Kamoo Jesu Kriste a ka re Thušago ka Gona

SEO Jesu Kriste a se dirilego bakeng sa go thuša batho ge a be a le mo lefaseng se be se kgahliša. Se e be e le sa therešo kudu moo ka morago ga go bala ditiragalo tše mmalwa ka bophelo bja Jesu, hlatse e nngwe e bonego ka mahlo e ilego ya re: “Xo sa na le tše dingwê tše ntši tše Jesu a di dirilexo, tše e rexo xe di ka ngwalwa ka xo hlatlamana xa tšôna, nna ke re lefase le ka se akaretše mangwalô ao a bexo a ka ngwalwa.” (Johane 21:25) Ka ge Jesu a dirile dilo tše dintši kudu mo lefaseng, re ka botšiša gore: ‘A ka ba mothuši wa rena bjang legodimong? Na re ka holega ka kwelobohloko e lerato ya Jesu gona bjale?’

Karabo ke yeo e thabišago pelo le yeo e kgonthišetšago. Beibele e re botša gore Kriste o tsene “xôna-kwa maxodimong, ’me byale ó bônala pele xa sefahloxô sa Modimo ka ’baka la rena.” (Ba-Hebere 9:24) O re diretše eng? Moapostola Paulo o hlalosa gore: “[Kriste] a tsêna Sekxêthwa-kxethweng xa-tee ya ba moka. A se tsênê ka madi a dipôô le a diphôkô; a tsêna [legodimong ka bolona, NW] ka madi a xaxwe Yêna mong, a hwetša topollô ya neng le neng.”​—Ba-Hebere 9:12; 1 Johane 2:2.

A ditaba tše dibotse gakaakang! Go e na le go fediša modiro wa Jesu o kgahlišago bakeng sa batho, go rotogela ga gagwe legodimong go ile gwa mo kgontšha go dira mo go oketšegilego bakeng sa batho. Se ke ka gobane Modimo, ka kgaugelo ya gagwe e kgolo e sa re swanelago, o ile a kgetha Jesu bakeng sa go hlankela e le “molaki”​—moperisita yo a phakgamego​—ka “letsoxong le letona la sedulô sa borêna bya kwa maxodimong.”​—Ba-Hebere 8:1, 2. 

“Molaki”

Ka gona, a le legodimong Jesu o tla ba molaki bakeng sa batho. O tla dira modiro o swanago le woo o ilego wa dirwa ke moperisita yo mogolo wa Isiraele bakeng sa barapedi ba Modimo nakong ya bogologolo. Modiro woo e be e le eng? Paulo o hlalosa gore: “Baperisita ba baxolo bohle ba be ba bewa xore ba fihlišê dibexô le didimo. Le Yêna [Jesu Kriste yo a rotogago] wa rena ó na le tše a swanetšexo xo di fihliša.”​—Ba-Hebere 8:3.

Jesu o be a na le selo se itšego seo a bego a tla neela ka sona seo se bego se feta kgole seo moperisita yo a phakgamego wa bogologolo a ilego a se nea. “Xe madi a dipôô le a diphôkô” a be a ka tliša go hlweka moyeng ka tekanyo e itšego go Isiraele ya bogologolo, “xôna madi a Kriste . . . [a] hlatswa matswalô a rena [gakaaka’ng] ra tšwa ’thšila tša medirô ye e hwilexo, ra tla ra dirêla Modimo e a phelaxo?”​—Ba-Hebere 9:13, 14.

Jesu gape ke molaki yo mogolo, ka gobane o neilwe bosafelego. Isiraeleng ya bogologolo ke “ba bantši ba ba hlatlamanexo è le baperisita, ka xe lehu le ba šitišitše xo dula.” Eupša go thwe’ng ka Jesu? Paulo o ngwala gore: “Ó na le boperisita byo bo sa šielwexo e mongwê, ka xobane à dula à le xôna neng le neng. Ké tšôna di mo kxonišaxo  xo phološa-moka, xo phološa bao ba batamêlaxo ka Yêna, ka xe e le wa xo phela neng le neng le xo ba rapêlêla.” (Ba-Hebere 7:23-25; Ba-Roma 6:9) Ee, ka letsogong le letona la Modimo legodimong, re na le molaki ‘yo a dulago a phela bakeng sa go re rapelela.’ Anke o nagane gore ke eng seo se se bolelago go rena gona bjale!

Ge Jesu a be a le lefaseng, batho ba ile ba kgobokana go yena bakeng sa thušo, gomme ka dinako tše dingwe ba be ba sepela dibaka tše kgolo bakeng sa go hwetša thušo ya gagwe. (Mateo 4:24, 25) Legodimong, Jesu o hwetšagala bakeng sa batho ba ditšhaba ka moka. Boemong bja gagwe bja legodimong, o dula a hwetšagala bjalo ka molaki.

Jesu ke Moperisita yo a Phakgamego wa Mohuta Mang?

Ditlhaloso tša Jesu Kriste tšeo di begilwego dipegong tša Ebangedi di re tlogela re se na pelaelo mabapi le go ba le thušo ga gagwe le kgaugelo ya gagwe e lerato. E be e le yo a ikgafilego gakaakang! Ka lekga la ka godimo ga le tee, go ba ka sephiring ga gagwe go ile gwa šitišwa ge yena le barutiwa ba gagwe ba be ba leka go ikhutša ka mo go nyakegago. Go e na le go ikwa a hlokišwa dinako tše kgethegilego tša khutšo le go homola, “a ba šôkêlwa” bjalo ka batho bao ba bego ba nyaka thušo ya gagwe. Gaešita le ge Jesu a be a lapile, a swerwe ke tlala e bile a nyorilwe “a ba xahlanetša” gape o be a ikemišeditše go gafa dijo ge e ba a be a swanetše go thuša badiradibe bao ba botegago.​—Mareka 6:31-34; Luka 9:11-17; Johane 4:4-6, 31-34.

Ka go ba šokelwa, Jesu o ile a tšea megato e swanetšego bakeng sa go kgotsofatša dinyakwa tša batho tša nama, tša maikwelo gotee le tša moya. (Mateo 9:35-38; Mareka 6:35-44) Go feta moo, o ile a ba ruta go hwetša tapologo ya ka mo go sa felego le khomotšo. (Johane 4:7-30, 39-42) Ka mohlala, taletšo ya gagwe ya motho ka noši ke e kgahlišago gakaakang: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena.”​—Mateo 11:28, 29.

Lerato la Jesu bakeng sa batho e be e le le legolo moo mafelelong a ilego a neela bophelo bja gagwe bakeng sa batho ba sebe. (Ba-Roma 5:6-8) Tabeng ye moapostola Paulo o ile a bea mabaka ka gore: “Yena [Jehofa Modimo] a sa kago a tsebafa le Morwa wa gagwe ruri, eupša a mo gafa ka baka la rena ka moka, a ka be a sa re setše bjang ka tšohle le yena? . . . Kriste ke e a hwilego; gape gagolo ke e a bilego a tsoga, gape ke e a lego letsogong le letona la Modimo, gape ke yena e a re rapelelago.”​—Ba-Roma 8:32-34, PK.

Moperisita yo Mogolo yo a ka re Kwelago Bohloko

Bjalo ka motho, Jesu o ile a swarwa ke tlala, lenyora, a lapa, a tlalelwa, a kwa bohloko a ba a hwa. Dikgateletšo tšeo a ilego a di kgotlelela di ile tša mo hlama ka tsela ya moswana-noši bakeng sa go hlankela bjalo ka Moperisita yo Mogolo bakeng sa batho bao ba tlaišegago. Paulo o ngwadile gore: “Xo be xo swanetše xe [Jesu] a e-ba e a swanaxo le bana babô ka tšohle, xore a bê wa xo ba kwêla bohloko, a bê Moperisita e moxolo e a bôtexetšexo Modimo, a kxônê xo hlatswa sethšaba dibe. Xobane ba ba lekwaxo ó kxôna xo ba lwêla, ka xe le Yêna a tlaišexile à lekwa.”​—Ba-Hebere 2:17, 18; 13:8.

Jesu o ile a bontšha gore o a swanelega gape o rata go thuša batho go batamela kgaufsi le Modimo. Lega go le bjalo, na se se bolela gore o swanelwa ke go phophotha go Modimo yo bogale le yo a se nago kgaugelo yo a dika-dikago go lebalela? Ga go bjalo le gatee, ka gobane Beibele e re kgonthišetša gore ke “yo botho, [ke] molebaledi.” Gape e re: “Xe re ipolêla dibe tša rena, xôna ka xe Yêna è le wa pôtêxô le tokô, ó re lebalêla dibe a  re hlatswa bokxôpô ka moka.” (Psalme 86:5; 1 Johane 1:9) Ge e le gabotse, mantšu a Jesu a bonolo le ditiro di bontšha kwelobohloko, kgaugelo le lerato la Tatagwe.​—Johane 5:19; 8:28; 14:9, 10.

Jesu o tliša bjang tokologo go badiradibe bao ba sokologago? Ka go ba thuša go hwetša lethabo le kgotsofalo maitekong a bona a kgonthe bakeng sa go thabiša Modimo. Ge a be a ngwalela Bakriste-gotee le yena ba ba tloditšwego, Paulo o ile a akaretša boemo ka gore: “Byale, xe re na le Moperisita e moxolo yo mokaakaa, e a tsenexo a fihla moseo wa maxodimo, Yêna Jesu Morwa wa Modimo, a re tiišeng xo ipolêla ka tumêlô. Xobane Moperisita e moxolo e lexo wa rena, xa se a kaxo šitwa xo re kwêla bohloko xe re fôkôla; ké e a lekilwexo mo xo tšohle byalo ka rena; fêla, xa a na sebe. Ké xôna, a re batameleng rè holofetše, re tlê madulong ao a kxauxêlô, re tle re amoxêlê thšôkêlô, re hwetše kxauxêlô ya xo hlakodišwa lebakeng la xôna.”​—Ba-Hebere 4:14-16.

“Xo Hlakodišwa Lebakeng la Xôna”

Lega go le bjalo, ke eng seo re ka se dirago ge re lebeletšane le mathata ao re ikwago gore ke a magolo kudu go ka lebeletšana le wona​—bolwetši bjo šoro, morwalo wa go ikwa molato, go nolega moko mo gogolo le kgateletšego? Re ka diriša tokišetšo yeo Jesu ka boyena a bego a ithekgile ka yona ka mehla​—tokelo e kgethegilego ya thapelo. Ka mohlala, bošegong bja pele ga ge a ka neela bophelo bja gagwe bakeng sa rena, o ile “a rapêla á tlaletšwe wa motho e a hwaxo; dikudumêla tša xaxwe tša ba byalo ka marotholodi a madi a rôthêlaxo fase.” (Luka 22:44) Ee, Jesu o a tseba gore go bjang go rapela Modimo ka boikemišetšo bjo bogolo. Ke yena “a tlišitšexo didimo tša dithapêlô le ditôpô le dillô tše thata le ka mexôkxô, a di fihliša xo Eo a kxonnexo xo mo phološa lehung; ’me a kwewa a hlakodišwa poifong.”​—Ba-Hebere 5:7.

Jesu o tseba gore go bolela mo go kaakang go batho go “kwewa” le go matlafatšwa. (Luka 22:43) Go feta moo, o ile a holofetša gore: “Tšohle tše Le tl’o xo di kxopêla xo Tate ka Leina la-ka ó tlo Le fa. . . . Kxopêlang, xomme Le tlo tšea, xore lethabô la lena e bê le le tletšexo.” (Johane 16:23, 24) Ka gona, re ka kgopela Modimo re kgodišegile gore o tla dumelela Morwa wa gagwe go diriša matla a gagwe le mohola wa sehlabelo sa gagwe sa topollo bakeng sa rena.​—Mateo 28:18.

Re ka kgonthišega gore boemong bja gagwe bja legodimong, Jesu o tla nea mohuta o swanetšego wa thušo ka nako e swanetšego. Ka mohlala, ge e ba re dirile sebe gomme re tloga re itshola e le ka kgonthe, re ka hwetša khomotšo kgonthišetšong ya gore “re na le Morapeledi xo Tata wešo, Jesu Kriste Yêna Moloki.” (1 Johane 2:1, 2) Mothuši wa rena le Mohomotši legodimong  o tla re kgopelela e le gore dithapelo tša rena leineng la gagwe le tumelelanong le Mangwalo di arabje.​—Johane 14:13, 14; 1 Johane 5:14, 15.

Go Bontšha Tebogo Bakeng sa Thušo ya Kriste

Go akaretša mo gontši go feta go fo kgopela Modimo ka Morwa wa gagwe. Ka mohola wa sehlabelo sa gagwe sa topollo, ‘Kriste ka thekollo’ o ile a ba bjalo ka “mong wa bôná e a . . . rekilexo” moloko wa batho. (Ba-Galatia 3:13; 4:5; 2 Petro 2:1) Re ka bontšha tebogo ya rena bakeng sa sohle seo Kriste a re direlago sona ka go lemoga ka go ba mong wa rena gomme ka lethabo re arabele taletšong ya gagwe e rego: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo] ka mehla, ’me a ntatêlê.” (Luka 9:23) ‘Go ikgafa’ ga se feela polelo ya molomo ya go fetoša mong wa gago. Go feta moo, Kriste “o hwile ’bakeng sa bohle, xore ba ba phelaxo ba se kê ba hlwa ba iphelêla, ba phelêlê Yêna e a hwilexo ’bakeng sa bôná.” (2 Ba-Korinthe 5:14, 15) Ka gona, tebogo bakeng sa topollo e tla ba le mafelelo a magolo ponong ya rena, dipakaneng le mokgweng wa bophelo. Go ineela ka mo go sa felego go “Jesu Kriste . . . Yêna a ikxafilexo ka ’baka la rena,” go swanetše go re tutuetša go ithuta ka mo go oketšegilego ka yena le Tatagwe yo lerato Jehofa Modimo. Gape re swanetše go nyaka go gola tumelong, go phela ka ditekanyetšo tša Modimo tše di holago gomme re be “dirôtô medirong e botse.”​—Tito 2:13, 14; Johane 17:3.

Phuthegong ya Bokriste ke fao re amogelago dijo tša moya ka nako, kgothatšo gotee le tlhahlo. (Mateo 24:45-47; Ba-Hebere 10:21-25) Ka mohlala, ge e ba le ge e le bafe ba babja moyeng, ba “bitšê baxolo [bagolo ba kgethilwego] ba phuthêxô.” Jakobo o tlaleletša ka kgonthišetšo e rego: “Me thapêlô ya tumêlô e tlo phološa molwetši. Morêna ó tlo mo tsoša; xe a dirile dibe ó tlo lebalêlwa.”​—Jakobo 5:13-15.

Ka mohlala: Monna yo a lego kgolegong kua Afrika Borwa o ile a ngwalela mogolo wa phuthego a bontšha tebogo bakeng sa “Dihlatse tša Jehofa ka moka tšeo di phethago modiro o mobotse wo o thomilwego ke Jesu Kriste bakeng sa go thuša batho go katanela go fihlelela Mmušo  wa Modimo.” Ke moka o ile a ngwala gore: “Ke be ke thabile kudu ge ke be ke amogela lengwalo la lena. Go tshwenyega ga lena bakeng sa go phološwa ga-ka moyeng go ile gwa nkgoma kudu. Tšeo ka moka ga tšona e bile lebaka leo le ntirilego gore ke thome go ela hloko seo Jehofa Modimo a se nyakago bakeng sa tshokologo. Ka nywaga e 27 ke be ke dutše ke dira diphošo gomme ke lahlegelwa ke tsela ya-ka lefsifsing la sebe, bofora, ditswalano tše di gobogilego, mekgwa e gobogilego le madumedi a belaetšago. Ka morago ga go itsebiša ga-ka go Dihlatse tša Jehofa, ke ile ka ikwa gore mafelelong ke hweditše tsela​—tsela e nepagetšego! Seo ke swanetšego go se dira ke go e latela.”

Thušo e Oketšegilego Bokamosong bjo bo Lego Kgaufsi

Go phuhlama ga maemo a lefase ke bohlatse bjo bo lego molaleng bja gore re phela lebakeng la nako e bohlokwa yeo e bego e tla tla pele ga ge “masetla-pelo a magolo” a thoma. Gona bjale, lešaba le legolo la ditšhaba ka moka, meloko, batho le maleme le ‘hlatswa mašela a lona le a dira a mašweu mading a Kwana.’ (Kutollo 7:9, 13, 14; 2 Timotheo 3:1-5) Ka go bontšha tumelo sehlabelong sa Jesu sa topollo, ba hwetša tebalelo ya dibe tša bona gomme ba thušwa go ba le tswalano ya kgaufsi le Modimo​—ge e le gabotse, go ba bagwera ba gagwe.​—Jakobo 2:23.

Kwana e lego Jesu Kriste “e tlo ba diša; [baphologi ba masetla-pelo a magolo] e tlo ba iša didibeng tša meetse a bophelô; ’me Modimo ó tlo phomola mexôkxô ka moka mahlong a bôná.” (Kutollo 7:17) Ka nako yeo Kriste o tla swaragana le mediro ya gagwe e le Moperisita yo a Phagamego ka mo go tletšego. O tla thuša bagwera ba Modimo ka moka go holega ka mo go tletšego go tšwa “didibeng tša meetse a bophelô”​—moyeng, nameng, monaganong le maikwelong. Seo Jesu a ilego a se thoma ka 33 C.E. le seo a ilego a se tšwetša pele legodimong ga e sa le go tloga moo se tla tšweletšwa pele go iša phethegong.

Ka gona, o se ke wa nolega moko ka go bontšha tebogo e tseneletšego bakeng sa sohle seo Modimo le Kriste ba se dirilego​—le seo ba dutšego ba se dira​—bakeng sa rena. Moapostola Paulo o ile a kgothatša ka gore: “Thabang Moreneng ka mehla! . . . A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”​—Ba-Filipi 4:4, 6, 7.

Go na le tsela e kgethegilego ya go bontšha tebogo ya rena go Jesu Kriste, Mothuši wa rena legodimong. Ka morago ga ge letšatši le sobetše ka Laboraro, April 19, 2000, Dihlatse tša Jehofa go dikologa lefase ka moka di tla bokana gotee bakeng sa Segopotšo sa lehu la Kriste. (Luka 22:19) Se e tla ba sebaka sa go nweletša tebogo ya gago bakeng sa sehlabelo sa Kriste sa topollo. O laletšwa ka borutho go ba gona le go kwa kamoo tokišetšo ya Modimo e kgahlišago bakeng sa phološo ka Kriste e ka go holago ka mo go sa felego. Hle ikopanye le Dihlatse tša Jehofa tša lefelong la geno bakeng sa nako ya maleba le lefelo la seboka se se se kgethegilego.

[Seswantšho go letlakala 7]

Jesu o tseba gore go bjang go rapela Modimo ka boikemišetšo bjo bogolo

[Diswantšho go letlakala 8]

Kriste o tla re thuša gore re lebeletšane le mathata a magolo ao rena ka noši re ka se lebeletšanego le wona

[Seswantšho go letlakala 9]

Kriste o re thuša ka bagolo ba lerato