Puku ya Daniele e a Hlaloswa!

BATLA-KOPANONG ba be ba fagahletše go ikhweletša kopi ya bona ya puku yeo e sa tšwago go lokollwa ya matlakala a 320 yeo e rego, Ela Hloko Boporofeta bja Daniele! Ba ile ba ikwa bjang ka puku ye? Ela hloko seo ba bangwe ba ilego ba se bolela.

“Bjalo ka bafsa ba bantši, ke na le bothata bja go thabela go ithuta histori ya bogologolo. Ka gona, ge ke be ke amogela kopi ya-ka ya puku e mpsha ya Ela Hloko Boporofeta bja Daniele! ke be ke sa fagahlela gakaalo go e bala, eupša ke ile ka e leka. A pono e fošagetšego gakaakang yeo ke bego ke e-na le yona! Ye ke e nngwe ya dipuku tše kaone kudu tšeo nkilego ka gahlana le tšona. E tloga e le yeo o ka se e beego fase! Ga ke sa ikwa gore ke bala ka pego e diragetšego nywaga e dikete e fetilego. Ke lekga la pele ke ikwa gore nka ipea boemong bja Daniele. Ke kgona go bona gabotse ka mahlo a kgopolo gore go be go tla ba bjang go tlošwa lapeng la geno, o išwe nageng e šele gomme potego ya gago e lekwe leboelela. Ke le leboga kudu bakeng sa puku ye.”​—Anya.

“Seo se nthušago kudu ke molaetša o sa fošego wa gore Jehofa o laola ka mo go feletšego ditaba tše di kgomago batho ba gagwe. Ka dipono le ditoro tša Daniele gotee le tša ba bangwe bao a ilego a ba hlathollela, go molaleng gore Modimo wa rena le ka mohla a ka se ke a dumelela ditiragalo gore di be ka godimo goba ka tlase ga seo a se rerilego. Se se tiiša kholofelo yeo re nago le yona diswantšhong tša boporofeta tšeo di hwetšwago ka Beibeleng mabapi le lefase le lefsa leo a tla bego a le dirile.”​—Chester.

“Ke thabetše tsela yeo le phedišitšego Daniele ka yona. Ke ile ka ikwa ke tlwaelane kudu le yena ka mokgwa woo le ilego la bontšha dilo tšeo a bego a tshwenyega ka tšona. Ke ile ka kwešiša lebaka leo ka lona Jehofa a ilego a mo hwetša e le yo a rategago. Nakong ya diteko le ditlaišego tša gagwe ka moka, o be a se a tshwenyega ka yena ka noši. O be a tshwenyegile kudu ka Jehofa le leina la Gagwe le lebotse. Ke leboga kudu bakeng sa go dira gore dintlha tše e be tšeo di kwagalago.”​—Joy.

“Se ke seo re bego re dutše re se letetše! Le ka mohla go be go se gwa ka gwa laetšwa tsela yeo ka yona puku ya Daniele ge e le gabotse e šomago go yo mongwe le yo mongwe wa rena. Ka morago ga go bala mo gontši pukung e mpsha mantšiboeng a ka morago ga gore ke e amogele, ke ile ka fo swanelwa ke go ema gomme ke leboge Jehofa ka thapelo.”​—Mark.

“Seo re bego re sa se letela e bile tutuetšo yeo e bego e tla ba le yona baneng ba rena. Ba bogolong ba nywaga e mehlano le e meraro. . . . Ka ge dipego tša Daniele, Hanania, Mišaele le Asaria ka mehla di bile gare ga tšeo ba di ratago kudu ka go Puku Ya-ka ya Ditaba tša Beibele, tsela yeo di beilwego ka yona ka pukung ya Boporofeta bja Daniele e ile ya ba kgoma ka tsela yeo re sa kago ra e lebelela. Gaešita le bonyenyaneng bja bona, go bonagala ba kgona go ipea boemong bja masogana a a lokilego. A mehlala e kgahlišago gakaakang bakeng sa bana ba rena! A sedirišwa se se kgahlišago gakaakang seo le re neilego sona! Re a leboga, re leboga kudu!”​—Bethel.

“Ke ile ka ikwa eka ke na le bašemane bao e lego bafsa ba ba-Hebere ge ba be ba lekwa tumelo; gomme se se ile sa nkgothaletša gore ke hlahlobe tumelo ya-ka. Lepokisana la tlhahlobo leo le nago le sehlogo seo se rego, “O Lemogile Eng?” le gatelela moko wa kgaolo ye ka pelong. Ke leboga gape bakeng sa puku e nngwe yeo e ngwadilwego ka bokgwari.”​—Lydia.