O Itebelela Bjang?
O Itebelela Bjang?
E BE e le monna yo a nago le boikgantšho. Ka morago ga go hlatlošetšwa maemong a godimo mmušong, o ile a kgahlwa ke kgodišo le tumišo tšeo di bego di lebišwa go yena. Eupša o ile a selekega kudu ge yo mongwe wa bahlankedi a ile a gana go mo nea kgodišo e bjalo. Bakeng sa go itefeletša, mohlankedi wa moikgantšhi o ile a rera go fediša batho ka moka mmušong bao ba bego ba na le setlogo sa morafo se swanago le sa mofoši. A kgopolo e kgopamego gakaakang ya go itšeela godimo!
Mologa-maano-mabe e be e le Hamane, mohlankedi yo a phagamego kgorong ya tsheko ya Kgoši ya Peresia Ahasiwerosi. O be a hloile mang? Mo-Juda yo a bitšwago Morodekai. Gaešita le ge maano-mabe a Hamane a go fsielela moloko e be e le a feteletšego, a bontšha kotsi le ditla-morago tše di šiišago tša boikgantšho. Ga se feela gore moya wa gagwe wa boikgantšho o ile wa bea ba bangwe kotsing, eupša o ile wa ba wa lebiša le go kokobetšweng ga gagwe phatlalatša gomme mafelelong wa lebiša lehung la gagwe.—Esitere 3:1-9; 5:8-14; 6:4-10; 7:1-10.
Ga go Ile Gore Barapedi ba Kgonthe ba be le Boikgantšho
Jehofa o nyaka gore re be ‘ba sepelago le Modimo wa rena re na le boipoetšo.’ (Mika 6:8) Beibele e na le dipego tše di fapa-fapanego tša batho bao ba ilego ba palelwa ke go kgomarela go ba le pono ya boipoetšo ka bona ka noši. Se se ile sa ba tlišetša mathata le manyami. Go ela hloko e mengwe ya mehlala ye go ka re thuša go bona bošilo le kotsi ya go nagana ka tsela e se nago teka-tekano.
Tsela ya go nagana ya moporofeta wa Modimo Jona e ile ya hloka teka-tekano moo a ilego a ba a leka go tšhaba ge Modimo a be a mo roma gore a yo lemoša batho ba babe ba Ninife mabapi le kahlolo ya Jehofa go bona. (Jona 1:1-3) Ka morago ge modiro wa gagwe wa boboledi o be o atlegile go sokolleng ba-Ninife, Jona o ile a befelwa. O be a tshwenyegile kudu ka go ba ga gagwe le leina le lebotse bjalo ka moporofeta mo e lego gore maphelo a ba-Ninife ba dikete o be a se na taba le ona. (Jona 4:1-3) Ge e ba re itšeela godimo ka mo go sa swanelago, re ka hwetša go le thata go dula re e-na le kgopolo ya go se bebe sefahlego le e nepagetšego ka batho le ditiragalo tšeo di re dikologilego.
Gape ela hloko Usia, yoo a bilego kgoši e botse ya Juda. Ge a thoma go ba yo a sa leka-lekanago tseleng ya gagwe ya go nagana, ka makoko o ile a leka go itšeela mediro e itšego ya baperisita. Ka baka la ditiro tša gagwe tša boikgantšho le tša go ipota kudu, o ile a lefa ka bophelo bja gagwe bjo bobotse gomme a lahlegelwa ke go amogelwa ke Modimo.—2 Koronika 26:3, 16-21.
Tsela ya go nagana e sa leka-lekanago e ile ya nyaka go tanya baapostola ba Jesu. Ba ile ba ba bao ba tshwenyegilego kudu ka go ikhweletša letago le matla. Ge nako ya teko e kgolo e e-tla, ba ile ba lahla Jesu gomme ba tšhaba. (Mateo 18:1; 20:20-28; 26:56; Mareka 9:33, 34; Luka 22:24) Go hloka ga bona boipoetšo gotee le dikgopolo tša bona tša go ikgodiša go nyakile go ba bakela gore ba lahlegelwe ke pono ka morero wa Jehofa le ka tema yeo ba e kgathago mabapi le thato ya gagwe.
Mafelelo a Gobatšago a go Ikgodiša
Go ba le pono e sa leka-lekanago ka rena ka noši go ka re kweša bohloko gomme gwa senya tswalano ya rena le ba bangwe. Ka mohlala, re ka be re dutše ka phapošing gomme ra bona banyalani ba sebelana gomme ba sega. Ge e ba re e-na le boithati, re ka nagana ka mo go fošagetšego gore ba a re kwera ka gobane ba bolelela fase kudu. Menagano ya rena e ka no se re dumelele go nagana ka lebaka le ge e le lefe le lengwe la gore ba itshware bjalo. Go ba gona, ke mang yo mongwe yoo ba ka bago ba bolela ka yena? Re ka befelwa gomme ra phetha ka gore re se ke ra hlwa re sa boledišana le banyalani bao gape. Ka tsela e bjalo, go itšeela ga rena godimo ka tsela e sa leka-lekanago go
ka lebiša go se kwešišaneng le ditswalanong tšeo di senyegilego le bagwera, ditho tša lapa gotee le ba bangwe.Bao ba itšeelago godimo kudu e ka ba baikgantšhi, ya ba bao ba ikgantšhago ka mo go sa felego ka dilo tšeo di bonagalago e le ditalente tša bona tše dikgolo, ditiro goba dithoto tša bona. Goba mo gongwe ba ka laola poledišano, ka mehla ba rata go bolela selo se itšego ka ga bona. Polelo e bjalo e bontšha go hloka lerato la kgonthe gomme e ka ba yeo e tenago kudu. Ka gona, bao ba ikgogomošago gantši ba ikarola go ba bangwe.—1 Ba-Korinthe 13:4.
Bjalo ka Dihlatse tša Jehofa, re ka gahlana le go kwerwa le go rakwa bodireding bja rena bja phatlalatša. Go nyakega gore re gopole gore kganetšo e bjalo ga se ya lebišwa go rena ka noši eupša e lebišitšwe go Jehofa, e lego Mothopo wa molaetša wa rena. Lega go le bjalo, pono e kgopamego ka bohlokwa bja rena e ka lebiša mafelelong a šoro. Nywageng e fetilego, ngwanabo rena o ile a tšeela godimo go omanywa ga gagwe ke mong wa ntlo gomme a ipušeletša ka go bolela gampe. (Ba-Efeso 4:29) Ka morago ga moo, ngwanabo rena ga se a ka a hlwa a sa tšea karolo bodireding bja ntlo le ntlo. Ee, boikgantšho bo ka re hlohleletša gore re lahlegelwe ke go laola kgalefo ge re ruta. Anke re kataneleng gore seo se se ke sa direga. Go e na le moo, ka boikokobetšo anke re tsomeng thušo ya Jehofa bakeng sa gore re dule re na le tebogo e swanetšego bakeng sa tokelo ya go ba le karolo bodireding bja Bokriste.—2 Ba-Korinthe 4:1, 7; 10:4, 5.
Go ba le boemo bja kgopolo bja go ikgodiša gape go ka re thibela le go amogela keletšo yeo e nyakegago kudu. Nywageng e mmalwa e fetilego nageng ya Amerika Bogare, mošemanyana yo a lego mahlalagading o ile a nea polelo Sekolong sa Bodiredi sa Pušo ya Modimo phuthegong ya Bokriste. Ge molebeledi wa sekolo a be a mo nea keletšo e lebanyago, mofsa yo a galefilego o ile a lahlela Beibele ya gagwe lebatong gomme a tšwela ka ntle ga Holo ya Mmušo ka maikemišetšo a go se sa boa gape. Eupša ka morago ga matšatši a mmalwa, o ile a metša boikgantšho bja gagwe, a lokiša ditaba le molebeledi wa sekolo gomme ka boikokobetšo a amogela keletšo ya gagwe. Ge nako e dutše e e-ya, lesogana le le ile la gola la ba Mokriste yo a godilego tsebong.
Go ba bao ba ikgodišago le ba itšeelago godimo kudu go ka lebiša go senyegeng ga tswalano ya rena le Modimo. Diema 16:5 e lemoša ka gore: “Morêna ó nyênya baipoti bohle.”
Go ba le Pono e Leka-lekanego ka Rena ka Noši
Ka kgonthe ga se ra swanela go itšeela godimo kudu. Ee, se ga se bolele gore ga se ra swanela go ba bao ba tiišitšego ka seo re se dirago goba seo re se bolelago. Beibele e bontšha gore balebeledi, bahlanka ba bodiredi—ge e le gabotse, bohle ka phuthegong—ba swanetše go ba le bokwala. (1 Timotheo 3:4, 8, 11; Tito 2:2) Ka gona, Bakriste ba ka hlagolela le go kgomarela go itebelela ga bona ka tsela ya boipoetšo e le e leka-lekanego bjang?
Beibele e nea mehlala e mentši yeo e kgothatšago ya batho bao ba ilego ba boloka pono e leka-lekanego ka bona ka noši. Mohlala o mobotse kudu ke wa Jesu Kriste mabapi le boikokobetšo. E le gore a dire thato ya Tatagwe le go tlišetša batho phologo, Morwa wa Modimo ka go rata o ile a tlogela maemo a gagwe a letago legodimong gomme a ba motho yo a nyatšegago lefaseng. Go sa šetšwe maroga, tshwaro e sehlogo le lehu leo le hlomphollago, o ile a dula a e-na le boitshwaro le seriti. (Mateo 20:28; Ba-Filipi 2:5-8; 1 Petro 2:23, 24) Jesu o ile a kgona bjang go dira se? O ile a ithekga ka mo go feletšego ka Jehofa gomme o be a ikemišeditše go dira thato ya Modimo. Jesu o be a ithuta Lentšu la Modimo ka mafolofolo, a rapela ka phišego gomme a ikgafa ka mafolofolo bodireding bja gagwe. (Mateo 4:1-10; 26:36-44; Luka 8:1; Johane 4:34; 8:28; Ba-Hebere 5:7) Go latela mohlala wa Jesu go ka re thuša gore re hlagolele le go boloka pono e leka-lekanego ka rena ka noši.—1 Petro 2:21.
Ela hloko gape mohlala o mobotse wa morwa wa Kgoši Saulo e lego Jonathane. Ka baka la go se kwe ga tatagwe, Jonathane o ile a lahlegelwa ke tokelo ya go hlatlama Saulo bjalo ka kgoši. (1 Samuele 15:10-29) Na Jonathane o be a kwele bohloko ka baka la go lahlegelwa ga gagwe? Na o ile a hufegela Dafida, lesogana leo le bego le tlo buša sebakeng sa gagwe? Gaešita le ge Jonathane e be e le yo mogolo mohlomongwe e bile a be a e-na le phihlelo go feta Dafida, ka boipoetšo le ka boikokobetšo o ile a dumelelana le thulaganyo ya Jehofa gomme ka potego a thekga Dafida. (1 Samuele ) Go ba le pono e botse ka thato ya Modimo le go rata go ikokobeletša yona go tla re thuša gore ‘re se ke ra itshema ka go fetiša moo go swanetšego.’— 23:16-18Ba-Roma 12:3.
Jesu o ile a bontšha bohlokwa bja go bontšha boipoetšo le boikokobetšo. O ile a bontšha se ka go botša barutiwa ba gagwe gore ge ba le menyanyeng ba se ke ba dula ‘madulong a ka pele’ ka gobane mohlomongwe motho yo mongwe yo a tsebjago kudu go ba feta a ka tla gomme ba ka kokobetšwa ka go išwa ditulong tša tlase. Bakeng sa go dira gore thuto ye e be e kwagalago gabotse, Jesu o ile a oketša ka gore: “Xobane bohle ba ba ikxodišaxo ba tlo kokobetšwa; e a ikokobetšaxo ó tlo xodišwa.” (Luka 14:7-11) Ke gabohlale gore re kwe keletšo ya Jesu le go ‘ikapeša boikokobetšo.’—Ba-Kolose 3:12; 1 Ba-Korinthe 1:31.
Ditšhegofatšo tša go ba le Pono e Leka-lekanego
Go ba le moya wa boipoetšo le wa boikokobetšo go kgontšha bahlanka ba Jehofa go hwetša lethabo la kgonthe bodireding bja bona. Bagolo ke bao ba batamelegago gabonolo ge e ba ka boikokobetšo ba ‘šetša mohlape.’ (Ditiro 20:28, 29) Ka gona, bohle ka phuthegong ba ikwa ba lokologile go bolela le bona le go nyaka thušo ya bona. Ka mokgwa o bjalo phuthego e ka batamelana ka moya wa lerato, o borutho le wa go holofelana.
Go se itšeele godimo kudu go dira gore re be le bagwera ba babotse. Boipoetšo le boikokobetšo di tla re dira gore re pheme go ba le moya wa phadišano le go leka go phala ba bangwe ka mediro goba ka dilo tše di bonagalago. Dika tše tša go boifa Modimo di tla re thuša go ba bao ba bontšhago go naganela kudu gomme ka go rialo re tla ba boemong bjo bobotse bja go homotša le go thekga bao ba lego mathateng. (Ba-Filipi 2:3, 4) Ge e ba batho ba kgomilwe ke lerato le botho, gantši ba arabela ka mokgwa o swanetšego. Na tswalano e bjalo e se nago boithati ga e be motheo woo bogwera bjo bo tiilego bo agwago godimo ga wona? A tšhegofatšo e kgolo gakaakang bakeng sa go se be yo a itšeelago godimo ka mo go sa swanelago!—Ba-Roma 12:10.
Go ba le pono e leka-lekanego ka rena ka noši gape go dira gore go be bonolo go dumela diphošo tša rena ge e ba re fošeditše yo mongwe. (Mateo 5:23, 24) Se se feleletša ka ditswalano tše kaone, se nea sebaka sa go boelana le go hlomphana. Ge e ba e le ba ba ikokobeditšego le ba ipoeditšego, bao ba lego maemong a bolebeledi ba bjalo ka bagolo ba Bakriste, ba na le sebaka se sebotse sa go direla ba bangwe dilo tše dibotse kudu. (Diema 3:27; Mateo 11:29) Motho yo a ikokobeditšego o tla hwetša go le bonolo go lebalela ba bangwe bao ba mo senyetšago. (Mateo 6:12-15) A ka se ke a itshwara ka mo go feteletšego malebana le diphošo tšeo di lemogegago gomme o tla bota Jehofa gore o tla lokiša maemo ao a ka se kego a lokišwa ka tsela le ge e le efe.—Psalme 37:5; Diema 3:5, 6.
Tšhegofatšo e kgolo yeo e hwetšwago ka go ba le pono ya boipoetšo le ya boikokobetšo ka rena ka noši ke ya go thabela kgaugelo ya Jehofa le go amogelwa ke yena. “Modimo ó lwa le baikxoxomoši; ba ba ikokobetšaxo ó ba sétša ka kxauxêlô.” (1 Petro 5:5) Anke le ka mohla re se ke ra wela moreong wa go nagana gore re kaone kudu go feta ka kamoo gabotse-botse re lego ka gona. Go e na le moo, ka boikokobetšo anke re lemogeng boemo bja rena tokišetšong ya Jehofa ya dilo. Ditšhegofatšo tše kgolo di boloketšwe bao ba dirago ka go dumelelana le ditekanyetšo tša gagwe tša ‘go ba le boipoetšo ge ba sepela le Modimo.’
[Seswantšho go letlakala 22]
Ka boikokobetšo Jonathane o ile a thekga Dafida