Na o na le “Kêlêlô ya Kriste”?

“Modimo, Yêna Mong wa tiišô le khomotšô, lena ka moka a Le fê kxopolô e tee ya xo amana le Kriste Jesu.”​—BA-ROMA 15:5.

1. Jesu o bonagatšwa bjang diswantšhong tše dintši tša Bojakane, gomme ke ka baka la’ng se e se tsela e nepagetšego ya go hlalosa Jesu?

“GA SE a ka a bonwa a sega le ka mohla.” Ke kamoo Jesu a hlaloswago ka gona lengwalong leo le ipolelago ka maaka gore le ngwadilwe ke mohlankedi wa bogologolo wa Roma. Lengwalo le, leo le bego le dutše le tsebja ka sebopego seo le lego ka sona ga e sa le go tloga mo e ka bago lekgolong la bo-11 la nywaga, go thwe le tutueditše bo-rabokgabo ba bantši. * Diswantšhong tše dintši, Jesu o tšwelela e le motho yo a bogegago a nyamile, yo a bego a myemyela ka sewelo, ge e ba e le gore o be a ke a dire bjalo. Eupša yeo ga se tlhaloso e swanetšego ya Jesu le gatee, yoo Diebangedi di mo hlalosago e le motho yo borutho, wa pelo e lokilego le yo a nago le maikwelo a tseneletšego.

2. Re ka hlagolela bjang “kxopolô e tee ya xo amana le Kriste Jesu,” gomme se se tla re hlamela go dira’ng?

² Go molaleng gore e le gore re tsebe Jesu wa kgonthe, re swanetše go tlatša menagano ya rena le dipelo tša rena ka kwešišo e nepagetšego ya mohuta wa motho yoo Jesu a bego a le yena e le ka kgonthe ge a be a le mo lefaseng. Ka gona anke re hlahlobeng tše dingwe tša dipego tša Diebangedi tšeo di re neago temogo ka “kêlêlô ya Kriste”​—ke gore, maikwelo a gagwe, temogo ya gagwe, dikgopolo tša gagwe le tsela ya gagwe ya go bea mabaka. (1 Ba-Korinthe 2:16) Ge re dutše re dira bjalo, anke re eleng hloko kamoo re ka hlagolelago “kxopolô e tee ya xo amana le Kriste Jesu.” (Ba-Roma 15:5) Ka go rialo, re tla ba ba hlamilwego gabotse maphelong a rena le ditirišanong tša rena le ba bangwe bakeng sa go latela mohlala wo a re beetšego wona.​—Johane 13:15.

O be a Batamelega

3, 4. (a) Boemo bja pego yeo e ngwadilwego go Mareka 10:13-16 e be e le bofe? (b) Jesu o ile a arabela bjang ge barutiwa ba gagwe ba be ba leka go thibela bana go tla go yena?

³ Batho ba be ba ikwa ba gogelwa go Jesu. Mabakeng a sa swanego, batho ba bogolo bjo bo sa swanego le ditlogo tše di sa swanego ba be ba mmatamela ka bolokologi. Ela hloko taba yeo e ngwadilwego go Mareka 10:13-16. E diregile go ya bofelong bja bodiredi bja gagwe ge a be a lebile Jerusalema la mafelelo, bakeng sa go yo lebana le lehu le bohloko.​—Mareka 10:32-34.

⁴ Akanya ka boemo. Batho ba thoma go tliša bana, go akaretša le masea bakeng sa gore Jesu a ba šegofatše. * Lega go le bjalo, barutiwa ba leka go thibela bana go tla go Jesu. Mohlomongwe barutiwa ba nagana gore Jesu o tloga a sa nyake go tshwenywa ka bana dibekeng tše tša makgaola-kgang. Eupša ba fošitše. Ge Jesu a lemoga seo barutiwa ba se dirago, ga a se thabele. Jesu o biletša bana go yena, o re: “Lesang bana ba tlê xo Nna; Le se kê la ba thibêla.” (Mareka 10:14) Ka morago o dira se sengwe seo se utollago mokgwa wa kgonthe o bonolo le wa lerato. Pego e re: “’Me a ba xokara, a ba bea diatla a ba šexofatša.” (Mareka 10:16) Go molaleng gore bana ba ikwa ba lokologile ge Jesu a ba kuka ka matsogo a gagwe a nago le tlhokomelo.

5. Pego e lego go Mareka 10:13-16 e re botša’ng mabapi le mohuta wa motho yoo Jesu a bego a le wona?

⁵ Pego yeo e kopana e re botša mo gontši ka mohuta wa motho yoo Jesu a bego a le yena. Ela hloko gore o be a batamelega. Gaešita le ge a be a e-na le boemo bjo bo phagamego magodimong, o be a sa tšhošetše e bile a sa nyenyefatše batho ba sa phethagalago. (Johane 17:5) Le gona, na ga se mo go lemogegago gore gaešita le bana ba be ba ikwa ba lokologile go yena? Ga go na pelaelo gore ba be ba ka se ikwe ba gogelwa mothong yo a se nago borutho le yo a sa thabago yo le ka mohla a bego a sa myemyele goba go sega! Batho ba bogolo bjo bo sa swanego ba be ba batamela Jesu ka gobane ba be ba e-kwa gore e be e le motho yo borutho le yo a šetšago, gomme ba be ba kgodišegile gore o be a ka se ke a ba gomiša.

6. Bagolo ba ka itira bjang gore e be bao ba batamelegago kudu?

⁶ Ka go naganišiša ka pego ye, re ka ipotšiša gore, ‘Na ke na le monagano wa Kriste? Na ke a batamelega?’ Dinakong tše tše hlobaetšago, dinku tša Modimo di nyaka badiši ba batamelegago, banna bao ba etšago “tšhireletšo ge phefo e foka.” (Jesaya 32:1, 2, PK; 2 Timotheo 3:1, bapiša le NW.) Bagolo, ge e ba le hlagolela kgahlego ya kgonthe le e tšwago pelong go banababo rena e bile le ikemišeditše go ikgafa ka baka la bona, ba tla lemoga go kgomega ga lena. Ba tla go bona ponagalong ya lena ya sefahlego, ba tla go kwa segalong sa lena sa lentšu, e bile ba tla go hlokomela mokgweng wa lena wa botho. Go ba borutho le go kgomega mo go bjalo ga kgonthe go ka aga moya wa go botana woo go wona go lego bonolo gore ba bangwe, go akaretša le bana, ba go batamele. Mosadi yo mongwe wa Mokriste o hlalosa lebaka leo ka lona a ilego a kgona go phuthologa go mogolo yo mongwe: “O be a boledišana le nna ka mokgwa o bonolo le wa kwelobohloko. Ge nkabe go se be bjalo, mohlomongwe ke be nka se ntšhe le lentšu le tee. O ile a ntira gore ke ikwe ke bolokegile.”

Go Naganela ba Bangwe

7. (a) Jesu o ile a bontšha bjang gore o be a naganela ba bangwe? (b) Ke ka baka la’ng Jesu mo gongwe a ile a dira gore monna yo mongwe wa sefofu a bone gasele?

⁷ Jesu o be a bontšha go naganela. O be a kgomega ka maikwelo a ba bangwe. Go fo bona batho bao ba tlaišegago go ile gwa mo kgoma ka mo go tseneletšego mo e lego gore o ile a tutueletšega gore a ba imolle tlaišegong. (Mateo 14:14) O be a bile a naganela le mafokodi gotee le dinyakwa tša ba bangwe. (Johane 16:12) Ka lekga le lengwe, batho ba ile ba tliša monna wa sefofu go yena gomme ba kgopela Jesu gore a mo fodiše. Jesu o ile a dira gore monna a bone, eupša o ile a dira bjalo gasele. Mathomong, monna o ile a bona batho a ba bonela kgojana​—“e ke ké dihlare bà dikoloxa.” Ka morago, Jesu o ile a dira gore a bone ka mo go feletšego. Ke ka baka la’ng a ile a fodiša monna gasele? Se e ka ba e be e le bakeng sa gore a kgontšhe yo a bego a tlwaetše go ba lefsifsing kudu gore a tlwaelane le go tšhošwa ke go bona gatee-tee lefase le le edišeditšwego le le le raraganego.​—Mareka 8:22-26.

8, 9. (a) Ke’ng seo se ilego sa direga kapejana ka morago ga gore Jesu le barutiwa ba gagwe ba tsene tikologong ya Dekapoli? (b) Hlalosa tsela ya Jesu ya go fodiša monna wa sefoa.

⁸ Gape ela hloko tiragalo yeo e ilego ya direga ka morago ga Paseka ya 32 C.E. Jesu le barutiwa ba gagwe ba be ba tsene tikologong ya Dekapoli, ka bohlabela bja Lewatle la Galilea. Moo, mašaba a magolo a ile a akgofa a ba hwetša gomme a tlišetša Jesu ba bantši bao ba bego ba babja le ba golofetšego, gomme o ile a ba fodiša ka moka. (Mateo 15:29, 30) Ka mo go kgahlišago, Jesu o ile a hlaola monna yo mongwe bakeng sa go lebiša tlhokomelo e kgethegilego go yena. Mongwadi wa Ebangedi e lego Mareka, e lego yena feela yo a ngwadilego tiragalo ye, o bega seo se ilego sa direga.​—Mareka 7:31-35.

⁹ Monna e be e le sefoa seo se sa kgonego go bolela. Jesu mo gongwe o ile a lemoga go tšhoga kudu goba go hlabja ke dihlong ga monna yo. Ka gona Jesu o ile a dira selo se sengwe se se sa tlwaelegago. O ile a ya le monna ka thokwana, kgojana le lešaba moo ba lego noši. Ka morago Jesu o ile a diriša ditšhupetšo tša diatla go bontšha monna yo seo a bego a tlo se dira. O ile “a bea menwana ya gagwe ditsebeng tša gagwe, a tshwela mare, gomme a swara leleme la gagwe ka ona.” (Mareka 7:33, PK) Ka morago ga moo, Jesu o ile a lebelela legodimong gomme a rapela ka go fegelwa. Ditiro tše tša go bontšha di be di tla botša monna gore, ‘Seo ke tlago go go direla sona se dirwa ka matla a tšwago go Modimo.’ Mafelelong, Jesu o ile a re: “Thiboloxa!” (Mareka 7:34) Ge a fetša go rialo, monna o ile a kwa gomme a kgona go bolela gabotse.

10, 11. Re ka bontšha bjang go naganela maikwelo a ba bangwe ka phuthegong? ka lapeng?

¹⁰ Jesu o be a bontšha tlhokomelo gakaakang bakeng  sa ba bangwe! O be a kgomega ka maikwelo a bona, gomme go bontšha kwelobohloko mo, ka morago go ile gwa mo tutueletša gore a dire dilo ka tsela yeo e bego e naganela maikwelo a bona. Bjalo ka Bakriste, re dira gabotse go hlagolela le go bontšha monagano wa Kriste tabeng ye. Beibele e re kgothaletša gore: “Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho.” (1 Petro 3:8) Se ruri se re nyaka gore re bolele le go dira dilo ka ditsela tšeo di bontšhago go naganela maikwelo a batho ba bangwe.

¹¹ Ka phuthegong, re ka bontšha go naganela maikwelo a ba bangwe ka go ba nea seriti le go ba swara ka tsela yeo re bego re tla rata ba re swara ka yona. (Mateo 7:12) Seo se tla akaretša go ba šedi ka seo re se bolelago gotee le mokgwa woo re se bolelago ka wona. (Ba-Kolose 4:6) Gopola gore ‘mantšu a se nago tlhaologanyo a ka hlaba wa lerumo.’ (Diema 12:18, bapiša le NW.) Go thwe’ng ka lapeng? Monna le mosadi bao ba ratanago e le ka kgonthe ba naganela maikwelo a yo mongwe le yo mongwe wa bona. (Ba-Efeso 5:33) Ba phema go diriša mantšu a sa lokago, go swaya diphošo ka mehla le kgegeo e hlabago​—tšeo ka moka ga tšona di ka bakago maikwelo a kwelego bohloko ao a sa folego gabonolo. Bana le bona ba na le maikwelo, gomme batswadi ba lerato ba ela hloko se. Ge go nyakega phošollo, batswadi ba bjalo ba e nea ka ditsela tšeo di hlomphago seriti sa bana ba bona le go phema go ba leša dihlong ka mo go sa nyakegego. * (Ba-Kolose 3:21) Ge e ba re bontšha go naganela ba bangwe ka tsela e bjalo, re bontšha gore re na le monagano wa Kriste.

Go Ikemišetša go Bota ba Bangwe

12. Jesu o be a e-na le pono efe e leka-lekanego le ya kgonthe ka barutiwa ba gagwe?

¹² Jesu o be a e-na le pono e leka-lekanego le ya kgonthe ka barutiwa ba gagwe. O be a tseba gabotse gore ba be ba sa phethagala. Go ba gona, o be a kgona go bala dipelo tša batho. (Johane 2:24, 25) Lega go le bjalo, o be a ba lebelela e sego feela tabeng ya diphošo tša bona, eupša tabeng ya dika tša bona tše dibotse. O be a bile a bona tekanyo ya bokgoni ba​nneng ba bao Jehofa a bego a ba gogetše go yena. (Johane 6:44) Go ba ga Jesu le pono e nepagetšego ka barutiwa ba gagwe go be go bonagala ka tsela yeo a bego a dirišana le bona le ye a bego a ba swara ka yona. Gare ga dilo tše dingwe, o ile a bontšha go ikemišetša go ba bota.

13. Jesu o ile a bontšha bjang gore o be a bota barutiwa ba gagwe?

¹³ Jesu o ile a bontšha bjang go ba bota mo go bjalo? Ge a be a tloga lefaseng, o ile a abela barutiwa ba gagwe ba tloditšwego boikarabelo bjo bogolo. O ile a tlogelela boikarabelo bja go hlokomela dikgahlego tša Mmušo wa gagwe tša lefase ka bophara diatleng tša bona. (Mateo 25:14, 15; Luka 12:42-44) Nakong ya bodiredi bja gagwe, o ile a bontšha le ka ditsela tše dinyenyane le tše di sa lebanyego gore o be a ba bota. Nakong ya ge a be a atiša dijo ka mohlolo bakeng sa go fepa mašaba, o ile a abela barutiwa ba gagwe boikarabelo bja go aba dijo.​—Mateo 14:15-21; 15:32-37.

14. O be o ka hlalosa bjang ka boripana pego yeo e ngwadilwego go Mareka 4:34-41?

¹⁴ Gape nagana ka pego yeo e ngwadilwego go Mareka 4:35-41. Lebakeng le Jesu le barutiwa ba gagwe ba ile ba namela lesela-watle gomme ba sesa go ya ka bohlabela go phatša Lewatle la Galilea. Kapejana ka morago ga gore ba tloge, Jesu o ile a sekama ka morago ga lesela-watle gomme a tšewa ke boroko. Lega go le bjalo, go se go ye kae, go ile “xwa tsoxa sesesedi se sexolo sa ledimo.” Madimo a bjalo e be e se a sa tlwaelegago Lewatleng la Galilea. Ka baka la botlase bja lona, (mo e ka bago dimithara tše 200 go fihla ka tlase ga tekanyo ya lewatle), moya o borutho kudu moo go feta tikologong e dikologilego, gomme se se baka tšhitišo lefaufaung. Go okeletša go se, diphefo tše matla di phatša go theoga le Moedi wa Jorodane di e-tšwa Thabeng ya Herimone yeo e lego ka leboa. Go homola ga nakwana go ka fetogela ledimong le le tšubutlago le le latelago. Nagana ka  se: Ga go na pelaelo gore Jesu o be a tseba madimo a tlwaelegilego, ka gobane o goletše Galilea. Lega go le bjalo, o ile a ithobalela boroko, a holofetše bokgoni bja barutiwa ba gagwe, bao ba bangwe ba bona e bego e le barei ba dihlapi.​—Mateo 4:18, 19.

15. Re ka ekiša bjang go ikemišetša ga Jesu go bota barutiwa ba gagwe?

¹⁵ Na re ka ekiša go ikemišetša ga Jesu go bota barutiwa ba gagwe? Ba bangwe ba hwetša ba thatafalelwa ke go abela ba bangwe boikarabelo. Go ka thwe, go nyakega gore ka mehla e be bona ba laolago. Mo gongwe ba nagana gore: ‘Ge e ba ke nyaka gore selo se itšego se dirwe gabotse, ke swanetše ke se dire ka bonna!’ Eupša ge e ba re swanelwa ke go itirela selo se sengwe le se sengwe, re ipea kotsing ya go iphetša matla gomme mohlomongwe re jela lapa la rena nako ka tsela yeo e sa nyakegego. Go e na le moo, ge e ba re sa abele ba bangwe mediro yeo e nepagetšego gotee le boikarabelo, re ka ba re ba tima boitemogelo bjo bo nyakegago gotee le tlwaetšo. E tla ba gabohlale go ithuta go bota ba bangwe, gomme re ba abele dilo. Re dira gabotse go ipotšiša ka potego gore: ‘Na ke na le monagano wa Kriste tabeng ye? Na ke ikemišetša go abela ba bangwe mediro e itšego, ke holofela gore ba tla dira gabotse ka mo ba ka kgonago?’

O Ile a Bontšha go Holofela Barutiwa ba Gagwe

16, 17. Bošegong bja mafelelo bja bophelo bja gagwe bja lefaseng, Jesu o ile a nea baapostola ba gagwe kgonthišetšo efe, gaešita le ge a be a tseba gore ba be ba tlo mo lahla?

¹⁶ Jesu o ile a bontšha go ba ga gagwe le pono e nepagetšego ka barutiwa ba gagwe ka tsela e nngwe e bohlokwa. O ile a dira gore ba tsebe gore o be a ba holofela. Se se ile sa bonagala gabotse mantšung a kgonthišetšago ao a ilego a a botša baapostola ba gagwe bošegong bja mafelelo bja bophelo bja gagwe bja lefaseng. Ela hloko seo se ilego sa direga.

¹⁷ E be e le mantšiboa a tletšego bakeng sa Jesu. O ile a nea baapostola ba gagwe thuto yeo ba bego ba swanetše go ithuta yona ya boikokobetšo ka go ba hlapiša maoto. Ka morago ga moo, o ile a hloma selalelo seo e bego e tla ba segopotšo sa lehu la gagwe. Ka morago, baapostola ba ile ba buša ba ba le ngangišano e šoro ka taba ya gore ke mang mo go bona a bonagalago e le yo mogolo. A dutše a sa fele pelo bjalo, Jesu ga se a ka a ba omanya, eupša o ile a bontšhana le bona mabaka. O ile a ba botša ka seo se letšego ka pele: “Lena ka moka bošexo byó Le tlo xakanêxa ka tše kè tl’o xo di dirwa; xobane xo ngwadilwe xwa thwe: Ke tlo ôtla modiši, ’me dinku tša mohlape di tlo xašanywa.” (Mateo 26:31; Sakaria 13:7) O be a tseba gore bagwera ba gagwe ba kgaufsi-ufsi ba be ba tla mo lahla nakong ya ge a ba nyaka. Lega go le bjalo, ga se a ka a ba sola. Ka mo go fapanego, o ile a ba botša gore: “Fêla, e tlo re xe ke tsoxile, ke tlo Le êta pele ra ya Galilea.” (Mateo 26:32) Ee, o ile ba kgonthišetša gore le ge ba be ba tla mo lahla, yena o be a ka se ke a ba lahla. Ge tlaišo ye e šoro e fetile, o be a tla kopana le bona gape.

18. Kua Galilea, Jesu o ile a nea barutiwa ba gagwe thomo efe e boima, gomme baapostola ba ile ba e phetha bjang?

¹⁸ Jesu o ile a phelela lentšu la gagwe. Ka morago, kua Galilea, Jesu yo a tsošitšwego o ile a tšwelela go baapostola ba gagwe ba botegago ba 11, bao go bonagalago ba be ba bokane le ba bangwe ba bantši. (Mateo 28:16, 17; 1 Ba-Korinthe 15:6) Moo, Jesu o ile a ba nea thomo e boima: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Puku ya Ditiro e re nea bohlatse bjo bo kwagalago bja gore baapostola ba ile ba phetha thomo yeo. Ba ile ba etelela pele ka potego mošomo wa go bolela ditaba tše di lokilego lekgolong la pele la nywaga.​—Ditiro 2:41, 42; 4:33; 5:27-32.

19. Ditiro tša Jesu tša ka morago ga go tsošwa ga gagwe di re ruta’ng mabapi le monagano wa Kriste?

¹⁹ Pego ye e utollago e re ruta’ng ka monagano wa Kriste? Jesu o be a ile a bona baapostola ba gagwe ba  le maemong a bona a mabe kudu, fela “a ba rata xo fihla bofelong.” (Johane 13:1) Go sa šetšwe mafokodi a bona, o ile a ba tsebiša gore o a ba holofela. Hlokomela gore go bota ga Jesu e be e se mo go lebišitšwego gošele. Ga go na pelaelo gore go ba bota le go ba holofela mo a ilego a go bontšha go ile gwa ba matlafaletša gore ba ikemišetše dipelong tša bona go phetha modiro wo a bego a ba laetše gore ba o dire.

20, 21. Re ka bontšha bjang go ba le pono e nepagetšego ka badumedi-gotee le rena?

²⁰ Re ka bontšha bjang monagano wa Kriste tabeng ye? O se ke wa belaela badumedi-gotee le wena. Ge e ba o nagana dilo tše mpe, go ka direga gore mantšu a gago le ditiro tša gago di utolle seo. (Luka 6:45) Lega go le bjalo, Beibele e re botša gore lerato “le dumêla tšohle.” (1 Ba-Korinthe 13:7) Lerato le nagana tše botse, e sego tše mpe. Ke le agago go e na le go ba le senyago. Batho ba arabela leratong le kgothatšong le semeetseng go e na le go arabela tšhošetšong. Re ka aga le go kgothatša ba bangwe ka go bontšha go ba bota. (1 Ba-Thesalonika 5:11) Ge e ba ka go swana le Kriste re e-na le pono e nepagetšego ka banababo rena, re tla ba swara ka ditsela tšeo di ba agago le tšeo di ba dirago gore ba ntšhe ka ga tšhwene.

²¹ Go hlagolela le go bontšha monagano wa Kriste go tsenelela kudu go feta go fo ekiša dilo tše itšego tšeo Jesu a bego a di dira. Bjalo ka ge go bontšhitšwe sehlogong se se fetilego, ge e ba re nyaka go itshwara ka go swana le Jesu e le ka kgonthe, re swanetše pele re ithute go lebelela dilo ka tsela yeo a bego a di lebelela ka yona. Diebangedi di re kgontšha go bona karolo e nngwe ya semelo sa gagwe, dikgopolo tša gagwe le maikwelo a gagwe ka modiro wo a bego a o abetšwe, bjalo ka ge sehlogo se se latelago se tla ahla-ahla taba yeo.

[Mengwalo ya ka tlase]

Na o ka Hlalosa?

• Jesu o ile a arabela bjang ge barutiwa ba gagwe ba be ba leka go thibela bana go tla go yena?

• Jesu o ile a bontšha go naganela ba bangwe ka ditsela dife?

• Re ka ekiša bjang go ikemišetša ga Jesu go bota barutiwa ba gagwe?

• Re ka ekiša bjang go holofela ga Jesu baapostola ba gagwe mo a ilego a go bontšha?

[Dipotšišo tša Thuto]

 [Seswantšho go letlakala 16]

Bana ba be ba ikwa ba lokologile ge ba be ba e-na le Jesu

 [Seswantšho go letlakala 17]

Jesu o be a swara ba bangwe ka go ba kwela bohloko

[Seswantšho go letlakala 18]

Bagolo bao ba batamelegago ke tšhegofatšo