Go Tseba “Kêlêlô ya Kriste”

“Kêlêlô ya Morêna e tsebilwe ke mang? Moeletši wa xaxwe ké mang? Xomme rena re na le kêlêlô ya Kriste.”​—1 BA-KORINTHE 2:16.

1, 2. Ka Lentšung la gagwe, Jehofa o ile a bona go swanetše gore a utolle eng ka Jesu?

PONAGALO ya Jesu e be e le bjang? Mmala wa moriri wa gagwe e be e le o mobjang? wa letlalo la gagwe? wa mahlo a gagwe? O be a le botelele bjo bokaaka’ng? O be a imela gakaaka’ng? Go theoša le nywaga-kgolo, diswantšho tša bo-rabokgabo tša Jesu e bile tše di fapa-fapanego go tloga go tše di sa fetelelago go ya go tšeo di sa kgonegego. Ba bangwe ba ile ba mo swantšha e le yo a nago le sebopego sa bonna le yo a phetšego, mola ba bangwe ba ile ba mo swantšha e le sekoka le yo a sehlefetšego.

² Lega go le bjalo, Beibele ga e lebiše tlhokomelo ponagalong ya Jesu. Go e na le moo, Jehofa o ile a bona e le mo go swanetšego gore a utolle selo se sengwe se bohlokwa-hlokwa: mohuta wa motho yoo Jesu a bego e le yena. Dipego tša Diebangedi ga di bege feela seo Jesu a se boletšego le seo a se dirilego, eupša gape di utolla le maikwelo a tseneletšego le tsela ya go nagana tšeo di bego di hlohleletša mantšu a gagwe le ditiro tša gagwe. Dipego tše tše nne tše di buduletšwego di re kgontšha gore re bone seo moapostola Paulo a bego a se šupa e le “kêlêlô ya Kriste.” (1 Ba-Korinthe 2:16) Ke gabohlokwa gore re tlwaelane le dikgopolo, maikwelo le semelo tša Jesu. Ka baka la’ng? Ka baka la bonyenyane mabaka a mabedi.

3. Go tlwaelana ga rena le monagano wa Kriste go ka re nea temogo efe?

³ La pele, monagano wa Kriste o re sedimošetša ka monagano wa Jehofa Modimo. Jesu o be a tlwaelane kgaufsi kudu le Tatagwe mo e lego gore o be a ka re: “Xa xo e a hlathaxo Morwa, xe e se Tate; le a hlathaxo Tate, xe e se Morwa, le yo Morwa a rataxo xo mo utollêla.” (Luka 10:22) Go bjalo ka ge eka Jesu o be a re, ‘Ge e ba o rata go tseba gore Jehofa o bjang, lebelela nna.’ (Johane 14:9) Ka gona, ge re ithuta seo se utollwago ke Diebangedi mabapi le tsela yeo Jesu a bego a nagana le go ikwa ka yona, ge e le gabotse re ithuta kamoo Jehofa a naganago le go ikwa ka gona. Tsebo e bjalo e re thuša gore re batamele kgaufsi le Modimo wa rena.​—Jakobo 4:8.

4. Ge e ba re rata go itshwara go etša Kriste e le ka kgonthe, ke eng seo re swanetšego go ithuta sona pele, gomme ka baka la’ng?

⁴ La bobedi, go tseba ga rena monagano wa Kriste go re thuša gore re “latele dikgato tša gagwe kgaufsi.” (1 Petro 2:21, NW) Go latela Jesu ga e fo ba taba ya go boeletša mantšu a gagwe le go ekiša ditiro tša gagwe. Ka ge polelo le ditiro di tutuetšwa ke dikgopolo le maikwelo, go latela Kriste go nyaka gore re hlagolele “kxopolô” e swanago le yeo a bego a e-na le yona. (Ba-Filipi 2:5) Ka mantšu a mangwe, ge e ba re rata go itshwara go etša Kriste e le ka kgonthe, re swanetše pele re ithute go nagana le go ikwa bjalo ka yena, ke gore, go fihla bokgoleng bjoo re ka kgonago go dira bjalo re le batho ba sa phethagalago. Ka gona, anke re lebeledišišeng monagano wa Kriste ka thušo ya bangwadi ba Diebangedi. Re tla thoma ka go ahla-ahla mabaka ao a ilego a tutuetša tsela yeo Jesu a bego a nagana le go ikwa ka yona.

Go ba Gona ga Gagwe Pele e E-ba Motho

5, 6. (a) Bagwera ba rena ba ka re kgoma ka tsela efe? (b) Ke segwera sefe seo Morwa wa Modimo wa leitšibolo a bego a e-na le sona magodimong pele a e-tla lefaseng, gomme se ile sa mo kgoma ka tsela efe?

⁵ Bagwera ba rena ba kgaufsi ba ka re kgoma ka tsela e itšego, ba tutuetša dikgopolo tša rena, maikwelo a rena le ditiro tša rena gore e be tše botse goba tše mpe. * (Diema 13:20) Ela hloko segwera seo Jesu a bego a e-na le sona magodimong pele a e-tla lefaseng. Ebangedi ya Johane e lebiša tlhokomelo tabeng ya go ba gona ga Jesu pele e e-ba motho e le “Lentšu” goba Mmoleledi wa Modimo. Johane o re: “Mathomong Lentšu le be le le gona, gomme Lentšu le be le le go Modimo, gomme Lentšu e be e le Modimo. Lona le be le le go Modimo mathomong.” (Johane 1:1, 2, PK) Ka ge Jehofa a se na mathomo, go ba ga Lentšu le Modimo go tloga “mathomong” go swanetše go ba go šupa mathomong a mediro ya Modimo ya tlholo. (Psalme 90:2) Jesu ke “tháka-letswálô yá dibopya tšohle.” Ka gona, o bile gona pele ga ge dibopša tše dingwe tša moya gotee le legohle la kgonthe di ka bopša.​—Ba-Kolose 1:15; Kutollo 3:14.

⁶ Go ya ka dikakanyetšo tše dingwe tša tša thutamahlale, legohle la kgonthe le bile gona ka lebaka la bonyenyane nywaga e dimilione tše dikete tše 12. Ge e ba e le gore dikakanyetšo tšeo di nyakile e e-ba therešo, Morwa wa Modimo wa leitšibolo o thabetše segwera sa kgaufsi le tatagwe lebaka la nywaga e dimilione tše dikete-kete pele Adama a ka bopša. (Bapiša le Mika 5:1.) Ka baka leo go ile gwa ba le tswalano e bonolo le e tseneletšego magareng ga bona ka bobedi. Ka ge e le bohlale bjo bo mothofaditšwego, Morwa yo wa leitšibolo a le boemong bja gagwe bja pele e e-ba motho o hlaloswa a bolela gore: “Ké xe kè na naê’ kè . . . mo [Jehofa] kxahla mehla yohle, kè bapala pele xa xaxwe ka mehla.” (Diema 8:30) Ka kgonthe go fetša mehla e sa balegego a le kgaufsi-ufsi le Mothopo wa lerato go ile gwa kgoma Morwa wa Modimo ka mo go tseneletšego! (1 Johane 4:8) Morwa yo o ile a tseba le go bonagatša dikgopolo tša Tatagwe, maikwelo a gagwe le ditsela tša gagwe go phala kamoo motho le ge e le mang a bego a ka dira ka gona.​—Mateo 11:27.

Bophelo bja Lefaseng le Ditutuetšo

7. Le lengwe la mabaka ao ka ona go ilego gwa nyakega gore Morwa wa Modimo wa leitšibolo a tle lefaseng ke lefe?

⁷ Morwa wa Modimo o be a e-na le mo gontši mo a ka ithutago gona, ka ge morero wa Jehofa e be e le go hlama Morwa wa gagwe gore e be Moperisita yo Mogolo yo a nago le kwelobohloko le yo a kgonago go “re kwêla bohloko xe re fôkôla.” (Ba-Hebere 4:15) Go fihlelela tše di nyakegago bakeng sa go phetha karolo ye e be e le le lengwe la mabaka ao ka ona Morwa a ilego a tla lefaseng e le motho. Mo, e le motho wa nama le madi, Jesu o ile a lebana le maemo  le ditutuetšo tšeo nakong e fetilego a bego a di bogetše feela a le legodimong. Bjale o be a kgona go kwa maikwelo a go ba motho ka boyena. Ka dinako tše dingwe o be a ikwa a lapile, a nyorilwe e bile a swerwe ke tlala. (Mateo 4:2; Johane 4:6, 7) Se segolo le go feta, o ile a kgotlelela mehuteng ka moka ya mathata le ya tlaišego. Ka go rialo o “ithutile xo kwa” gomme a ba yo a swanelegago ka mo go feletšego bakeng sa go phetha karolo ya gagwe e le Moperisita yo Mogolo.​—Ba-Hebere 5:8-10.

8. Re tseba’ng ka bophelo bja Jesu bja pejana mo lefaseng?

⁸ Go thwe’ng ka diphihlelo tša Jesu nakong ya bophelo bja gagwe bja pejana ge a le lefaseng? Pego ya bophelo bja gagwe bja bjaneng ke e kopana kudu. Ge e le gabotse, ke Mateo le Luka feela bao ba ilego ba anega ka ditiragalo tšeo di lego mabapi le matswalo a gagwe. Bangwadi ba Diebangedi ba be ba tseba gore Jesu o be a ile a phela legodimong pele a e-tla lefaseng. Go ba gona moo ga gagwe pele e e-ba motho, go feta selo le ge e le sefe se sengwe, go ile gwa hlalosa mohuta wa motho yo a bego a le yena. Lega go le bjalo, Jesu e be e le motho ka botlalo. Le ge a be a phethagetše, o ile a swanelwa ke gore a gole go tloga boseeng go feta bjaneng le go feta nywageng ya mahlalagading go ba go fihla bogolong, a dutše a ithuta nakong ka moka. (Luka 2:51, 52) Beibele e utolla dilo tše dingwe tše itšego mabapi le bophelo bja Jesu bja pejana tšeo go se nago pelaelo gore di ile tša mo kgoma.

9. (a) Ke pontšho efe e lego gona ya gore Jesu o belegetšwe lapeng le le diilago? (b) Go bonagala Jesu a goletše maemong a mohuta mang?

⁹ Go ya ka bohlatse bjo bo lego gona, Jesu o belegetšwe lapeng le le diilago. Se se bonagatšwa ke sehlabelo seo Josefa le Maria ba ilego ba se iša tempeleng mo e ka bago matšatši a 40 ka morago ga go belegwa ga gagwe. Go e na le gore ba tliše kgapa e nyenyane e le sehlabelo le leeba le lenyenyane goba leeba-kgororwana e le seloba, ba ile ba tliša “maebana a mabedi, [goba] mekurwanyana e mebedi.” (Luka 2:24) Go ya ka Molao wa Moše, sehlabelo se e be e le seo se lokišeleditšwego bakeng sa ba diilago. (Lefitiko12:6-8) Ge nako e dutše e e-ya, lapa le la bobotlana le ile la gola. Josefa le Maria ba ile ba ba le bonyenyane bana ba bangwe ba tshelelago ka tsela ya tlhago ka morago ga go belegwa ga Jesu ka tsela ya mohlolo. (Mateo 13:55, 56) Ka gona, Jesu o goletše lapeng le legolo, mohlomongwe ka gare ga maemo a bobotlana.

10. Ke eng se se bontšhago gore Maria le Josefa e be e le batho ba ba boifago Modimo?

¹⁰ Jesu o godišitšwe ke batswadi bao ba boifago Modimo bao ba bego ba mo hlokomela. Mmagwe, Maria, e be e le mosadi yo a ikgethilego. Gopola gore nakong ya ge morongwa Gabariele a mo dumediša, o ile a re: “Thabá, wene Moxauxêlwa. Morêna ó na le wene.” (Luka 1:28) Josefa le yena e be e le motho wa borapedi. Ngwaga le ngwaga ka potego o be a tšea leeto la dikhilomithara tše 150 la go ya Jerusalema bakeng sa Paseka. Maria le yena o be a e-ya, le ge e le gore ke banna feela bao ba bego ba swanetše go dira bjalo. (Ekisodo 23:17; Luka 2:41) Lebakeng le lengwe le le bjalo, Josefa le Maria ka morago ga gore ba phuruphutše gohle, ba ile ba hwetša Jesu wa nywaga e 12 ka tempeleng a dutše ka gare ga barutiši. Jesu o ile a botša batswadi ba gagwe ba ba tshwenyegilego gore: “A Le be Le sa tsebe xe ke swanetše xo ba mo xo tšé tša Tate?” (Luka 2:49) “Tate”​—lentšu leo le swanetše go ba le be le e-na le tlhaloso e borutho le e nepagetšego go Jesu yo monyenyane. Gare ga dilo tše dingwe, go bonagala a be a boditšwe gore Jehofa e be e le Tatagwe wa kgonthe. Go oketša moo, Josefa o swanetše go ba e be e le tate yo a lokilego wa mogodiši go Jesu. Ka kgonthe Jehofa o be a ka se ke a kgetha monna yo bogale le yo sehlogo gore a godiše Morwa wa Gagwe yo a ratwago!

11. Jesu o ile a ithuta mošomo ofe, gomme mehleng ya Beibele, go šoma mošomong wo go be go akaretša’ng?

¹¹ Nywageng yeo a e feditšego Natsaretha, Jesu o ile a ithuta modiro wa go betla, mohlomongwe a ithuta go tatagwe wa mogodiši, Josefa. Jesu o be a kgona modiro wo kudu mo e lego gore yena ka noši o be a bitšwa “mmetli.” (Mareka 6:3) Mehleng ya Beibele, babetli ba be ba šoma go aga dintlo, go betla fenitšhara (go akaretša ditafola, ditulwana le dipanka) le go dira ditlabakelo tša go lema. Justin Martyr wa lekgolong la bobedi la nywaga C.E., o ngwadile ka Jesu ka pukung ya gagwe ya Dialogue With Trypho gore: “O be a tlwaetše go šoma bjalo ka mmetli ge a le gare ga banna, a dira megoma le dijoko.” Mošomo o bjalo o be o se bonolo ka gobane mohlomongwe mmetli wa bogologolo o be a sa kgone go ithekela kota. Kgonagalo e kgolo ke ya gore o be a e-ya nageng gomme a kgetha sehlare, a se rema ke moka a rwalela kota gae. Ka gona Jesu mo gongwe o swanetše go ba a be a tseba ditlhohlo tša go hwetša sa go iphediša, go dirišana le bareki le go kgona go iphediša.

12. Ke eng se se bontšhago gore Josefa a ka ba a hwile pele ga Jesu, gomme se se be se tla bolela eng go Jesu?

¹² Bjalo ka morwa yo mogolo, mohlomongwe Jesu o be a thuša ka go hlokomela lapa, kudu-kudu ka ge go bonagala Josefa a ile a hwa pele ga Jesu. * Zion’s Watch Tower ya January 1, 1900, e itše: “Kanegelo e bolela gore Josefa o hwile nakong ya ge Jesu e be e sa le yo monyenyane, le gore yo a boletšwego morago o ile a ithuta modiro wa go betla gomme a fetoga mofepi wa lapa. Se se thekgwa ka tsela e itšego ke bohlatse bja Mangwalo moo Jesu ka boyena a bitšwago mmetli, gomme go bolelwa ka mmagwe le banababo, eupša Josefa o tlogetšwe. (Mareka 6:3) . . . Ka gona, go tloga go na le kgonagalo e kgolo ya gore lebaka le letelele la nywaga e lesome-seswai ya bophelo bja Morena wa rena, go tloga nakong ya ge tiragalo ye [yeo e ngwadilwego go Luka 2:41-49] go fihla nakong ya go kolobetšwa ga gagwe, o e feditše a dira mediro e tlwaelegilego ya bophelo.” Maria le bana ba gagwe, go akaretša le Jesu, mo gongwe ba be ba tseba bohloko bjo bo bakwago ke ge monna yo e bilego e le tate yo a rategago a e-hwa.

13. Nakong ya ge Jesu a be a thoma bodiredi bja gagwe, ke ka baka la’ng a be a e-na le tsebo, temogo le maikwelo a tseneletšego tšeo go bego go se na motho yo mongwe yo a kilego a ba le tšona?

¹³ Go molaleng gore Jesu ga se a belegelwa bophelong bja manobonobo. Go e na le moo, o ile a ikwela ka noši bophelo bja batho ba tlwaelegilego. Ke moka, ka 29 C.E., go ile gwa fihla nako ya gore Jesu a phethe kabelo yeo a bego a e filwe ke Modimo yeo e bego e mo letetše. Lehlabuleng la ngwaga woo, o ile a kolobetšwa meetseng gomme a tlotšwa e le Morwa wa Modimo wa moya. ‘Legodimo le ile la mmulegela,’ e lego seo mo gongwe se bontšhago gore bjale o be a kgona go gopola bophelo bja gagwe bja pele e e-ba motho legodimong, go akaretša le dikgopolo le maikwelo tšeo di bego di sepedišana le seo. (Luka 3:21, 22) Ka gona ge Jesu a be a thoma bodiredi bja gagwe, o be a e-na le tsebo, temogo le maikwelo a tseneletšego tšeo go bego go se na motho yo mongwe yo a kilego a ba le tšona. Ka lebaka le lebotse, bangwadi ba Diebangedi mengwalong ya bona e mentši ba boletše kudu ka ditiragalo tša bodiredi bja Jesu. Gaešita le ge go le bjalo, ba be ba sa kgone go ngwala selo se sengwe le se sengwe seo a se boletšego le seo a se dirilego. (Johane 21:25) Eupša seo ba ilego ba budulelwa gore ba se ngwale se re kgontšha gore re hlole monaganong wa monna yo a phagamego kudu yo a kilego a phela.

Kamoo Jesu a Bego a le ka Gona ge e le Motho

14. Diebangedi di bontšha Jesu bjang e le motho yo a nago le borutho bjo bo nago le bonolo le maikwelo a tseneletšego?

¹⁴ Semelo sa Jesu seo se tšwelelago Diebangeding  ke sa monna yo a nago le borutho bjo bo nago le bonolo ka gare le maikwelo a tseneletšego. O ile a bontšha dikarabelo tše di fapa-fapanego tša maikwelo: go kwela molephera bohloko (Mareka 1:40, 41); go kwešwa bohloko ke batho ba ba sa arabelego (Luka 19:41, 42); go galefela baananyi ba tšhelete ba megabaru ka tsela e lokilego (Johane 2:13-17). Bjalo ka motho wa kwelobohloko, Jesu o be a kgona go kgomega gore a be a lle, gomme o be a sa ute maikwelo a gagwe. Nakong ya ge mogwera wa gagwe yo a mo ratago kudu Latsaro a be a hwile, go bona Maria, kgaetšedi ya Latsaro a lla go ile gwa kgoma Jesu ka mo go tseneletšego kudu mo e lego gore o ile a ntšha megokgo ka boyena, a lla a bonwa gabotse ke ba bangwe.​—Johane 11:32-36.

15. Maikwelo a Jesu a bonolo a ile a bonagala bjang ka tsela ye a bego a lebelela le go swara ba bangwe ka yona?

¹⁵ Maikwelo a Jesu a bonolo a ile a bonagala kudu-kudu ka tsela yeo a bego a lebelela le go swara ba bangwe ka yona. O be a ipatametša go ba ba diilago le bao ba gateletšwego, a ba thuša gore ba ‘hweletše meoya ya bona tapologo.’ (Mateo 11:4, 5, 28-30, bapiša le NW.) O be a se a swarega kudu gore a ka arabela dinyakweng tša bao ba tlaišegago, go sa šetšwe gore e be e le mosadi yo a bego a swerwe ke bolwetši bja ngope yo a ilego a kgoma seaparo sa Jesu a ikhomoletše goba mokgopedi wa sefofu yo a bego a sa nyake go homotšwa. (Mateo 9:20-22; Mareka 10:46-52) Jesu o be a lebelela botse go ba bangwe gomme a ba reta; lega go le bjalo, o be a bile a ikemišeditše go nea tsholo ge e be e nyakega. (Mateo 16:23; Johane 1:47; 8:44) Nakong ya ge basadi ba be ba thabela ditshwanelo tše sego kae feela, Jesu o be a ba swara ka tsela e nago le seriti le tlhompho tše di nago le teka-tekano. (Johane 4:9, 27) Ka mo go kwešišegago, sehlopha sa basadi se ile sa mo direla ka go ithatela ka dithoto tša bona ka noši.​—Luka 8:3.

16. Ke eng seo se bontšhago gore Jesu o be a na le pono e leka-lekanego ka bophelo le dilo tše di bonagalago?

¹⁶ Jesu o be a e-na le pono e leka-lekanego ka bophelo. Dilo tše di bonagalago e be e se tša bohlokwa bjo bogolo go yena. Go bonagala dilong tše di bonagalago a be a e-na le mo gonyenyane kudu. O ile a bolela gore “xa a na mo a kaxo samiša hlôxô.” (Mateo 8:20) Ka nako e swanago, Jesu o ile a tlaleletša lethabong la ba bangwe. Nakong ya ge a be a le monyanyeng wa lenyalo​—woo ka tlwaelo e lego tiragalo yeo e hlaolwago ka mmino, go opela le go thaba​—go molaleng gore o be a sa ya moo bakeng sa go yo ba hlafediša. Ka kgonthe, Jesu o ile a dira mohlolo wa gagwe wa mathomo moo. Ge beine e be e fedile, o ile a fetola meetse beine, e lego seno seo se ‘thabišago pelo ya motho.’ (Psalme 104:15; Johane 2:1-11) Ka gona boipshino bo be bo ka tšwela pele, gomme monyadi le monyadiwa ruri ba ile ba se ke ba swarwa ke dihlong. Teka-tekano ya gagwe e bonagala gape le tabeng ya gore go na le ditiragalo tše dintši kudu tšeo go bolelwago ka tšona tša nakong ya ge Jesu a be a šoma nako e telele le ka thata bodireding bja gagwe.​—Johane 4:34.

17. Ke ka baka la’ng e se mo go makatšago gore Jesu e be e le Morutiši yo Mogolo, gomme dithuto tša gagwe di be di bonagatša eng?

¹⁷ Jesu e be e le Morutiši yo Mogolo. Bogolo bja dithuto tša gagwe bo be bo bonagatša ditherešo tša bophelo bja letšatši le lengwe le le lengwe, tšeo a bego a tlwaelane le tšona kudu. (Mateo 13:33; Luka 15:8) Mokgwa wa gagwe wa go ruta o be o sa bapišwe​—o kwagalago kudu, o bonolo le o šomago. Selo seo e lego sa bohlokwa kudu ke seo a bego a se ruta. Dithuto tša gagwe di be di bonagatša kganyogo ya gagwe e tšwago pelong ya go rata go tlwaelanya batheetši ba gagwe le dikgopolo, maikwelo le ditsela tša Jehofa.​—Johane 17:6-8.

18, 19. (a) Jesu o ile a hlalosa Tatagwe ka diswantšho dife tše di bonagalago gabotse tša mantšu? (b) Ke’ng seo se tlago go ahla-ahlwa sehlogong se se latelago?

¹⁸ Ka ge a be a diriša diswantšho gantši, Jesu o ile a utolla Tatagwe ka diswantšho tše di bonagalago gabotse tša mantšu tšeo di bego di ka se lebalege gabonolo.  Go bolela ka kakaretšo ka kgaugelo ya Modimo ke selo se sengwe. Go swantšha Jehofa le tate yo a lebalelago yo a kgomegago ka mo go tseneletšego kudu ge a bona morwa wa gagwe yo a boelago gae mo e lego gore o ‘a kitima a ba a wela molaleng wa morwa’gwe gomme a mo atla ka lerato,’ ke selo se sengwe se se fapanego kudu. (Luka 15:11-24) Ka go gana setlogo se thata seo go sona baetapele ba bodumedi ba bego ba tšeela batho feela tlase, Jesu o ile a hlalosa gore Tatagwe e be e le Modimo yo a batamelegago yo a bego a kgetha ditopo tša molekgetho yo a ikokobeditšego go e na le thapelo ya bomponeng ya Mofarisei yo a ikgodišago. (Luka 18:9-14) Jesu o ile a hlalosa Jehofa e le Modimo yo a hlokomelago le yo a tsebago ge thaga e nyenyane e wela fase. Jesu o ile a kgonthišetša balatedi ba gagwe ka gore: “Se boifeng; Le feta dithaxa è le tše ntši.” (Mateo 10:29, 31) Ka mo go kwešišegago, batho ba be ba tlabilwe ke ‘tsela ya Jesu ya go ruta’ gomme ba ile ba gogelwa go yena. (Mateo 7:28, 29, PK) Ka gona, lebakeng le lengwe “lešaba le lentši” le ile la dula kgaufsi le yena lebaka la matšatši a mararo, e bile le hlwa le sa ja!​—Mareka 8:1, 2.

¹⁹ Re ka leboga gakaakang gore Jehofa o utolotše monagano wa Kriste ka Lentšung la gagwe! Ka gona, re ka hlagolela bjang gotee le go bontšha monagano wa Kriste ditirišanong tša rena le ba bangwe? Taba ye e tla ahla-ahlwa sehlogong se se latelago.

[Mengwalo ya ka tlase]

Na o a Gopola?

• Ke ka baka la’ng e le gabohlokwa gore re tlwaelane le “kêlêlô ya Kriste”?

• Ke segwera sefe seo Jesu a bego a e-na le sona nakong ya go ba gona ga gagwe pele e e-ba motho?

• Nakong ya bophelo bja gagwe bja lefaseng, ke maemo a mohuta mang gotee le ditutuetšo tšeo Jesu a ilego a iponela tšona?

• Diebangedi di utolla eng mabapi le semelo sa Jesu?

[Dipotšišo tša Thuto]

[Seswantšho go letlakala 10]

Jesu o goletše lapeng le legolo, mohlomongwe ka gare ga maemo a bobotlana

[Diswantšho go letlakala 12]

Barutiši ba be ba tlabilwe ke kwešišo le dikarabo tša Jesu wa nywaga e 12