Bagoeledi ba Mmušo ba a Bega

Go Thuša Batho ba Mehuta ka Moka Kua Netherlands

ABORAHAMA e be e le monna wa tumelo e sa tlwaelegago. Moapostola Paulo o boletše gore Aborahama ge a be a “bitšwa” o ile a theetša lentšu la Modimo gomme a “tsoxa a sepela à sa tsebe mo a yaxo.” Ka morago ga ge a hudušitše lapa la gagwe ka moka, Aborahama o ile a “diilêla naxeng yeo a e holofedišitšwexo” lebaka la nywaga e lekgolo ya bophelo bja gagwe yeo e bego e sa šetše.​—Ba-Hebere 11:8, 9. 

Ka mo go swanago lehono, tše dintši tša Dihlatse tša Jehofa di amogetše tlhohlo ya go hudugela nageng e nngwe e le gore di hlankele moo go nyakegago thušo e kgolo gona. Tše dingwe di ile tša ithuta maleme a fapa-fapanego e le gore di ka nea bohlatse go bašele bao ba hudugetšego dinageng tša gabo tšona. Bjalo ka ge mehlala e latelago e bontšha, moya wo o mobotse o butše “mojako o mogolo o išago modirong” Netherlands, moo badudi ba milione go ba dimilione tše 15 ba tšwago dinageng tše dingwe.​—1 Ba-Korinthe 16:9, NW.

□ Bahram, yo e kilego ya ba mohlahli wa papadi ya tša go iphemela ya Kung Fu, o tšwa nageng ya ka Bohlabela bja Magareng. O ile a hwetša kopi ya Beibele le dipuku tše dingwe tša Watch Tower. Ka kgwedi Bahram o ile a lemoga gore o be a hweditše therešo. Go ile gwa thongwa thuto le yena le mosadi wa gagwe, eupša go be go na le bothata​—morutiši wa bona wa Beibele o be a sa kgone go bolela leleme la bona. Ba be ba boledišana ka ditšhupetšo tša mmele, gomme ba gopola gore ba be ba bolela “ka matsogo le maoto.” Ge nako e dutše e tšwela pele Bahram le mosadi wa gagwe ba ile ba kgona go hwetša phuthego yeo go yona go bego go bolelwa leleme la gabo bona, gomme ka morago ga moo ba ile ba dira tšwelopele ka go akgofa. Bahram ga bjale ke Hlatse e kolobeditšwego.

□ Banyalani ba babulamadibogo ba ma-Dutch ba ile ba batamela monna wa mo-Indonesia yo a bego a eme ka pele ga lebenkele le legolo. O be a maketše ka lethabo ge banyalani ba ba be ba bolela le yena ka leleme la gagwe. Ka gona, go ile gwa dirwa ditokišetšo bakeng sa gore a etelwe legaeng la gagwe. Go ile gwa lemogwa gore o be a ile a dula Russia ka nywaga e fetago 20, e lego ka nako yeo a ilego a ba setsebi sa malwetši a basadi. O be a bolela gore ke moila-Modimo, eupša o ile a dumela ka gore nako e nngwe le e nngwe ge a be a belegiša, ka ntle le pelaelo o be a fo makala ka gore, “Mmele wa motho o phethagetše gakaakang! A mohlolo o mogolo gakaakang!” O ile a dumela go ithuta Beibele, gomme go se go ye kae a thoma go dumela gore go na le Mmopi yo a nago le taba le batho. (1 Petro 5:6, 7) Ga bjale ke ngwanabo rena yo a kolobeditšwego gomme o hlankela le phuthego ya se-Indonesia kua Amsterdam.

□ Kua Rotterdam, bjo bongwe bja maema-kepe a magolo lefaseng, sehlopha sa babulamadibogo se fetogile seo se nago le bokgoni go ruteng dihlopha tša maleme tše di fapa-fapanego tšeo di tlago go laolla le go laiša letšatši le lengwe le le lengwe. Ka baka la modiro wo wa sehlopha se se mafolofolo sa baboledi, basesiši ba mmalwa, go akaretša le molaodi wa sekepe, molaodi-mogolo wa dikepe le yo e bego e le mohlapetši ba ile ba amogela therešo. Le bona ka mo go swanago ba thuša ka go phatlalatša ditaba tše di lokilego tša Mmušo wa Modimo lefaseng ka bophara.​—Mateo 24:14.

Bjalo ka dikarolong tše dingwe tša lefase, Dihlatse tša Jehofa kua Netherlands di ikemišeditše go kgatha tema ya tšona go boleleng ditaba tše di lokilego tša ka mo go sa felego go ditšhaba tšohle, meloko yohle, maleme ohle le merafo yohle.​—Kutollo 14:6.