Keletšo e Bohlale ya Mma

“Ngwan’a-ka! Theetša tayô ya tat’axo; O se nyatšê thutô ya mm’axo.”​—Diema 1:8.

BATSWADI ba rena​—tatago rena le mmago rena​—e ka ba mothopo o bohlokwa wa kgothatšo, thekgo le keletšo. Puku ya Beibele ya Diema e re botša ka kgoši e nngwe ya mofsa e lego Lemuele, yo a ilego a amogela “molaetša o matla” wa “phošollo” go tšwa go mmagwe. Mantšu a a ngwadilwe go Diema kgaolo 31, gomme le rena re ka holwa ke keletšo ye e bohlale ya mma.​—Diema 31:1, NW.

Keletšo e Swanetšego Kgoši

Mmago Lemuele o thoma ka dipotšišo tše mmalwa tše di godišago kgahlego ya rena: “Nka re’ng, Morwa wa-ka! Morwa wa mmele wa-ka, nka re’ng? Nka re’ng? Wene Morwa wa dikênô tša-ka!” Kgopelo ya gagwe yeo e bušeleditšwego gararo e bontšha go tshwenyega ga gagwe kudu ka gore morwa wa gagwe a ele hloko mantšu a gagwe. (Diema 31:2) Go tshwenyega ga gagwe ka bophelo bjo bobotse bja moya bja bana ba gagwe go beela batswadi ba Bakriste mohlala o mobotse lehono.

Mabapi le bophelo bjo bobotse bja morwa wa gagwe, ke eng seo se ka tshwenyago mma go feta meletlo ya mašata le bohlola ka beine, basadi le kopelo tšeo di tumilego? Mmago Lemuele o ile a opa kgomo lenaka ka gore: “Bonatla bya xaxo se bo neêlê basadi.” O hlaola boitshwaro bjo gobogilego e le ‘seo se lebišago go senyeng magoši.’​—Diema 31:3, bapiša le NW.

Go nwa go feta tekano ga se gwa swanelwa go tšeelwa fase. O lemoša ka gore: “Di rônana le boxoši; Lemuele, di rônana le boxoši, xe kxoši e e-nwa sebelá.” Ke bjang kgoši e ka neago kahlolo e swanetšego le e hlaphogetšwego gomme ya se ke ya ‘lebala molao le go kgopamiša ditaba tša bahumanegi’ ge e ba e dula e tagilwe?​—Diema 31:4-7, bapiša le PK.

Ka mo go fapanego, ka go dula e ipolokile ditirong tše bjalo tše mpe, kgoši e tla kgona go ba le “moahlolêlô wa xo loka, [e] êmêlê ba madi-mabe le badiitšana.”​—Diema 31:8, 9. 

Gaešita le ge bafsa ba Bakriste e ka se be “dikxoši” lehono, keletšo e bohlale ya mmago Lemuele ke yeo e tlogago e le nakong, ge e ba e se go feta moo. Go diriša bjala gampe, go diriša motšoko le boitshwaro bjo bo gobogilego bja botona le botshadi ke tšeo di atilego magareng ga bafsa mehleng yeno, gomme ke gabohlokwa gore bafsa ba Bakriste ba ele hloko ge batswadi ba bona ba ba nea ‘melaetša e boima.’

Mosadi wa Sethakga

Bo-mma ba na le tshwanelo ya go tshwenyega ka ditebelelo tša lenyalo tša barwa ba bona bao ba batamelago go ba batho ba bagolo. Mmago Lemuele ka morago o ile a lebiša tlhokomelo ya gagwe go dika tša mosadi wa makgonthe. Ka ntle le pelaelo, lesogana  le tla holega kudu ka go ela hloko pono ya mosadi tabeng ye ya bohlokwa.

Go temana 10, “mosadi wa sethakxa” o swantšhwa le dipheta tše di sa hwetšwego gabonolo le tše bohlokwa kudu tšeo mehleng ya Beibele di bego di hwetšwa feela ka go dira maiteko a magolo. Ka tsela e swanago, go hwetša mosadi wa sethakga go nyaka maiteko. Go e na le go kitimela go tsena lenyalo ka go fagahla, lesogana le tla dira gabotse ge le ka ipha nako e lekanego ya gore le kgethe. Ka morago, go na le kgonagalo ya gore le tla swarela godimo selo se bohlokwa seo le se hweditšego.

Ge e le mabapi le mosadi wa sethakga, Lemuele o ile a botšwa gore: “Pelo ya mong wa xaxwe e dula è mmotile.” (Temana 11) Ka mantšu a mangwe, ga se a swanela go gapeletša gore mosadi wa gagwe a hwetše tumelelo ya gagwe tabeng e nngwe le e nngwe. Ee, balekane ba lenyalo ba swanetše gore ba boledišane pele ba ka dira diphetho tše dikgolo, tše bjalo ka tšeo di akaretšago go reka dilo tšeo di bitšago kudu goba tsela ya go godiša bana ba bona. Poledišano mabakeng a e tlaleletša tlemong ya kgaufsi magareng ga bona.

Ee, mosadi wa sethakga o na le dilo tše dintši tšeo a ka di dirago. Go ditemana 13 go ya go 27 go lokeleditšwe keletšo le melao ya motheo yeo basadi ba mehla le ge e le efe ba ka e šomišago bakeng sa go hola malapa a bona. Ka mohlala, ka baka la ditheko tše di hlatlogago tša diaparo le fenitšhara, mosadi wa sethakga o ithuta go ba yoo a itirelago ka diatla tša gagwe le yo a seketšago e le gore lapa la gagwe e be leo le aparago gabotse le ka tsela e bogegago. (Ditemana 13, 19, 21, 22) Bakeng sa go fokotša sekoloto sa dijo tša lapa, o bjala seo a ka se kgonago gomme o reka ka kelohloko.​—Ditemana 14, 16.

Go molaleng gore mosadi yo ga a je “bušwa bya bobodu.” O šoma ka thata gomme o rulaganya mešomo ya ntlo ya gagwe ka bokgoni. (Temana 27) O itlema “mathêka, a dira ka matla,” e lego seo se bolelago gore o itokišeletša go šoma mešomo e thata. (Temana 17) O tsoga pele letšatši le hlaba bakeng sa go thoma mošomo wa gagwe wa letšatši, gomme o šoma ka mafolofolo go fihla e e-ba bošego. Go bjalo ka ge eka lebone leo le edišetšago mošomo wa gagwe le dula le tuka.​—Ditemana 15, 18.

Go feta tšohle, mosadi wa seroto ke motho yo a sekametšego dilong tša moya. O boifa Modimo le go mo rapela ka tlhompho e tseneletšego le tlhompho ya borapedi. (Temana 30) Le yena ka mo go swanago o thuša monna wa gagwe go tlwaetša bana ba bona go dira ka mo go swanago. Temana 26 e re: ‘Ka bohlale,’ o ruta bana ba gagwe, gomme “’leme la xaxwe le ruta batho botho.”

Monna yo a Nago le Bokgoni

Bakeng sa go kgahliša mosadi wa sethakga, Lemuele o be a swanetše go phetha boikarabelo bja monna yo a nago le bokgoni. Mmago Lemuele o mo gopotša ka tše mmalwa tša tše.

Monna yo a nago le bokgoni o tla hwetša pego e botse go tšwa go “bagolo ba naga.” (Diema 31:23, PK) Se se bolela gore e tla ba yo a nago le bokgoni, yo a botegago, yo a ka botwago le yo a boifago Modimo. (Ekisodo 18:21; Doiteronomio 16:18-20) Ka go rialo, o tla “tsebja dikgorong,” moo banna bao ba tumilego ba kopanago gona bakeng sa go rera ditaba tša motse. Gore a ‘tsebje’ bjalo ka monna yoo a boifago Modimo, o tla swanela ke gore e be yoo a nago le teka-tekano le gona a šome ka go dumelelana le bagolo ba “naga,” yeo mohlomongwe e bolelago tikologo goba selete.

Ga go pelaelo gore mmago Lemuele a bolela go tšwa phihlelong ya gagwe ka noši, o gopotša morwa wa gagwe mabapi le bohlokwa bja go bontšha tebogo bakeng sa yo e tlago go ba mosadi wa gagwe. Ga go na motho yo mongwe lefaseng yo a tla mo ratago go mo feta. Ka gona, anke o nagane ka maikwelo a tseneletšego lentšung la gagwe ge a bolela pele ga bohle gore: “Basadi ba dinatla ké ba bantši; xo hlôkwa wa xo phala wêna.”​—Diema 31:29.

Go molaleng gore Lemuele o ile a thabela keletšo ya mmagwe e bohlale. Ka mohlala, go temana ya pele re lemoga gore o bolela ka mantšu a mmagwe bjalo ka ge eka a bolelwa ke yena. Lega go le bjalo, o ile a tšeela godimo “phošollo” ya mmagwe gomme a holwa ke keletšo ya gagwe. Eka le rena ka mo go swanago re ka hwetša mohola go tšwa ‘molaetšeng wo o matla’ ka go diriša melao ya motheo ya wona maphelong a rena.

[Diswantšho go letlakala 31]

Mosadi wa sethakga ga a je “bušwa bya bobodu”