Monna yo a Beago Mohlala yo a Ilego a Amogela Phošollo

“DIKWENA tša Zambia di ja Batho ba 30 ka Kgwedi.” Ke kamoo kuranta e nngwe ya Afrika e begilego ka gona nywageng e mentši e fetilego. Go ya ka setsebi sa bophelo bja diphoofolo seo se ilego sa swara digagabi tše bakeng sa go ithuta tšona, “go be go nyakega banna ba 12 bakeng sa go swara kwena e tee.” Ka lebaka la mosela wa yona o matla le mehlagare e tiilego, kwena e ka ba phoofolo e tšhošago!

Ge a be a šupa kwena e le “Leviathane,” Mmopi o dirišitše ‘kgoši ya dibata ka moka tše dikgolo tša naga’ go ruta mohlanka wa gagwe Jobo thuto e bohlokwa. (Jobo 41:1, 34, NW) Se se diregile mo e ka bago nywaga e 3 500 e fetilego nageng ya Utsi, yeo go ka diregago gore e felo-tsoko ka leboa la Arabia. Ge a be a hlalosa sebopiwa se, Modimo o ile a botša Jobo gore: “Xa xo wa mahlahlu ’a kaxo e hlohla.​—Ké mang a kaxo êma a lwa le Nna?” (Jobo 41:2) Seo ke therešo gakaakang! Ge e ba re boifa kwena, gona ke mo go swanetšego kudu gakaakang gore re boife go bolela gampe ka Yo a e bopilego! Jobo o ile a bontšha tebogo bakeng sa thuto ye ka go bolela phošo ya gagwe.​—Jobo 42:1-6.

Ge go bolelwa ka Jobo, re ka gopola mohlala wa gagwe wa potego ge a kgotleletše teko. (Jakobo 5:11) Ge e le gabotse, Jehofa o be a thabela Jobo gaešita le pele ga ge tumelo ya gagwe e ka lekwa o šoro. Go ya ka tsela yeo Modimo a bego a bona maemo ka yona, ka nako yeo go be go se na “motho lefaseng yo a swanago nae: monna yo a se nago bosodi, yo a lokilego, yo a boifago Modimo a tšhabago bobe.” (Jobo 1:8, PK) Se se swanetše go re tutueletša go ithuta mo gontši ka Jobo, ka ge go dira bjalo go tla re thuša go bona kamoo le rena re ka kgahlišago Modimo ka gona.

Go ba le Tswalano le Modimo go be go E-tla Pele

Jobo e be e le monna yo a humilego. Ka ntle le gauta, o be a e-na le dinku tše 7 000, dikamela tše 3 000, dipokolo tša ditshadi tše 500, mohlape wa dikgomo tše 1 000 le sehlopha se segolo kudu sa bahlanka. (Jobo 1:3) Eupša Jobo o be a botile Jehofa, e sego mahumo. O be a bea mabaka ka gore: “Xe nkabe ke botile dixauta, ka re: Xauta, ke Xo holofetše! Xe nkabe ke thabetše bontši bya mahumô, mola ’atla tša-ka di sa ruile kudu, . . . ké mo le tšôna-tšeo  e ka bexo è le molato mo-ôba-kôtlô, ka xobane nkabe ke hladile Modimo wa maxodimong.” (Jobo 31:24-28) Ka go swana le Jobo, re swanetše go tšeela godimo tswalano ya kgaufsi le Jehofa Modimo go phala kgole kudu dilo tše di bonagalago.

O be a E-na le Ditirišano tša Toka le Magagabo

Jobo o be a dirišana bjang le bahlanka ba gagwe? Taba ya gore ba be ba hwetša a e-na le toka e bile a batamelega e bontšhwa ke mantšu a Jobo ka noši: “Xe nkabe ke xanne mohla kè bélwa molato ke mohlanka wa-ka wa monna xoba wa mosadi, nkabe ke tlo dira bya’ng xe Modimo a ka tsoxa? Nkabe ke fetola ka lefé xe a ka nthsekiša?” (Jobo 31:13, 14) Jobo o be a tšeela godimo kgaugelo ya Jehofa gomme ka go rialo a dirišana ka kgaugelo le bahlanka ba gagwe. A mohlala o mobotse gakaakang, kudu-kudu bakeng sa bao ba nago le maemo a bolebeledi ka phuthegong ya Bokriste! Le bona ka mo go swanago ba swanetše go bontšha toka, ba se bebe sefahlego gomme e be bao ba batamelegago.

Jobo gape o bontšhitše kgahlego go bao e bego e se ba lapa la gagwe. Ge a utolla go kgomega ga gagwe ka ba bangwe, o itše: “Xe nkabe ke kunne mmôtlana, ka ribamiša mahlô a mohlôlôxadi, . . . xe nkabe ’tsôxô la-ka ke le akxetše sešuana ka xo bôna kè êmêlwa kwa kxorong, xôna ’tsôxô la-ka a le kxolwê lexetleng, marapô a sefáka sa-ka a rôbêxê.” (Jobo 31:16-22) Anke le rena ka mo go swanago re be bao ba naganelago bahlaki bao re ba tsebago ka phuthegong.

Ka baka la go bontšha ga gagwe kgahlego e se nago boithati go magagabo, Jobo o be a amogela batho bao a sa ba tsebego. Ka gona, o be a ka re: “Moeti ó be a sa lale ntlê; sefero sa-ka se be se bulêlwa ba tseleng.” (Jobo 31:32) A mohlala o mobotse gakaakang bakeng sa bahlanka ba Modimo lehono! Ge bao ba sa tšwago go bontšha kgahlego therešong ya Beibele ba e-tla Holong ya Mmušo, go ba amogela ga rena ka borutho go ka tlaleletša kgolong ya bona ya moya. Ee, balebeledi ba basepedi le Bakriste ba bangwe le bona ba nyaka kamogelo ya rena e lerato.​—1 Petro 4:9; 3 Johane 5-8.

Jobo o be a e-na le boemo bjo bo nepagetšego bja kgopolo le ka manaba a gagwe. O be a sa thabišwe ke masetla-pelo ao a bego a ka wela motho yo a bego a mo hloile. (Jobo 31:29, 30) Go e na le moo, o be a ikemišeditše go direla batho ba bjalo botse, ka ge go bonagala boikemišetšong bja gagwe bja go rapelela bahomotši ba gagwe ba bararo ba maaka.​—Jobo 16:2; 42:8, 9; bapiša le Mateo 5:43-48.

O be a Hlwekile Boitshwarong bja Botona le Botshadi

Jobo o be a botegela molekane wa gagwe wa lenyalo ka go se kwanantšhe, le ka mohla ga se a ka a dumelela pelo ya gagwe go hlagolela lerato le le sa swanelago la go rata mosadi yo mongwe. Jobo o itše: “Ke dirile kgwerano le mahlo a-ka ya gore nka se ke ka lebelela kgarebe. Ge e ka ba  mohlomongwe pelo ya-ka e kile ya arošwa ke mosadi, goba nkile ka khukhunela mojakong wa wa gešo;​—gona mosadi wa-ka a šilele yo mongwe, gomme ba bangwe ba tsene go yena! Gobane tšeo ke modiro wa dihlong, ke bokgopo bjo bo solwago ke baahlodi.”​—Jobo 31:1, 9-11, PK.

Jobo ga se a ka a dumelela dikganyogo tše di gobogilego di šilafatša pelo ya gagwe. Go e na le moo, o ile a phegelela tsela ya go loka. Ga go makatše ge Jehofa Modimo a be a thabela monna yo yo a botegago yo a bego a lwantšhana le dikgoketšo tše di gobogilego!​—Mateo 5:27-30.

O be a Tshwenyega ka Boemo bja Moya bja Lapa

Ka dinako tše dingwe, barwa ba Jobo ba be ba rulaganya menyanya yeo go yona barwa le barwedi ba gagwe ka moka ba bego ba e-ba gona. Ka morago ga ge matšatši a menyanya ye a fetile, Jobo o be a tshwenyega kudu gore mohlomongwe bana ba gagwe ba senyeditše Jehofa ka tsela e itšego. Ka gona Jobo o be a gata mogato, ka gobane pego ya Mangwalo e re: “Ya re xe matšatši a menyanya à fetile, Jobo a fêla a iša lentšu xo bôná a re ba ikxêthê; yêna a tsoxa è sa le bošexo, a dira dihlabêlô ka xo ya ka palô ya bôná bohle, xobane ó be a re: Mohlomong bana ba-ka ba sentše ba fapana le Modimo dipelong tša bôná.” (Jobo 1:4, 5) Se se swanetše go ba se ile sa gatelela dithong tša lapa la Jobo go tshwenyega ga gagwe ka gore ba be le poifo ya go hlompha Jehofa gomme ba sepele ditseleng tša Gagwe!

Lehono go nyakega gore dihlogo tša malapa tša Bakriste di rute malapa a tšona ka Lentšu la Modimo, Beibele. (1 Timotheo 5:8) Le gona, ke mo go tlogago go swanetše go rapelela ditho tša lapa.​—Ba-Roma 12:12.

O Kgotleletše ka Potego ka Tlase ga Teko

Babadi ba bantši kudu ba Beibele ba tlwaelane le diteko tše šoro tšeo di ilego tša wela Jobo. Sathane Diabolo o be a boletše gore Jobo ka tlase ga maemo a lekago o be a tla roga Modimo. Jehofa o ile a amogela tlhohlo ye, gomme Sathane o ile a tlišetša Jobo masetla-pelo ka ntle le go dika-dika. O ile a loba leruo la gagwe ka moka. Se sebe le go feta, o ile a lahlegelwa ke bana ba gagwe ka moka lehung. Kapejana ka morago ga moo, Sathane o ile a tlaiša Jobo ka dišo tše di hlohlonago go tloga hlogong go ya maotong.​—Jobo, dikgaolo 1, 2.

Mafelelo e bile afe? Ge mosadi wa gagwe a be a mo kgothaletša gore a roge Modimo, Jobo o ile a re: “O bolêla byalo ka lešilô xe le bolêla le mašilô. A re ka re xo amoxêla mola Modimo a re fa tše botse, ra tla ra xana xo amoxêla xe a re fa tše mpe?” Pego ya Beibele e oketša ka gore: “Jobo xe dilô tšeo di mo wetše tšohle, xa a ka a senya ka molomo wa xaxwe.” (Jobo 2:10) Ee, Jobo o ile a kgotlelela ka potego gomme ka go rialo a hlatsela Diabolo e le moaketši. Anke le rena ka mo go swanago re kgotleleleng diteko gomme re bontšhe gore tirelo ya rena go Modimo e tutuetšwa ke lerato le le sekilego la go rata Jehofa.​—Mateo 22:36-38.

O Ile a Amogela Phošollo ka Boikokobetšo

Le ge Jobo a be a bea mohlala ka ditsela tše dintši, fela e be e se motho yo a phethagetšego. Yena ka noši o itše: “A fa motho-mosekexi ó kile a tšwa xo yo thšila?​—Le o tee!” (Jobo 14:4; Ba-Roma 5:12) Ka gona, ge Modimo a be a re Jobo ga a na bosodi, se e be e le sa therešo ka kgopolo ya gore o be a dira ka go dumelelana le tšohle tšeo Modimo a bego a di lebeletše go yo mongwe wa bahlanka ba gagwe bao e lego batho ba sa phethagalago le ba nago le sebe. A mothopo wa kgothatšo e kgolo gakaakang!

Jobo o ile a kgotlelela teko ya gagwe, eupša e ile ya utolla bofokodi. Ge ba kwele ka masetla-pelo ka moka ao a mo wetšego, ba bararo bao go thwego ke bahomotši ba ile ba mo etela. (Jobo 2:11-13) Ba ile ba bolela gore Jehofa o be a otla Jobo ka baka la dibe tše dikgolo tšeo a di dirilego. Ka tlwaelo, Jobo o be a kwele bohloko ka baka la ditatofatšo tše tša maaka, gomme o be a leka ka thata go itwela. Eupša o ile a lahlegelwa ke teka-tekano ge a leka go itokafatša. Ka gona, Jobo o ile a ba a bolela gore o be a lokile kudu go phala le Modimo!​—Jobo 35:2, 3.

Ka ge Modimo a be a rata Jobo, o ile a diriša lesogana go bontšha phošo ya Jobo. Pego e re: “Elihu . . . a xalefêla Jobo ka xe a re ke lokile, ’me a bea Modimo molato.” Bjalo ka ge Elihu a boletše: “Jobo ó re: Xa ke n’e molato, ó re: Modimo ó nkamoxa se se nthswanetšexo.” (Jobo 32:2; 34:5) Lega go le bjalo, Elihu ga se a ka a tlatšana le “bahomotši” ba bararo go phetheng ka mo go fošagetšego gore Modimo o be a otla Jobo ka baka la dibe tša gagwe. Go e na le moo, Elihu o ile a bontšha go holofela ga gagwe potego ya Jobo gomme o ile a mo eletša ka gore: “Taba e pele xa xaxwe [Jehofa].  Dula O mo letêlê.” Ka kgonthe, Jobo o swanetše go ba a ile a letela Jehofa go e na le go bolela ka tsela e se nago tlhaologanyo bakeng sa go itwela. Elihu o ile a kgonthišetša Jobo ka gore: “Toka le boati bja go loka [Modimo] a ka se ke a di nyenyefatša.”​—Jobo 35:14; 37:23, NW.

Monagano wa Jobo o be o nyaka go lokišwa. Ka baka leo, Jehofa o ile a mo nea thuto ka bonyenyane bja motho ge a bapišwa le bogolo bja Modimo. Jehofa o ile a šupa lefase, lewatle, magodimo ao a tletšego dinaledi, diphoofolo le dimakatšo tše dingwe tše dintši tša tlholo. Mafelelong, Modimo o ile a bolela ka Leviathane​—kwena. Jobo o ile a amogela phošollo ka boikokobetšo, gomme le tabeng ye o bea mohlala o mongwe gape.

Le ge re ka ba re dira gabotse tirelong ya Jehofa, re tla dira diphošo. Ge e ba phošo e le e kgolo, Jehofa a ka re phošolla ka tsela e itšego. (Diema 3:11, 12) Re ka gopola lengwalo leo le tshwenyago letswalo la rena. Mohlomongwe Morokami goba kgatišo e nngwe ya Mokgatlo wa Watch Tower e ka bolela selo se sengwe seo se re hlokomedišago ka phošo. Goba go ka direga gore Mokriste-gotee a hlalose ka botho gore re paletšwe ke go diriša molao wa motheo wa Beibele. Re tla arabela bjang phošollong yeo? Jobo o ile a bontšha moya wa go itshola, a re; “Ke a inyatša, ke a ithsôla kè le lerole le molôra.”​—Jobo 42:6.

O Ile a Putswa ke Jehofa

Jehofa o ile a putsa Jobo, gomme a nea mohlanka wa gagwe sebaka sa go phela nywaga e mengwe gape e 140. Nakong yeo, o ile a amogela dilo tše dintši go feta tšeo di ilego tša mo lahlegela. Le ge Jobo mafelelong a ile a hwa, ga go na pelaelo gore o tla tsošetšwa lefaseng le lefsa la Modimo.​—Jobo 42:12-17; Hesekiele 14:14; Johane 5:28, 29; 2 Petro 3:13.

Le rena re ka kgonthišega ka kamogelo ya Modimo le tšhegofatšo ya gagwe ge e ba re mo hlankela ka potego e sa kwanantšhego gomme re amogela phošollo ka moka yeo e theilwego Beibeleng yeo re e newago. Ka baka leo, re tla ba le kholofelo e kgonthišeditšwego ya go phela tshepedišong e mpsha ya dilo ya Modimo. Sa bohlokwa kudu, re tla godiša Modimo. Boitshwaro bja rena bja potego bo tla putswa gomme bo tla tlaleletša bohlatseng bja gore batho ba mo hlankela e sego ka baka la mabaka a boithati, eupša ka baka la lerato le le tšwago pelong e feletšego. Ke tokelo e kgolo gakaakang yeo re nago le yona ya go thabiša pelo ya Jehofa, bjalo ka ge go dirile Jobo yo a botegago, yo a ilego a amogela phošollo ka boikokobetšo!​—Diema 27:11.

[Diswantšho go letlakala 26]

Jobo o ile a bontšha go kgomega ka lerato bakeng sa dišuana, bahlologadi le ba bangwe

[Diswantšho go letlakala 28]

Jobo o ile a putswa ka mo go humilego bakeng sa go amogela ga gagwe phošollo ka boikokobetšo