Go Tsoma Jehofa ka Pelo e Lokišitšwego

MOPERISITA wa mo-Isiraele Esera e be e le monyakišiši yo mogolo, seithuti, mongwalolodi le morutiši wa Molao. Le go Bakriste lehono e sa le mohlala o mobotse wa tirelo ya moya ka moka. Go bjalo bjang? Ka gore o ile a kgomarela boineelo bja gagwe go Modimo gaešita le ge a be a phela Babele, motse wo o tletšego medimo ya maaka le borapedi bja batemona.

Boineelo bja Esera go Modimo ga se bja fo itaragalela. O ile a bo katanela. Ka kgonthe, o re botša gore “pelo ya xaxwe e be e sa lese xo hlwa è nyaka molaô wa Morêna, le xo dira se se bolêlwaxo ke wôna.” (Mongwalo o sekamego ke wa rena.)​—Esera 7:10.

Go swana le Esera, lehono batho ba Jehofa ba nyaka go dira sohle seo Jehofa a se nyakago go bona ge ba dutše ba phela lefaseng leo le bontšhago bonaba borapeding bja therešo. Ka gona, anke re hlahlobeng ditsela tšeo ka tšona le rena re ka lokišago dipelo tša rena, motho wa ka gare​—go akaretša dikakanyo tša rena, mekgwa, dikganyogo le maikemišetšo​—go “nyaka molaô wa Morêna, le xo dira se se bolêlwaxo ke wôna.”

Go Lokiša Dipelo tša Rena

“Go lokiša” go bolela “go beakanya e sa le pele bakeng sa morero o itšego: go bea boemong bakeng sa tirišo e kgethegilego, go šoma goba tshekamelo.” Ee, ge e ba o šetše o hweditše tsebo e nepagetšego ya Lentšu la Modimo gomme o neetše bophelo bja gago go Jehofa, gona pelo ya gago e itlhatsetše e le ka kgonthe go ba boemong bjo bo lokišitšwego gomme e ka swantšhwa le ‘mmu o botse’ woo Jesu a boletšego ka wona seswantšhong sa gagwe sa mobyadi.​—Mateo 13:18-23.

Lega go le bjalo, pelo ya rena e nyaka tlhokomelo ya ka mehla le go lokišwa. Ka baka la’ng? Ka baka la mabaka a mabedi. La pele, ka gobane ditshekamelo tše di gobatšago tše bjalo ka ngwang ka serapaneng di ka tsema medu gabonolo, kudu-kudu mo ‘mehleng ye ya bofelo’ ya ge “môya” wa tshepedišo ya Sathane o tletše go feta le ge e le neng pele ka dipeu tše gobatšago tša kgopolo ya nama. (2 Timotheo 3:1-5; Ba-Efeso 2:2) Lebaka la bobedi le mabapi le mmu ka bowona. Ge o tlogelwa o sa hlokomelwe, mmu o ka oma go se go ye kae, wa tia gomme wa se sa tšweletša dienywa. Goba batho ba bantši ba ka sepela ka bošaedi godimo ga serapa gomme ba gatakela mmu gore o be o fetoge o tiilego. Mmu wa seswantšhetšo wa dipelo tša rena o a swana. E ka ba wo o sa tšweletšego dienywa ge o hlokomologwa goba o gatakelwa ke batho bao ba se nago kgahlego bophelong bja rena bjo bobotse bja moya.

Ka gona, ke gabohlokwa gakaakang gore ka moka ga rena re diriše keletšo ya Beibele e rego: “Mo xo tšohle di dišwaxo, diša pelo y’axo; xobane bophelô bo hlaxa xo yôna.”​—Diema 4:23.

Dilo Tšeo di Humišago “Mmu” wa Dipelo tša Rena

Anke re hlokomeleng dilo tše dingwe goba dika tšeo di tla humišago “mmu” wa dipelo tša rena e le gore o kgone go mediša dilo tše dibotse gabonolo. Ee, go na le dilo tše dintši tšeo di ka kaonefatšago dipelo tša rena, eupša mo re tla ela hloko tše tshelelago: go lemoga dinyakwa tša rena tša moya, boikokobetšo, go botega, go boifa Modimo, tumelo le lerato.

Jesu o itše: “Go thabile bao ba lemogago dinyakwa tša bona tša moya.” (Mateo 5:3, NW) Go swana le tlala ya kgonthe yeo e re gopotšago gore re swanetše go ja, go lemoga ga rena dinyakwa tša moya go re dira gore re dule re swerwe ke tlala bakeng sa dijo tša moya. Ka tlhago, batho ba na le kganyogo ya dijo tše bjalo ka gobane di nea morero bophelong. Dikgateletšo tshepedišong ye ya Sathane ya dilo goba bobodu ge go tliwa tabeng ya go ithuta di ka senya go ela hloko ga rena senyakwa se. Go sa dutše go le bjalo, Jesu o itše: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”​—Mateo 4:4.

Ka tsela ya kgonthe, dijo tša ka mehla tšeo di nago le phepo e leka-lekanego le tše di agago di dira gore mmele o dule o phetše gabotse, gape di dira gore mmele o hlagolele kganyogo bakeng sa dijo tše di latelago ge nako e fihla. Go bjalo le ka kgopolo ya moya. O ka itšea o le motho yo a sa kgonego go ithuta, eupša ge e ba o dira seo gore e be mokgwa go bala Lentšu la Modimo letšatši le letšatši gomme o ithuta dipuku tšeo di theilwego Beibeleng ka mehla, o tla hwetša gore kganyogo ya gago e a gola. Ge e le gabotse, o tla lebelela pele ka phišego dinakong tša gago tša go ithuta Beibele. Ka gona o se ke wa langwa gabonolo; katanela go ba le kganyogo e botse ya dijo tša moya.

Boikokobetšo bo Letefatša Pelo

Boikokobetšo ke seka sa bohlokwa tabeng ya go ba le pelo e lokišitšwego ka gobane bo re dira gore re be bao ba rutegago gape bo re thuša go amogela keletšo e lerato gotee le phošollo gabonolo. Ela hloko mohlala o mobotse wa Kgoši Josia. Nakong ya pušo ya gagwe go ile gwa hwetšwa lengwalo leo le swerego Molao wa Modimo wo o neilwego ka Moše. Ge Josia a be a e-kwa mantšu a Molao a bile a lemoga kamoo bo-rakgolokhukhu ba gagwe ba ilego ba aroga ka gona borapeding bjo bo sekilego, o ile a gagola diaparo tša gagwe ka bogare gomme a lla ka pele ga Jehofa. Ke ka baka la’ng Lentšu la Modimo le ile la kgoma pelo ya kgoši ka mo go tseneletšego gakaakaa? Pego e bontšha gore pelo ya gagwe e be e “lêtafetše” mo e lego gore o ile a ikokobetša ge a fetša go kwa mantšu a Jehofa. Jehofa o ile a lemoga pelo ya Josia e ikokobeditšego le yeo e kwago gomme a mo šegofatša ka mo go swanetšego.​—2 Dikxoši 22:11, 18-20.

Boikokobetšo bo ile bja kgontšha barutiwa ba Jesu bao e ‘sego ba mangwalo le bao ba sego ba rutega’ go kwešiša le go diriša ditherešo tša moya tšeo di ilego tša feta ba “bohlale le ba thlaloxanyô,” eupša feela ka mokgwa wa “nama.” (Ditiro 4:13; Luka 10:21; 1 Ba-Korinthe 1:26) Ba mafelelo bao go boletšwego ka bona ba be ba se ba itokišetša go amogela lentšu la Jehofa ka gobane dipelo tša bona di be di tiišitšwe ke boikgantšho. Na ke mo go makatšago ka tsela le ge e le efe gore Jehofa o hloile boikgantšho?​—Diema 8:13; Daniele 5:20.

Go Botega le go Boifa Modimo

Moporofeta Jeremia o ngwadile gore “pelo ké yôna mmata-mâno-mabe, ké yôna lešaedi; e hlathwa ke mang?” (Jeremia 17:9) Maano-mabe a, a ipontšha ka ditsela tše di fapa-fapanego tše bjalo ka ge re ipeela mabaka ge re dira phošo. A tšwelela gape ge re iphahlelela bakeng sa diphošo tše dikgolo tša semelo sa rena. Lega go le bjalo, potego e tla re thuša go fenya pelo ya maano-mabe ka go re thuša go lebeletšana le seo e lego therešo mabapi le rena e le gore re ka kaonefatša. Mopsalme o ile a bontšha potego e bjalo ge a be a rapela ka gore: “Morêna, nnyakorêlê O mphêtlêkê; lekola ’phsiô tša-ka le pelo ya-ka.” Go molaleng gore mopsalme o ile a lokišetša pelo ya gagwe go amogela go hlwekišwa le go lekwa ke Jehofa, gaešita le ge go ka ba go be go bolela go amogela go ba gona ga dika tše swanago le ditšhila e le gore tše di ka fenya.​—Psalme 17:3; 26:2.

Poifo ya go boifa Modimo, yeo e akaretšago “xo hlôya bobe,” ke selo se matla se thušago bakeng sa go hlwekiša mo. (Diema 8:13) Ge a dutše a leboga botho bjo lerato bja Jehofa le go loka ga gagwe, motho yo a boifago Jehofa e le ka kgonthe o dula a lemoga gore Jehofa o na le matla a go tliša kotlo gaešita le lehu godimo ga bao ba sa mo kwego. Jehofa o ile a bontšha gore bao ba mmoifago ba be ba bile ba tla mo kwa ge a be a bolela mabapi le Isiraele gore: “A dipelo tša bôná e ka bê e le tše byalo ka mehla, ba mpoifa, ba hlôkômêla ditaêlô tša-ka ka moka; ké mo ba ka bexo ba dula bà thabile, bôná le bana ba bôná neng le neng!”​—Doiteronomio 5:29.

Ka mo go kwagalago, morero wa poifo ya go boifa Modimo ga se go re bea boemong bja go ikokobeletša yena re tšhogile, eupša ke go re šušumeletša go kwa Tatago rena yo lerato, yoo re tsebago gore o re kganyogela tše botse pelong. Ge e le gabotse, poifo e bjalo ya go boifa Modimo e a gola gaešita le go šušumeletša lethabo leo le ilego la bontšhwa kudu ke Jesu Kriste ka noši.​—Jesaya 11:3; Luka 12:5.

Pelo e Lokišitšwego ke Yeo e Humilego ka Tumelo

Pelo yeo e tiilego tumelong e tseba gore selo le ge e le sefe seo Jehofa a se nyakago goba a se laelago  ka Lentšu la gagwe ka mehla ke seo se nepagetšego gomme ke seo se re holago kudu. (Jesaya 48:17, 18) Motho yo a nago le pelo e bjalo o ba le kgotsofalo e tseneletšego le go kgotsofatšwa ke go diriša keletšo yeo e lego go Diema 3:5, 6 yeo e rego: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Lega go le bjalo, pelo ye e se nago tumelo e tla ba ye e sa sekamelago go boteng Jehofa, kudu-kudu ge e ba go dira bjalo go akaretša go dira boikgafo bjo bjalo ka gore motho a nolofatše bophelo bja gagwe e le gore a ka kgona go lebiša tlhokomelo dikgahlegong tša Mmušo. (Mateo 6:33) Ka lebaka le lebotse, Jehofa o lebelela pelo e se nago tumelo e le “e mpe.”​—Ba-Hebere 3:12.

Tumelo ya rena go Jehofa e bonagatšwa mafelong a mantši, go akaretša le dilo tšeo re di dirago ka sephiring ka magaeng a rena. Tšea ka mohlala molao wa motheo wo o lego go Ba-Galatia 6:7: “Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna.” Tumelo ya rena molaong wo wa motheo e tla bonagatšwa dilong tše bjalo ka dipaesekopo tšeo re di bogelago, dipuku tšeo re di balago, palo ya dithuto tša Beibele tšeo re di swarago gotee le dithapelong tša rena. Ee, tumelo e tiilego yeo e re šušumeletšago go bjala ‘go ya ka moya’ ke selo sa bohlokwa bakeng sa go ba le pelo yeo e lokišeditšwego go amogela Lentšu la Jehofa le go le kwa.​—Ba-Galatia 6:8.

Lerato​—Seka se Segolo

Go feta dika tše dingwe ka moka, lerato ka kgonthe le dira mmu wa dipelo tša rena gore e be o arabelago Lentšung la Jehofa. Ka gona, ge a le bapiša le tumelo le kholofelo, moapostola Paulo o ile a hlalosa lerato e le seka “se sexolo.” (1 Ba-Korinthe 13:13) Pelo e tletšego ka lerato la go rata Modimo e hwetša kgotsofalo e tseneletšego le lethabo ka go mo kwa; ka kgonthe ga e befedišwe ke dinyakwa tša Modimo. Moapostola Johane o itše: “Xobane leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.” (1 Johane 5:3) Ka kgopolo e swanago, Jesu o itše: “Xe motho a nthata, ó tlo lôtôla Lentšu la-ka; le Tate ó tlo mo rata.” (Johane 14:23) Lemoga gore lerato le bjalo ke leo le arabelago. Ee, Jehofa o rata ka mo go tseneletšego bao ba batametšego go yena ka lerato.

Jehofa o a tseba gore ga se ra phethagala gomme ka mehla re a mo senyetša. Lega go le bjalo, ga a re katoge. Seo Jehofa a se nyakago go bahlanka ba gagwe ke “pelo yohle,” yeo e re šušumeletšago go mo hlankela ka go rata ka “môya wa mafolofolo.” (1 Koronika 28:9) Ee, Jehofa o a tseba gore go nyakega nako le maiteko go rena gore re hlagolele dika tše dibotse ka dipelong tša rena gomme ka go rialo re tšweletše dienywa tša moya. (Ba-Galatia 5:22, 23) Ka baka leo, ga a re felele pelo, “xobane Yena ó tseba lebopô le re lexo ka lôna, xa a lebale xe re le lerole.” (Psalme 103:14) Ka go bonagatša boemo bjo bo swanago bja kgopolo, Jesu le ka mohla ga se a ka a swaya barutiwa ba gagwe diphošo o šoro bakeng sa diphošo tša bona eupša ka go se fele pelo o ile a ba thuša le go ba kgothatša. Na lerato le bjalo, kgaugelo le go se fele pelo tša Jehofa le Jesu ga di go tutueletše go ba rata ka moka ka mo go oketšegilego?​—Luka 7:47; 2 Petro 3:9.

Ge e ba ka dinako tše dingwe o hwetša go le thata go tomola mekgwa e swanago le sekoro yeo e tsemilego medu goba go thuba mekotlana ya dika tšeo di lego thata tše di swanago le letsopa, o se ke wa nyama goba wa nolega moko. Go e na le moo, tšwela pele o šomela go kaonefatša ge o dutše o sa “kgaotše go rapela,” go akaretša le go lopa Jehofa ka mehla bakeng sa moya wa gagwe. (Ba-Roma 12:12, NW) Ka go swana le Esera, ka thušo ya gagwe ya go ithatela, o tla atlega go ba le pelo yeo e lokišeditšwego go “nyaka molaô wa Morêna, le xo dira se se bolêlwaxo ke wôna.”

[Seswantšho go letlakala 31]

Esera o be a kgomaretše boineelo bja gagwe go Modimo le ge a be a le Babele

[Mothopo wa Seswantšho go letlakala 29]

Garo Nalbandian