Re Mohuta o Nago le Tumelo

Go Abelana Kholofelo ya Bokriste Kua Senegal

GA E sa le go tloga mehleng ya kgale hlapi e dutše e le sejo sa ka mehla. Ka nywaga e dikete, batho ba be ba swara dihlapi mawatleng a lefase, matsheng le dinokeng. Ba bangwe ba baapostola ba Jesu Kriste e be e le barei ba dihlapi Lewatleng la Galilea. Lega go le bjalo, Jesu o ile a tšweletša mohuta o mongwe wa go rea dihlapi. Wo e be e le modiro wa go rea dihlapi tša moya wo o bego o ka se hole barei feela, eupša o be o tla hola le dihlapi.

Tabeng ye, Jesu o ile a botša morei wa dihlapi e lego Petro gore: “Xo tloxa byalo O tlo ba morei wa xo phutha batho.” (Luka 5:10) Mohuta wo wa go rea o a dirwa lehono dinageng tša ka godimo ga 230, go akaretša le Senegal. (Mateo 24:14) Mo ‘barei ba batho’ ba mehleng yeno ba abelana ka sebete le ba bangwe kholofelo ya bona ya Bokriste.​—Mateo 4:19.

Senegal e ka ntlheng ya ka bodikela ya Afrika. E naba go tloga mafelong a leganata a nago le mohlaba o montši ao a lego mollwaneng wa Sahara ka leboa go ya dithokgweng tše di nago le monola tša Casamance ka borwa. Senegal ke naga yeo e fokelwago ke diphefo tša moya o omilego kudu tša leganateng gotee le moyana o botšiditšana le o lapološago wa Atlantic. Mo go dula batho ba fetago dimilione tše senyane. Badudi ba Senegal ba tsebja ka mokgwa wa bona wa go amogela baeng. Ba bantši ba bona ga ba ipolele gore ke Bakriste. Ba bantši ke badiši ba dinku, mola ba bangwe e le badiši ba dikgomo, dikamela le dipudi. Go na le ka balemi bao ba lemago dimake, leokodi le reise. Ee, e bile gape go na le barei ba dihlapi bao ba boago ba tladitše molokwa go tšwa Lewatleng la Atlantic gape le go tšwa dinokeng tše dintši tša manyoke-nyoke tša ka nageng. Intaseteri ya go rea dihlapi e kgatha tema e bohlokwa boemong bja tša boiphedišo bja Senegal. Ge e le gabotse, sejo se se tumilego sa setšhaba se ke ceebu jën, sejo se se latswegago se se dirilwego ka reise, hlapi le merogo.

‘Barei ba Batho’

Go na le bagoeledi ba mafolofolo ba Mmušo wa Modimo ba 863 Senegal. Modiro wa go rea dihlapi tša moya o thomile mo mathomong a nywaga ya bo-1950. Go ile gwa bulwa ofisi ya lekala ya Mokgatlo wa Watch Tower kua Dakar, e lego motse-mošate ka 1965. ‘Barei ba dihlapi’ ba baromiwa ba ile ba thoma go fihla ba e-tšwa dinageng tše dintši tša kgole. Go ile gwa thongwa mediro ya go ‘rea,’ gomme go abelanwa ga kholofelo ya Bokriste kua Senegal gwa tšwela pele ka mo go sa kgaotšego. Mafelelong, go ile gwa agwa meago e mefsa ya lekala kua Almadies, ka ntle ga Dakar gomme e ile ya neelwa go Jehofa ka June 1999. E bile nako ya lethabo le legolo gakaakang!

Tlhohlo ya go Amogela Therešo

Go boledišanwa ka mehla le batho bao ba tšwago ditšong tše di fapa-fapanego, gomme ba bangwe ba arabetše ka tsela e kgahlišago molaetšeng wa kholofelo wo o hwetšwago ka Lentšung la Modimo. Le ge ba bantši ba se na tsebo ya Beibele, ba thabela go ithuta gore dikholofetšo tšeo Jehofa Modimo a di dirilego go baporofeta ba botegago ba bogologolo di tla phethagala kgaufsinyane.

Gantši go nyakega sebete bakeng sa go emela melao ya motheo ya Bokriste ka go tia, kudu-kudu ge go akaretšwa meetlo le metlwae ya lapa. Ka mohlala, lenyalo la segadikane le dirišwa gohle kua Senegal. Nagana ka taba ya monna yo a bego a e-na le basadi ba babedi ge a be a thoma go ithuta Beibele. Na o be a tla ba le sebete sa go amogela therešo ya Bokriste ke moka a dire ka go dumelelana le seo se nyakwago ke Mangwalo bakeng sa gore a be monna wa mosadi o tee? (1 Timotheo 3:2) Le gona na o be a tla šala le mosadi wa bofseng bja gagwe, e lego mosadi yo a mo nyetšego pele? Ke sona seo a ilego a se dira, gomme gona bjale o hlankela e le mogolo yo mafolofolo go e nngwe ya diphuthego tše dikgolo tikologong ya Dakar. Mosadi wa gagwe wa pele le yena o amogetše therešo gotee le bana ba gagwe ka moka ba 12, bao ba lesome e lego ba mosadi wa gagwe wa pele mola ba babedi e le ba yo e bego e le mosadi wa gagwe wa bobedi.

Lepheko le lengwe leo le šitišago go amogela kholofelo ya Bokriste e ka ba go se tsebe go bala le go ngwala. Na se se bolela gore motho yo a sa tsebego go bala le go ngwala a ka se ke a amogela le go diriša therešo? Le gatee. Ela hloko mohlala wa Marie, mma wa bana ba seswai yo a šomago ka thata. O ile a akgofa a bona bohlokwa bja go ahla-ahla temana ya Beibele le bana ba gagwe letšatšing le lengwe le le lengwe pele ba tloga ba e-ya sekolong gomme yena a e-ya mošomong. Eupša o be a ka dira se bjang ka ge e le gore o be a sa kgone go bala? Mesong e mengwe le e mengwe  e sa le ka pela, o be a tšea pukwana ya Go Hlahloba Mangwalo ka Mehla gomme a ema tseleng ya mohlaba o montši ka pele ga ntlo ya gagwe. Ge batho ba feta, o be a ba botšiša ge e ba ba be ba kgona go bala. Ge a be a hweditše motho yo a kgonago, o be a mo nea puku gomme a bolela ka go tšwa pelong a re: “Ga ke kgone go bala, ka gona na o ka se mpalele hle karolo ye lehono?” O be a theetša ka kelohloko ge go balwa. Ka morago o be a leboga mofeti ke moka a tsena ka ntlong ya gagwe kapejana bakeng sa go swara poledišano e phelago ya temana le bana ba gagwe pele ba tloga ba e-ya sekolong!

Batho ba Mehuta ka Moka ba a Arabela

Kua Senegal, batho ba ka hwetšwa ba dutše ditarateng ba rekiša dihlapi, merogo goba dienywa mmarakeng goba ba dutše ba ithekgile ka tlase ga sehlare se segologolo sa baobab ba e-nwa ataya, e lego teye e tala e babago ganyenyane. Ka ge ba be ba ikemišeditše go abelana ditaba tše di lokilego le bohle bao ba bego ba kopana le bona, banababo rena ba babedi ba ile ba boledišana le monna wa segole yo a bego a kgopela setarateng. Ge ba šetše ba mo dumedišitše, ba ile ba re: “Batho ba bantši ba go fa tšhelete eupša ga ba eme bakeng sa gore ba boledišane le wena. Re tlile mo go tlo boledišana le wena ka selo sa bohlokwa kudu seo se kgomago bokamoso bja gago.” Mokgopedi o be a maketše. Banababo rena ba ile ba tšwela pele ka gore: “Re rata go go botšiša potšišo. O nagana gore ke ka baka la’ng go e-na le tlaišego e kgolo gakaakaa lefaseng?” Mokgopedi o ile a araba ka gore: “Ke thato ya Modimo.”

Ka morago banababo rena ba ile ba bontšhana le yena go tšwa Mangwalong gomme ba hlalosa Kutollo 21:4. Mokgopedi o ile a kgongwa kudu ke molaetša wo wa kholofelo le ke taba ya gore motho yo mongwe o ile a bontšha kgahlego e lekanego go yena bakeng sa gore a eme gomme a bolele ka Beibele. O ile a seka megokgo. Go e na le go kgopela tšhelete, o ile a lopa banababo rena gore ba tšee tšhelete ka moka ya tshipi yeo a bego a e-na le yona ka tšhitswaneng ya gagwe ya go kgopela! O ile a ba phegelela mo e lego gore se se ile sa goga tlhokomelo ya yo mongwe le yo mongwe yo a bego a feta. E bile ka bothata feela moo banababo rena ba ilego ba kgona go mo fenya ka polelo gore a šale le tšhelete. Mafelelong o ile a dumela fela a phegelela gore ba mo etele gape.

Yunibesithi e kgolo kua Dakar le yona e tlaleletša go tšeo di swerwego lelokweng la go rea dihlapi tša moya. Moo morutwana yo a ithutelago tša bongaka yo a bitšwago Jean-Louis o ile a thoma go ithuta Beibele. O ile a amogela therešo kapejana, a neela bophelo bja gagwe go Jehofa gomme a kolobetšwa. Kganyogo ya gagwe e be e le go hlankela Modimo tirelong ya bobulamadibogo bja ka mehla, eupša o be a bile a thabela thuto ya gagwe ya tša bongaka. Ka baka la tumelelano yeo a bego a e dirile le naga yeo a tšwago go yona, o be a tlamega gore a fetše dithuto tša gagwe. Lega go le bjalo, o ile a thoma go hlankela e le mmulamadibogo wa go thuša ka nako yona yeo. Kapejana ka morago ga go amogela diploma ya gagwe bjalo ka ngaka yeo e nago le mangwalo, o ile a laleletšwa go hlankela legaeng le legolo la Bethele Afrika e le ngaka ya lapa. Lesogana le lengwe leo go ikopantšwego le lona kua Yunibesithing ya Dakar le lona ga bjale le hlankela le lapa la Bethele nageng ya gabo lona.

Modiro wa go rea dihlapi tša moya kua Senegal e tloga e le o putsago. Dipuku tša Beibele tša Dihlatse tša Jehofa di lebogwa kudu gomme ga bjale di tšweletšwa ka leleme la tikologong la se-Wolof. Go kwa ditaba tše di lokilego ka leleme la gabo bona go kgothaleditše batho ba bantši ba dipelo tše di botegago go arabela ka tebogo. Ka tšhegofatšo ya Jehofa, ga go na pelaelo gore dihlapi tše dintši tša seswantšhetšo di tla swarwa, ge ‘barei ba dihlapi’ ba Senegal ba fišegago ba tšwela pele go abelana kholofelo ya Bokriste ka tumelo le ka sebete.

[Mmapa/Seswantšho go letlakala 31]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

SENEGAL

[Seswantšho]

Go abelana kholofelo ya Bokriste kua Senegal

[Mothopo]

Mountain High Maps® Copyright © 1997 Digital Wisdom, Inc.