Motlaiši o Bona Seetša se Segolo

SAULO o be a bela ka kgalefo go balatedi ba Jesu. A se a kgotsofala ka tlaišo yeo ba bego ba šetše ba tlaišitšwe ka yona Jerusalema, go akaretša le go thungwa ga Stefano ka mafsika, ga bjale o be a tsoma go katološa thibelo. “Xe e le Saulo ó be a sa fêla à xalefile, à rata xo thšošetša le xo bolaya barutiwa ba Morêna. A ya xo moperisita e moxolo. A mo kxopêla a fiwa mangwalô a xo ya diphuthexong tša Damaseko xore xe a ka hwetša ba bangwê ba e lexo ba thutô yé, xoba banna, xoba basadi, a ba tlêmê a ba tlišê Jerusalêma.”​—Ditiro 9:1, 2. 

Ge Saulo a dutše a sepela a lebile Damaseko, o swanetše go ba a be a nagana gore ke ka tsela efe a bego a tla phetha taelo ya gagwe ka mo go atlegilego. Matla a taolo ao a bego a a neilwe ke moperisita yo mogolo ka ntle le pelaelo a be a tla šireletša tirišano yeo e tšwago go baetapele ba setšhaba se segolo sa ba-Juda motseng woo. Saulo o be a tla nyaka thušo ya bona.

Lethabo la Saulo le swanetše go ba le ile la ba le legolo ge a be a le kgaufsi le go fihla mo a yago gona. Leeto la go tloga Jerusalema go ya Damaseko​—mosepelo wa matšatši a šupa goba a seswai wa dikhilomithara tše ka bago 220—​e be e le o lapišago. Gatee-tee mo e ka bago mosegareng wa sekgalela, seetša seo se fetago sa letšatši se ile sa gadimela Saulo ka gohle, gomme a wela fase. O ile a kwa lentšu le bolela le yena ka Sehebere le re: “Saulo! Saulo! O nthlomaretše’ng? . . . Xo raxa seotledi go tlo Xo thatafalêla.” Saulo o ile a botšiša a re: “Ké Wene mang?” Phetolo ya re: “Ké Nna Jesu yo O mo hlomerexo. Fêla, tsoxa O êmê ka dinaô; xobane ke Xo bônaxaletše xore ke Xo dirê mohlanka, ke Xo dirê hlatse ya tše O di bonexo le ya tše ke sa tl’o xo ipônatša xo wene ka tšona. Ke tlo Xo hlakodiša diatleng tša sethšaba sé, le diatleng tša ba-ntlê, ba ke tl’o xo Xo roma wa ya xo bôná.” Saulo o ile a botšiša gore: “Morêna! O rata xe nka dira’ng? . . . Tsoxa O yê Damaseko; xôna-fao O tlo botšwa se O laetšwexo xo se dira.”​—Ditiro 9:3-6; 22:6-10; 26:13-17.

 Bao ba bego ba sepela le Saulo ba ile ba kwa lentšu, eupša ga se ba ka ba bona seboledi goba go kwešiša seo a se boletšego. Ka baka la phadimo ya seetša, ge Saulo a tsoga o be a foufetše gomme a swanelwa ke gore a hlahlwe ka seatla. “A hlwa matšatši a mararo à sa bone, à sa je, à sa nwe.”​—Ditiro 9:7-9; 22:11.

Matšatši a Mararo a go Naganišiša

Saulo o ile a amogelwa ka borutho ke Judase, yoo a bego a dula mokgotheng wo o bitšwago mokgotha wa go loka. * (Ditiro 9:11) Mokgotha wo​—o bitšwa Darb al-Mustaqim ka se-Arabia—​e sa dutše e le tsela e kgolo kua Damaseko. Akanya gore ke eng seo se bego se le monaganong wa Saulo ge a be a le legaeng la Judase. Seo se wetšego Saulo se ile sa mo tlogela a foufetše e bile a tšhogile. Ga bjale e be e le nako ya go naganišiša ka dilo tše di tswalanago le sona.

Motlaiši o be a lebeletšane le seo a bego a se phaela ka thoko e le go hloka tlhaologanyo. Morena Jesu Kriste yo a kokotetšwego​—a ahloletšwe ke babuši ba ba-Juda bao ba phagamego kudu gomme ‘a nyatšwa le go lahlwa ke batho’​—o be a phela. Ke ka baka leo a ilego a ba a amogelwa ka go dula ka letsogong le letona la Modimo “seetšeng se se sa fihlelwexo”! Jesu e be e le Mesia. Stefano le ba bangwe ba be ba nepile. (Jesaya 53:3; Ditiro 7:56; 1 Timotheo 6:16) Saulo o be a fošitše ka mo go feletšego, ka gobane Jesu o be a dumelelana le bona bao Saulo a bego a ba tlaiša! Pele ga bohlatse, Saulo o be a ka “raxa seotledi” bjang? Gaešita le pholo ya senganga mafelelong e hlohleletšega go ya ka thoko yeo mong wa yona a nyakago e e-ya go yona. Ka gona, ka go gana go swarišana le ditaelo tša Jesu, Saulo o be a tla be a ikgobatša yena ka noši.

Bjalo ka Mesia, Jesu o be a ka se ke a ahlolwa ke Modimo. Lega go le bjalo, Jehofa o ile a mo dumelela gore a hwe lehu le sehlogo ka go fetišiša le gore a be ka tlase ga kahlolo ya Molao e rego: “E a fexilwexo ó roxilwe ke Modimo.” (Doiteronomio 21:23) Jesu o ile a hwa ge a be a fegilwe koteng ya tlhokofatšo. O ile a rogwa e sego ka baka la dibe tša gagwe ka ge a be a se na tšona, eupša ka baka la dibe tša batho. Saulo ka morago o ile a hlalosa gore: “Xobane ba e lexo ba medirô ya Molaô, ba roxilwe ka xe xwa thwe: Moroxwa ké e a sa tiišexo xo dira tšohle tše di ngwadilwexo pukung ya Molaô. Xobane pele xa Modimo xa xo e a lokafalaxo ka Molaô. . . . Kriste ó re rekolotše thoxong ye ya Molaô ka xo ba moroxwa ’bakeng sa rena, ka xobane xo ngwadilwe xwa thwe: E a fexilwexo kwateng ó roxilwe.”​—Ba-Galatia 3:10-13.

Sehlabelo sa Jesu se na le mohola wa topollo. Ka go amogela sehlabelo seo, Jehofa ka tsela ya seswantšhetšo o ile a kokotela Molao le thogako ya wona koteng. Ka go kwešiša ntlha yeo, Saulo o be a ka tšeela godimo kota ya tlhokofatšo yeo go ‘ba-Juda e bego e le kgopišo’ e le “bohlale bya Modimo.” (1 Ba-Korinthe 1:18-25; Ba-Kolose 2:14) Ka gona-ge, ge e ba phološo e be e sa tle ka mediro ya molao eupša e e-tla ka go bontšhwa ga botho bjo bo sa swanelago bja Modimo go badira-dibe ba swanago le Saulo ka boyena, gona go be go na le kgonagalo ya gore e be e buletšwe le bao ba lego ka ntle ga Molao. Moo Jesu a bego a romela Saulo gona e be e le go ba-ntle.​—Ba-Efeso 3:3-7.

Ga re tsebe gore Saulo o ile a kwešiša se ka tekanyo e kaakang nakong ya go sokologa ga gagwe. Jesu o be a swanetše go bolela le yena gape, mohlomongwe ka makga a fetago le tee, mabapi le thomo ya gagwe go ba-ditšhaba. Go feta moo, go ile gwa feta nywaga e mmalwa pele ga ge Saulo a ngwala dilo tše ka moka fase a le ka tlase ga pudulelo ya Modimo. (Ditiro 22:17-21; Ba-Galatia 1:15-18; 2:1, 2) Lega go le bjalo, go ile gwa feta matšatši a mmalwa feela pele ga ge Saulo a  ka amogela ditaelo tše di oketšegile go tšwa go Mong wa gagwe yo mofsa.

Go Etelwa ke Anania

Jesu ka morago ga go iponagatša go Saulo, o ile a iponagatša gape le go Anania gomme a mmotša gore: “O yê mokxotheng wo ba rexo ké mokxôtha wa xo loka; ngwakong wa Juda O botšišê motho e a bitšwaxo Saulo wa Tareso; xobane šoo ó a rapêla. Mo ponong ó bone monna e a bitšwaxo Anania, à tsêna a mmea seatla xore a foufoloxê.”​—Ditiro 9:11, 12.

Ka ge Anania a be a tseba ka ga Saulo, go makalela ga gagwe mantšu a Jesu go a kwešišega. O itše: “Morêna, Ke kwile ba bantši bà bolêla monna eo, ka mo a dirilexo ba bakxêthwa ba xaxo xa-mpe-mpe kwa Jerusalêma. Le xôna baperisita ba baxolo ba mo file matla a xore le motseng wó a tlêmê bohle ba ba rapêlaxo Leina la xaxo.” Lega go le bjalo, Jesu o ile a botša Anania gore: “Yaa xo yêna; xobane monna eo ke mo hlaotše xore a bê sebya sa-ka sa xo iša ’ina la-ka xo bantlê, le xo maxoši, le xo Ba-Isiraele.”​—Ditiro 9:13-15.

A kgonthišeditšwe, Anania o ile a ya atereseng yeo Jesu a mo neilego yona. Ka morago ga go hwetša Saulo le go mo dumediša, Anania o ile a mmea diatla. Pego e re: “À sa r’yalo, mahlong a Paulo xwa khumoxa dilô tše e kexo ké makxapetla, ’me a boêla a bôná.” Saulo bjale o be a ikemišeditše go theetša. Mantšu a Anania a be a tiišetša seo Saulo mohlomongwe a bego a se kwešišitše mantšung a Jesu a rego: “Modimo wa bô-tata-wešo ó Xo swere ka seatla xore O tsebê thatô ya xaxwe, O bônê Yêna Moloki, O kwê Lentšu la molomo wa xaxwe, O kxônê xo ba hlatse ya xaxwe xo batho bohle, hlatse ya tše O di bonexo le tše O di kwilexo. Byale O sa diêxêla’ng? Êma O kolobetšwê, O hlatswiwê dibe tša xaxo ka xo rapêla Leina la Morêna.” Mafelelo e bile afe? Saulo “a tsoxa a kolobetšwa; a ja dijo, a tiêlêla.”​—Ditiro 9:17-19; 22:12-16.

Ka morago ga go phethagatša thomo ya gagwe, Anania yo a botegago o ile a tloga kapejana tiragalong yeo bjalo ka ge a ile a tsena, gomme ga re sa botšwa selo ka yena. Eupša Saulo o ile a tlaba ka moka bao ba ilego ba mo kwa! Yo e bego e le motlaiši yo a ilego a tla Damaseko a tlela go golega barutiwa ba Jesu, o ile a thoma go ruta disinagogeng le go hlatsela gore Jesu e be e le Kriste.​—Ditiro 9:20-22.

“Moapostola wa Ba-ntle”

Seo Saulo a ilego a se bona ge a be a le tseleng ya gagwe ya go ya Damaseko se ile sa mo kgaosetša go seo a bego a se dira. Ka go lemoga seo Mesia a lego sona, Saulo o be a kgona go tswalanya dikgopolo tše dintši le diporofeto tša Mangwalo a Sehebere le Jesu. Go lemoga gore Jesu o ile a iponagatša go yena gomme ‘a mo thopa’ a ba a mo romela bjalo ka “moapostola wa ba-ntle,” go ile gwa fetoša bophelo bja Saulo kudu. (Ba-Filipi 3:12; Ba-Roma 11:13) Ga bjale e le moapostola Paulo, o be a e-na le tokelo le taolo tšeo di bego di ka se kgome feela matšatši ohle a bophelo bja gagwe eupša gape a be a tla kgoma le tsela ya histori ya Bokriste.

Nywaga ka morago, ge go ba ga Paulo moapostola go be go belaelwa, o ile a lwela taolo ya gagwe ka go bolela ka seo se ilego sa mo wela tseleng e yago Damaseko. O ile a botšiša gore: “A xa ke Moapostola? A xa k’a bôna Jesu . . . Mong wa rena?” Ka morago ga go bolela ka go bonagala ga Jesu yo a tsošitšwego go ba bangwe, Saulo (Paulo) o ile a bolela gore: “Mafelelong, xe bohle bao bà šetše ba mmone, ké xe a bônwa ke nna ke etšaxo lefolotšana.” (1 Ba-Korinthe 9:1; 15:8) Ka pono ya gagwe ya Jesu a le letagong la legodimong, go be go le bjalo ka ge eka Saulo o be a neilwe tlhompho ya go tswalelwa goba go tsošetšwa bophelong bja moya pele ga nako.

Saulo o ile a hlompha tokelo ya gagwe gomme a katana bakeng sa go e phelela. O ile a ngwala gore: “Nna ké e monyenyane xo baapostola; xa k’a swanêlwa xo bitšwa moapostola, xobane ke tlaišitše phuthêxô ya Modimo. . . . ’Me kxauxêlô ya [Modimo] xa y’a ntlêla lefêla; eupya ke dirile xo fetiša [baapostola ba bangwe ka moka].”​—1 Ba-Korinthe 15:9, 10.

Mohlomongwe ka go swana la Saulo le wena o gopola nako ya ge o be o lemoga gore, gore o hwetše kgaugelo ya Modimo, go nyakega gore o fetole dipono tšeo o bego o dutše o na le tšona go tloga kgale ka bodumedi. Ga go na pelaelo gore o ile wa leboga kudu gore Jehofa o go thušitše go kwešiša therešo. Ge Saulo a be a bona seetša gomme a lemoga seo go bego go nyakega gore a se dire, ga se a ka a dika-dika go se dira. O ile a tšwela pele a se dira ka phišego le ka boikemišetšo bophelong bja gagwe ka moka mo lefaseng. A mohlala o mobotse gakaakang bakeng sa bao ka moka ba kganyogago go amogelwa ke Jehofa lehono!

[Mongwalo wa ka tlase]

[Seswantšho go letlakala 27]

Mokgotha wo o bitšwago Mokgotha wa go Loka mehleng ya lehono kua Damaseko

[Mothopo]

Photo by ROLOC Color Slides