Batho ba Lwago le Modimo ba ka se ke ba Fenya!

“Le xe ba tlo lwa naxô’, ba ka se Xo kxônê.”—JEREMIA 1:19.

1. Ke taelo efe yeo Jeremia a ilego a e amogela, gomme modiro wa gagwe o tšwetše pele ka nako e kaaka’ng?

JEHOFA o ile a laela Jeremia yo mofsa go porofetela ditšhaba. (Jeremia 1:5) Se se diregile nakong ya pušo ya Kgoši Josia wa go loka wa Juda. Bodiredi bja Jeremia bja go porofeta bo ile bja tšwela pele nakong ya khuduego ya pele ga ge Babele e fenya Jerusalema le go fihla nakong ya go išwa ga batho ba Modimo bothopša.​—Jeremia 1:1-3.

2. Jehofa o ile a matlafatša Jeremia bjang, gomme go lwa le moporofeta yoo go be go bolela’ng?

² Melaetša ya kahlolo yeo Jeremia a bego a swanetše go e tsebatša e be e tla tsoša kganetšo. Ka baka leo, Modimo o ile a mo matlafatša bakeng sa seo se bego se letše ka pele. (Jeremia 1:8-10) Ka mohlala, moya wa moporofeta o ile wa matlafatšwa ke mantšu a rego: “Gomme ba tlo lwa nago, eupša ba ka se ke ba go kgona, gobane nna ke na le wena, ke tlo go hlakodiša, go rialo Jehofa.” (Jeremia 1:19, PK) Go lwa le Jeremia go be go tla bolela go lwa le Modimo. Lehono, Jehofa o na le sehlopha sa bahlanka ba swanago le baporofeta, bao mošomo wa bona o swanago le wa Jeremia. Go swana le yena, ba bolela lentšu la Modimo la boporofeta ka sebete. Le gona molaetša wo o kgoma batho bohle le ditšhaba tšohle, bakeng sa botse goba bobe, go ithekgile ka tsela yeo ba arabelago ka yona go wona. Go swana le mehleng ya Jeremia, go na le bao ba lwago le Modimo ka go ganetša bahlanka ba gagwe ba fišegago gotee le mediro ya bona ye ba e abetšwego ke Modimo.

Bahlanka ba Jehofa ba ka Tlase ga Tlhaselo

3. Ke ka baka la’ng bahlanka ba Jehofa ba bile ka tlase ga tlhaselo?

³ Bahlanka ba Jehofa ba bile ka tlase ga tlhaselo ga e sa le go tloga mathomong a lekgolo la bo-20 la nywaga. Dinageng tše dintši, batho bao ba bego ba rerile bobe ba ile ba nyaka go šitiša​—gona go homotša​—go bolelwa ga ditaba tše di lokilego tša Mmušo wa Modimo. Ba hlohleleditšwe ke Lenaba la rena le legolo, Diabolo, yo ‘a dikologago bo-ka tau e bopago; a nyaka yo a kago mo metša.’ (1 Petro 5:8) Ka morago ga ge “mabaka a ba-ntlê” a fedile ka 1914, Modimo o ile a bea Morwa wa gagwe go ba Kgoši e mpsha ya lefase, a mo laela gore: “Buša xare xa manaba ’axo.” (Luka 21:24; Psalme 110:2) A diriša matla a gagwe, Kriste o ile a leleka Sathane legodimong gomme a mo tswalelela tikologong ya lefase. Diabolo o tšhollela bogale bja gagwe godimo ga Bakriste ba tloditšwego le bagwera ba bona ka ge a tseba gore nako ya gagwe ke e kopana. (Kutollo 12:9, 17) Mafelelo a ditlhaselo tše sa kgaotšego tša batho ba bao ba lwago le Modimo e bile afe?

4. Ke diteko dife tšeo batho ba Jehofa ba ilego ba ba le tšona mehleng ya Ntwa ya I ya Lefase, eupša go ile gwa direga’ng ka 1919 le ka 1922?

⁴ Nakong ya Ntwa ya I ya Lefase, bahlanka ba tloditšwego ba Jehofa ba ile ba lebana le diteko tše dintši tša tumelo. Ba be ba kwerwa le go senywa maina, ba šetšwe morago ke bahlola-mpherefere gomme ba bethwa. Bjalo ka ge Jesu a be a boletše e sa le pele, ba ile ba “hloiwa ke dithšaba tšohle.”  (Mateo 24:9) Nakong ya khuduego ya ntwa, manaba a Mmušo wa Modimo a ile a diriša leano le le ilego la dirišwa malebana le Jesu Kriste. A be a phara batho ba Jehofa ka la gore ke balwantšha-mmušo, gomme a ile a hlaba gona karolong e bohlokwa ya mokgatlo wa Modimo o bonagalago. Ka May 1918, madira a mmušo a ile a laelwa gore a golege mopresidente wa Mokgatlo wa Watch Tower, J. F. Rutherford gotee le badirišani ba gagwe ba kgaufsi ba šupago. Banna ba ba seswai ba ile ba newa dikahlolelo tše boima tša kgolego gomme ba romelwa kgolegong ya mmušo kua Atlanta, Georgia, U.S.A. Dikgwedi tše senyane ka morago ba ile ba lokollwa. Ka May 1919 kgoro ya tša boipiletšo ya tikologo e ile ya ahlola ka gore basekišwa ga se ba sekišwa ka toka, gomme kahlolo ya fetošwa. Molato o ile wa bušetšwa morago bakeng sa go sekwa lefsa, eupša ka morago mmušo o ile wa phumola molato, e lego moo Ngwanabo rena Rutherford gotee le badirišani ba gagwe ba kgaufsi ba ilego ba lokollwa ka mo go feletšego. Ba ile ba thoma mediro ya bona lefsa, gomme dikopano tšeo di bego di swaretšwe kua Cedar Point, Ohio, ka 1919 le ka 1922 di ile tša nea modiro wa go bolela ka Mmušo tutuetšo e mpshafaditšwego.

5. Dihlatse tša Jehofa di ile tša tšwela pele bjang Jeremane ya Nazi?

⁵ Ka bo-1930, go ile gwa tšwelela dipuša-noši tša taolo e feletšego gomme Jeremane, Italy gotee le Japane di ile tša kopana go bopa mebušo ya Kgwerano. Mathomong a ngwaga-some woo, go ile gwa tšwelela tlaišo e šoro malebana le batho ba Modimo, kudu-kudu Jeremane ya Nazi. Go ile gwa bewa dithibelo. Magae a ile a phuruphutšwa gomme badudi ba ona ba golegwa. Ba dikete ba ile ba lahlelwa dikampeng tša tshwenyo ka ge ba be ba gana go latola tumelo ya bona. Ntwa ya go lwa le Modimo gotee le batho ba gagwe e be e reretšwe go fediša Dihlatse tša Jehofa mmušong woo wa bonkgwete. * Ge Dihlatse di be di e-ya dikgorong tša tsheko kua Jeremane bakeng sa go lwela ditshwanelo tša tšona, Lefapha la tša Toka la Mmušo le ile la lokišeletša lelokelelo le letelele la dikgopolo go kgonthišetša gore di se ke tša atlega. Le itše: “Dikgoro tša tsheko ga se tša swanela go palelwa ka baka la seo go bonagalago e le feela mekgwa ya molao; eupša di swanetše go nyaka le go hwetša ditsela tša go phethagatša mešomo ya tšona e phagamego go sa šetšwe mathata a tlwaelegilego.” Se se be se bolela gore toka ya kgonthe e ka se ke ya hwetšwa. Ma-Nazi a ile a bolela gore mediro ya Dihlatse tša Jehofa e be e le ya bonaba, e bile e ‘šitiša kago ya Setšhaba ya tša Leago.’

6. Go ile gwa dirwa maiteko afe a go kgaotša modiro wa rena nakong ya Ntwa ya II ya Lefase le ka morago ga moo?

⁶ Nakong ya Ntwa ya II ya Lefase, go ile gwa bewa dithibelo godimo ga batho ba Modimo kua Australia, Canada le dinageng tše dingwe tšeo di bego di hlaolwa e le tša Commonwealth ya Brithania​—e lego tša Afrika, Asia le dihlakahlaka tša Caribbean le tša Pacific. United States, manaba a nago le tutuetšo gotee le batho ba neilwego tsebišo e fošagetšego ba ile ba baka ‘bobe bjo bo bopilwego ka molao.’ (Psalme 94:20, bapiša le PK.) Eupša dikgang tša go dumedišwa ga folaga le ditaelo tša setšhaba tša go thibela go bolela ka ntlo le ntlo di ile tša lwewa dikgorong tša tsheko, gomme diphetho tše dibotse tše di fihleletšwego kua United States di ile tša aga morako wa go thekga tokologo ya borapedi. Ka thušo ya Jehofa, maiteko a lenaba ga se a ka a fenya. Ge ntwa e fela kua Yuropa, dithibelo di ile tša tlošwa. Dihlatse tše dikete tšeo di bego di tswaleletšwe dikampeng tša tshwenyo di ile tša lokollwa, eupša ntwa e be e se ya fela. Kapejana ka morago ga Ntwa ya II ya Lefase, go ile gwa thoma Ntwa ya Molomo. Ditšhaba tša ka Bohlabela bja Yuropa di ile tša tliša kgateletšo e oketšegilego bathong ba Jehofa. Go ile gwa tšewa kgato ya semmušo go tsena-tsenana le mešomo ya rena ya go nea bohlatse le go o thibela, go kgaotša go romelwa ga dipuku tša Beibele le go fediša dikopano tša rena tša phatlalatša. Ba bantši ba ile ba golegwa goba ba romelwa dikampeng tšeo go tšona go šongwago ka thata.

Go Tšwela Pele ka Modiro wa Boboledi!

7. Dihlatse tša Jehofa di ile tša lebana le maemo afe kua Poland, Russia le dinageng tše dingwe nywageng ya morago bjale?

⁷ Ge masome a nywaga a dutše a feta, modiro wa go bolela ka Mmušo o ile wa bulega. Poland, gaešita le ge e be e sa dutše e le ka tlase ga pušo ya Bokomanisi, e ile ya dumelela go swarwa ga dikopano  tša letšatši le tee ka 1982. Dikopano tša ditšhaba-tšhaba di ile tša swarelwa moo ka 1985. Dikopano tše dikgolo tša ditšhaba-tšhaba di ile tša latela ka 1989, go e-na le ba dikete go tšwa Russia le Ukraine ba bilego gona. Wona ngwageng woo Hungary le Poland di ile tša amogela Dihlatse tša Jehofa ka molao. Ka seruthwane sa 1989, Leboto la Berlin le ile la wa. Dikgwedi tše sego kae ka morago, re ile ra newa tumelelo ya molao ka Bohlabela Jeremane, gomme kapejana ka morago ga moo go ile gwa swarwa kopano ya ditšhaba-tšhaba kua Berlin. Le gona mathomong a nywaga e lesome ya mafelelo ya ngwaga-kgolo wa bo-20, go ile gwa dirwa maiteko a tšwelago pele a go ikopanya ka nama le banababo rena ba kua Russia. Go ile gwa batamelwa ba bangwe ba bahlankedi ba mmušo kua Moscow, gomme ka 1991 Dihlatse tša Jehofa di ile tša ngwadišwa ka molao. Go tloga nakong yeo modiro o ile wa gola kudu kua Russia gotee le direpabliking tšeo e bego e le karolo ya yeo e kilego ya ba Soviet Union.

8. Batho ba Jehofa ba ile ba diragalelwa ke eng nywageng e 45 yeo e latetšego ka morago ga go fela ga Ntwa ya II ya Lefase?

⁸ Ge tlaišo e be e fela mafelong a mangwe, e be e oketšega go a mangwe. Nywageng e 45 yeo e ilego ya latela ka morago ga go fela ga ntwa ya bobedi ya lefase, dinaga tše dintši di ile tša gana go dumelela Dihlatse tša Jehofa ka molao. Go oketša moo, re ile ra thibelwa ka go lebanya goba ra thibelwa medirong ya rena dinageng tše 23 Afrika, tše 9 Asia, tše 8 Yuropa, tše 3 Latin America le tše 4 ditšhabeng tše dingwe tša dihlakahlakeng.

9. Bahlanka ba Jehofa ba ile ba feta tlase ga maemo afe kua Malawi?

⁹ Dihlatse tša Jehofa kua Malawi di ile tša lebana le tlaišo e šoro go thoma ka 1967. Ka baka la boemo bja bona bja go se tšee lehlakore e le Bakriste ba therešo, barapedi-gotee le rena ba moo ba be ba sa reke dikarata tša mokgatlo wa dipolitiki. (Johane 17:16) Ka morago ga seboka sa Malawi Congress Party ka 1972, bošoro bo ile bja tsošološwa. Banababo rena ba ile ba ntšhwa magaeng a bona gomme ba tingwa mešomo. Ba dikete ba ile ba tšhaba nageng bakeng sa go efoga go bolawa. Eupša na batho bao ba bego ba e-lwa le Modimo le batho ba gagwe ba ile ba atlega? Le gatee! Ka morago ga ge maemo a fetogile, tlhora ya bagoeledi ba Mmušo ba 43 767 e ile ya bega kua Malawi ka 1999, gomme ba fetago 120 000 ba ile ba ba gona dikopanong tša selete gona moo. Go agilwe ofisi e mpsha ya lekala motseng-mošate.

Ba Nyaka se ba ka re Latofatšago ka Sona

10. Go swana le tabeng ya Daniele, baganetši ba mehleng yeno ba batho ba Modimo ba dirile’ng?

¹⁰ Bahlanogi, baruti gotee le ba bangwe ga ba kgone go kgotlelela molaetša wa rena o tšwago ka Lentšung la Modimo. Ba le ka tlase ga kgateletšo ya dikarolo tše itšego tša bodumedi bja Bojakane, baganetši ba nyaka tsela yeo go thwego ke ya molao bakeng sa go lokafatša go re lwantšha ga bona. Ke maano afe ao ka dinako tše dingwe a dirišwago? Baloga-maano-mabe ba ile ba dira’ng e le go hlasela moporofeta Daniele? Go Daniele 6:5, 6, re bala gore: “Baxolo le bakxôma xe ba di bôna, ba lakana Daniele xore ba mmeê molato ka tša mmušô; ba šitwa xo hwetša molato le xe e le phošô; ka xobane Daniele ó be a bôtêxa, xò sa hwetšwe bošaedi le xe e le thsenyô mo xo yêna. Banna bao ba re: Xo Daniele yó, re ka se kê ra hwetša molato, xe e se xe re ka o hwetša ka thokong ya melaô ya Modimo wa xaxwe.” Ka mo go swanago lehono, baganetši ba nyaka se ba ka re latofatšago ka sona. Ba ngongorega ka “dihlotswana tše kotsi,” ke moka ba leke go kgomaretša leina le go Dihlatse tša Jehofa. Ba hlasela borapedi bja rena le go kgomarela ga rena melao ya Modimo ya motheo ka go re bolela gampe, ka dipolelo tše di sa lemogego le ka maaka.

11. Ke dipolelo dife tša maaka tšeo di boletšwego ke baganetši ba bangwe ba Dihlatse tša Jehofa?

¹¹ Dinageng tše dingwe, dihlopha tša bodumedi le tša dipolitiki di gana go amogela gore re diriša “borapedi byo Modimo Tata-wešo a bônaxo bò se na thšila le senyalô.” (Jakobo 1:27) Gaešita le ge mediro ya rena ya Bokriste e tšwetšwa pele dinageng tše 234, baganetši ba bolela gore re “bodumedi bjo bo sa tsebjego.” Pejana ga kopano ya ditšhaba-tšhaba ka 1998, kuranta ya Athene e ile ya tsopola sehlopha sa baruti ba Orthodox ya Gerika se bolela gore “[Dihlatse tša Jehofa] ga se ‘bodumedi bjo bo tsebjago,’” go sa šetšwe kahlolo e fapanego ya Kgoro ya Tsheko ya Ditshwanelo tša Batho ya Yuropa. Matšatši a sego kae ka morago, kuranta e nngwe gape motseng wona woo e ile ya tsopola seboleledi sa kereke se re: “[Dihlatse tša Jehofa] e ka se ke ya ba ‘phuthego ya Bokriste,’ ka  ge go se na seo ba tswalanago ka sona le tumelo ya Bokriste yeo e emelwago ke Jesu Kriste.” Se se a makatša, ka ge go se na sehlopha se sengwe sa bodumedi se se gatelelago go ekiša Jesu go feta kamoo Dihlatse tša Jehofa di dirago ka gona!

12. Ge re e-lwa ntwa ya rena ya moya, ke eng seo re swanetše go se dira?

¹² Re nyaka go šireletša le go thea ditaba tše di lokilego ka molao. (Ba-Filipi 1:7, bapiša le NW.) Go oketša moo, re ka se ke ra kwanantšha goba ra hwefola go kgomarela ga rena ka go tia ditekanyetšong tša Modimo tša go loka. (Tito 2:10, 12) Ka go swana le Jeremia, re ‘itlema matheka gore re bolele tšohle tše Modimo a re laelago tšona,’ re sa dumelele batho bao ba lwago le Modimo go re tšhošetša le ge e ka ba ka eng. (Jeremia 1:17, 18) Lentšu la Jehofa le Lekgethwa le re bontšhitše gabotse tsela e nepagetšego yeo re swanetšego go e swara. Le ka mohla ga re nyake go ithekga ka “letsôxô la . . . nama” le fokolago goba go tsoma go “khuta moriting wa Egipita,” ke gore, lefase le. (2 Koronika 32:8; Jesaya 30:3; 31:1-3) Ge re e-lwa ntwa ya moya, re swanetše go tšwela pele go bota Jehofa ka pelo ka moka, re dire gore a hlahle dikgato tša rena gomme re se ke ra ithekga ka kwešišo ya rena ka noši. (Diema 3:5-7) Ka ntle le ge re e-na le thekgo ya Jehofa gomme yena ka boyena a re hlokometše, mediro ka moka ya rena e tla ba ya “lefêla.”​—Psalme 127:1.

Ba a Tlaišwa Fela ga ba Kwanantšhe

13. Ke ka baka la’ng go ka bolelwa gore tlhaselo ya Sathane godimo ga Jesu e ile ya palelwa?

¹³ Mohlala o mogolo tabeng ya go se kwanantšhe boineelong go Jehofa ke Jesu, yoo a ilego a latofatšwa ka maaka a gore o lwantšha mmušo le go šitiša thulaganyo e theilwego. Pilato o be a ikemišeditše go lokolla Jesu ka morago ga go hlahloba molato wa gagwe. Eupša lešaba leo le bego le hlohleletšwa ke baetapele ba bodumedi, le ile la goeletša ka gore Jesu a kokotelwe koteng gaešita le ge a be a se na molato. Go e-na le gore ba mo lokolle, ba ile ba laela gore go lokollwe Baraba​—monna yo a bego a lahletšwe kgolegong ka baka la go tsogela mmušo matla le go bolaya! Pilato o ile a leka gape go thibela baganetši ba hlokago tlhaologanyo, eupša mafelelong o ile a ineela lešateng la setšhaba. (Luka 23:2, 5, 14, 18-25) Le ge Jesu a hwetše koteng, tlhaselo e šoro kudu ya Sathane godimo ga Morwa yo a se nago molato wa Modimo e ile ya palelwa ka mo go feletšego, ka gobane Jehofa o ile a tsoša Jesu gomme a mo rotošetša ka letsogong la Gagwe le letona. Letšatšing la Pentekoste ya 33 C.E., go dirišwa Jesu yo a tagafaditšwego, moya o mokgethwa o ile wa tšhollwa gomme gwa thewa phuthego ya Bokriste​—“mmopya e mofsa.”​—2 Ba-Korinthe 5:17; Ditiro 2:1-4.

14. Go ile gwa feleletša ka eng ge sehlopha sa bodumedi sa ba-Juda se be se lwantšha balatedi ba Jesu?

¹⁴ Kapejana ka morago ga moo ditho tša bodumedi di ile tša tšhošetša baapostola, eupša balatedi bao ba Kriste ga se ba ka ba kgaotša go bolela ka dilo tšeo ba di bonego le tše ba di kwelego. Balatedi ba Jesu ba ile ba rapela gore: “Morêna, bôna kxalemô tša bôná; ’me bahlanka ba xaxo O ba fê mafolofolo ruri, ba bolêlê ’ntšu la xaxo.” (Ditiro 4:29) Jehofa o ile a araba thapelo ya bona ka go ba tlatša ka moya o mokgethwa le go ba matlafaletša go tšwetša pele boboledi bja bona ka ntle le poifo. Go se go ye kae baapostola ba ile ba laelwa gape gore ba kgaotše go bolela, eupša Petro le baapostola ba bangwe ba ile ba araba ka gore: “Mo xo batho le Modimo, wa xo kwešešwa ke Modimo.” (Ditiro 5:29) Ditšhošetšo, go golegwa le go bethwa ga se tša ka tša ba thibela go katološa modiro wa bona wa Mmušo.

15. Gamaliele e be e le mang, gomme ke keletšo efe yeo a ilego a e nea baganetši ba bodumedi bao ba ganetšago balatedi ba Jesu?

¹⁵ Baetapele ba bodumedi ba ile ba arabela bjang? “Ba betwa ke dipelo, ba rata xe [baapostola] ba ka bolawa.” Lega go le bjalo, morutiši wa Molao yo leina la gagwe e lego Gamaliele, Mofarisei, o be a le gona gomme o be a hlompšha ke batho ka moka. Ge a ntšheditše baapostola ka ntle ga holo ya Sanhedrine ka nako e kopana, o ile a eletša baganetši bao ba bodumedi ka gore: “Banna ba Isiraele! Iphakxameleng tabeng yé ka se Le tl’o xo se dira batho bá. . . . Byalo nna ke re: Tloxêlang batho bá. Ba leseng ba sepelê, xobane xe morêrô wó è le o tšwaxo bathong, ó tlo senyêxa. Xe o e-tšwa xo Modimo, xôna Le ka se kê la kxôna xo o senya. Ba leseng, xore Le se tlo hwetšwa Lè le ba ba lwaxo le Modimo.”​—Ditiro 5:33-39.

Ga go na Sebetša Seo se Reretšwego go re Gobatša Seo se Tlago go Atlega

16. Ka mantšu a gago, o ka hlalosa bjang kgonthišetšo yeo Jehofa a e neago batho ba gagwe?

¹⁶ Keletšo ya Gamaliele e be e le e kwalago, gomme re a leboga ge ba bangwe ba re emelela. Gape re a leboga ge tokologo ya borapedi e ile ya godišwa ka dikahlolo tša kgoro ya tsheko tša baahlodi ba sa bebego sefahlego. Ke therešo gore go kgomarela ga rena Lentšu la Modimo ga go thabiše baruti ba Bojakane gotee le baetapele ba bangwe ba Babele o Mogolo, mmušo wa lefase wa bodumedi bja maaka. (Kutollo 18:1-3) Le ge bona gotee le bao ba ba tutueditšego ba e-lwa le rena, re na le kgonthišetšo e rego: “Xobane marumô ka moka a rulêlwaxo xo lwa naxô’, a ka se kxône selô. Maleme ka moka a a Xo pharaxo O tlo a fenya thsekong. Ké byôna bohwa bya balata ba Morêna; ké tšôna di tl’o xo ba lokêla di e-tšwa xo Nna. Ó r’yalo Morêna.”​—Jesaya 54:17.

17. Le ge baganetši ba e-lwa le rena, ke ka baka la’ng re e-na le sebete?

¹⁷ Manaba a rena a lwa le rena ka ntle le lebaka, eupša ga re felelwe ke matla. (Psalme 109:1-3) Le ka mohla re ka se ke ra dumelela bao ba hloilego molaetša wa rena wa Beibele ba re tšhošetša gore re be re kwanantšhe tumelo ya rena. Le ge re letetše gore ntwa ya rena ya moya e tla ba e matla ka mo go oketšegilego, fela re tseba mafelelo. Ka go swana le Jeremia, re tla bona phethagalo ya mantšu a boporofeta a rego: “Gomme ba tlo lwa nago, eupša ba ka se ke ba go kgona, gobane nna ke na le wena, ke tlo go hlakodiša, go rialo Jehofa.” (Jeremia 1:19, PK) Ee, re a tseba gore batho bao ba lwago le Modimo ba ka se ke ba fenya!

[Mengwalo ya ka tlase]

O be o tla Araba Bjang?

• Ke ka baka la’ng bahlanka ba Jehofa ba bile ka tlase ga tlhaselo?

• Baganetši ba ile ba lwa le batho ba Jehofa ka ditsela dife?

• Ke ka baka la’ng re ka kgonthišega gore batho bao ba lwago le Modimo ba ka se ke ba fenya?

[Dipotšišo tša Thuto]

[Seswantšho go letlakala 17]

Jeremia o ile a kgonthišetšwa gore Jehofa o be a tla ba le yena

 [Seswantšho go letlakala 18]

Baphologi ba kampeng ya tshwenyo

[Seswantšho go letlakala 18]

Bošoro bja bahlola-mpherefere malebana le Dihlatse tša Jehofa

[Seswantšho go letlakala 18]

J. F. Rutherford le badirišani ba gagwe

[Seswantšho go letlakala 21]

Tabeng ya Jesu, batho bao ba bego ba e-lwa le Modimo ga se ba ka ba fenya