Lentšu la Modimo la Boporofeta le Nea Kholofelo Bakeng sa Bokamoso

KA THUŠO ya Lentšu la Modimo, Beibele e Kgethwa, Bakriste ba kgonthe ba lebelela bokamoso ka tumelo le ka kholofelo. Ba šireletšegile tswalanong ya bona le Jehofa Modimo, ba lebeletše pele bokamosong. Bjalo ka ge polelo ya go bula Dikopanong tša Selete tša “Lentšu la Modimo la Boporofeta” e ile ya hlalosa, Dihlatse tša Jehofa e bile barutwana ba fišegago ba boporofeta bja Beibele ka nywaga e mentši. Ka gona, ke eng seo Jehofa a bego a se boloketše batho ba gagwe dikopanong tše? Ba swere Dibeibele ka diatleng tša bona, bohle bao ba bego ba le gona ba be ba fagahletše go kwa. Sehlogo sa letšatši le lengwe le le lengwe la kopano se beilwe e le sehlogwana se se ikemetšego.

LETŠATŠI LA PELE: Go Sepela Seetšeng sa Lentšu la Modimo

Polelo ye e rego, “Lentšu la Modimo le re Hlahlile” e ile ya hlalosa gore batho ba Jehofa ba swana le monna yo a thomago leeto la gagwe lefsifsing la bošego. Ge letšatši le hlaba, o bona meriti, eupša ge letšatši le tshela kgomo mokokotlo o bona gabotse kudu. Go etša ge go boletšwe e sa le pele go Diema 4:18, batho ba Jehofa ba ile ba bona tsela ya bona gabotse-botse ka tlase ga seetša sa letšatši seo se phadimago kudu sa therešo go tšwa lentšung la Modimo la boporofeta. Ga se ba tlogelwa bakeng sa go kgopša lefsifsing la moya.

Polelo ya thwadi yeo e bego e re, “Ela Hloko Lentšu la Modimo la Boporofeta,” e ile ya gopotša batheetši gore bao ba lebelelago go Jehofa ba šireletšegile go ka swabišwa le go nolega moko moo go bonwago ke batho bao ba latelago bo-mesia ba maaka le baporofeta ba maaka. Ka mo go fapanego kudu, bohlatse bja Mesia wa kgonthe, Jesu Kriste, ke bjo bogolo kudu! Ka mohlala, go fetošwa ga Jesu lebopo ka mohlolo go ile gwa nea seswantšho sa gagwe e le Kgoši e beilwego sedulong sa bogoši ya Mmušo wa Modimo. Ga e sa le a e-ba matleng a Mmušo ka 1914, Jesu gape ke “naledi ya mesô” yeo go bolelwago ka yona go 2 Petro 1:19. Seboledi se itše: “Ka ge e le Naledi ya Masa yeo e lego Mesia, o eta pele letšatši le lefsa goba mehla yeo e tšwelelago bakeng sa batho ka moka bao ba kwago.”

Bakeng sa go rola lenaneo la thapama, polelo ye e rego, “Go Bonega Bjalo ka Dietša” e ile ya hlalosa ka mo go nabilego Ba-Efeso 5:8, moo moapostola  Paulo a re eletšago gore re ‘sware tsela bo-ka bana ba seetša.’ Bakriste ke diediši, e sego feela ka go abelana le ba bangwe Lentšu la Modimo eupša gape le ka go diriša Beibele maphelong a bona ka go ekiša Jesu.

E le gore re be seetša sa mohuta woo, re swanetše go “Thabela go Bala Lentšu la Modimo.” Sehlogo se se ile sa nabišwa polelong ya tšhiedišano ya dikarolo tše tharo. Ka morago ga go tsopola Abraham Lincoln, yoo a ilego a bitša Beibele “mpho e phalago tšohle yeo Modimo a kilego a e nea batho,” seboledi sa pele se ile sa botšiša batheetši gore ke eng seo mekgwa ya bona ya go bala e se utollago mabapi le go tsenelela ga go leboga ga bona Lentšu la Jehofa. Batheeletši ba ile ba kgothaletšwa gore ba bale Beibele ka kelohloko, ba tšee nako bakeng sa go bona ka mahlo a kgopolo dipego tša Mangwalo le go tswalanya dintlha tše difsa le dilo tšeo ba šetšego ba ithutile tšona.

Karolo e latelago ya tšhiedišano e ile ya gatelela go nyakega ga thuto, e sego feela go fo bala, ge e ba re tla nweletša “dijô tše di tiilexo.” (Ba-Hebere 5:13, 14) Seboledi se itše thuto ke yeo e agago kudu-kudu ge e ba re ‘lokišetša dipelo tša rena’ e sa le pele, go etša ge moperisita wa mo-Isiraele Esera a ile a dira. (Esera 7:10) Eupša ke ka baka la’ng go ithuta go le bohlokwa gakaakaa? Ka lebaka la gore go na le tutuetšo e lebanyago tswalanong ya rena le Jehofa. Ka gona, thuto ya Beibele e swanetše go ba ya bohlokwa, e kgahlišago le yeo e lapološago gaešita le ge e akaretša go itaya monaganong le go dira boiteko. Re hwetša bjang nako ya thuto yeo e nago le morero? Seboledi sa mafelelo sa tšhiedišano se itše ke ka go ‘reka nako e botse’ dilong tšeo di sego bohlokwa kudu. (Ba-Efeso 5:16, bapiša le NW.) Ee, senotlelo sa go hwetša nako ke go šomiša gabotse nako yeo re nago le yona.

Polelo yeo e rego, “Modimo o Nea yo a Lapilego Matla” e ile ya bontšha go dumela gore batho ba bantši ba lapile mehleng yeno. E le gore re ka ba le “matla a fetišago a tlhago” bodireding bja Bokriste, go nyakega gore re ithekge ka Jehofa yoo ‘a neago yo a lapilego matla.’ (2 Ba-Korinthe 4:7, NW; Jesaya 40:29) Dithušo tše di matlafatšago di akaretša Lentšu la Modimo, thapelo, phuthego ya Bokriste, go tšea karolo ka mehla bodireding, balebeledi ba Bakriste le mohlala wa potego wa ba bangwe. Sehlogo se se rego: “E-bang Barutiši ka Baka la Nako” se ile sa gatelela go nyakega ga gore Bakriste e be barutiši gotee le baboledi le gore ba šome ka thata bakeng sa go aga “bokgoni bja go ruta.”​—2 Timotheo 4:2, NW.

Polelo ya go phetha ya letšatši yeo e rego, “Batho ba Lwago le Modimo ba ka se ke ba Fenya,” e ile ya bontšha ka maiteko ao a lebišitšwego gošele a dirilwego morago bjale dinageng tše dingwe bakeng sa go dira gore Dihlatse tša Jehofa di bitšwe sehlotswana se kotsi. Eupša ga se ra swanela go boifa ka gobane Jesaya 54:17 e re: “Marumô ka moka a rulêlwaxo xo lwa naxô’, a ka se kxône selô. Maleme ka moka a a Xo pharaxo O tlo a fenya thsekong. Ké byôna bohwa bya balata ba Morêna; ké tšôna di tl’o xo ba lokêla di e-tšwa xo Nna. O r’yalo Morêna.”

LETŠATŠI LA BOBEDI: Dilo Tšeo di Tsebaditšwego ka Mangwalo a Boporofeta

Ka morago ga poledišano ya temana ya Beibele ya letšatši, bao ba bego ba bokane ba ile ba thabela tšhiedišano ya bobedi ya kopano yeo e bego e e-na le sehlogo se se rego, “Go Tumiša Jehofa Bjalo ka Barwadi ba Seetša.” Polelo ya mathomo e ile  ya bontšha gore pakane ya Mokriste ke go tumiša Jehofa ka go bolela gohle. Karolo e latelago e ile ya bontšha go nyakega ga go lebiša batho bao ba arabelago mokgatlong wa Modimo. Bjang? Ka go tšea metsotso e mehlano goba e lesome pele goba ka morago ga thuto e nngwe le e nngwe ya legae ya Beibele bakeng sa go bontšha kamoo mokgatlo wa Modimo o šomago ka gona. Polelo ya boraro ya tšhiedišano ye e ile ya gatelela go nyakega ga go tumiša Modimo ka mediro e mebotse.

Polelo e rego, “Rata Dikgopotšo tša Jehofa ka go Fetišiša” e ile ya akaretša ditemana tše di kgethilwego go Psalme 119. Ka kgonthe, re nyaka dikgopotšo ka gobane ka moka ga rena re sekametše go lebaleng. Ka gona, ke gabohlokwa gakaakang gore re age lerato la go rata dikgopotšo tša Jehofa, bjalo ka ge mopsalme a dirile!

Ka morago ga moo go ile gwa latela taba e kgahlišago ka mo go kgethegilego​—polelo ya kolobetšo yeo e bego e e-na le sehlogo seo se rego, “Go kwa Lentšu la Boporofeta go Lebiša Kolobetšong.” Bao ba bego ba e-ya kolobetšong ba ile ba gopotšwa gore ba ekiša Kriste e sego feela ka go fo kolobetšwa eupša gape le ka go latela dikgato tša gagwe kgaufsi-ufsi. (1 Petro 2:21) A tokelo e kgolo gakaakang yeo ba bafsa ba ba nago le yona ya go ba le karolo go phethagatšeng Johane 10:16, moo Jesu a ilego a bolela e sa le pele gore o tla kgoboketša “dinku tše dingwê” bakeng sa go hlankela gotee le barutiwa ba gagwe ba tloditšwego ka moya!

Ge go thongwa lenaneo la thapama, polelo e rego, “E-kwa Seo Moya o se Bolelago,” e ile ya hlalosa gore moya wa Jehofa o bolela le rena ka Beibele, “molaki e a bôtêxaxo yo bohlale” le ka matswalo a rena a tlwaeditšwego ka Beibele. (Mateo 24:45) Ka gona, ga go nyakege gore Bakriste ba kwe lentšu la kgonthe go tšwa legodimong e le gore ba tsebe kamoo ba ka kgahlišago Modimo ka gona. Poledišano e latelago e rego, “Go Emela Thuto e Dumelelanago le Boineelo go Modimo ka go Tia,” e ile ya kgothaletša Bakriste gore ba se ke ba fatolla dikgopolong tše di senyago tšeo di gašitšwego ke lefase le. Ka kgonthe, go rata go tseba mo go sa laolegego go ka re bontšha tsebišo e gobatšago yeo e bjetšwego ke bahlanogi le baemedi ba bangwe ba Sathane. Go kaone kudu gakaakang gore ka mehla re bale Beibele gotee le dihlogo ka moka tšeo di lego ka go Morokami le Phafoga!

Polelo e latelago e nago le sehlogo se se rego, “O Tšee ka Mohlala wa Mantšu ao a se Nago Senyalo” e ile ya gatelela bohlokwa bja go ba bao ba tlwaelanego kudu le “mohlala” wa Mangwalo goba thulaganyo ya therešo. (2 Timotheo 1:13) Go kwešiša mohlala wo ke senotlelo e sego feela sa go ba le boineelo go Modimo eupša le sa go hlaola dilo tšeo di sa dumelelanego le therešo.

Anke o nagane o lebelelwa ke Jehofa bjalo ka yo a rategago. A kgodišo e kaakang! E theilwe boporofeteng bja Hagai, polelo e rego, “‘Matsaka’ a Tlatša Ntlo ya Jehofa” e be e le yeo e kgothatšago kudu ka gobane e ile ya kgonthišetša batheetši gore setho se sengwe le se sengwe sa “lešaba le lexolo” ke seo se rategago go Jehofa. (Kutollo 7:9) Ka baka leo, Jehofa o tla ba boloka ge a “šišinya” la mafelelo ditšhaba nakong ya ‘masetlapelo a magolo’ a tlago. (Hagai 2:7, 21, 22; Mateo 24:21) Lega go le bjalo, ge go sa letilwe, batho ba Jehofa ba swanetše go dula ba phafogile moyeng bjalo ka ge go ile gwa hlaloswa karolong ye e rego, “Mangwalo a Boporofeta a re Lemoša Gore re Phakgame.” Seboledi se ile sa tsopola mantšu a Jesu a rego: “Ké xôna phakxamang, xobane nakô ya xo tla xa Morêna wa lena xa Le e tsebe.” (Mateo 24:42) Ke bjang re ka dulago re phakgame moyeng? Ka go dula re swaregile tirelong ya Jehofa, go rapela ka go se kgaotše le go dula re letetše letšatši le legolo la Jehofa.

Polelo ya go phetha ya letšatši e be e e-na le sehlogo se se rego, “Lentšu la Boporofeta Mehleng ya Bofelo.” E tla gopolwa nywageng e mentši e tlago. Ka baka la’ng? Ka gobane seboledi se ile sa tsebiša ka go lokollwa ga puku e mpsha​—Ela Hloko Boporofeta bja Daniele! Seboledi se itše: “Puku ye e nago le diswantšho tše botse ya matlakala a 320 e akaretša karolo e nngwe le e nngwe ya puku ya Daniele.” A bohlatse bjo bo tiišago tumelo gakaakang bja gore Jehofa o ediša seetša Lentšung la gagwe la boporofeta!

LETŠATŠI LA BORARO: Lentšu la Modimo la Boporofeta ga le Palelwe le ka Mohla

Letšatši la mafelelo la kopano le ile la thoma ka tšhiedišano ya sehlogo se se rego, “Mantšu a Boporofeta Bakeng sa Nako e Beilwego.” Dikarolo tše tše tharo di ile tša ahla-ahla ditsebišo tše tharo tša moporofeta Habakuku mabapi le dikahlolo tša Jehofa tša phedišo. Ya pele e be e le malebana le Juda  yeo e tšwilego tseleng gomme ya bobedi e le malebana le Babele e gatelelago. Ya mafelelo yeo e sa tlogo phethagala e šoma tshenyegong yeo e batamelago ya batho ka moka ba kgopo. Ngwanabo rena wa mafelelo tšhiedišanong ge a bolela mabapi le Haramagedone o ile a hlohleletša tekanyo e kgolo ya go boifa Modimo go batheetši ba gagwe ge a be a re: “Ka kgonthe, e tla ba mo go boifišago kudu ge Jehofa a lokolla matla a feletšego a matla a gagwe a magolo.”

“Go Leboga Bohwa bja Rena bja Moya” e be e le sehlogo sa papadi ya Beibele e tutuetšago ya kopano. Tiragatšo ye yeo e fatollago e ile ya bontšha phapano magareng ga boemo bja kgopolo bja Jakobo le bja Esau mabapi le dilo tša moya. Esau o ile a nyatša bohwa bja gagwe bja moya mo e lego gore bo ile bja newa Jakobo, yoo a ilego a bo lebelela e le bja bohlokwa. Batla-kopanong ba ile ba botšišwa gore: ‘Ke [bohwa bofe bja moya] bjoo Jehofa a re neilego bjona?’ Seboledi se ile sa araba ka gore: “Ke therešo ya Lentšu la gagwe, Beibele; kholofelo ya bophelo bjo bo sa felego; le kgodišo ya go mo emela bjalo ka bagoeledi ba ditaba tše di lokilego.”

Karolo e latelago e be e e-na le sehlogo seo se rego: “Bohwa bja Rena bjo Bohlokwa bo Bolela Eng go Wena?” Re bontšha boemo bjo bo nepagetšego bja kgopolo mabapi le bohwa bja rena bja moya ka go bea tirelo ya Jehofa le ditokelo tša moya pele ga dikgahlego tša motho ka noši goba tša dilo tše di bonagalago. Ka tsela ye re aga maphelo a rena tswalanong ya rena le Jehofa, ka go fapana ka mo go feletšego le Adama, Esau le ba-Isiraele bao ba sa botegego.

Polelo ya phatlalatša yeo e bego e re, “Go Dira Dilo ka Moka tše Mpsha​—Bjalo ka ge go Boletšwe e sa le Pele,” e ile ya kgokaganya gotee diporofeto tše nne tša motheo mabapi le “maxodimo a mafsa” le “lefase le lefsa.” (Jesaya 65:17-25; 66:22-24; 2 Petro 3:13; Kutollo 21:1, 3-5) Ka kgonthe, Jehofa o be a naganne ka phethagalo e kgolwanyane ya diporofeto go e na le yeo e ilego ya ba gona godimo ga batho ba gagwe ba tsošološitšwego ka 537 B.C.E. Ee, o be a naganne ka pušo ya Mmušo wa gagwe (“maxodimo a mafsa”) le balata ba wona ba lefaseng (“lefase le lefsa”), bao ba tla dulago paradeiseng ya letago ya lefase ka moka.

Bakeng sa go fihliša kopano seremong seo se thabišago le seo se tutuetšago, go ile gwa phethwa ka polelo e rego, “Ditebelelo tša Rena ge Lentšu la Modimo le Dutše le re Hlahla.” E ile ya gopotša bohle gore “lebaka ké la pitlaxanô” bakeng sa go fetša modiro wa go tsebatša Mmušo. (1 Ba-Korinthe 7:29) Ee, re eme serepuding sa phethagatšo ya kahlolo ya Jehofa malebana le Sathane le tshepedišo ya gagwe ka moka e kgopo ya dilo. Eka maikwelo a rena a ka swana le a mopsalme yoo a ilego a opela ka gore: “Dipelo tša rena di leta Morêna; Mohlakodiši le kôtsê ya rena ké Yêna.” (Psalme 33:20) A tebelelo e kgahlišago gakaakang yeo e letšego ka pele bakeng sa bao ditebelelo tša bona di theilwego lentšung la Modimo la boporofeta!

[Seswantšho go letlakala 7]

Papadi e tutuetšago e ile ya godiša tebogo bakeng sa bohwa bja moya bja bahlanka ba Jehofa

[Seswantšho go letlakala 7]

Ba bantši bao ba ilego ba kwa lentšu la Modimo la boporofeta ba ile ba kolobetšwa