“Matsaka” a Tlatša Ntlo ya Jehofa

“Le dithšaba ka moka [Jehofa o] tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.”​—HAGAI 2:7.

1. Ke ka baka la’ng re nagana pele ka baratiwa ba rena nakong ya boemo bja tšhoganetšo?

KE MATSAKA afe ao a tletšego ka ntlong ya gago? Na o na le fenitšhara ya mabonwa, computer ya tšweletšo ya sebjale-bjale le koloi e mpsha ka karatšheng ya gago? Gaešita le ge o e-na le dilo tše ka moka, na o be o ka se ke wa dumela gore dilo tša bohlokwa-hlokwa legaeng la gago ke batho​—ditho tša lapa la gago? Akanya bošegong bjo bongwe o tsošwa ke monkgo wa muši. Ntlo ya gago e a fsa, gomme o šaletšwe ke metsotso feela gore o phonyokge! Selo sa pele seo o tshwenyegago ka sona ke sefe? Na ke fenitšhara ya gago? Na ke computer ya gago? Na ke koloi ya gago? Go e na le moo, na o be o ka se ke wa nagana ka baratiwa ba gago? Ruri o be o tla nagana ka bona ka gobane batho ba bohlokwa kudu go fetiša dilo.

2. Tekanyo ya bogolo bja tlholo ya Jehofa e kaaka’ng, gomme ke karolo efe ya yona yeo e bego e kgahla Jesu kudu?

² Bjale nagana ka Jehofa Modimo le Morwa wa gagwe, Jesu Kriste. Jehofa ke yena a “hlodilexo lexodimo le lefase le lewatlê, le tšohle di lexo mo xo ôna.” (Ditiro 4:24) Morwa wa gagwe, “mošomi yo a nago le bokgoni,” e bile moemedi yoo ka yena Jehofa a dirilego dilo tše dingwe ka moka. (Diema 8:30, 31, NW; Johane 1:3; Ba-Kolose 1:15-17) Ka kgonthe bobedi Jehofa le Jesu ba lebelela tšohle tšeo di hlodilwego e le tša bohlokwa kudu. (Bapiša le Genesi 1:31.) Eupša ke karolo efe ya tlholo yeo o naganago gore ke ya bohlokwa kudu go bona​—na ke dilo goba batho? Karolong yeo e kgathwago ke bohlale bjo bo mothofaditšwego, Jesu o re: “Kè [be ke] kxahlwa ke bana ba batho,” goba bjalo ka ge phetolelo ya William F. Beck e e bea, Jesu o be a “kgahlišwa ke batho.”

3. Ke boporofeta bofe bjo Jehofa a ilego a bo bolela ka Hagai?

³ Ga go na pelaelo gore Jehofa o lebelela batho e le ba bohlokwa-hlokwa. Pontšho e nngwe ya se e hwetšwa mantšung a boporofeta ao a a boletšego ngwageng wa 520 B.C.E. ka moporofeta wa gagwe Hagai. Jehofa o itše: “Le dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô. . . . Letaxô la Ntlo yé e tlo ba le lexolo, le le fetišaxo lela la ya kxalê.”​—Hagai 2:7, 9.

4, 5. (a) Ke ka baka la’ng e ka se be mo go kwalago go phetha ka gore lentšu “matsaka” le šupa letagong la dilo tše di bonagalago? (b) O ka hlalosa bjang “matsaka,” gomme ka baka la’ng?

⁴ Ke “matsaka” afe ao a bego a tla tlatša ntlo ya Jehofa gomme a tliše letago leo le sa kago la ba  gona pele? Na ke dithoto tša mabonwa le mekgabišo e feteletšego? Na ke gauta, silifera le mabje a bohlokwa? Se se be se ka se bonagale se e-na le tlhaologanyo le gatee. Gopola gore tempele ya pele, yeo e kgakotšwego nywaga-kgolo e ka bago e mehlano pejana, e be e le moago o agilwego ka diranta tše dimilione-milione! * Ruri, Jehofa o be a ka se ke a lebelela gore tempele yeo e agilwego ke sehlopha se se senyenyane sa ba-Juda bao ba bego ba bušeditšwe nageng ya gabo bona e fete tempele ya Salomo ka letago la dilo tše di bonagalago!

⁵ Ka gona, “matsaka” ao a bego a tla tlatša ntlo ya Jehofa ke afe? Go molaleng gore e swanetše go ba e le batho. Go ba gona, seo se thabišago pelo ya Jehofa ga se silifera le gauta eupša ke batho bao ba mo hlankelago ka lerato. (Diema 27:11; 1 Ba-Korinthe 10:26) Ee, Jehofa o lebelela banna ka moka, basadi le bana bao ba mo rapela ka tsela e amogelegago e le ba bohlokwa kudu. (Johane 4:23, 24) Ba ke “matsaka,” gomme ba bohlokwa kudu go Jehofa go feta dilo ka moka tše dibotse tše di bego di kgabišitše tempele ya Salomo.

6. Tempele ya Modimo ya bogologolo e be e phetha morero ofe?

⁶ Go sa šetšwe kganetšo yeo e sa kgaotšego, tempele e ile ya fela go agwa ka 515 B.C.E. Go fihlela nakong ya ge Jesu a dira sehlabelo, tempele ya Jerusalema e be e dutše e le lefelo la borapedi bjo bo sekilego bakeng sa “matsaka” a mantši, ao a akaretšago ba-Juda ba tlhago le basokologi ba ba-Ntle. Eupša tempele e be e emela selo se sengwe se segolwanyane, bjalo ka ge re tla bona.

Phethagalo ya Lekgolong la Pele la Nywaga

7. (a) Tempele ya Modimo ya bogologolo kua Jerusalema e be e swantšhetša’ng? (b) Hlalosa ditiro tša moperisita yo mogolo ka Letšatši la Poelano.

⁷ Tempele ya Jerusalema e be e swantšhetša thulaganyo e kgolwanyane ya borapedi. Ke tempele ya Modimo ya moya yeo Jehofa a e hlomilego ka 29 C.E., Jesu e le Moperisita yo Mogolo wa yona. (Ba-Hebere 5:4-10; 9:11, 12) Ela hloko go swana magareng ga mediro ya moperisita yo mogolo wa Isiraele le ditiro tša Jesu. Ngwageng o mongwe le o mongwe Letšatšing la Poelano, moperisita yo mogolo o be a e-ya aletareng ka lapeng la tempele gomme a neela pholo bakeng sa go fediša dibe tša baperisita. Ka morago, o be a tsena ka tempeleng ka madi a pholo, a feta mabating ao a bego a aroganya lapa le Sekgethwa ke moka a tsena ka seširong se se bego se aroganya Sekgethwa go Sekgethwa-kgethwa. Ge a šetše a tsene ka Sekgethwa-kgethweng, moperisita yo mogolo o be a šašetša madi ka pele ga areka ya kgwerano. Ke moka, a latela mogato o swanago, o be a neela phooko bakeng sa go fediša dibe tša meloko e 12 yeo e sego ya boperisita ya Isiraele. (Lefitiko 16:5-15) Monyanya wo o tswalana bjang le tempele ya Modimo ya moya?

8. (a) Ke ka kgopolo efe Jesu a ilego a neelwa mathomong a 29 C.E.? (b) Ke tswalano efe e kgethegilego yeo Jesu a ilego a e thabela le Jehofa bophelong ka moka bja bodiredi bja gagwe lefaseng?

⁸ Ge e le gabotse, Jesu o ile a neelwa aletareng ya thato ya Modimo ge a be a kolobetšwa gomme a tlotšwa ka moya o mokgethwa wa Modimo ka 29 C.E. (Luka 3:21, 22) Ka kgonthe, tiragalo ye e be e swaya mathomo a tsela ya bophelo bja boikgafo bja Jesu yeo e ilego ya tšea lebaka la nywaga e meraro le seripa. (Ba-Hebere 10:5-10) Lebakeng leo, Jesu o be a thabela tswalano yeo e tloditšwego ka moya le Modimo. Batho ba bangwe ba be ba sa kgone go kwešiša ka mo go feletšego boemo bjo bja moswana-noši bjo Jesu a bilego le bjona le Tatagwe wa legodimong. Go be go le bjalo ka ge eka mahlo a bona a kwešišo a apešitšwe ke seširo, go fo swana le ge seširo se be se širile Sekgethwa gore se se bonwe ke bao ba bego ba le ka lapeng la tabarenakele.​—Ekisodo 40:28.

9. Ke ka baka la’ng Jesu a se a ka a kgona go tsena legodimong e le motho, gomme boemo bjo bo ile bja rarollwa bjang?

⁹ Go sa šetšwe go ba ga gagwe Morwa wa Modimo yo a tloditšwego ka moya, Jesu yo e lego motho o be a sa kgone go ba bophelong bja legodimong. Ke ka baka la’ng go be go sa kgonege? Ka gobane nama le madi ga di kgone go hwetša bohwa Mmušong wa Modimo wa legodimong.  (1 Ba-Korinthe 15:44, 50) Ka ge nama ya Jesu ge e le motho e be e le lepheko, e be e swantšhetšwa gabotse ke seširo seo se bego se aroganya Sekgethwa go Sekgethwa-kgethwa tempeleng ya Modimo ya bogologolo. (Ba-Hebere 10:20) Eupša ka morago ga matšatši a mararo a lehu la gagwe, Jesu o ile a tsošwa ke Modimo e le moya. (1 Petro 3:18) Ka nako yeo o be a ka kgona go tsena phapošing ya Sekgethwa-kgethwa ya tempele ya Modimo ya moya​—legodimo ka bolona. Gomme se ke sona se se diregilego. Paulo o ngwala gore: “Xe e le Kriste xa a ka a tsêna Sekxethweng se se axilwexo ka diatla ya ba seswanthšô sa Sekxêthwa sa makxonthe. Yêna ó tsene xôna-kwa maxodimong, ’me byale ó bônala pele xa sefahloxô sa Modimo ka ’baka la rena.”​—Ba-Hebere 9:24.

10. Jesu o ile a dira eng ge a se no boela legodimong?

¹⁰ Legodimong, Jesu o ile a ‘šašetša madi’ a sehlabelo sa gagwe ka go tliša mohola wa topollo wa madi a gagwe a bophelo go Jehofa. Le gona, Jesu o dirile mo gontši. Pejana ga lehu la gagwe, o ile a botša balatedi ba gagwe gore: “Ke ya go le lokišetša sebaka. Gomme ge ke ile gomme ke le lokišeditše sebaka, ke tlo buša ke e tla, gomme ke tlo le tšeela go nna, gore mo ke lego gona, le lena le be gona.” (Johane 14:2, 3, PK) Ka gona ka go tsena Sekgethwa-kgethweng goba legodimong, Jesu o ile a bulela ba bangwe tsela gore ba latele. (Ba-Hebere 6:19, 20) Batho ba, bao ba bego ba tla ba 144 000, ba be ba tla hlankela e le baperisita ba ka tlasana thulaganyong ya tempele ya Modimo ya moya. (Kutollo 7:4; 14:1; 20:6) Go fo swana le ge moperisita yo mogolo wa Isiraele a be a thoma ka go tsena le madi a pholo ka Sekgethwa-kgethweng bakeng sa go fediša dibe tša baperisita, mohola wa madi a Jesu a tšholotšwego a ile a šoma pele go baperisita ba ba ka tlasana ba 144 000. *

“Matsaka” a Mehleng Yeno

11. Moperisita yo mogolo wa Isiraele o be a neela phooko bakeng sa bomang, gomme se se be se swantšhetša’ng?

¹¹ Go bonagala eka ka ngwaga wa 1935, kgoboketšo-kakaretšo ya batlotšwa e be e feletše. * Eupša Jehofa o be a se a fetša go tagafatša ntlo ya gagwe. Aowa, “matsaka” a be a sa dutše a tla tsena ka go yona. Gopola gore moperisita yo mogolo Isiraeleng o be a neela diphoofolo tše pedi​—pholo bakeng sa dibe tša baperisita le phooko bakeng sa dibe tša merafo yeo e sego ya boperisita. Ka ge baperisita ba be ba swantšhetša batlotšwa bao ba bego ba tla ba le Jesu Mmušong wa legodimong, ditšhaba tšeo e sego tša baperisita di be di swantšhetša bomang? Karabo e hwetšwa mantšung a Jesu ao a ngwadilwego go Johane 10:16: “Ke sa na le dinku tše dingwê tše e sexo tša lešaka lé. Le tšôna ke swanetše xo di xapa; ’me di tlo kwa lentšu la-ka, ya tlo ba mohlape o tee le modiši o  tee.” Ka gona, madi a Jesu ao a tšholotšwego a hola dihlopha tše pedi tša batho​—sa pele ke Bakriste bao kholofelo ya bona e lego go buša le Jesu legodimong gomme sa bobedi, ke bao ba lebeletšego pele bophelong bjo bo sa felego lefaseng la paradeise. Go molaleng gore sehlopha se sa bobedi ke sona seo se swantšhetšwago ke “matsaka” a boporofeta bja Hagai.​—Mika 4:1, 2; 1 Johane 2:1, 2.

12. “Matsaka” a mantši a gogelwa bjang ntlong ya Modimo lehono?

¹² “Matsaka” a a sa dutše a tlatša ntlo ya Jehofa. Nywageng ya morago bjale, go ile gwa tlošwa dithibelo Yuropa Bohlabela, dikarolong tša Afrika le dinageng tše dingwe, e lego seo se ilego sa nea sebaka bakeng sa gore ditaba tše di lokilego tša Mmušo wa Modimo o hlomilwego di nabele mašemong ao go fihla mo nakong ye a sa kago a kgongwa. Ge matsaka a dutše a tsena thulaganyong ya tempele ya Modimo, le ona a katanela go dira barutiwa ba oketšegilego e le ge a e-kwa taelo ya Jesu. (Mateo 28:19, 20) Ge a dutše a dira bjalo, a gahlana le batho ba bantši, bobedi ba banyenyane le ba bagolo, bao ba nago le tshekamelo ya go ka ba “matsaka” ao a tlago go tagafatša ntlo ya Jehofa. Ela hloko mehlala e sego kae feela ya kamoo se se diregago ka gona.

13. Ngwanenyana yo monyenyane wa Bolivia o ile a bontšha bjang phišego ya gagwe bakeng sa go phatlalatša molaetša wa Mmušo?

¹³ Kua Bolivia, ngwanenyana wa nywaga e mehlano yo a godišwago ke batswadi ba Dihlatse o ile a kgopela tumelelo go morutiši wa gagwe ya gore a se be gona sekolong bekeng ya ketelo ya molebeledi wa tikologo. Ka baka la’ng? O be a nyaka go tšea karolo bekeng ye ka moka e kgethegilego ya modiro. Se se ile sa makatša batswadi ba gagwe, eupša ba be ba thabetše gore o na le boemo bja kgopolo bjo bobotse gakaalo. Ngwanenyana yo monyenyane gona bjale o swara dithuto tše hlano tša legae tša Beibele, gomme ba bangwe ba barutwana ba ba kopanela dibokeng tša Bokriste. O ile a ba a ya le morutiši wa gagwe Holong ya Mmušo. Mohlomongwe ge nako  e dutše e e-ya, ba bangwe ba barutwana ba gagwe ba Beibele ba tla ipontšha e le “matsaka” ao a tlago go tagafatša ntlo ya Jehofa.

14. Kua Korea, go phegelela ga kgaetšedi motho yo a bego a bonagala a sa thabele go ile gwa putswa bjang?

¹⁴ Ge a be a letile seteišeneng sa setimela, mosadi wa Mokriste wa Korea o ile a batamela morutwana yo a bego a theeditše mmino ka di-headphone. Mosadi o ile a botšiša gore: “Na o na le bodumedi?” Morutwana o ile a araba ka gore: “Ga ke na kgahlego bodumeding le ge e le bofe.” Kgaetšedi ga se a ka a langwa. O ile a tšwela pele ka gore: “Ge nako e dutše e e-ya, mo gongwe motho a ka rata go ikgethela bodumedi. Eupša ge a sa tsebe selo ka bodumedi, a ka kgetha bjo bo fošagetšego.” Ponagalo ya morutwana e ile a fetoga, gomme a thoma go theetša kgaetšedi ya rena ka kgahlego. O ile a mo nea puku e rego, Is There a Creator Who Cares About You? gomme a mmotša gore puku ye e be e tla ba thušo e kgolo ge go fihlile nako ya gore a kgethe bodumedi. O ile a amogela puku gatee-tee. Bekeng e latelago, o ile a thoma go ithuta Beibele le Dihlatse tša Jehofa gomme gona bjale o kopanela dibokeng ka moka tša phuthego.

15. Ngwanenyana yo mongwe yo monyenyane kua Japane o thoma bjang dithuto tša Beibele, gomme maiteko a gagwe a ile a putswa bjang?

¹⁵ Kua Japane, Megumi wa nywaga e 12 o lebelela sekolo seo a tsenago go sona e le tšhemo e humilego bakeng sa go bolela le go ruta. O kgonne gape le go thoma dithuto tše dintši tša Beibele. Megumi o dira se bjang? Ka ge a bala Beibele goba a lokišeletša diboka nakong ya go khutša ya letena, gantši bao a tsenago le bona ka klaseng ba mmotšiša gore o dira eng. Ba bangwe ba botšiša Megumi lebaka leo ka lona a sa tšeego karolo medirong e itšego ya sekolo. Megumi o araba dipotšišo tša bona ke moka a ba botša gore Modimo o na le leina. Se gantši se tsoša kgahlego ya batheetši ba gagwe. Ge a fetša o ithapela go ba swarela thuto ya Beibele. Megumi gona bjale o swara dithuto tše 20​—tše 18 tša tšona o di swara le bao a tsenago le bona ka klaseng.

16. Ngwanabo rena kua Cameroon o ile a kgona bjang go thoma dithuto tša Beibele le ba bangwe gare ga sehlopha sa bakweri?

¹⁶ Kua Cameroon, sehlopha sa banna ba seswai bao ba šomago lefelong la modiro ba ile ba goeletša ngwanabo rena yo a bego a nea bafeti ba tsela dipuku tša Beibele. Ba nyaka go tlo kwera ngwanabo rena, ba ile ba mmotšiša lebaka leo ka lona a bego a sa dumele thuto ya Boraro botee, mollo wa dihele goba go se hwe ga moya. Ngwanabo rena o ile a araba dipotšišo tša bona a diriša Beibele. E le mafelelo a seo, ba bararo ba banna bao ba ile ba amogela dithuto tša Beibele. Yo mongwe wa bona, e lego Daniel, o ile a thoma go kopanela dibokeng gomme a ba a senya dilo ka moka tšeo a bego a e-na le tšona tšeo di kgokaganago le bonoge. (Kutollo 21:8) O ile a kolobetšwa lebakeng la ka tlase ga ngwaga.

17. Banababo rena ba bangwe ba El Salvador ba ile ba diriša bjang bohlale bjo bo itšego go bolela le monna yo mathomong a bego a sa nyake go kwa molaetša wa Mmušo?

¹⁷ Kua El Salvador, monna yo mongwe o be a bofelela mpša ya gagwe e bogale ka pele ga lebati nako le nako ge a be a bona Dihlatse tša Jehofa di le mo kgaufsi. Monna o be a leta Dihlatse gore di fetele pele ke moka a bušetše mpša ka ntlong. Banababo rena ba be ba sa kgone go bolela le yena le ka mohla. Ka gona ka letšatši le lengwe ba ile ba rera go diriša mokgwa o fapanego. Ka go tseba gore monna yoo o be a tla kwa seo ba se bolelago, ba ile ba phetha ka gore ba bolele le mpša. Ba ile ba ya ntlong, ba dumediša mpša gomme ba bolela kamoo ba bego ba thabile ka  gona go hwetša sebaka sa go boledišana le yona. Ba ile ba bolela mabapi le nako yeo ka yona go tlago go ba le paradeise mo lefaseng, nakong yeo go ka se bego le yo a befetšwego​—ee, nakong yeo ka yona le diphoofolo di tlago go ba le khutšo. Ka morago ba ile ba šadiša mpša ka botho gomme ba wela tseleng. Seo se ilego sa ba makatša kudu ke gore monna o ile a tšwa ka ntlong ya gagwe gomme a kgopela tshwarelo bakeng sa ge a se a ka a nea Dihlatse sebaka sa go boledišana le yena. O ile a amogela dimakasine gomme gwa thongwa thuto ya Beibele. Monna yo gona bjale ke ngwanabo rena​—yo mongwe wa “matsaka”!

“Se Boifeng!”

18. Bakriste ba bantši ba lebeletšane le ditlhohlo dife, eupša Jehofa o lebelela barapedi ba gagwe bjang?

¹⁸ Na o tšea karolo modirong o bohlokwa wa go bolela ka Mmušo le wa go dira barutiwa? Ge e ba go le bjalo, o tloga o na le tokelo. Ka kgonthe, ke ka modiro wo “matsaka” a gogelwago ke Jehofa ka ntlong ya gagwe. (Johane 6:44) Ke therešo gore ka dinako tše dingwe o ikwa o lapile goba o nolegile moko. Ka dinako tše dingwe, ba bangwe​—gaešita le gare ga bahlanka ba botegago ba Jehofa​—ba katana le maikwelo a go ikwa ba se na mohola. Eupša tia matla! Jehofa o lebelela yo mongwe le yo mongwe wa barapedi ba gagwe e le yo a kgahlišago, gomme o tloga a kgahlegela gore o phologe.​—2 Petro 3:9.

19. Ke kgothatšo efe yeo Jehofa a e neilego ka Hagai, gomme mantšu a e ka ba bjang mothopo wa matla go rena?

¹⁹ Ge re ikwa re nolegile moko, e ka ba e le ka baka la kganetšo goba ka baka la maemo a mangwe a sa kgahlišego, mantšu ao Jehofa a a boditšego ba-Juda bao ba bušeditšwego nageng ya gabo bona e ka ba mothopo wa matla. Go Hagai 2:4-6, re bala gore: “Byale wene Serubabele, tia matla!​—Ó r’yalo Morêna.​—Le wene Jošua morwa wa Jotsadaka moperisita e moxolo, tia matla! Le lena sethšaba ka moka sa naxa, tiang matla! Dirang xobane ke na le lena.​—Ó r’yalo Morêna wa mašaba. Lentšu lela le ke le tlemilexo le lena mola Lè e-tšwa Egipita, le sa tiile; le Môya wa-ka o mo xo lena. Se boifeng! Ka xobane Morêna wa mašaba ó re: Xo sa šetše lebakanyana, ké mo ke tl’o xo šišinya lexodimo le lefase, le lewatlê le naxa.” Ela hloko gore Jehofa ga a re kgothaletše feela gore re tie matla eupša gape o re nea mokgwa wa gore re hwetše matla. Bjang? Ela hloko mantšu ao a kgonthišetšo: “Ke na le lena.” Ke mo go matlafatšago tumelong gakaakang go lemoga gore go sa šetšwe mapheko ao re lebeletšanego le ona, Jehofa o na le rena!​—Ba-Roma 8:31.

20. Letago leo le sa kago la ba gona pele le tlatša ntlo ya Jehofa ka tsela efe mo nakong ye?

²⁰ Jehofa ruri o ipontšhitše gore o na le batho ba gagwe. Ka kgonthe, go bjalo feela ka ge a boletše ka moporofeta Hagai gore: “Letaxô la Ntlo yé e tlo ba le lexolo, le le fetišaxo lela la ya kxalê. . . . ’Me felô fa ke tlo bea khutšô.” (Hagai 2:9) Ke therešo gore lehono letago le legolo le hwetšwa tempeleng ya Jehofa ya moya. Ka gona, makgolo a dikete a kgeregela borapeding bja therešo ngwaga o mongwe le o mongwe. Ba ba fepša gabotse moyeng, gaešita le lefaseng le leo le dubegilego, ba thabela khutšo yeo e tlago go fetišwa ke feela yeo e tlago go thabelwa lefaseng le lefsa la Modimo.​—Jesaya 9:5, 6; Luka 12:42.

21. Re swanetše go ikemišetša go dira’ng?

²¹ Go šišinya ga Jehofa ditšhaba ka Haramagedone go letše pejana. (Kutollo 16:14, 16) Ka gona a re dirišetšeng nako e šetšego go thuša ka go phološa maphelo a mangwe a mantši. Eka re ka tia matla gomme ra bota Jehofa ka mo go feletšego. Anke re ikemišetšeng go tšwela pele re rapela tempeleng ya gagwe e kgolo ya moya, re e tlatše ka “matsaka” a oketšegilego go fihlela ge Jehofa a bolela gore mošomo wa rena o phethilwe.

[Mengwalo ya ka tlase]

Na o a Gopola?

• Ke eng seo e lego sa bohlokwa kudu go Jehofa go fetiša dilo tše di bonagalago?

• Ke dihlopha dife tše pedi tša batho tšeo di holwago ke madi a Jesu a tšholotšwego?

• “Matsaka” ao a bego a tla tlatša ntlo ya Jehofa ka letago ke bomang?

• Ke bohlatse bofe bjo re nago le bjona bja gore boporofeta bja Hagai bo a phethagala lehono?

[Dipotšišo tša Thuto]

[Seswantšho go letlakala 16]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Na o tseba seo se bolelwago ka tsela ya seswantšhetšo ke tempele ya Jehofa ya bogologolo?

Sekgethwa-kgethwa

Seširo

Sekgethwa

Mathudi

Aletare

Lapa

[Seswantšho go letlakala 17]

Moperisita yo mogolo o be a neela pholo bakeng sa dibe tša baperisita le phooko bakeng sa dibe tša meloko yeo e sego ya boperisita ya ba-Isiraele

[Seswantšho go letlakala 18]

Modiro wa lefase ka bophara wa go bolela ka Mmušo o gogela mašaba ntlong ya Jehofa