Ditaba tše di Lokilego Bakeng sa Bohle

KE TŠONA feela ditaba tše di lokilego tšeo di hwetšagalago ka ntle le tefo go bohle. Ke ditaba tše di lokilego tša Mmušo wa Modimo le tša phološo ka go bontšha tumelo go Jesu Kriste. Di akaretša ditherešo ka moka tšeo Jesu a boletšego ka tšona le tšeo barutiwa ba ilego ba ngwala ka tšona.

Le ge banna ba bogologolo ba be ba holofela Modimo gomme ba e-na le tumelo ka go ba le tsebo ka Yena, merero ya Modimo le botho bjo bo sa swanelago pele di ile tša “bonaxatšwa mehleng yeno ka xo bônaxala xa Mophološi wa rena Jesu Kriste, e a fedišitšexo lehu, a tšweletša bophelô le xo se hwe ka seetša sa Ebangedi.”—2 Timotheo 1:9, 10.

Nywaga-kgolong ya pejana Modimo o be a ile a bolela ditaba tše di lokilego go Aborahama, ka go rialo a bontšha tsela yeo ka yona a rerilego go nea ditaba tše di lokilego. O ile a re: “Meloko ka moka ya lefase e tlo šexofatšwa ka wêna.” (Ba-Galatia 3:8) Ka morago Jehofa o ile a bolela ka go bolelwa ga ditaba tše di lokilego ka moporofeta Jesaya. Jesu Kriste o badile boporofeta bjo ge a be a le sinagogeng ya Natsaretha gomme ka morago a re: “Lehono, xe tše di ngwadilwexo fá di kwala ditsebeng tša lena, kê xore di tšweletše.” (Luka 4:16-21) Boporofeta bja Jesaya bo hlalositše morero le mafelelo a ditaba tše di lokilego tše di bego di tlobolelwa, kudu-kudu go tloga nakong ya go tla ga Mesia.—Jesaya 61:1-3.

Tšwelopele ya Ditaba tše di Lokilego

Matswalong a Jesu morongwa o tsebišitše badiši gore: “Se boifeng! Bônang, ke Le botša taba e botse ya thabô e kxolo, e tl’o xo ba ya sethšaba ka moka.” (Luka 2:10) Johane Mokolobetši o lokišeditše Jesu tsela ka go bolela ditaba tše di lokilego, a botša ba-Juda gore: “Sokoloxang, xobane mmušô wa maxodimo o batametše.”—Mateo 3:1, 2.

Jesu o boletse ka boboledi bja Johane a re: “Xo tloxa mehleng ya Johane Mokolobetši, le byale, mmušô wa maxodimo o tsênwa ka boxale; ’me baxale kê bôná ba o thopaxo.”—Mateo 11:12.

Ka morago ga lehu la Jesu le tsogo ya gagwe, o ile a nea balatedi ba gagwe taelo e rego: “Ke xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Gape o ba boditše le gore boboledi bja bona bo tla fihla “maxomong a lefase.”—Ditiro 1:8.

Eupša mo e ka bago lebaka la nywaga e meraro le seripa ka morago ga moo, moya o mokgethwa o hlahlile barutiwa go dira modiro wa  bona wa boboledi go ba-Juda le ba-Samaria feela. Ka morago Petro o ile a romelwa ke Modimo gore a tlise ditaba tše di lokilego go ba lapa la molaodi wa madira a Roma e lego Koronelio. (Ditiro, dikgaolo 10, 11) Go tloga ka nako yeo go ya pele, ditaba tše di lokilego di ile tša bolelwa ka tekanyo e kgolo kudu ka mo go ka kgonegago karolong e nabilego kudu ya naga.

Go sa šetšwe tšwelopele ya ditaba tše di lokilego, moapostola Paulo o ile a lemoša gore ba bangwe ba be ba leka go menola tumelo ya kgonthe ka go bolela “Ebangedi e šele.” (2 Ba-Korinthe 11:4; Ba-Galatia 1:6, 7) O be a bolela ka bohlanogi bjo bo bego bo tla tšwelela gomme a bontšha gore ’sephiri sa go hloka molao’ se be se šetše se šoma. O lemošitše Bakriste gore ba gopole morero wa ditaba tše di lokilego le go ema ba tiile le go kgomarela go swara ga bona mekgwa yeo e hlahlwago ke moya yeo ba ithutilego yona ka baapostola.—2 Ba-Thesalonika 2:3, 7, 14, 15.

Manaba a ditaba tše di lokilego a ile a bakela Bakriste tlaišego e kgolo gomme gwa nyakega gore baapostola ba lwe ka thata pele ga babuši go lweleng le go hlomeng ditaba tše di lokilego ka molao e le gore di ka gašwa ka bolokologi bjo bogolo ka mo go ka kgonegago.—Ba-Filipi 1:7, 16.

Bohlokwa bja go Bolela Ditaba tše di Lokilego

Go swarelela ka potego le go tšwela pele ka go tsebatša ditaba tše di lokilego go ile gwa lebelelwa ke Jesu e le gabohlokwa kudu go feta bophelo bja motho bja gona bjale. (Mareka 8: 35) Motho a ka lahlegelwa ke dilo tša gagwe tšeo a di ratago kudu, gaešita le go lebeletšana le ditlaišo, eupša mafelelong o tla amogela tše lekgolo mo nakong ye, a “hwetša malapá, le bana babo, le dikxaetšedi, le bô-mm’axwe, le bana, le mašemo, . . . ’me mehleng e tl’o xo tla ô tlo hwetša bophelô byo bo sa felexo.”—Mareka 10:29, 30.

Maikemišetšo a motho yo mongwe le yo mongwe a go bolela ditaba tše di lokilego e swanetše go ba a lokilego, gape o swanetše go di bolela go tšwa pelong a šušumeletšwa ke lerato la go rata bao ba mo kwago. Baapostola ba be ba na le tebogo kudu ka bohlokwa bjo bo neago bophelo bja ditaba tše di lokilego gomme ba be ba tladitšwe ka moya wa Modimo le ka lerato moo ba ilego ba se ke ba phatlalatša ditaba tše di lokilego feela eupša ba neela le ’meoya ya bona’ go bao ba bego ba theetša boboledi bja bona.—1 Ba-Thesalonika 2:8, NW.

Modimo o be a dirile tokišetšo ya gore bagoeledi ba ditaba tše di lokilego ba na le tshwanelo ya go amogela thušo ya dilo tše di bonagalago go bao ba bego ba ba išetša tšona. (1 Ba-Korinthe 9:11-14) Eupša Paulo le bagwera ba gagwe ba be ba tšeela godimo kudu tokelo ya bona bjalo ka barwadi ba ditaba tše di lokilego moo e lego gore ba be ba phema ka kelohloko go dira ditseno tša ditšhelete ka tokelo yeo, goba gaešita le go dira gore go bonagale eka ba dira bjalo mabapi le boboledi bja bona. Moapostola Paulo o hlalosa seo a ilego a se dira tabeng ye go 1 Ba-Korinthe 9:14-18 le go 1 Ba-Thesalonika 2:6, 9.

Le lengwe la maswao ao Jesu a ilego a bolela ka wona e sa le pele gore a tla swaya bofelo bja tshepedišo ye ya dilo e be e le gore: “Ditaba tše tše di lokilego tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.”—Mateo 24:3, 14, NW.

Go Kutollo yeo e neilwego moapostola Johane mo e ka bago ka 96 C.E., Johane o ile a bona “Morongwa e mongwê’ á fofa xare xa lexodimo” a swere “Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle; A bolêla ka lentšu le lexolo, a re: Boifang Modimo Le rêtê Yêna, xobane nakô ya kahlolô ya xaxwe e tlile.” (Kutollo 14: 6, 7) Dipolelo tše tšeo di buduletšwego di bontšha gore “mehleng ya bofêlô” ditaba tše di lokilego tša Mmušo di be di tla tsebatšwa ka tekanyo e sa bapišwego.