Lebaka Leo ka Lona Batho ba Nyakago Mothuši

MONNA yo a kilego a ikgantšha e bile a be a le šoro o ile a dumela gore: ‘Ke be ke le motlaiši yo bogale.’ O be a kile a ba morogaki yo a gobošago yoo ka go hloka kwelobohloko a ilego a tlaiša le go hlasela balatedi ba Jesu Kriste bao ba boifago Modimo. O ile a bolela ka tebogo gore: “Lega go le bjalo, ke ile ka gaugelwa.” (NW) Le ge se se ka bonagala se sa dumelege, motlaiši yo yo šoro o ile a ba moapostola Paulo wa Mokriste yo a botegago.​—1 Timotheo 1:12-16; Ditiro 9:1-19.

Ga se yo mongwe le yo mongwe a dirilego mohuta wa dilo tšeo Paulo a di dirilego. Lega go le bjalo, ka moka ga rena re palelwa ke go fihlelela ditekanyetšo tša Modimo. Ka baka la’ng? Ka gobane “ba dirile dibe bohle, ba hlaya letaxô la Modimo.” (Ba-Roma 3:23) Go feta moo, go bonolo gore re nolwe moko ke tlalelo, mohlomongwe re ikwa gore re ba babe kudu go ka amogela kgaugelo ya Modimo. Ge a dutše a nagana ka ditshekamelo tša gagwe tša sebe, Paulo o ile a bolela gore: “Joo, nna motho wa madi-mabe! Ké mang a tl’o xo nkhunolla ka tloxa mmele wó wa lehu!” Ge a araba potšišo ya gagwe ka noši o ile a ngwala gore: “Ke leboxa Modimo ka Jesu Kriste Mong ’a rena.”​—Ba-Roma 7:24, 25.

Mmopi yo a lokilego a ka dirišana bjang le badiradibe? (Psalme 5:4) Ela hloko gore Paulo o itše: “Ke leboxa Modimo ka Jesu Kriste Mong ’a rena.” (Mongwalo o sekamego ke wa rena.) Moamogedi yo mongwe wa kgaugelo ya Modimo o hlalositše gore: “Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki. Ké Yêna seloba sa dibe tša rena; xomme xa se sa tša rena fêla; ké Yêna seloba sa dibe tša lefase ka moka.”​—1 Johane 2:1, 2.

Ke ka baka la’ng Jesu Kriste a bitšwa “Morapeledi [“mothuši,” NW] xo Tata wešo”? Gomme ke bjang Jesu e lego “seloba” sa dibe?

Lebaka Leo Mothuši a Nyakegago

Jesu o tlile lefaseng “xo neêla bophelô bya xaxwe xore e bê topollô ya ba bantši.” (Mateo 20:28) Topollo ke tefo e lefšago bakeng sa go rekolla, goba go tliša topollo ya motho yo mongwe goba selo se sengwe. Sebopego sa lediri la lentšu la Sehebere le le fetoletšwego e le “topollo” le fetišetša kgopolo ya go bipa goba go dira poelano bakeng sa dibe. (Psalme 78:38) Lentšu la Segerika le le swanago le leo le hwetšwago go Mateo 20:28, le be le šomišwa ka mo go kgethegilego bakeng  sa go šupa tefo yeo e lefšago bakeng sa go lopolla bagolegwa ba ntwa goba go lokolla makgoba. Go phethagatša dinyakwa tša toka, selo se sengwe se tšeelwa sebaka ke se sengwe seo se nago le mohola o lekanago.

Batho ba ile ba tsena bokgobeng ka baka la borabele bja motho wa pele malebana le Modimo. Bjalo ka ge go bontšhitšwe go Genesi kgaolo 3, monna yoo yo a phethagetšego​—Adama​—o ile a kgetha go phegelela tsela ya go se kwe Jehofa Modimo. Ka go dira bjalo, o ile a ithekiša yena ka noši gotee le ditlogolwana tša gagwe tšeo di bego di sa hlwa di belegwa a ithekišetša bokgobeng bja sebe le lehu. Ka go rialo Adama o ile a loba mpho ya bophelo bjo bo phethagetšego bja batho bakeng sa gagwe le ditlogolwana tša gagwe ka moka.​—Ba-Roma 5:12, 18, 19; 7:14.

Isiraeleng ya bogologolo, Modimo o ile a lokišeletša gore go dirwe dihlabelo tša diphoofolo bakeng sa go dira poelano bakeng sa dibe tša batho goba go di bipa. (Lefitiko 1:4; 4:20, 35) Ge e le gabotse, bophelo bja phoofolo ya sehlabelo bo be bo neelwa sebakeng sa bja modiradibe. (Lefitiko 17:11) Ka baka leo, “letšatši la poêlanyô” gape go be go ka bolelwa ka lona e le “letšatši la ditopollo.”​—Lefitiko 23:26-28.

Lega go le bjalo, ka ge diphoofolo e le tše di nyatšegago go e na le batho, ‘madi a dipoo le a diphooko a be a sa kgone go tloša dibe [ka mo go feletšego].’ (Ba-Hebere 10:1-4) Bakeng sa gore sehlabelo se be le mohola o lekanego bakeng sa go dira poelano bakeng sa dibe goba go di bipela sa ruri, se be se swanetše go lekana ka mohola le seo Adama a se lobilego. Dikala tša toka di be di nyaka motho yo a phethagetšego (Jesu Kriste) bakeng sa go leka-lekanya seo monna yo mongwe yo a phethagetšego (Adama) se mo lahlegetšego. Ke feela bophelo bja motho yo a phethagetšego bjo bo ka lefago tefo ya topollo bakeng sa go lokolla ditlogolwana tša Adama bokgobeng bjo tatago bona wa pele a ba rekišeditšego go bjona. ‘Bophelo ka bophelo’ bo be bo tla fihlelela tšeo di nyakwago ke toka ya kgonthe.​—Ekisodo 21:23-25.

Ge Adama a be a dira sebe gomme a ahlolelwa lehu, bana ba gagwe bao ba bego ba se ba tšwa ba belegwa ba be ba sa dutše ba le go yena gomme ba ile ba hwa le yena. Monna yo a phethagetšego Jesu, “Adama wa mafêlêlô,” ka go ithatela ga se a ka a ba le bana. (1 Ba-Korinthe 15:45) O be a na le bana bao ba sego ba belegwa go yena ge a be a e-hwa e le sehlabelo sa motho yo a phethagetšego. Ka gona, go ka bolelwa gore moloko wa batho wo o bego o na le kgonagalo ya go ba gona o hwile ka gare ga gagwe le yena. Jesu o ile a itšeela lapa la Adama la dibe leo le hwago go ba la gagwe. O ile a gafa tshwanelo ya go ba le lapa la gagwe. Ka go dira sehlabelo ka bophelo bja gagwe bjo bo phethagetšego bja motho, Jesu o ile a rekolla batho ka moka bao ba tšwago go Adama e le gore ba ka ba lapa la Gagwe ba Mo dira “Tatê wa xo sa felexo.”​—Jesaya 9:5, 6.

Sehlabelo sa Jesu sa topollo se ile sa bulela batho ba ba kwago tsela ya go amogela kgaugelo ya Modimo le go hwetša bophelo bjo bo sa felego. Ka baka leo, moapostola Paulo o ngwadile gore: “Xobane moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.” (Ba-Roma 6:23) Re tutueletšega go tumiša Jehofa bakeng sa lerato le kgaugelo tšeo di tswalanago le topollo, yeo e neilwego ka go ikgafa mo go golo ga gagwe ka noši le ga Morwa wa gagwe yo a rategago. (Johane 3:16) Jesu ka kgonthe o ile a itlhatsela go ba “Morapeledi xo Tata wešo” ge a be a tsošetšwa bophelong bja legodimong gomme a tliša mohola wa sehlabelo sa gagwe sa topollo go Modimo magodimong. * (Ba-Hebere 9:11, 12, 24; 1 Petro 3:18) Lega go le bjalo, ke bjang Jesu Kriste gona bjale a itlhatselago go ba mothuši wa rena legodimong?

[Mongwalo wa ka tlase]

[Seswantšho go letlakala 4]

Bophelo bja Jesu bjo bo phethagetšego e le motho bo bile tefo ya go lopolla ditlogolwana tša Adama