Jehofa—Yena yo a Nago le Matla a Magolo

“Mo xo boati byo bokaakaa xwa se hlôkwê le setee, ka xobane è le yo matla a maxolo.”​—JESAYA 40:26.

1, 2. (a) Ka moka ga rena re ithekgile ka mothopo ofe wa kgonthe wa matla? (b) Hlalosa lebaka leo ka lona Jehofa e lego Mothopo wa mafelelo wa matla.

MATLA ke selo seo ba bantši ba rena re se tšeago gabohwefo. Ka mohlala, ga re nagane selo ka matla a mohlagase ao a re neago seetša le phišo goba go nagana ka go ba bonolo ga dilo ka go hloma sedirišwa le ge e le sefe sa mohlagase seo re ka bago re e-na le sona. Ke feela ge mohlagase o kgaoga ka mo go sa letelwago moo re hlokomedišwago gore ka ntle le mohlagase, metse ya batho e tla kgaotša go šoma e le ka kgonthe. Bogolo bja mohlagase woo re ithekgilego ka wona o tšwa ka go se lebanye mothopong wa lefase o ka botwago kudu wa matla​—letšatši. * Motsotswaneng o mongwe le o mongwe sediriši se sa matla se ja ditone tše dimilione tše hlano tša matla a nuclear, gomme se nea lefase matla ao a thekgago bophelo.

² Matla a ka moka a letšatši a tšwa kae? Ke mang yo a hlotšego seteišene se sa go fehla mohlagase sa legodimong? Jehofa Modimo o se hlodile. Psalme 74:16 ge e bolela ka yena e re: “Mmei wa dietša le letšatši ké Wêna.” Ee, Jehofa ke Mothopo wa mafelelo wa matla ka moka, go fo etša ge e le Mothopo wa bophelo ka moka. (Psalme 36:9) Le ka mohla ga se ra swanela go tšea matla a gabohwefo. Ka moporofeta Jesaya, Jehofa o re gopotša gore re lebelele godimo makokong a legodimong, a bjalo ka letšatši le dinaledi, gomme re naganišiše ka tsela yeo a bilego gona ka yona. “Llalang Le bônê tša kwa xodimo; ké mang e a di hlodilexo, a di nthša byalo ka mohlape wo o badilwexo? a di bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo.”​—Jesaya 40:26; Jeremia 32:17.

3. Re holwa bjang ke dipontšho tša matla a Jehofa?

³ Ka ge Jehofa a e-na le matla a magolo, re ka kgonthišega gore letšatši le tla tšwela pele le re nea seetša le phišo tšeo maphelo a rena a ithekgilego ka tšona. Lega go le bjalo, re ithekgile ka matla a Modimo bakeng  sa seo se fetago dinyakwa tša rena tša motheo tša nama. Go lopollwa ga rena sebeng le lehung, kholofelo ya rena ka bokamoso le go bota ga rena Jehofa ka moka di kgokagane ka mo go sa aroganywego le go diriša ga gagwe matla. (Psalme 28:6-9; Jesaya 50:2) Beibele e tletše ka mehlala ye e hlatselago matla a Jehofa a go hlola le go lopolla, go phološa batho ba gagwe le go fediša manaba a gagwe.

Matla a Modimo a Bonagala Tlholong

4. (a) Dafida o ile a kgongwa bjang ke go lebelela leratadimeng bošego? (b) Makoko a legodimo a utolla’ng mabapi le matla a Modimo?

⁴ Moapostola Paulo o hlalositše gore ‘matla a neng le neng a Mmopi wa rena a ka hlathwa ka go bona ditiro tša gagwe.’ (Ba-Roma 1:20) Nywaga-kgolong ya pejana, mopsalme Dafida, yo bjalo ka modiši mo gongwe a bego a fela a lebelela leratadimeng la bošego gantši, o ile a lemoga bogolo bja legohle le matla a Modiri wa lona. O ngwadile gore: “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé O di beilexo, ke re motho ké eng, xe O bile O sa mo lebale? Ngwana wa motho ké eng, xe O bile O mo êla hlôkô?” (Psalme 8:3, 4) Go sa šetšwe tsebo ya gagwe e nyenyane ka makoko a legodimong, Dafida o be a kwešiša gore o be a tloga a se selo ge a bapišwa le Mmopi wa legohle la rena le legolo. Lehono, ditsebi tša tša dinaledi di tseba mo gontši kudu ka bogolo bja legohle le matla ao a le bolokago le le gona. Ka mohlala, di re botša gore letšatši la rena motsotswaneng o mongwe le o mongwe le lokolla matla a lekanago le mothuthupo wa di-megaton tša TNT tše dimilione tše 100 000. * Ke tekanyo e nyenyane feela ya matla ao ye e fihlago lefaseng; fela ke e lekanego bakeng sa go thekga bophelo ka moka polaneteng ya rena. Lega go le bjalo, letšatši la rena ga se lona naledi e matla go feta tše dingwe ka moka magodimong. Dinaledi tše dingwe di ediša matla ao letšatši le a edišago ka letšatši ka moka ka motsotswana feela. Ka gona, akanya matla ao motho Yo a bopilego makoko a bjalo a legodimo a nago le ona! Elihu o ile a bolela ka mo go swanetšego gore: “Yo-matla-ohle re ka se Mo fihlêlê; ké yo moxolo ka matla.”​—Jobo 37:23.

5. Re hwetša bohlatse bofe bja matla a Jehofa medirong ya gagwe?

⁵ Ge e ba re ‘nyaka mediro ya Modimo’ bjalo ka ge Dafida a ile a dira, re tla bona bohlatse bja matla a gagwe gohle​—phefong le maphotong, modumong wa tladi le legadimeng, dinokeng tše matla le dithabeng tše dikgolo. (Psalme 111:2; Jobo 26:12-14) Go feta moo, bjalo ka ge Jehofa a ile a gopotša Jobo, diphoofolo di hlatsela matla a Gagwe. Gare ga tšona go na le Behemothe goba kubu. Jehofa o ile a botša Jobo gore: “Matla a ’nôkeng tša yôna . . . Marapô a yôna a etša dikôta tša mphiri.” (Jobo 40:15-18) Matla a tšhošago a nare a be a tsebja kudu le mehleng ya Beibele, gomme Dafida o ile a rapela gore a namolelwe ‘ganong la ditau le dinakeng tša nare.’​—Psalme 22:21; Jobo 39:9-11.

6. Poo e swantšhetša’ng ka Mangwalong, gomme ka baka la’ng? (Bona mongwalo wa ka tlase.)

⁶ Ka baka la matla a yona, poo ka Beibeleng e dirišetšwa go swantšha matla a Jehofa. * Pono ya  moapostola Johane ya sedulo sa bogoši sa Jehofa e hlalosa diphedi tše nne, tšeo se sengwe sa tšona se bego se e-na le sefahlego se swanago le sa poo. (Kutollo 4:6, 7) Go ya ka bohlatse bjo bo lego gona, se sengwe sa dika tša motheo tša Jehofa tšeo di bonagatšwago ke bakerubi ba ke matla. Tše dingwe ke lerato, bohlale le toka. Ka ge matla e le karolo e bohlokwa kudu ya semelo sa Modimo, go ba le kwešišo e kwagalago ya matla a gagwe le kamoo a a dirišago ka gona go tla re batametša go yena gomme gwa re thuša gore re ekiše mohlala wa gagwe ka go diriša gabotse matla ao re nago le ona.​—Ba-Efeso 5:1.

“Morêna wa Mašaba Ra-matla”

7. Re ka kgonthišega bjang gore botse bo tlo fenya bobe?

⁷ Ka Mangwalong, Jehofa o bitšwa “Modimo Ra-matla-ohle,” e lego sereto seo se re gopotšago gore le ka mohla ga se ra swanela go tšea matla a gagwe gabohwefo goba re belaele bokgoni bja gagwe bja go kgona go fediša manaba a gagwe. (Genesi 17:1; Ekisodo 6:3) Tshepedišo e kgopo ya dilo ya Sathane e ka bonagala e tsemile medu, eupša mahlong a Jehofa “dithšaba di byalo ka lerotholodi le le šaletšexo kxamelong! Di byalo ka lerojanyana le le šaletšexo leselong.” (Jesaya 40:15) Ka thušo ya matla a bjalo a Modimo, ga go na pelaelo gore botse bo tla fenya bobe. Nakong ye ya ge bokgopo bo iphile matla, re ka homotšega ka go tseba gore “Morêna wa mašaba Ra-matla wa Isiraele” o tla fedišetša bobe sa ruri.​—Jesaya 1:24; Psalme 37:9, 10.

8. Ke madira afe a legodimong ao Jehofa a a laelago, gomme re na le pontšho efe ya matla a ona?

⁸ Polelwana “Jehofa wa mašaba,” (NW) yeo e tšwelelago ka makga 285 ka Beibeleng, ke kgopotšo e nngwe ya matla a Modimo. “Mašaba” ao go bolelwago ka ona mo ke bontši bja dibopiwa tša moya tšeo Jehofa a di laelago. (Psalme 103:20, 21; 148:2) Ka bošego bjo tee feela, yo tee wa barongwa ba o ile a bolaya madira a Asiria a 185 000 ao a bego a beile Jerusalema kotsing. (2 Dikxoši 19:35) Ge e ba re lemoga matla a madira a Jehofa a legodimong, re ka se ke ra tšhošetšwa gabonolo ke baganetši. Moporofeta Elisa o be a sa tshwenyege ge a be a tantšwe ke madira ka moka ao a bego a mo nyaka ka gobane, ka go se swane le mohlanka wa gagwe, o be a kgona go bona ka mahlo a tumelo lešaba la madira a legodimong leo le bego le mo thekga.​—2 Dikxoši 6:15-17.

9. Ke ka baka la’ng re swanetše go bota tšhireletšo ya Modimo go etša Jesu?

⁹ Jesu le yena ka mo go swanago o be a lemoga thekgo ya barongwa ge a be a lebeletšane le sehlopha sa bahlola-mpherefere se se itlhamilego ka ditšhoša le melamo serapeng sa Getsemane. Ka morago ga go botša Petro gore a bušetše tšhoša ya gagwe madulong a yona, Jesu o ile a mmotša gore ge e ba go nyakega, A ka kgopela Tatagwe “Barongwa ba ba fetišaxo madirá a lesome le metšô e mebedi.” (Mateo 26:47, 52, 53) Ge e ba re e-na le tebogo e swanago ka madira a legodimong ao Modimo a nago le ona, le rena re tla bota thekgo ya Modimo ka mo go feletšego. Moapostola Paulo o ngwadile gore: “Byale ditaba tšé re tlo di re’ng? Modimo xe a na le rena, re sa tlo šiteletšwa ke mang?”​—Ba-Roma 8:31.

10. Jehofa o diriša matla a gagwe legatong la bomang?

¹⁰ Ka gona, re na le mabaka ka moka a go bota tšhireletšo ya Jehofa. Ka mehla o diriša matla a gagwe bakeng sa go dira botse le ka go dumelelana le dika tše dingwe tša gagwe​—toka, bohlale le lerato. (Jobo 37:23; Jeremia 10:12) Le ge banna ba matla gantši ba gatakela ba diilago le ba ikokobeditšego ka baka la boithati, Jehofa o “tsoša babôtlana leroleng” gomme ke “Yo matla xo phološa.” (Psalme 113:5-7; Jesaya 63:1) Bjalo ka ge Maria, mmago Jesu yo a ipoeditšego le yo bonolo, a be a kwešiša, “Yo-matla” o diriša matla a gagwe ka tsela e sego ya boithati legatong la bao ba mmoifago, o kokobetša baikgogomoši gomme a godiša babotlana.​—Luka 1:46-53.

Jehofa o Utollela Bahlanka ba Gagwe Matla a Gagwe

11. Ke bohlatse bofe bja matla a Modimo bjo ba-Isiraele ba bo bonego ka 1513 B.C.E.?

¹¹ Mabakeng a mantši, Jehofa o ile a bontšha bahlanka ba gagwe matla a gagwe. Le lengwe la mabaka a bjalo e bile Thabeng ya Sinai ka 1513 B.C.E. Ngwageng woo ba-Isiraele ba be ba šetše ba bone bohlatse bjo bo kgahlišago bja matla a Modimo. Dikotlo tše lesome tše di senyago di be di utolotše seatla se matla sa Jehofa le go se be selo ga medimo ya Egipita. Kapejana ka morago  ga moo, go tshelwa ga Lewatle le Lehwibidu ka mohlolo le go fedišwa ga madira a Farao go ile gwa nea bohlatse bjo bongwe bja matla a Modimo. Ka morago ga dikgwedi tše tharo, patogeng ya Thaba ya Sinai, Jehofa o ile a laletša ba-Isiraele gore e be “baruiwa [ba gagwe] mo dithšabeng ka moka.” Ge e le bona, ba ile ba holofetša gore: “Tšohle tše Morêna a di boletšexo re tlo di dira.” (Ekisodo 19:5, 8) Ka morago, Jehofa o ile a nea pontšho e bonagalago gabotse ya matla a gagwe. Thaba ya Sinai e ile ya kuelela muši le go thothomela ka gare ga modumo wa tladi le wa legadima gotee le modumo o mogolo wa phala. Batho bao ba bego ba emetše kgojana ba be ba tšhogile. Eupša Moše o ile a ba botša gore phihlelo ye e swanetše go ba ruta poifo ya go boifa Modimo, poifo yeo e bego e tla ba tutueletša go kwa Modimo wa bona yo matla ohle le yo e lego yena a nnoši wa therešo, Jehofa.​—Ekisodo 19:16-19; 20:18-20.

12, 13. Ke maemo afe ao a ilego a dira Eliya gore a tlogele kabelo ya gagwe, eupša Jehofa o ile a mo matlafatša bjang?

¹² Ka morago ga nywaga-kgolo e mmalwa, mehleng ya Eliya, Thaba ya Sinai e ile ya ba le pontšho e nngwe ya matla a Modimo. Moporofeta o be a šetše a bone matla a Modimo a dira. Modimo o ile a “tswalêla lexodimo” lebaka la nywaga e meraro le seripa ka baka la bohlanogi bja setšhaba sa Isiraele. (2 Koronika 7:13) Nakong ya komelelo yeo e ilego ya tšwelela, manong a ile a fepa Eliya nokeng ya Kirithe, gomme ka morago kabo ya mohlologadi ya bupi le ya makhura e ile ya oketšwa ka mohlolo bakeng sa go nea Eliya dijo. Jehofa o ile a ba a nea Eliya matla a gore a tsoše morwa wa mohlologadi yo. Mafelelong, tekong e kgolo ya Bomodimo Thabeng ya Karamele, mollo o ile wa fologa legodimong gomme wa tšhuma sehlabelo sa Eliya. (1 Dikxoši 17:4-24; 18:36-40) Lega go le bjalo, kapejana ka morago ga moo, Eliya o ile a thoma go tšhoga le go nolega moko ge Isebele a be a tšhošetša ka go mmolaya. (1 Dikxoši 19:1-4) O ile a tšhaba nageng a nagana gore modiro wa gagwe bjalo ka moporofeta o fedile. Bakeng sa go mo kgonthišetša le go mo matlafatša, Jehofa ka botho o ile a mo nea pontšho e lebanyago ya matla a Modimo.

¹³ Nakong ya ge Eliya a be a khutile ka leweng, o ile a bona ponagatšo e boifišago ya dikarolo tše tharo tša matla ao Jehofa a a laolago: phefo e matla, tšhišinyego ya lefase gomme mafelelong ya ba mollo. Lega go le bjalo, nakong ya ge Jehofa a be a bolela le Eliya, o ile a dira bjalo ka “lentšu le fodilego, la tlasana.” O ile a mo abela gore a dire mošomo o oketšegilego gomme a mo tsebiša gore go be go sa na le barapedi ba 7 000 ba botegago ba Jehofa ka nageng. (1 Dikxoši 19:9-18, bapiša le NW.) Ge e ba ka go swana le Eliya, re fela re ikwa re nolega moko ka baka la go se be le mafelelo bodireding bja rena, re ka kgopela Jehofa “matla a fetišago a tlwaelegilego”​—matla a ka re matlafaletšago go tšwela pele re bolela ditaba tše di lokilego re sa kgaotše.​—2 Ba-Korinthe 4:7, NW.

Matla a Jehofa a Kgonthišetša Phethagalo ya Dikholofetšo tša Gagwe

14. Leina la Jehofa le le mo hlaolago le utolla’ng, gomme matla a gagwe a kgokaganywa bjang le leina la gagwe?

¹⁴ Matla a Jehofa gape a kgokaganywa kgaufsi kudu le leina la gagwe le go phethwa ga thato ya gagwe. Leina la moswana-noši la Jehofa, leo le bolelago gore “Yo a Bakago go ba Gona,” le utolla gore o itira gore e be Mophethagatši wa dikholofetšo. Ga go na selo goba motho yo a ka thibelago Modimo go phethagatša merero ya gagwe, go sa šetšwe gore babelaedi ba ka ba ba e lebelelela kgole gakaakang. Bjalo ka ge Jesu a kile a botša baapostola ba gagwe, “xo Modimo ké mo xo kxônêxaxo tšohle.”​—Mateo 19:26.

15. Aborahama le Sara ba ile ba gopotšwa bjang gore ga go na seo se kago go šita Jehofa?

¹⁵ Ka mohlala, Jehofa o kile a holofetša Aborahama le Sara gore o be a tla dira gore ditlogolwana tša bona e be setšhaba se segolo. Lega go le bjalo, ba ile ba dula ba se na bana ka nywaga e mentši. Bobedi bja bona ba be ba tšofetše kudu nakong ya ge Jehofa a be a ba botša gore kholofetšo ya gagwe e be e tla tloga e phethagala gomme Sara o ile a sega. Morongwa ge a fetola o ile a re: “A xo na le selô se se kaxo šita Morêna?” (Genesi 12:1-3; 17:4-8; 18:10-14) Ka morago ga nywaga-kgolo e mene, nakong ya ge Moše mafelelong a kgobokeditše ditlogolwana tša Aborahama​ —tšeo bjale e bego e le setšhaba se segolo​—Moeding wa Moaba, o ile a ba gopotša gore Modimo o be a phethagaditše kholofetšo ya gagwe. Moše o itše: “A di dira ka xobane a [Jehofa] ratile bôtata-weno, a ikxêthêla ditloxolo tša bôná mehleng e tlilexo moraxo, a Xo nthša Egipita ka nnoši ka matla a xaxwe a maxolo. A raka dithšaba tše kxolo tše di Xo fetaxo ka matla xe O fihla, xore a Xo tlišê fá, a Xo fê naxa ya tšôna. Ké tšôna tšé tša mehla yeno.”​—Doiteronomio 4:37, 38.

16. Ke ka baka la’ng Basadutsei ba ile ba wela phošong ya go gana tsogo ya bahu?

¹⁶ Ka morago ga nywaga-kgolo, Jesu o ile a kgalemela Basadutsei bao ba bego ba sa dumele tsogong. Ke ka baka la’ng ba ile ba gana go dumela kholofetšo ya Modimo ya gore o be a tla tsoša bahu? Jesu o ile a ba botša gore: “Xa Le tsebe mangwalô; le matla a Modimo xa Le a tsebe.” (Mateo 22:29) Mangwalo a re kgonthišetša gore ‘bohle ba ba lego mabitleng ba tlo kwa lentšu la Morwa wa motho gomme ba tlo tšwa.’ (Johane 5:27-29) Ge e ba re tseba seo Beibele e se bolelago ka tsogo, kholofelo yeo re nago le yona matleng a Modimo e tla re kgodiša gore bahu ba tla tsošwa. Modimo “lehu ó tlo le tloša ka xo sa felexo; . . . xobane Morêna ó r’yalo.”​—Jesaya 25:8.

17. Ke letšatšing lefe leo le sa lego ka pele moo go bota Jehofa go tla nyakegago ka tsela e kgethegilego?

¹⁷ Kgaufsinyane, go tla tla nako yeo ka yona go tla nyakegago gore yo mongwe le yo mongwe wa rena a bote ka tsela e kgethegilego matla a Modimo a phološago. Sathane Diabolo o tla hlasela batho ba Modimo, bao ba tlago go bonagala ba sa šireletšega. (Hesekiele 38:14-16) Ka nako yeo Modimo o tla bonagatša matla a gagwe a magolo legatong la rena, gomme yo mongwe le yo mongwe o tla swanelwa ke go tseba gore ke yena Jehofa. (Hesekiele 38:21-23) Bjale ke nako ya go aga tumelo ya rena le kholofelo ya rena go Modimo Ra-matla-ohle e le gore re se ke ra tekema nakong yeo ya makgaola-kgang.

18. (a) Re hwetša mehola efe ge re naganišiša ka matla a Jehofa? (b) Ke potšišo efe yeo e tla ahla-ahlwago sehlogong se se latelago?

¹⁸ Ka ntle le pelaelo, go na le mabaka a mantši a gore re naganišiše ka matla a Jehofa. Ge re dutše re naganišiša ka mediro ya gagwe, re tutueletšega ka boikokobetšo go tumiša Mmopi wa rena yo Mogolo le go leboga bakeng sa gore o diriša matla a gagwe ka tsela e bohlale kudu le e lerato. Le ka mohla re ka se ke ra tšhoga ge e ba re bota Jehofa wa mašaba. Tumelo ya rena dikholofetšong tša gagwe e ka se ke ya tekema. Lega go le bjalo, gopola gore re bopilwe ka seswantšho sa Modimo. Ka gona, le rena re na le matla​—le ge e le a lekanyeditšwego. Re ka ekiša Mmopi wa rena bjang tseleng yeo re dirišago matla a rena ka yona? Se se tla ahla-ahlwa sehlogong se se latelago.

[Mengwalo ya ka tlase]

Na o ka Araba Dipotšišo tše?

• Tlholo e hlatsela bjang matla a Jehofa?

• Ke madira afe ao Jehofa a a dirišago go thekga batho ba gagwe?

• Ke mabakeng afe a mangwe ao go wona Jehofa a ilego a bontšha matla a gagwe?

• Re na le kgonthišetšo efe ya gore Jehofa o tla phethagatša dikholofetšo tša gagwe?

[Dipotšišo tša Thuto]

 [Diswantšho go letlakala 10]

“Llalang Le bônê tša kwa xodimo: ké mang e a di hlodilexo?”

[Mothopo]

Photo by Malin, © IAC/RGO 1991

[Diswantšho go letlakala 13]

Go naganišiša ka dipontšho tša matla a Jehofa go aga tumelo dikholofetšong tša gagwe