“Phakxamang”
“Phakxamang”
“Ké xôna phakxamang, xobane nakô ya xo tla xa Morêna wa lena xa Le e tsebe.”—MATEO 24:42.
1. Bahlanka ba Jehofa ba kgale ba ikwa bjang ka nywaga ya bona e mentši ya tirelo ya boineelo? Nea mohlala.
BAHLANKA ba bantši ba kgale ba Jehofa ba ithutile therešo ge e be e sa le masogana le dikgarebe. Go etša mmapatši yo a ilego a hwetša perela ya theko e kgolo gomme a rekiša tšohle tšeo a bego a e-na le tšona e le gore a e reke, barutwana bao ba Beibele ba ba fišegago ba ile ba ikgafa gomme ba neela maphelo a bona go Jehofa. (Mateo 13:45, 46; Mareka 8:34) Na ba ikwa bjang ge ba ile ba swanelwa ke go leta nako e telele go feta yeo ba bego ba e gopotše gore ba bone merero ya Modimo e phethagala lefaseng? Ga ba itshole! Ba dumelelana le Ngwanabo rena A. H. Macmillan, yo ka morago ga nywaga e ka bago 60 ya tirelo ya boineelo go Modimo a boletšego gore: “Ke ikemišeditše kudu le go feta le ge e le neng pele go tšwela pele ka tumelo ya-ka. E dirile gore bophelo bo be le morero go nna. E sa dutše e nthuša gore ke lebeletšane le bokamoso ka ntle le poifo.”
2. (a) Ke keletšo efe e lego nakong yeo Jesu a ilego a e nea balatedi ba gagwe? (b) Ke dipotšišo dife tšeo re tlago go di ahla-ahla sehlogong se?
2 Go thwe’ng ka wena? Go sa šetšwe bogolo bja gago bja nywaga, ela hloko mantšu a Jesu a rego: “Ké xôna phakxamang, xobane nakô ya xo tla xa Morêna wa lena xa Le e tsebe.” (Mateo 24:42) Polelo yeo e bonolo e rwele therešo e tseneletšego. Ga re tsebe letšatši leo Morena a tlago go tla ka lona go tlo phetha kahlolo godimo ga tshepedišo ye e kgopo, e bile ga go nyakege gore re le tsebe. Eupša re swanetše go phela ka tsela yeo e lego gore ge a e-tla, re ka se ke ra itshola. Tabeng ye, ke mehlala efe yeo re e hwetšago ka Beibeleng yeo e tlago go re thuša gore re dule re phakgame? Jesu o ile a bontšha bjang senyakwa se? Le gona ke bohlatse bofe bjo re nago le bjona lehono bjo bo bontšhago gore re phela mehleng ya bofelo bja lefase le le sa boifego Modimo?
Mohlala wa Temošo
3. Batho ba bantši lehono ba swana bjang le ba mehleng ya Noage?
3 Batho lehono ba swana le banna le basadi bao ba phetšego mehleng ya Noage ka ditsela tše dintši. Nakong yeo lefase le be le tletše bošoro, gomme tshekamelo ya pelo ya motho e be e le “bobe fêla ka mehla.” (Genesi 6:5) Bontši bo be bo swaregile ka ditaba tša bophelo bja letšatši le letšatši. Lega go le bjalo, pele a tliša Meetse-fula a magolo, Jehofa o ile a nea batho sebaka sa go itshola. O ile a laela Noage gore a bolele gomme Noage o ile a kwa—a hlankela e le “sexoeledi sa tokô” mohlomongwe lebaka la nywaga e 40 goba e 50 goba go feta moo. (2 Petro 2:5) Lega go le bjalo, batho ba ile ba hlokomologa molaetša wa Noage wa temošo. Ba be ba sa phakgama. Ka gona, mafelelong go ile gwa phologa Noage le lapa la gagwe feela ge go be go phethwa kahlolo ya Jehofa.—Mateo 24:37-39.
4. Ke ka kgopolo efe go ka thwego bodiredi bja Noage bo ile bja atlega, gomme go ka bolelwa bjang se se swanago ka modiro wa gago wa boboledi?
4 Na bodiredi bja Noage bo ile bja atlega? O se ke wa ahlola ditaba ka palo e nyenyane ya bao ba ilego ba arabela. Ka kgonthe, boboledi bja Noage bo ile bja phetha morero wa bjona go sa šetšwe karabelo. Ka baka la’ng? Ka gobane bo ile bja nea batho sebaka se se lekanego sa go kgetha gore ba be ba tla hlankela Jehofa goba ba ka se dire bjalo. Go thwe’ng ka tšhemo yeo o bolelago go yona? Gaešita le ge go e-na le karabelo e nyenyane e kgahlišago, o atlega kudu. Ka baka la’ng? Ka gobane ge o bolela, o goeletša temošo ya Modimo gomme ka go dira bjalo o phethagatša thomo yeo Jesu a e neilego balatedi ba gagwe.—Mateo 24:14; 28:19, 20.
Go Hlokomologa Baporofeta ba Modimo
5. (a) Ke maemo afe ao a bego a atile kua Juda mehleng ya Habakuku, gomme batho ba ile ba arabela bjang molaetšeng wa gagwe wa boporofeta? (b) Batho ba Juda ba ile ba bontšha bjang bonaba baporofeteng ba Jehofa?
5 Nywaga-kgolo ka morago ga Meetse-fula, mmušo wa Juda o ile wa lebeletšana le boemo bjo bo hlobaetšago bja ditaba. Go rapela medimo ya diswantšho, go hloka toka, go gatelela gaešita le go bolaya e be e le dilo tše di tlwaelegilego. Jehofa o ile a tsoša Habakuku gore a lemoše batho gore ge e ba ba sa itshole, ba be ba tla welwa ke masetlapelo ka diatleng tša ba-Kaladea goba ba-Babele. (Habakuku 1:5-7) Eupša batho ba ile ba gana go theetša. Mohlomongwe ba be ba fahlela ka gore, ‘Ee, nywageng e fetago e lekgolo e fetilego, moporofeta Jesaya o ile a goeletša temošo e swanago eupša ga se gwa hlwa go direga selo!’ (Jesaya 39:6, 7) Ga se feela gore bontši bja bahlankedi ba Juda ba be ba sa re selo ka molaetša eupša ba be ba bile ba bontšha bonaba go batseta. Lebakeng le lengwe, ba ile ba leka go bolaya moporofeta Jeremia, gomme ge nkabe e se be ka go tsena ga Ahikama ditaba gare, ba ka be ba ile ba atlega. A befedišitšwe ke molaetša o mongwe wa boporofeta, Kgoši Joyakima o ile a dira gore moporofeta Uria a bolawe.—Jeremia 26:21-24.
6. Jehofa o ile a matlafatša Habakuku bjang?
6 Molaetša wa Habakuku le wona o be o le matla gomme ka mo go swanago o be o sa ratwe go etša wa Jeremia yoo a bego a buduletšwe ke Modimo gore a porofete ka go ba lešope ga Juda ka nywaga e 70. (Jeremia 25:8-11) Ka gona, re ka kwešiša kgatelelo ya Habakuku ge a be a lla ka gore: “Morêna, xo tlo feletša neng ke fêla kè bitša Ò sa kwe? Ke hlaboša lentšu kè Xo bitša kè patilwe, Ò sa nnamolele.” (Habakuku 1:2) Jehofa o ile a araba Habakuku ka kgaugelo ka mantšu a a matlafatšago tumelong: “Pônô e beetšwe lebaka la yôna; e bola tša bofêlô, xa e fore. Xe e sa phêthêxe ka pelá, xona e letêlê. Xo tla di tlo tla, di ka se diêxe.” (Habakuku 2:3) Ka gona Jehofa o be a na le ‘lebaka le le beilwego’ bakeng sa go fediša go hloka toka le kgatelelo. Ge e ba go be go bonagala eka go na le go diega, Habakuku o be a sa swanela go nolega moko, e bile o be a sa swanela go goga maoto. Go e na le moo, o be a swanetše gore a ‘lete,’ letšatši le lengwe le le lengwe a phela a e-na le kgopolo ya go akgofa ga mehla. Letšatši la Jehofa le be le ka se diege!
7. Ke ka baka la’ng Jerusalema lekgolong la pele la nywaga C.E. e ile ya hlaolelwa go senywa?
7 Mo e ka bago nywaga e 20 ka morago ga ge Jehofa a boletše le Habakuku, motse-mošate wa Juda, Jerusalema, o ile wa senywa. Ka morago o ile wa agwa lefsa, gomme bontši bja ditiro tše mpe tše di bego di nyamiša Habakuku kudu di ile tša lokišwa. Lega go le bjalo, lekgolong la pele la nywaga C.E., motse o ile wa buša wa hlaolelwa go fedišwa ka baka la go se botege ga badudi ba wona. Ka tsela ya kgaugelo, Jehofa o ile a rulaganyeletša gore ba dipelo tše di lokilego ba phologe. Nakong ye, o ile a diriša moporofeta yo mogolo Jesu Kriste gore a fetišetše molaetša. Ka 33 C.E., Jesu o ile a botša balatedi ba gagwe gore: “Xe Le bôna motse wa Jerusalêma ò dikilwe ke makôkô a madirá, xôna Le tsebê xore xo batametše xo phušolwa xa wôna. Mehleng yeo ba ba lexo naxeng ya Juda ba thšabêlê dithabeng.”—Luka 21:20, 21.
8. (a) Ke eng seo se ka bego se diragaletše Bakriste ba bangwe ge nako e dutše e feta ka morago ga lehu la Jesu? (b) Mantšu a Jesu a boporofeta mabapi le Jerusalema a ile a phethagatšwa bjang?
8 Ge nywaga e dutše e feta, Bakriste ba bangwe kua Jerusalema ba swanetše go ba ba ile ba ipotšiša nako yeo boporofeta bja Jesu bo bego bo tla phethagala ka yona. Go ba gona, ela hloko boikgafo bjo ba bangwe ba bona ba ilego ba bo dira ka ntle le pelaelo. Mohlomongwe ba ile ba gana dibaka tša dikgwebo tše di gogelago ka baka la boikemišetšo bja bona bja go dula ba phakgame. Ge nako e dutše e e-ya, na ba ile ba lapa? Na ba ile ba phetha ka gore ba senya nako ya bona, ba fahlela ka gore mantšu a Jesu a be a šoma molokong wa nakong e tlago, e sego wa bona? Ka 66 C.E., boporofeta bja Jesu bo ile bja thoma go phethagala ge madira a Roma a be a dikanetša Jerusalema. Bao ba ilego ba dula ba phakgame ba ile ba lemoga pontšho, ba tšhaba motseng gomme ba phologa go senyweng ga Jerusalema.
Go Bontšha go Nyakega ga go Phakgama
9, 10. (a) O be o ka akaretša bjang seswantšho sa Jesu sa bahlanka bao ba ilego ba leta mong wa bona gore a boe lenyalong la gagwe? (b) Ke ka baka la’ng go leta ga bahlanka mong wa bona go swanetše go ba go ile gwa ba thatafalela? (c) Ke ka baka la’ng e be e le mo go holago gore bahlanka ba lete?
9 Ge a gatelela go nyakega ga go phakgama, Jesu o ile a swantšha barutiwa ba gagwe le bahlanka bao ba letilego mong wa bona gore a boe lenyalong la gagwe. Ba be ba tseba gore o tla boa bošegong bjona bjoo bjo itšego—eupša ka nako mang? Na ke nakong ya pele ya tlhapetšo? Ya bobedi? Ya boraro? Ba be ba sa tsebe. Jesu o itše: “Ba lehlôxônôlô ké bôná-bao, ba mong wa bôná xe a e-tla, e ka ba ka nakô ya bobedi le xe e le ka ya boraro, a ba hwetša bà phakxame.” (Luka 12:35-38) Anke o akanye ka tetelo-kgolo ya bahlanka ba. Modumo o mongwe le o mongwe, moriti o mongwe le o mongwe o monyenyane o be o tla godiša tebelelo ya bona: ‘Na yo e ka ba e le mong wa rena?’
10 Go thwe’ng ge e ba mong wa bona a be a ka fihla ka nako ya bobedi ya tlhapetšo, yeo e bego e thoma mo e ka bago ka iri ya senyane go fihla bošego-gare? Na bahlanka ka moka, go akaretša le bao ba ilego ba šoma ka thata go tloga ka mahube, ba be ba tla ba ba loketše go mo gahlanetša goba na ba bangwe ba be ba tla be ba robetše? Go thwe’ng ge e ba mong wa bona a be a ka boa nakong ya boraro ya tlhapetšo—nako e thomago bošego-gare go fihla mo e ka bago ka iri ya boraro ka masa? Na ba bangwe ba bahlanka ba be ba tla be ba nolegile moko, e bile ba ngongorega ka baka la go bonagala ga mong wa bona eka o diegile? * Ke feela bahlanka bao ba hweditšwego ba phakgame ge mong wa bona a fihla bao ba bego ba tla bolelwa e le ba ba thabilego. Ruri mantšu a Diema 13:12, (PK) a be a tla šoma go bona: “Kholofelo e diegilego e hlokofatša pelo; eupša tebelelo ge e phethega, ke sehlare sa bophelo.”
11. Thapelo e ka re thuša bjang gore re dule re phakgame?
11 Nakong ya ge go bonagala eka o a diega, ke eng seo se bego se tla thuša balatedi ba Jesu gore ba dule ba phakgame? Ge ba le serapeng sa Getsemane pejana ga go swarwa ga gagwe, Jesu o ile a botša ba bararo ba baapostola ba gagwe gore: “Phakxamang Le rapêlê [“tšwelang pele le rapela,” NW], xore Le se tsênê melekong.” (Mateo 26:41) Ka morago ga nywaga, Petro, yo a bego a le gona tiragalong yeo, o ile a nea Bakriste-gotee le yena keletšo e swanago. O ngwadile gore: “Bofelo bja dilo ka moka bo batametše. Ka baka leo, e-bang ba hlaphogetšwego monaganong, gomme le be ba phafogilego mabapi le dithapelo.” (1 Petro 4:7, NW) Go molaleng gore thapelo e tšwago pelong e swanetše go ba karolo ya bophelo bja rena bja ka mehla bja Bokriste. Ka kgonthe, go nyakega gore re kgopele Jehofa ka mo go tšwelago pele gore a re thuše go dula re phakgame.—Ba-Roma 12:12; 1 Ba-Thesalonika 5:17.
12. Phapano ke efe magareng ga go phopholetša le go phakgama?
12 Hlokomela gore Petro o ile a ba a re: “Bofelo bja dilo ka moka bo batametše.” Bo batametše gakaaka’ng? Ga go na tsela yeo ka yona batho ba ka šupago letšatši le iri tše lebanyago. (Mateo 24:36) Eupša go na le phapano magareng ga go dulela go phopholetša moo Beibele e sa go kgothaletšego, le go dula re letile bofelo, e lego seo e se kgothaletšago. (Bapiša le 2 Timotheo 4:3, 4; Tito 3:9.) Tsela e nngwe yeo ka yona re ka dulago re letile bofelo ke efe? Ke ka go šetša kudu bohlatse bja gore bofelo bo batametše. Ka gona anke re hlahlobeng mabaka a tshelelago ao a bontšhago gore re phela mehleng ya bofelo ya lefase le le sa boifego Modimo.
Mabaka a Tshelelago a Kgodišago a Bohlatse
13. Boporofeta bja Paulo bjo bo ngwadilwego go 2 Timotheo kgaolo 3 bo go kgodiša bjang gore re phela “mehleng ya bofêlô”?
13 La pele, re bona gabotse go phethagala ga boporofeta bja moapostola Paulo mabapi le ‘mehla ya bofelo.’ Paulo o ngwadile gore: “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; e tlo ba baeki, baipuši, baikxanthši, ba xo iphsina ba lahlile Modimo. Xe O ba bôna, O tlo re ba n’e borapedi; anthe matla a byôna xa ba a dumele. Ba ba byalo O ba xerulê. Batho ba babe le baaroši, bobe bya bôná bo tlo fêla bò xola bò e-ya, bà fora ba bangwê, le bôná bà forwa.” (2 Timotheo 3:1-5, 13) Na ga re bone boporofeta bjo bo phethagala mehleng ya rena? Ke feela bao ba itlhokomološago ditherešo ka boomo bao ba ganago seo! *
14. Mantšu a Kutollo 12:9 ao a lego mabapi le Diabolo a phethagala bjang lehono, gomme ke eng seo se tla tlogago se mo diragalela?
14 La bobedi, re bona mafelelo a go rakwa ga Sathane le batemona ba gagwe legodimong, e lego seo se phethagatšago Kutollo 12:9. Moo re bala gore: “Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.” Se se feleleditše ka madimabe a magolo bakeng sa lefase. Ka kgonthe, go bile le madimabe a magolo bakeng sa batho, kudu-kudu ga e sa le go tloga ka 1914. Eupša boporofeta bjo bo lego go Kutollo bo tlaleletša ka gore ge Diabolo a lahlelwa lefaseng, o a tseba gore ‘o šaletšwe ke lebakanyana feela.’ (Kutollo 12:12) Nakong ye, Sathane o lwa ntwa le balatedi ba tloditšwego ba Kriste. (Kutollo 12:17) Ka ntle le pelaelo re bone mafelelo a tlhaselo ya gagwe mehleng ya rena. * Lega go le bjalo, kgaufsinyane Sathane o tla tswalelelwa sekoting e le gore a “se hlwê [a] aroša dithšaba.”—Kutollo 20:1-3.
15. Kutollo 17:9-11 e nea bjang bohlatse bja gore re phela lebakeng la bofelo?
15 La boraro, re phela mehleng ya “kgoši” ya boseswai le ya mafelelo yeo go bolelwago ka yona boporofeteng bjo bo ngwadilwego go Kutollo 17:9-11. Mo moapostola Johane o bolela ka dikgoši tše šupago, tšeo di emelago mebušo e šupago ya lefase—Egipita, Asiria, Babele, ba-Mede le ba-Peresia, Gerika, Roma le mmušo wa lefase wa mohlakanelwa wa Maisemane le ma-Amerika. Gape o bona le ‘kgoši ya boseswai yeo e tšwago go tšela tše šupago.’ Kgoši ye ya boseswai—e lego ya mafelelo yeo Johane a e bonago—bjale e emela mokgatlo wa Ditšhaba tše Kopanego. Johane o bolela gore kgoši ye ya boseswai “e ya tahlexong,” yeo ka morago ga yona go se sa nago dikgoši tše dingwe tša lefaseng tšeo go bolelwago ka tšona. *
16. Ditherešo phethagalong ya seswantšho sa toro ya Nebukadinetsara di bontšha bjang gore re phela mehleng ya bofelo?
16 La bone, re phela nakong yeo e swantšhetšwago ke maoto a seswantšho sa torong ya Nebukadinetsara. Moporofeta Daniele o ile a hlatholla toro ye e gakantšhago ya seswantšho se segolo se se lego ka sebopego sa motho. (Daniele 2:36-43) Dikarollo tše nne tša tšhipi seswantšhong di emela mebušo e fapa-fapanego ya lefase, go thoma ka hlogo (Mmušo wa Babele) go ya fase go fihla maotong le menwaneng (mebušo yeo e bušago lehono). Mebušo ka moka ya lefase yeo e emelwago seswantšhong seo e iponagaditše. Re phela mehleng yeo e swantšhetšwago ke maoto a seswantšho. Ga go na moo go bolelwago ka mebušo e mengwe yeo e tlago. *
17. Modiro wa rena wa go bolela ka Mmušo o nea bohlatse bjang ka mo go oketšegilego bja gore re phela lebakeng la bofelo?
17 La bohlano, re bona go phethwa modiro wa boboledi wa lefase ka moka, woo Jesu a boletšego gore o be o tla dirwa pejana ga bofelo bja tshepedišo ye. Jesu o itše: “Ditaba tše tše di lokilego tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:14, NW) Lehono, boporofeta bjoo bo gare bo a phethagala ka tekanyo yeo e sa kago ya bonwa. Ke therešo gore go sa na le mašemo ao a sa kago a kgongwa, gomme go ka direga gore ka nako ya Jehofa yeo e beilwego, go tla bulega mojako o mogolo o lebišago modirong o mogolo. (1 Ba-Korinthe 16:9) Lega go le bjalo, Beibele ga e bolele gore Jehofa o tla leta go fihlela ge motho yo mongwe le yo mongwe mo lefaseng a amogetše bohlatse bja gagwe ka noši. Go e na le moo, ditaba tše di lokilego di swanetše go bolelwa go fihlela Jehofa a kgotsofala. Ke moka bofelo bo tla tla.—Bapiša le Mateo 10:23.
18. Go ya ka bohlatse bjo bo lego gona, ke eng seo se tlago go direga ka ba bangwe ba batlotšwa ge masetla-pelo a magolo a thoma, gomme se se ka lemogwa bjang?
18 La botshelela, palo ya barutiwa ba therešo ba tloditšwego ba Kriste e a fokotšega, le ge ba bangwe go bonagala eka ba tla be ba sa le gona lefaseng ge masetla-pelo a magolo a thoma. Bontši bja mašaledi bo tšofetše kudu, gomme go theoša le nywaga palo ya bao ba tloditšwego e le ka kgonthe e be e dutše e fokotšega. Lega go le bjalo, Jesu ge a bolela ka masetla-pelo a magolo o itše: “Xomme xe mehla yeo e ka be e sa fokotšwe, xo ka be xo sa pholoxe motho. Fêla, a tlo fokotšwa ka ’baka la bakxêthwa.” (Mateo 24:21, 22) Ka gona, go molaleng gore ba bangwe ba “bakxểthwa” ba Kriste ba tla be ba sa le gona lefaseng ge masetla-pelo a magolo a thoma. *
Ke Eng Seo se Letšego ka Pele?
19, 20. Ke ka baka la’ng gona bjale go akgofile kudu go feta le ge e le neng pele gore re dule re phafogile gomme re phakgame?
19 Bokamoso bo re huparetše eng? Dinako tše di kgahlišago di sa tla. Paulo o lemošitše gore “letšatši leo la Morêna le tlo tla bo-ka lehodu xe le tla bošexo.” Ge a bolela ka banna bao ba bonagalago ba le bohlale ka tsela ya lefase, o re: “Xe xo tlo thwe: Xo khutšô! Xo iketlilwe! ké mo ba tl’o xo wêlwa xodimo ke thsenyêxô.” Lega go le bjalo, Paulo o kgothatša babadi ba gagwe ka gore: “Byale xomme, a re se keng ra rôbala bo-ka ba bangwê bao. A re phakxameng rè fahloxile.” (1 Ba-Thesalonika 5:2, 3, 6) Ruri, bao ba lebelelago mekgatlong ya batho gore e tliše khutšo le polokego ba iphoufaletša therešo. Batho ba bjalo ba ile le boroko!
20 Tshenyego ya tshepedišo ye ya dilo e tla tla ka mo go sa letelwago. Ka gona, dulang le letile letšatši la Jehofa. Modimo ka boyena o boditše Habakuku gore: ‘Le ka se diege’! Ka kgonthe, ga se gwa ka gwa nyakega kudu gakaakaa gore re dule re phakgame go swana le gona bjale.
[Mengwalo ya ka tlase]
^ ser. 10 Mong wa bahlanka o be a sa beelana nako le bona. Le gona, go be go sa nyakege gore a ba botše ka go tla le go tloga ga gagwe, e bile o be a sa tlamege gore a hlalosetše bahlanka ba gagwe ka seo se bonagalago eka ke go diega.
^ ser. 13 Bakeng sa tlhaloso e nabilego ya boporofeta bjo, bona kgaolo 11 ya puku ya Tsebo e Išago Bophelong bjo bo sa felego, yeo e gatišitšwego ke Watchtower Bible and Tract Society of New York, Inc.
^ ser. 14 Bakeng sa tsebišo e oketšegilego, bona matlakala 180-6 a puku ya Seremo se Segolo sa Kutollo se Batametše!, yeo e gatišitšwego ke Watchtower Bible and Tract Society of New York, Inc.
^ ser. 15 Bona Seremo se Segolo sa Kutollo se Batametše!, matlakala 251-4.
^ ser. 16 Bona kgaolo 4 ya puku ya Ela Hloko Boporofeta bja Daniele!, yeo e gatišitšwego ke Watchtower Bible and Tract Society of New York, Inc.
^ ser. 18 Seswantšhong sa dinku le dipudi, Morwa wa motho o fihla ka letago la gagwe nakong ya masetla-pelo a magolo gomme o dula kahlolong. O ahlola batho motheong wa ge e ba ba ile ba thekga banababo Kriste ba tloditšwego. Tekanyetšo ye ya kahlolo e be e ka se be le morero ge e ba e le gore nakong ya kahlolo, bohle ba banababo Kriste e ka be e le kgale ba tlogile lefaseng.—Mateo 25:31-46.
Na o a Gopola?
• Ke mehlala efe ya Mangwalo yeo e ka re thušago go dula re phakgame?
• Jesu o bontšhitše bjang go nyakega ga go dula re phakgame?
• Ke mabaka afe a tshelelago a bohlatse a a bontšhago gore re phela mehleng ya bofelo?
[Dipotšišo tša Thuto]
[Diswantšho go letlakala 9]
A. H. Macmillan o hlanketše Jehofa ka potego lebaka la mo e ka bago nywaga-some e tshelelago
[Seswantšho go letlakala 10]
Jesu o ile a swantšha barutiwa ba gagwe le bahlanka bao ba dulago ba phakgame