Go Thabela Modimo yo a re Phološago

“Nna ke tla hlalalêla Yêna Morêna, ka thabêla Yêna Modimo wa xo mphološa.”​—HABAKUKU 3:18.

1. Daniele o ile a ba le pono mabapi le eng pele ga go wa ga Babele ka 539 B.C.E.?

LEBAKA la ka godimo ga nywaga e lesome pele ga go wa ga Babele ka 539 B.C.E., moporofeta Daniele yo a tšofetšego o ile a bona pono e kgahlišago. E be e bolelela pele ditiragalo tša lefase tšeo di lebišago go ba go fihla nakong ya ntwa ya makgaola-kgang ya magareng ga manaba a Jehofa le Kgoši ya gagwe yeo e kgethilwego, Jesu Kriste. Daniele o ile a arabela bjang? O itše: “Ka kwa kè fôkôla . . . kè tlabexile ka pônô yeo.”​—Daniele 8:27.

2. Ke ntwa efe yeo Daniele a ilego a e bona ponong, gomme o ikwa bjang ka go batamela ga yona?

² Go thwe’ng ka rena? Re phela mehleng yeo nako e šetšego e gagabile kudu! Re arabela bjang ge re lemoga gore ntwa yeo Daniele a e bonego ponong​—e lego ntwa ya Modimo ya Haramagedone​—e batametše kudu? Re arabela bjang ge re lemoga gore bokgopo bjoo bo pepentšhitšwego boporofeteng bja Habakuku bo apareditše kudu mo e lego gore go fedišwa ga manaba a Modimo go ka se ke gwa phengwa? Go ka direga gore maikwelo a rena a swana le a Habakuku ka noši, bjalo ka ge a hlalositšwe kgaolong ya bo-3 ya puku ya gagwe ya boporofeta.

Habakuku o Rapelela Kgaugelo ya Modimo

3. Habakuku o ile a rapelela bomang, gomme mantšu a gagwe a ka re kgoma bjang?

³ Habakuku kgaolo 3 ke thapelo. Go ya ka temana ya pele e hlaloswa ka difela, e lego dikoša tša manyami goba sello. Moporofeta o rapela bjalo ka ge eka o a ithapelela. Eupša ge e le gabotse, Habakuku o rapelela setšhaba se se kgethilwego sa Modimo. Lehono, thapelo ya gagwe e na le tlhaloso e kgolo go batho ba Modimo  bao ba swaregilego modirong wa go bolela ka Mmušo. Ge re bala Habakuku kgaolo 3 re dutše re nagana ka se, mantšu a yona a re tlatša poifo eupša gape a re tlatša le lethabo. Thapelo goba sefela sa Habakuku di re nea lebaka le tiilego la go thabela Jehofa, Modimo yo a re phološago.

4. Ke ka baka la’ng Habakuku a ile a tšhoga, gomme re ka kgonthišega ka tirišo efe ya matla a Modimo?

⁴ Bjalo ka ge re šetše re bone dihlogong tše pedi tše di fetilego, maemo e be e le a mabe kudu nageng ya Juda mehleng ya Habakuku. Eupša Modimo o be a ka se ke a dumelela gore boemo bjo bo tšwele pele. Jehofa o be a tla gata mogato, go etša ge a ile a dira nakong e fetilego. Ga go makatše ge moporofeta a ile a goeletša ka gore: ‘Morena, ke kwele kgowane ya gago ka tšhoga. Morena, ka tšhoga ditiro tša gago’! O be a bolela’ng? ‘Kgowane ya Jehofa’ e be e le histori e ngwadilwego ya ditiro tše matla tša Modimo, tše bjalo ka tša Lewatleng le Lehwibidu, lešokeng le Jeriko. Habakuku o be a tseba ditiro tše gabotse gomme di ile tša mo tšhoša ka ge a be a tseba gore Jehofa o be a tla buša a diriša matla a gagwe a magolo malebana le manaba a gagwe. Ge re bona bokgopo bja batho lehono, le rena re a tseba gore Jehofa o tla gata mogato bjalo ka ge a ile a dira mehleng ya bogologolo. Na seo se re dira gore re tšhoge? Ee, go bjalo! Lega go le bjalo, re rapela go etša ge Habakuku a ile a dira: “A di yê le nywaxa di phela, di tsebya di e-ya le nywaxa. Xe O ka befêlwa, O se lebalê thlômôxêlô.” (Habakuku 3:2) Ka nako ya Modimo e swanetšego, e lego ‘ge nywaga e e-ya,’ eka a ka diriša matla a gagwe a makatšago. Le gona ka nako yeo, eka a ka gopola go bontšha bao ba mo ratago kgaugelo!

Jehofa o Tšwela Pele Mogwantong!

5. Ke ka tsela efe ‘Modimo a ilego a tla a e-tšwa Themane,’ gomme se se bontšha’ng mabapi le Haramagedone?

⁵ Go tla direga’ng ge Jehofa a e-kwa thapelo ya rena ya go kgopela kgaugelo? Re hwetša karabo go Habakuku 3:3, 4. Sa pele, moporofeta o re: “Modimo-dimo ó tla à e-tšwa Themane; Mokxêthwa ó tla ka ’thabeng tša Parane.” Morago kua mehleng ya moporofeta Moše, Themane le Parane di be di le tseleng ya ba-Isiraele ge ba phatša lešokeng ba lebile Kanana. Ge setšhaba se segolo sa Isiraele se dutše se swere leeto, go be go bonagala Jehofa le yena a be a sepela gomme go be go se na seo se bego se ka mo thibela. Pejana ga ge Moše a e-hwa, o ile a re: “Morêna ó tlile a e-tšwa Sinai, a ba hlabêla à e-tšwa Seire, a xadima à le thabeng ya Perane, a tla a e-tšwa xo bakxêthwa ba dikete-kete [ba barongwa].” (Doiteronomio 33:2) Ge Jehofa a gata mogato malebana le manaba a gagwe ka Haramagedone, o tla bonagatša ka tsela e swanago matla a gagwe ao a sa palelwego ke selo.

6. Go okeletša letagong la Modimo, Bakriste ba ba nago le temogo ba bona’ng?

⁶ Habakuku gape o re: “Letaxô la [Jehofa] le apeša lexodimo, naxa ya ênêla ditumišô. Seetša sa xôna se ka sa mosexarê.” A pono e kgahlišago gakaakang! Ke therešo gore batho ba ka se ke ba bona Jehofa Modimo gomme ba phela. (Ekisodo 33:20) Lega go le bjalo, ge e le bahlanka ba botegago ba Modimo, mahlo a dipelo tša bona a a fahlwa ge ba naganišiša ka bogolo bja gagwe. (Ba-Efeso 1:18) Le gona Bakriste bao ba nago le temogo ba bona selo se sengwe go okeletša letagong la Jehofa. Habakuku 3:4 e phetha ka gore: “Thokô tšohle tš’axwe xwa hlaxa mahlasedi; ké mo xo khutilexo matla ’axwe.” Ee, re a bona gore Jehofa o ikemišeditše go gata mogato, a diriša seatla sa gagwe se setona sa matla a magolo-golo.

7. Go tšwela pele ga Modimo a fenya go bolela eng bakeng sa bao ba rabelago malebana le yena?

⁷ Mogwanto wa Modimo wa phenyo o bolela masetla-pelo go bao ba rabelago malebana le yena. Habakuku 3:5 e re: “Ó êtwa pele ke dinkhu; ó šalwa nthaxo ke mollô.” Ge ba-Isiraele ba be ba batametše mellwaneng ya Naga ya Kholofetšo  ka 1473 B.C.E., ba bantši ba bona ba ile ba rabela, ba ineela boitshwarong bjo bo gobogilego le borapeding bja medimo ya diswantšho. Ka baka leo, ba fetago 20 000 ba ile ba bolawa ke mauba a malwetši ao a bego a rometšwe ke Modimo. (Numeri 25:1-9) Kgaufsinyane, ge Jehofa a gwanta go ya “ntweng ya mohla-moxolo wa Modimo Ra-matla-ohle,” bao ba rabelago malebana le yena ba tla tlaišega ka tsela e swanago ka baka la dibe tša bona. Ba bangwe mo gongwe ba tla ba ba bolawa ke mauba a kgonthe a malwetši.​—Kutollo 16:14, 16.

8. Go ya ka Habakuku 3:6, ke eng seo se boloketšwego manaba a Modimo?

⁸ Bjale kwaa tlhaloso e kwalago gabotse ya moporofeta ya go hlalosa madira a Jehofa ao a lego ntweng. Go Habakuku 3:6 (PK) re bala gore: “A [Jehofa Modimo] ema a lekanya naga, a lebelela a thothometša ditšhaba; dithaba tša bogologolo tša gašanywa, gomme meboto ya kgale ya pherimela; a tšea ka ditsela tše di sa felego [“mesepelo ya kgale,” NW].” Jehofa o thoma ka go “ema” go swana le molaodi wa madira yo a lekolago mogola wa ntwa. Manaba a gagwe a thothomela ka letšhogo. A bona mophenkgišani wa ona gomme a a tšhoga, a a ferekana. Jesu o ile a bolela e sa le pele ka nako ya ge “merafô yohle ya lefase e tlo hlaboša sellô.” (Mateo 24:30) Ba tla lemoga ba šetše ba šiilwe ke nako gore ga go na yo a ka emeletšanago le Jehofa. Mekgatlo ya batho​—gaešita le yeo e bonagalago e tsepame ka mo go tiilego go etša “dithaba tša bogologolo” le “meboto ya kgale”​—e tla pšhatlagana. Go tla swana le “mesepelo ya kgale” ya Modimo, go swana le kamoo a ilego a gata mogato ka gona mehleng ya bogologolo.

9, 10. Habakuku 3:7-11 e re gopotša ka eng?

⁹ ‘Bogale bja Jehofa bo ile bja tukela’ manaba a gagwe. Eupša o tla diriša dibetša dife ntweng? Theetša ge moporofeta a di hlalosa, a re: “Borá bya xaxo bo a bônala; mara-mašupa. Ké lentšu lela la ‘tuu’. Ó fatotše naxa ka dinoka. Dithaba di Xo bone tša rôtla; mafula a meetse a a feta, bodiba bo duma modumô, bò iša matsôxô a byôna xodimo. ’Tšatši le kxwedi di khuta dintlong, mesêbê ya xaxo xe e xadima; di široxa xò pekenya dikxadima tša marumô ’axo.”​—Habakuku 3:7-11.

¹⁰ Mehleng ya Jošua, Jehofa o ile a emiša letšatši le kgwedi ge a be a bontšha matla a gagwe ka tsela e makatšago. (Jošua 10:12-14) Boporofeta bja Habakuku bo re gopotša gore Jehofa o tla diriša matla a swanago ka Haramagedone. Ka 1513 B.C.E., Jehofa o ile a bontšha borena bja gagwe godimo ga madiba a meetse a lefase ge a be a diriša Lewatle le Lehwibidu go fediša madira  a Farao. Ka morago ga nywaga e 40, Noka ya Jorodane yeo e bego e boa ka mariba ga se ya ka ya šitiša mogwanto wa ba-Isiraele wa phenyo ge ba be ba tsena Nageng ya Kholofetšo. (Jošua 3:15-17) Mehleng ya moporofeta wa mosadi Debora, dipula tša matlorotloro di ile tša gogola dikoloi tša ntwa tša lenaba la Isiraele e lego Sisera. (Baahlodi 5:21) Jehofa o tla diriša matla a swanago a mafula, dipula tša matlorotloro le madiba a meetse ka Haramagedone. Modumo le legadima le tšona di ka seatleng sa gagwe, go etša lerumo goba mokotla wo o tletšego mesebe.

11. Go tla direga’ng ge Jehofa a lokolla matla a gagwe a magolo?

¹¹ Ke therešo gore go tla šiiša ge Jehofa a lokolla matla a gagwe a feletšego a magolo-golo. Mantšu a Habakuku a bontšha gore bošego bo tla fetoga mosegare gomme mosegare o tla taga kudu go feta kamoo letšatši le ka o tagišago ka gona. Go sa šetšwe gore tlhaloso ye ye e buduletšwego ya boporofeta ya Haramagedone ke ya kgonthe goba ya seswantšhetšo, therešo ke gore​—Jehofa o tla fenya gomme a ka se dumelele le lenaba le tee gore le phonyokge.

Phologo e Kgonthišeditšwe Bakeng sa Batho ba Modimo!

12. Ke eng seo Modimo a tla se dirago manabeng a gagwe, eupša ke bomang bao ba tlago go phološwa?

¹² Moporofeta o tšwela pele go hlalosa go fediša ga Jehofa manaba a Gagwe. Go Habakuku 3:12 (PK) re bala gore: “Wa na wa phatša naga o befetšwe, wa pšhatla ba ditšhaba ka bogale.” Lega go le bjalo, Jehofa a ka se ke a fediša ka go se kgethe. Batho ba bangwe ba tla phološwa. Habakuku 3:13 (PK) e re: “Wa na wa tšwa dira go phološa setšhaba sa gago, go phološa motlotšwa wa gago.” Ee, Jehofa o tla phološa bahlanka ba gagwe ba botegago ba tloditšwego. Ka nako yeo Babele o Mogolo, mmušo wa lefase wa bodumedi bja maaka, e tla be e fedišitšwe ka mo go feletšego. Lega go le bjalo, lehono ditšhaba di leka go fediša borapedi bjo bo sekilego. Go se go ye kae, bahlanka ba Jehofa ba tla hlaselwa ke madira a Gogo wa Magogo. (Hesekiele 38:1–39:13; Kutollo 17:1-5, 16-18) Na tlhaselo yeo ya Sathane e tla atlega? Aowa! Ka nako yeo Jehofa o tla fola manaba a gagwe a galefile, a a gataka bjalo ka mabele lebatong la go folela. Eupša o tla phološa bao ba mo rapelago ka moya le ka therešo.​—Johane 4:24.

13. Habakuku 3:13 e tla phethagatšwa bjang?

¹³ Phedišo e feletšego ya ba babe e bolelwa e sa le pele ka mantšu a: “Ntlo ya o mobe O [Jehofa] e rutla hlaka; methêô O epola xwa šala lentswê le le medilexo.” (Habakuku 3:13) “Ntlo” ye ke tshepedišo e kgopo yeo e bilego gona ka tlase ga tutuetšo ya Sathane Diabolo. E tla šwalalanywa. “Mothêô” goba baetapele ba ba lwago le Modimo, ba tla pšhatlaganywa. Tshepedišo ka moka e tla fedišwa go fihla ka motheo wa yona. E ka se sa hlwa e e-ba gona. Yeo e tla ba kimollo e kgahlišago gakaakang!

14-16. Go ya ka Habakuku 3:14, 15, ke eng seo se tlago go diragalela batho ba Jehofa le manaba a bona?

¹⁴ Ka Haramagedone, bao ba lekago go fediša “motlotšwa” wa Jehofa ba tla gakantšhwa. Go ya ka Habakuku 3:14, 15, moporofeta o bolela le Modimo ka gore: “Balaodi ba bôná O ba tia hlôxô ka melamo ya bôná. Ké ba xo re šwahlêla wa ledimo xore ba re šwalalanyê; ké ba xo nyakalala xe ba ja mmôtlana bà utame. Dipitsi tša xaxo O tla natšô’ ka lewatlê, ka bela-bela ya meetse-maxolo.”

¹⁵ Ge Habakuku a re ‘balaodi . . . ba šwahlela wa ledimo gore ba ntšhwalalanye,’ moporofeta o bolelela bahlanka ba Jehofa ba tloditšwego. Go swana le bahlakodi bao ba laletšego, ditšhaba di tla pharumela barapedi ba Jehofa gore di ba fediše. Manaba a a Modimo le a batho ba gagwe a tla “nyakalala,” e le ge a holofetše gore a tla atlega.  Bakriste ba botegago ba tla bonagala e le ba fokolago, bjalo ka “mmôtlana.” Eupša ge madira ao a lwago le Modimo a thoma tlhaselo ya ona, Jehofa o tla dira gore a tsogelane matla seng sa ona. A tla dirišetša dibetša tša ona goba “melamo” go hlasela bahlabani ba ona ka noši.

¹⁶ Eupša go tla latela tše dintši kgaufsinyane. Jehofa o tla diriša madira a moya ao a phagametšego motho go feleletša phedišo godimo ga manaba a gagwe. A diriša “dipitsi” tša madira a gagwe a legodimong ka tlase ga Jesu Kriste, o tla tšwela pele a lebile phenyong go phatša “lewatlê” le “meetse-maxolo,” ke gore, lešaba le le akga-akgegago la manaba a batho. (Kutollo 19:11-21) Ka morago ba kgopo ba tla fedišwa lefaseng. A pontšho e matla gakaakang ya matla a Modimo gotee le toka ya gagwe!

Letšatši la Jehofa le a tla!

17. (a) Ke ka baka la’ng re ka ba le kgodišego ka phethagalo ya mantšu a Habakuku? (b) Re ka swana bjang le Habakuku ge re sa letile letšatši le legolo la Jehofa?

¹⁷ Re ka kgodišega gore mantšu a Habakuku a tla phethagala kgaufsinyane. A ka se ke a diega. O arabela bjang tsebong ye yeo o e hwetšago e sa le pele? Gopola, Habakuku o be a ngwala a le ka tlase ga pudulelo ya Modimo. Jehofa o tla gata mogato, gomme lefaseng go tla ba le tshenyo e kgolo ge seo se direga. Ga go makatše ge moporofeta a ngwadile gore: “Ke itše go kwa tšeo, teng ya-ka ya huduega, melomo ya-ka ya  ema-ema, mašapo a ka a tsenwa ke go bola, ka rekologa mo ke lego gona. Lega go le bjalo ke tlo letela letšatši la tlalelo; ke tlo ikhomolela letšatši la ge setšhaba se tsogelwa ke yo a tlog’o se tlaiša ka madira a gagwe.” (Habakuku 3:16, PK) Habakuku o be a tloga a ferekane​—gona e le ka mo go kwešišegago. Eupša na tumelo ya gagwe e ile ya šišinywa? Le gatee! O be a ikemišeditše go letela letšatši la Jehofa a sa fele pelo. (2 Petro 3:11, 12) Na bjoo ga se boemo bja kgopolo bjo re nago le bjona? Ruri go bjalo! Re na le tumelo e tletšego ya gore boporofeta bja Habakuku bo tla phethagala. Lega go le bjalo, re tla leta ka go se fele pelo go fihlela e e-ba nako ya gona.

18. Le ge Habakuku a be a letile mathata, o be a e-na le boemo bofe bja kgopolo?

¹⁸ Ntwa ka mehla e tliša mathata, gaešita le go bao mafelelong e tlago go ba bafenyi. Dijo di ka fela. Dithoto di ka lobja. Maemo a bophelo a ka theoga. Ge e ba seo se re diragalela, re tla arabela bjang? Habakuku o be a e-na le boemo bja kgopolo bjo bo beago mohlala, ka gobane o itše: “Fêla, le xe moxó o ka lesa xo khukhuša, le merara e se enywe selô, le mehlware e ka šitwa, le mašemo a se nthše dijô, le xe dinku di ka fêla merakeng, xwa hlôkwa kxomo merakeng, Le xe xo ka ba byalo, nna ke tla hlalalêla Yêna Morêna, ka thabêla Yêna Modimo wa xo mphološa.” (Habakuku 3:17, 18) Habakuku ge e le gabotse o be a letetše mathata, mohlomongwe le tlala. Lega go le bjalo, ga se a ka a lahlegelwa ke lethabo la gagwe la go thabela Jehofa, yoo phološo ya gagwe e bego e e-tšwa go yena.

19. Bakriste ba bangwe ba hlagelwa ke mathata afe, eupša re ka kgodišega ka eng ge e ba re etiša Jehofa pele maphelong a rena?

¹⁹ Lehono, le pele ntwa ya Jehofa malebana le bakgopo e ka thoma, ba bantši ba tlalelong e šoro. Jesu o boletše e sa le pele gore dintwa, ditlala, ditšhišinyego tša lefase le mauba a malwetši e be e tla ba karolo ya ‘pontšho ya go ba gona ga gagwe’ a le matleng a mmušo. (Mateo 24:3-14; Luka 21:10, 11) Ba bantši ba barapedi-gotee le rena ba dula dinageng tšeo di tlaišwago kudu ke phethagalo ya mantšu a Jesu, gomme ba feleletša ba le mathateng a magolo kudu. Bakriste ba bangwe ba ka kgomega ka tsela e swanago nakong e tlago. Go ba bantši ba rena, go na le kgonagalo e kgolo ya gore ‘mogo o se khukhuše’ pele bofelo bo fihla. Lega go le bjalo, re tseba lebaka leo dilo tše di diregago ka lona gomme seo se re fa matla. Go feta moo, re hwetša thekgo. Jesu o holofeditše gore: “Sa pele Le tsomê mmušô wa Modimo le tokô ya [Modimo]; ké mo Le tl’o xo ekeletšwa ka tšeo ka moka.” (Mateo 6:33) Seo ga se nee kgonthišetšo ya bophelo bja boiketlo, eupša se re kgonthišetša gore ge e ba re etiša Jehofa pele maphelong a rena, o tla re hlokomela.​—Psalme 37:25.

20. Go sa šetšwe mathata a nakwana, re swanetše go ikemišetša go dira’ng?

²⁰ Go sa šetšwe mathata a nakwana ao re ka swanelwago ke go lebeletšana le ona, re ka se ke ra lahlegelwa ke tumelo matleng a Jehofa a phološago. Banababo rena le dikgaetšedi ba bantši Afrika, Yuropa Bohlabela le mafelong a mangwe ba swanelwa ke go lebeletšana le mathata a feteletšego, eupša ba tšwela pele ba “thabêla Yêna Modimo.” Ka go swana le bona, anke le ka mohla re se ke ra kgaotša go dira se se swanago. Gopola gore Morena wa Legohle Jehofa ke Mothopo wa “matla a magolo.” (Habakuku 3:19, NW) A ka se ke a re nyamiša. Ga go na pelaelo gore Haramagedone e tla tla, e bile ga go belaetše gore lefase le lefsa le le holofeditšwego la Modimo le tla latela. (2 Petro 3:13) Ka nako yeo “lefase le tlo tlala tsebô ya letaxô la Morêna, byalo ka lewatlê lè enetšwe ke meetse.” (Habakuku 2:14) Go fihlela ge nako yeo e kgahlišago e fihla, anke re lateleng mohlala o mobotse wa Habakuku. Anke ka mehla re ‘hlalaleleng yena Morena gomme re thabele yena Modimo yo a re phološago.’

Na o a Gopola?

• Thapelo ya Habakuku e ka re kgoma bjang?

• Ke ka baka la’ng Jehofa a tšwela pele mogwantong?

• Boporofeta bja Habakuku bo re’ng ka phologo?

• Re swanetše go letela letšatši le legolo la Jehofa re e-na le boemo bofe bja kgopolo?

[Dipotšišo tša Thuto]

[Seswantšho go letlakala 23]

Na o tseba gore Modimo o tla diriša dibetša tša mohuta mang malebana le ba kgopo ka Haramagedone?