Modimo o Araba Dithapelo

Koronelio e be e le monna yo a ilego a nyaka kgaugelo ya Modimo ka dithapelo tša ka mehla tšeo di tšwago pelong. Go feta moo, o ile a diriša maemo a gagwe gabotse bjalo ka mohlankedi wa mašole. Go ya ka Beibele, “o be a fêla a hlallêla badiidi dineô tša kxauxêlô.”​—Ditiro 10:1, 2.

KA NAKO yeo, phuthego ya Bokriste e be e bopilwe ka ba-Juda ba dumelago, basokologi le ba-Samaria. Koronelio e be e le yo mongwe wa Ba-ntle yo a sa bollago gape e se karolo ya phuthego ya Bokriste. Na se se bolela gore dithapelo tša gagwe e be e le tša lefeela? Aowa. Jehofa Modimo o ile a lemoga Koronelio le mediro ya gagwe e dirwago ka thapelo.​—Ditiro 10:4.

Ka tlhahlo ya barongwa, Koronelio o ile a kgokaganywa le phuthego ya Bokriste. (Ditiro 10:30-33) E le mafelelo a se, yena le ba lapa la gagwe ba ile ba ba le tokelo ya go ba Ba-ntle ba pele ba sa bolotšwago ba go amogelwa ka phuthegong ya Bokriste. Jehofa Modimo o ile a bona e le mo go swanetšego gore phihlelo ya Koronelio e tsenywe ka pegong ya Beibele. Ka ntle le pelaelo, o ile a dira diphetogo tše dintši bakeng sa go dumelelanya bophelo bja gagwe ka mo go feletšego le ditekanyetšo tša Modimo. (Jesaya 2:2-4; Johane 17:16) Phihlelo ya Koronelio e swanetše go ba kgothatšo e kgolo go batho ba ditšhaba ka moka bao ba nyakago kgaugelo ya Modimo lehono. Ela hloko mehlala e mengwe.

Mehlala ya Mehleng Yeno

Mosadi yo mofsa kua India o be a nyaka go homotšwa kudu. O nyetšwe a na le nywaga e 21 gomme a ba le bana ba babedi. Eupša kapejana ka morago ga go belega ngwana wa bobedi, monna wa gagwe o ile a hlokofala. Kapejana ge a e-na le nywaga e 24, ke ge e le mohlologadi yo a nago le morwedi wa dikgwedi tše 2 le morwa wa dikgwedi tše 22. Ga go makatše gore o be a nyaka khomotšo! O be a ka retologela kae? Bošegong bjo bongwe a gateletšegile kudu, o ile a rapela a re: “Tate wa legodimong, hle nkhomotše ka Lentšu la gago.”

Mesong e latelago o ile a ba le moeng. E be e le yo mongwe wa Dihlatse tša Jehofa. Letšatšing leo, bodiredi bja gagwe bja ntlo le ntlo bo ile bja ba thata ka gobane o ile a amogelwa ke ba mmalwa feela. A lapile e bile a nolegile moko, o be a šetše a le kgaufsi le go ya gae, eupša o ile a ikwa a tutueletšega ka tsela e itšego gore a etele ntlong e nngwe gape e tee feela. Mo ke moo a ilego a gahlana le mohlologadi yo mofsa. Mosadi o ile a mo laletša gore a tsene gomme a amogela puku yeo e bego e hlalosa Beibele. Mosadi o ile a hwetša khomotšo e kgolo ka go bala puku yeo le ka dipoledišano tša gagwe le Hlatse. O ile a ithuta ka kholofetšo ya Modimo ya go tsoša bahu le ka Mmušo  wa Modimo woo kgaufsinyane o tla dirago lefase paradeise. Sa bohlokwa kudu, o ile a thoma go tseba le go rata Modimo a nnoši wa therešo, Jehofa, yoo a ilego a araba thapelo ya gagwe.

Nora yo a dulago motseng wa George, Afrika Borwa, o ile a beela kgwedi ka thoko bakeng sa gore a tšee karolo modirong wa boebangedi wa nako e tletšego. Pele a ka thoma, o ile a rapela Jehofa ka go tšwa pelong gore a mo thuše go hwetša motho yo a bego a thabela e le ka kgonthe go ithuta Beibele. Tšhemo ye a bego a e abetšwe e be e akaretša legae la motho yo a ilego a ba bogale kudu go Nora ketelong e fetilego. Ka sebete, Nora o ile a ya legaeng leo gape. Ka go makala, o ile a hwetša gore moo go hudugetše modudi yo mofsa yo a bitšwago Noleen. Go feta moo, Noleen le mmagwe ba be ba dutše ba rapela Modimo gore a ba thuše go kwešiša Beibele. Nora o hlalosa gore: “Ge ke be ke ithapela go ba swarela thuto ya Beibele, ba ile ba thaba.” Noleen le mmagwe ba ile ba dira tšwelopele ka pela. Ge nako e dutše e e-ya, ba ile ba thoma go tšea karolo gotee le Nora modirong wa go fodiša wa moya.

Mohlala o mongwe o bontšhago matla a tumelo ke wa banyalani bao ba dulago motseng wa Johannesburg, Afrika Borwa. Bošegong bjo bongwe bja Mokibelo ka 1996, lenyalo la Dennis le Carol le ile la fihla boemong bja go fela. E le kholofelo ya mafelelo, ba ile ba rera go rapelela thušo, e lego seo ba ilego ba se dira leboelela go fihla bošego kudu. Mesong e latelago ka iri ya 11, Dihlatse tša Jehofa tše pedi di ile tša kokota mojako wa bona. Dennis o ile a araba gomme a di botša gore di eme go fihla ge a biditše mosadi wa gagwe. Ka nako yeo Dennis o ile a lemoša Carol gore ge e ba a ka tsenya Dihlatse ka gare, go tla ba thata go di raka. Carol o ile a gopotša Dennis gore ba be ba dutše ba rapelela thušo gomme se e ka ba e le karabo ya Modimo dithapelong tša bona. Ka gona Dihlatse di ile tša tsenywa ka gare, gomme thuto ya Beibele e ile ya thongwa ka puku ya Tsebo e Išago Bophelong bjo bo sa Felego. Dennis le Carol ba ile ba thabišwa ke seo ba ithutilego sona. Mathapameng wona ao, ba ile ba ba gona dibokeng ka lekga la pele Holong ya Mmušo ya Dihlatse tša Jehofa ya lefelong leo. Ka go diriša tsebo yeo ba bego ba ithutile yona ka Beibeleng, Dennis le Carol ba ile ba hwetša ditharollo mathateng a bona a lenyalo. Ga bjale ba thabile, ke batumiši ba kolobeditšwego ba Jehofa gomme ba ba le karolo ka mehla go abelaneng ditumelo tša bona tše theilwego Beibeleng le baagišani ba bona.

Go Thwe’ng ge e ba o Ikwa o sa Swanelege go Rapela?

Batho ba bangwe ba botegago ba ka ikwa ba sa swanelege go rapela ka baka la tsela ya bona e mpe ya bophelo. Jesu Kriste o ile a bolela ka kanegelo ya monna yo bjalo, molekgetho yo a hlaswegago. Ge a tsena ka lapeng la tempele, monna yo o ile a ikwa a sa swanelege go tla lefelong le tlwaetšwego la go rapela. “A êma kxolê . . . a ithsetla sehuba a re: Modimo, nkxauxêlê, nna mo-dira-dibe.” (Luka 18:13) Go ya ka Jesu, monna yo o ile a theetšwa gabotse. Se se bontšha gore Jehofa Modimo o tloga e le yo a gaugelago gomme o nyaka go thuša badiradibe bao ba itsholago ka go tšwa pelong.

Ela hloko lesogana la Afrika Borwa leo le bitšwago Paul. Ge e sa le mošemane, Paul o be a e-ba gona dibokeng tša Bokriste le mmagwe. Eupša nakong ya nywaga ya gagwe ya ge a le sekolong se phagamego, o ile a thoma go gwerana le bafsa bao ba bego ba sa latele ditsela tša Modimo. Ka morago ga go tlogela sekolo, o ile a hlankela madireng a mmušo wa kgale wa kgethollo wa Afrika Borwa. Ka nako yeo, kgarebe ya gagwe e ile ya fediša tswalano ya bona ka mo go sa letelwago. Tsela ye ya go se kgotsofatše ya bophelo e ile ya tlogela Paul a gateletšegile kudu. O gopola gore: “Mantšiboeng a mangwe ke ile ka rapela Jehofa gomme ka mo kgopela thušo, gaešita le ge e be e le nywaga e mentši ke se ka ka ka batamela Modimo ka go tšwa pelong.”

E sego kgale ka morago ga thapelo ya gagwe, mmago Paul o ile a mo laleletša Segopotšong sa ngwaga le ngwaga sa lehu la Kriste. (Luka 22:19) Paul o ile a bona e le mo go sa tlwaelegago gore mmagwe a dire se, ka ge a be a ile a tšwa tseleng gomme a sa bontšhe go thabela Beibele. “Ke ile ka lebelela taletšo ye e le karabo ya Jehofa thapelong ya-ka gomme ka ikwa gore ke swanetše go arabela.” Go tloga ka nako yeo go ya pele, Paul o ile a thoma go ba gona dibokeng ka moka tša Bokriste. Ka morago ga dikgwedi tše nne tša thuto ya Beibele, o ile a swanelega bakeng sa kolobetšo. Go feta moo, o ile a tlogela dithuto tša gagwe tša boentšineare gomme a kgetha mošomo wa go tšea karolo modirong wa boebangedi wa nako e tletšego. Lehono, Paul ke monna yo a thabilego, ga a sa gateletšegile ka bophelo bja gagwe bja nakong e fetilego. Nywageng e 11 e fetilego, o be a dutše a hlankela ofising ya lekala ya Mokgatlo wa Watch Tower Afrika Borwa.

Ka kgonthe, Jehofa Modimo ka kgaugelo o araba dithapelo e bile “ba ba Mo nyakaxo ó a ba putsa.” (Ba-Hebere 11:6) Kgaufsinyane letšatši le legolo la Jehofa le tla fihla gomme la fediša bokgopo ka moka. Mo nakong ye, Jehofa o araba dithapelo tša batho ba gagwe bakeng sa matla le tlhahlo ge ba dutše ba tšea karolo ka mafolofolo modirong o bohlokwa wa go nea bohlatse. Ka gona, dimilione tša batho ditšhabeng ka moka di kgokaganywa le phuthego ya Bokriste gomme di šegofatšwa ka tsebo ya Beibele yeo e išago bophelong bjo bo sa felego.​—Johane 17:3.

[Seswantšho go letlakala 5]

Thapelo ya Koronelio e tšwago pelong e ile ya dira gore a etelwe ke moapostola Petro

[Seswantšho go letlakala 6]

Thapelo e thušitše ba bantši dinakong tša kgateletšego

 [Seswantšho go letlakala 7]

Ke mo gobotse go rapelela thušo ya go kwešiša Beibele

Banyalani ba ka rapelela thušo bakeng sa go matlafatša lenyalo la bona