‘Modimo, Roma Seetša sa Gago’

“Roma Seetša sa xaxo le Therešô ya xaxo, ke hlahlwê ke tšôna.”​—Psalme 43:3.

1. Jehofa o utolla merero ya gagwe bjang?

JEHOFA ke yo a naganelago kudu tseleng yeo ka yona a tsebišago bahlanka ba gagwe merero ya gagwe. Go e na le gore a fo utolla therešo ka nako e tee ka seetša seo se foufatšago, o re sedimoša ka mo go tšwelago pele. Mosepelo wa rena tseleng ya bophelo o ka swantšhwa le mosepelo wa monamedi wa dithaba yo a sepelago tseleng e telele. O thoma e sa le mesong kudu gomme o bona ganyenyane feela. Ge letšatši le thoma go hlaba ka go nanya dithabeng, monamedi wa dithaba o kgona go lemoga dilo tše mmalwa tše di mo dikologilego. Sohle seo a se bonago ke lefsifsana. Eupša ge letšatši le tšwela pele le hlaba, o kgona go  bonela kgole kudu. Go bjalo le ka seetša sa moya seo Modimo a se neago. O re dira gore re kwešiše dilo tše mmalwa ka nako e tee. Morwa wa Modimo Jesu Kriste, o ile a nea tshedimošo ya moya ka mokgwa o swanago. Anke re eleng hloko kamoo Jehofa a ilego a sedimoša batho ba gagwe mehleng ya bogologolo le kamoo a dirago bjalo ka gona lehono.

2. Jehofa o ile a nea tshedimošo bjang mehleng ya pele ga Bokriste?

² Go bonala bangwadi ba Psalme ya bo-43 e be e le barwa ba Kora. Ka ge e be e le ba-Lefi, ba be ba e-na le tokelo ya go ruta batho Molao wa Modimo. (Maleaki 2:7) Ee, Jehofa e be e le Mohlahli wa bona yo Mogolo, gomme ba be ba lebelela go yena e le Mothopo wa bohlale bjohle. (Jesaya 30:20) Mopsalme o ile a rapela ka gore: ‘Modimo, roma seetša sa gago le therešô ya gago, ke hlahlwe ke tšona.’ (Psalme 43:1, 3) Jehofa o be a ruta ba-Isiraele ditsela tša gagwe ge feela ba be ba mmotegela. Ka morago ga nywaga-kgolo e mentši, Jehofa o ile a ba nea seetša le therešo tša mohuta o ikgethilego. Modimo o ile a dira bjalo ge a be a roma Morwa wa gagwe lefaseng.

3. Ke ka tsela efe ba-Juda ba ilego ba bewa tekong ke thuto ya Jesu?

³ E le motho Jesu Kriste, Morwa wa Modimo e be e le “seetša sa lefase.” (Johane 8:12) O be a ruta batho “ditaba tše ntši ka diswanthšô”​—dilo tše difsa. (Mareka 4:2) O boditše Pontio Pilato gore: “Mmušô wa-ka xa se o tšwaxo ’faseng leno.” (Johane 18:36) Yeo e be e le kgopolo e mpsha go mo-Roma gomme e tloga e le bjalo le go ba-Juda bao ba bego ba rata botšhaba ka gobane ba be ba nagana gore Mesia o be a tla kokobetša Mmušo wa Roma gomme a bušetše Isiraele letagong la yona la pele. Jesu o be a bonagatša seetša se se tšwago go Jehofa, eupša mantšu a gagwe a be a sa kgahle babuši ba ba-Juda, bao ba bego “ba kxanyoxa xo rêtwa ke batho, ba nyatša xo rêtwa ke Modimo.” (Johane 12:42, 43) Batho ba bantši ba ile ba kgetha go kgomarela metlwae ya bona ya batho go e na le go amogela seetša sa moya le therešo tše di tšwago go Modimo.​—Psalme 43:3; Mateo 13:15.

4. Re tseba bjang gore barutiwa ba Jesu ba be ba tla tšwela pele ba gola kwešišong?

⁴ Lega go le bjalo, banna le basadi ba sego kae ba dipelo tše botegago ba ile ba amogela ka lethabo therešo yeo Jesu a bego a e ruta. Ba ile ba dira tšwelopele e tsepamego kwešišong ya bona ya merero ya Modimo. Le gona, ge bofelo bja bophelo bja lefaseng bja Morutiši wa bona bo batamela, ba be ba sa dutše ba e-na le mo gontši mo ba swanetšego go ithuta gona. Jesu o ile a ba botša gore: “Ke sa na le tše ntši tša xo Le botša; fêla xe e le byale Le ka se kxône xo di rwala.” (Johane 16:12) Ee, barutiwa ba be ba tla tšwela pele ba gola kwešišong ya therešo ya Modimo.

Seetša se Tšwela Pele go Phadima

5. Go ile gwa rotoga bothata bofe lekgolong la pele la nywaga, gomme ke bomang bao ba bego ba e-na le boikarabelo bja go bo rarolla?

⁵ Ka morago ga lehu la Jesu le tsogo ya gagwe, seetša se se tšwago go Modimo se ile sa phadima kudu go feta pele. Ponong yeo e neilwego Petro, Jehofa o ile a utolla gore ba-Ntle ba sa bollago ba be ba ka ba balatedi ba Kriste go tloga nakong yeo go ya pele. (Ditiro 10:9-17) Seo e bile kutollo e kgolo gakaakang! Lega go le bjalo, ka morago go ile gwa rotoga potšišo e rego: Na Jehofa o be a nyaka gore ba-Ntle ba bjalo ba bolle ka morago ga ge ba fetogile Bakriste? Potšišo yeo e be e se ya hlwa e fetolwa ponong, gomme go ile gwa ngangišanwa kudu ka taba yeo gare ga Bakriste. E ile ya swanelwa ke gore e rarollwe, e le gore botee bja bona bjo bohlokwa bo se ke bja senyega. Ka baka leo, kua Jerusalema, “baapostola le ba baxolo ba phuthêxa xore ba bônê taba yé ka mo e lexo ka xôna.”​—Ditiro 15:1, 2, 6.

6. Ke tshepedišo efe yeo baapostola le banna ba bagolo ba ilego ba e latela ge ba be ba ahla-ahla taba ya lebollo?

⁶ Bao ba bego ba le gona sebokeng seo ba be ba ka lemoga bjang thato ya Modimo bakeng sa ba-Ntle ba dumelago? Jehofa ga se a ka a romela morongwa gore a yo okamela poledišanong, e bile ga se a ka a nea bao ba bego ba le gona pono. Lega go le bjalo, baapostola le bagolo ba be ba sa tlogelwa ka mo go feletšego ba se na tlhahlo. Ba ile ba ahla-ahla bohlatse bjo bo tšwago go Bakriste ba bangwe ba ba-Juda bao ba bego ba bone kamoo Modimo a ilego a thoma go dirišana le batho ba ditšhaba ka gona, a tšhollela moya wa gagwe o mokgethwa godimo ga ba-Ntle bao ba sa bollago. Ba ile ba ba ba phetla ka Mangwalong bakeng sa go hwetša tlhahlo. Ka baka leo, morutiwa Jakobo o ile a nea keletšo yeo e theilwego lengwalong le le  sedimošago. Ge ba dutše ba naganišiša ka bohlatse, thato ya Modimo e ile ya ba molaleng. Go be go sa nyakege gore baditšhaba bao ba bolle e le gore ba ka thabela kamogelo ya Jehofa. Baapostola le banna ba bagolo ga se ba ka ba senya nako bakeng sa go ngwala phetho e le gore Bakriste-gotee ba ka hlahlwa ke yona.​—Ditiro 15:12-29; 16:4.

7. Bakriste ba lekgolong la pele la nywaga ba ile ba tšwela pele bjang?

⁷ Ka go se swane le baetapele ba bodumedi ba ba-Juda, bao ba bego ba kgomaretše metlwae ya bo-rakgolo-khukhu ba bona, Bakriste ba bantši ba ba-Juda ba ile ba thaba ge ba be ba amogela kwešišo ye e kgethegilego e mpsha ka morero wa Modimo mabapi le batho ba ditšhaba, le ge go e amogela go be go nyaka gore go fetošwe pono mabapi le ba-Ntle ka kakaretšo. Jehofa o ile a šegofatša moya wa bona wa boikokobetšo, gomme “diphuthêxô tša tiišwa tumelong, badumedi ba fêla ba ata ka mehla.”​—Ditiro 15:31; 16:5.

8. (a) Re tseba bjang gore go be go ka letelwa seetša se se oketšegilego ka morago ga ge lekgolo la pele la nywaga le fedile? (b) Ke dipotšišo dife tše di swanetšego tšeo re tlago go di ahla-ahla?

⁸ Seetša sa moya se ile sa tšwela pele se phadima go theoša le lekgolo la pele la nywaga. Eupša Jehofa ga se a ka a utollela Bakriste ba pele karolo e nngwe le e nngwe ya merero ya gagwe. Moapostola Paulo o ile a botša Bakriste-gotee le yena ba lekgolong la pele la nywaga gore: “Xe e le byale re bôna ka seiponi, re sa kwa ka nyêpô.” (1 Ba-Korinthe 13:12) Seipone se bjalo se be se sa bontšhe gabotse kudu. Ka gona, mathomong kwešišo ya seetša sa moya e be e tla ba e nyenyane. Ka morago ga lehu la baapostola, seetša se ile sa fsifala ka lebakanyana, eupša mehleng ya gona bjale tsebo ya Mangwalo e atile. (Daniele 12:4) Jehofa o sedimoša batho ba gagwe bjang lehono? Le gona re swanetše go arabela bjang ge a atološa kwešišo ya rena ya Mangwalo?

Seetša se Phadima ka mo go Tšwelago Pele

9. Ke mokgwa ofe wa moswana-noši le o šomago wa go ithuta Beibele wo o bego o dirišwa ke Barutwana ba Beibele ba pele?

⁹ Hlasenyana ya kgonthe ya mathomo ya seetša e thomile go tšwelela mehleng yeno kotareng ya mafelelo ya lekgolo la bo-19 la nywaga ge sehlopha sa banna le basadi ba Bakriste se be se thoma go ithuta Mangwalo ka mafolofolo. Ba ile ba hlama mokgwa o šomago bakeng sa go ithuta Beibele. Motho o be a botšiša potšišo; ke moka sehlopha se be se seka-seka ditemana ka moka tša Mangwalo tšeo di tswalanago le yona. Ge go be go bonagala eka temana e nngwe ya Beibele e lwantšhana le e nngwe, Bakriste ba ba botegago ba be ba katanela go di dumelelanya. Ka go se swane le baetapele ba bodumedi ba mehleng yeno, Barutwana ba Beibele (bjalo ka ge Dihlatse tša Jehofa di be  di tsebja bjalo ka nako yeo) ba be ba ikemišeditše go dira gore Mangwalo a Makgethwa, e be tlhahlo ya bona, e sego metlwae goba thuto yeo e dirilwego ke batho. Ka morago ga ge ba hlahlobile bohlatse ka moka bja Mangwalo bjo bo hwetšagalago, ba be ba ngwala pego ya diphetho tše ba di dirilego. Ka tsela yeo kwešišo ya bona ya dithuto tše dintši tša motheo tša Beibele e ile ya lokišwa.

10. Charles Taze Russell o ngwadile dithušo dife tše thušago tša go ithuta Beibele?

¹⁰ Yo a lemogegago kudu gare ga Barutwana ba Beibele e be e le Charles Taze Russell. O ile a ngwala lelokelelo la dithušo tša go ithuta Beibele tše tshelelago tše leina la tšona e lego Studies in the Scriptures. Ngwanabo rena Russell o be a rerile go ngwala bolumo ya bošupa, yeo e bego e tla hlalosa dipuku tša Beibele tša Hesekiele le Kutollo. O itše: “Ke tla ngwala Bolumo ya Bošupa le ge e le neng ge nka hwetša tlhaloso.” Lega go le bjalo, o ile a oketša ka gore: “Ge e ba Morena a nea motho yo mongwe tlhaloso, a ka no e ngwala.”

11. Go na le kgokagano efe magareng ga go bewa ga nako le kwešišo ya rena ya merero ya Modimo?

¹¹ Polelo ye e lego ka mo godimo ye e boletšwego ke C. T. Russell e bontšha ntlha e bohlokwa bokgoning bja rena bja go kwešiša dikarolo tše itšego tša Beibele​—go bewa ga nako. Ngwanabo rena Russell o be a tseba gore a ka se ke a gapeletša seetša gore se hlabele pukung ya Kutollo go etša ge monamedi wa dithaba yo a fišegago a ka se ke a gapeletša letšatši gore le hlabe pele ga nako ya lona e beilwego.

E Utolotšwe​—Eupša ka Nako ya Modimo e Swanetšego

12. (a) Boporofeta bja Beibele bo kwešišwa gabotse neng? (b) Ke mohlala ofe wo o bontšhago gore bokgoni bja rena bja go kwešiša boporofeta bja Beibele bo ithekgile ka tšhupamabaka ya Modimo? (Bona mongwalo wa ka tlase.)

¹² Go fo etša ge baapostola ba kwešišitše diporofeto tše dintši mabapi le Mesia feela ka morago ga lehu la Jesu le tsogo ya gagwe, Bakriste lehono ba kwešiša boporofeta bja Beibele ka mo go feletšego feela ka morago ga ge bo phethagaditšwe. (Luka 24:15, 27; Ditiro 1:15-21; 4:26, 27) Kutollo ke puku ya boporofeta, ka gona re swanetše go letela go tlo e kwešiša ka mo go feletšego ge ditiragalo tšeo e di hlalosago di utologa. Ka mohlala, C. T. Russell o be a ka se ke a kwešiša ka mo go nepagetšego seo se bolelwago ke sebata se sehwibidu sa seswantšhetšo seo go bolelwago ka sona go Kutollo 17:9-11, ka ge mekgatlo yeo e emelwago ke sebata, e lego Kgwerano ya Ditšhaba le Ditšhaba tše Kopanego e se ya ba gona go ba go fihla ka morago ga lehu la gagwe. *

13. Ka dinako tše dingwe go direga eng ge seetša se edišetšwa tabeng e itšego ya Beibele?

¹³ Ge Bakriste ba pele ba be ba lemoga gore ba-Ntle bao ba sa bollago ba be ba ka fetoga badumedi-gotee le bona, phetogo yeo e ile ya lebiša potšišong e mpsha yeo e lego mabapi le go nyakega ga gore batho ba ditšhaba ba bolle. Se se ile sa tutuetša baapostola le banna ba bagolo gore ba hlahlobe lefsa taba ka moka ya lebollo. Go sa dirišwa mokgwa o swanago le lehono. Ka dinako tše dingwe go phadima mo gogolo ga seetša tabeng e nngwe ya Beibele go hlahla bahlanka ba Modimo ba tloditšwego, “molaki e a bôtêxaxo yo bohlale,” gore ba hlahlobe lefsa ditaba tše di tswalanago le yona, bjalo ka ge go bontšhwa ke mohlala o latelago wa morago bjale.​—Mateo 24:45.

14-16. Peakanyo ponong ya rena mabapi le tempele ya moya e ile ya kgoma bjang kwešišo ya rena ya Hesekiele dikgaolo 40 go ya go 48?

¹⁴ Ka 1971 tlhaloso ya boporofeta bja Hesekiele e ile ya gatišwa ka pukung ya “The Nations Shall Now That I Am Jehovah”​​—How? Kgaolo e nngwe ya puku yeo e be e ahla-ahla ka boripana pono ya Hesekiele ya tempele. (Hesekiele, dikgaolo 40 go ya go 48) Ka nako yeo, tlhokomelo e be e lebišitšwe tabeng ya kamoo pono ya Hesekiele ya tempele e bego e tla phethagatšwa ka gona lefaseng le lefsa.​—2 Petro 3:13.

¹⁵ Lega go le bjalo, dihlogo tše pedi tšeo di gatišitšwego ka go Morokami (wa Seisemane) wa December 1, 1972, di ile tša kgoma kwešišo ya rena ka pono ya Hesekiele. Di be di ahla-ahla tempele e kgolo ya moya yeo e hlaloswago ke moapostola Paulo go Ba-Hebere kgaolo 10. Morokami o ile wa hlalosa gore phapoši e Kgethwa le lapa la ka gare la tempele ya moya di tswalana le boemo bja batlotšwa ge ba sa le lefaseng. Ge dikgaolo 40 go ya go 48 tša Hesekiele di be di ahla-ahlwa lefsa ka morago ga nywaga, go ile gwa lemogwa gore go fo etša ka tsela yeo tempele ya moya e šomago ka gona lehono, ke kamoo le tempele yeo Hesekiele a e bonego ponong e swanetšego go šoma ka gona lehono. Bjang?

¹⁶ Ponong ya Hesekiele, baperisita ba bonwa ba sepe-sepela ka malapeng a tempele ge ba dutše ba hlankela ditšhaba tšeo e sego tša baperisita. Baperisita ba ge e le gabotse ba emela “boperisita bya boxoši,” e lego bahlanka ba Jehofa ba tloditšwego. (1 Petro 2:9) Lega go le bjalo, ba tla be ba sa hlankele lapeng la tempele ya lefaseng nakong ka moka ya Pušo ya Kriste ya Nywaga e Sekete. (Kutollo 20:4) Bogolong bja nako yeo, ge e ba e se ka moka ga yona, batlotšwa ba tla be ba hlankela Modimo Sekgethwa-kgethweng sa tempele ya moya, e lego “xôna-kwa maxodimong.” (Ba-Hebere 9:24) Ka ge baperisita ba bonwa ba ema-ema malapeng a tempele ya Hesekiele, pono yeo e swanetše go ba e phethagala lehono ge ba bangwe ba batlotšwa ba sa le mo lefaseng. Ka go dumelelana le seo, tokollo ya makasine wo ya March 1, 1999 e bontšhitše pono e beakantšwego tabeng ye. Ka gona, nakong ka moka go ba go fihla bofelong bja lekgolo la bo-20 la nywaga, seetša sa moya se be se dutše se edišetšwa boporofeteng bja Hesekiele.

E-ba yo a Ikemišeditšego go Beakanya Pono ya Gago

17. Ke dipeakanyo dife tšeo o di dirilego ponong ya gago ka noši ga e sa le o tseba therešo, gomme di ile tša go hola bjang?

¹⁷ Motho yo mongwe le yo mongwe yo a nyakago go kwešiša therešo o swanetše go ikemišetša go ‘itshwara gore a tleme menagano gore e kwe Kriste.’ (2 Ba-Korinthe 10:5) Seo ga se ka mehla se lego bonolo, kudu-kudu ge e ba dipono di tsemile medu. Ka mohlala, pele o ithuta therešo ya Modimo, o ka ba o be o thabela go keteka matšatši a itšego a maikhutšo a bodumedi le metswalo ya gago. Ka morago ga gore o thome go ithuta Beibele, o ile wa lemoga gore meletlo ye ge e le gabotse e tšwa boheiteneng. Mathomong, mo gongwe o be o dika-dika go diriša seo o bego o ithuta sona. Lega go le bjalo, mafelelong lerato la go rata Modimo le ile la ipontšha e le le matla go feta kgopolo ya bodumedi, gomme o ile wa kgaotša go kopanela meletlong yeo e sa kgahlego Modimo. Na Jehofa ga se a šegofatša phetho yeo o e dirilego?​—Bapiša le Ba-Hebere 11:25.

18. Re swanetše go arabela bjang ge kwešišo ya rena ya therešo ya Beibele e lokišwa?

¹⁸ Ka mehla re holwa ke go dira dilo ka tsela ya Modimo. (Jesaya 48:17, 18) Ka gona ge pono yeo re nago le yona ka karolo Beibele e hlaloswa gabotse, a re thabeleng therešo e tšwelago pele! Ruri, go tšwela pele ga rena re sedimošetšwa go tiišetša taba ya gore re tseleng e nepagetšego. Ke “mmila wa baloki” o ‘etšago bo-ka mahuba ge a hlatloga, letšatši la ba la hlaba.’ (Diema 4:18) Ke therešo gore mo nakong ye re bona dikarolo tše dingwe tša morero wa Modimo “ka seipone.” Eupša ge nako ya Modimo e swanetšego e fihla, re tla bona therešo ka botse bja yona bjo bo feletšego, ge feela maoto a rena a ile a dula a tiile ‘mmileng.’ Ge re sa letile, anke re thabeleng ditherešo tšeo Jehofa a dirilego gore di kwagale gabotse, re letile le tshedimošo go tšeo di sa hlwago di kwešišega gabotse.

19. Tsela e nngwe yeo ka yona re ka bontšhago gore re rata therešo ke efe?

¹⁹ Re ka bontšha bjang lerato la rena la go rata seetša ka tsela ya kgonthe? E nngwe ya ditsela ke ka go bala Lentšu la Modimo ka mehla​—letšatši le letšatši ge e ba go kgonega. Na o latela lenaneo la ka mehla la mmalo wa Beibele? Dimakasine tša Morokami le Phafoga! le tšona di re fepa ka boati  bja dijo tša moya tše di agago tšeo re ka di thabelago. Gape, nagana ka dipuku, diporoutšha le dikgatišo tše dingwe tšeo di ilego tša ngwalwa bakeng sa go re hola. Go thwe’ng ka dipego tše di kgothatšago tša mediro ya go bolela ka Mmušo tšeo di gatišwago ka go Yearbook of Jehovah’s Witnesses?

20. Go na le kgokagano efe magareng ga seetša le therešo tšeo di tšwago go Jehofa gotee le go ba gona ga rena dibokeng tša Bokriste?

²⁰ Ee, Jehofa o arabile ka tsela e kgahlišago thapelo yeo e ngwadilwego go Psalme 43:3. Bofelong bja temana yeo re bala gore: “[Seetša le therešo ya gago] di nkiša kwa thabeng e kxêthwa, madulô a xaxo.” Na o lebeletše pele go rapeleng Jehofa o e-na le lešaba la ba bangwe? Thuto ya moya yeo e newago dibokeng tša rena ke tsela e bohlokwa yeo Jehofa a neago tshedimošo ka yona lehono. Re ka dira eng bakeng sa go godiša tebogo ya rena ya diboka tša Bokriste? Re go laletša gore o naganišiše taba ye ka thapelo sehlogong se se latelago.

[Mongwalo wa ka tlase]

 Na o ka Araba?

• Ke ka baka la’ng Jehofa a utolla merero ya gagwe ka mo go tšwelago pele?

• Baapostola le banna ba bagolo kua Jerusalema ba ile ba rarolla taba ya lebollo bjang?

• Ke mokgwa ofe wa go ithuta Beibele wo o ilego wa dirišwa ke Barutwana ba pele ba Beibele, gomme ke ka baka la’ng o be o ikgethile?

• Bontšha kamoo seetša sa moya se utollwago ka gona ka nako ya Modimo e swanetšego.

[Dipotšišo tša Thuto]

[Seswantšho go letlakala 12]

Charles Taze Russell o be a tseba gore seetša se be se tla hlabela puku ya Kutollo ka nako ya Modimo e swanetšego