Ela Hloko Lentšu la Modimo la Boporofeta

“Re na le Lentšu leo la porofetô le le tiilexo ruri; Le dira xabotse xe Le le šetša.”​—2 PETRO 1:19.

1, 2. O ka anega ka mohlala ofe wa mesia wa maaka?

BO-MESIA ba maaka ba lekile go bolelela bokamoso pele ka nywaga-kgolo e mentši. Lekgolong la bohlano la nywaga C.E., monna yo a bego a ipitša Moše o ile a kgodiša ba-Juda sehlakahlakeng sa Kereta gore e be e le yena mesia gomme o be a tla ba lokolla kgatelelong. Letšatšing leo le bego le beetšwe khunologo ya bona, ba ile ba mo latela go fihla mmotong o botogilego o okametšego Lewatle la Mediterranean. O ile a bolela gore sa bona e be e le gore ba fo itahlela ka lewatleng gomme le be le tla arogana ba le lebeletše. Ba bantši bao ba ilego ba itahlela ka meetseng ba ile ba nwelela, gomme mesia yoo wa maaka o ile a tsena bjang botala.

² Lekgolong la bo-12 la nywaga, go ile gwa tšwelela “mesia” kua Yemen. Caliph goba mmuši o ile a mo kgopela gore a dire pontšho ya go ba ga gagwe mesia. “Mesia” yo o ile a šišinya gore caliph a mo kgaole hlogo. O ile a porofeta ka tsogo ya gagwe ya kapejana yeo e bego e tla šoma bjalo ka pontšho. Caliph o ile a dumelelana le kgopolo yeo​—gomme seo ya ba mafelelo a “mesia” yoo.

3. Mesia wa therešo ke mang, gomme bodiredi bja gagwe bo hlatsetše eng?

³ Bo-mesia ba maaka gotee le diporofeto tša bona ba paletšwe ka mo go feletšego, eupša go ela hloko lentšu la Modimo la boporofeta ga go ke go lebiša manyaming. Mesia wa therešo, Jesu Kriste, o bile phethagatšo e phelago ya diporofeto tše dintši tša Beibele. Ka mohlala, mongwadi wa Ebangedi e lego Mateo ge a tsopola boporofeta bja Jesaya o ngwadile gore: “Naxa ya Sebulone, le naxa ya Nafutali, tseleng ya lewatlê, mošola wa Jorodane, Galilea dithšabeng, sethšaba se se dutšexo ’fsifsing se bôna seetša se sexolo; ’me ba ba dutšexo naxeng le moriting wa lehu, ba hlabêlwa ke seetša se sexolo. Ké lôna lebaka le Jesu a thomilexo ka lôna xo xoêlêla a re: Sokoloxang, xobane mmušô wa maxodimo o batametše.” (Mateo 4:15-17; Jesaya 9:1, 2) Jesu e be e le yena ‘seetša seo se segolo,’ gomme bodiredi bja gagwe bo bontšhitše gore e be e le yena Moporofeta yo a bego a boletšwe e sa le pele ke Moše. Bao ba ganago go theetša Jesu ba tla fedišwa.​—Doiteronomio 18:18, 19; Ditiro 3:22, 23.

4. Jesu o phethagaditše bjang Jesaya 53:12?

⁴ Le gona Jesu o phethagaditše mantšu a boporofeta a Jesaya 53:12: “Ó thšolletše môya w’axwe mo lehung, a balwa le ba-dira-dibe, a rwala dibe tša ba bantši, a humêla baaroxi.” E le ge a lemoga gore kgaufsinyane o be a tla neela bophelo bja gagwe e le motho gore e be topollo, Jesu o ile a matlafatša tumelo ya barutiwa ba gagwe. (Mareka 10:45) O dirile se ka tsela e kgethegilego ka tsela ya go fetošwa lebopo.

Go Fetošwa Lebopo go Aga Tumelo

5. Ka mantšu a gago, o be o ka hlalosa bjang go fetošwa lebopo?

⁵ Go fetošwa lebopo e be e le tiragalo e porofetilwego. Jesu o itše: “Morwa-motho ó tlo tla ka letaxô la Tat’axwe à na le Barongwa ba xaxwe . . . Ruri ke a Le botša, mo xo ba ba emexo fá xo na le ba ba tl’o xo bôna Morwa-motho à e-tla à le mmušong wa xaxwe, bôná ba sešo ba kwa lehu.” (Mateo 16:27, 28) Na ba bangwe ba baapostola ba ile ba bona Jesu e le ka kgonthe a e-tla ka Mmušo wa gagwe? Mateo 17:1-7 e re: “Xe xo fetile matšatši a selêlaxo, Jesu a tloxa à na le Petro, le Jakobo, le Johane monn’axwe; ’me ba ya thabeng e telele bà nnoši. A fetoxa lebopô bà mo lebeletše.” A tiragalo e kgolo gakaakang! “Sefahloxô sa xaxwe sa phadima byalo ka letšatši, diaparô tša xaxwe tša šweufala  wa seetša. Ba bôna xò tšwêlêla Mošê le Eliya, ba tla ba bolêla le Yêna.” Le gona, “xwa tla leru le le editšexo la ba apeša ka moriti” gomme “ba kwa lentšu lè e-tšwa lerung, le re; Yó ké Yêna Morwa-moratwa wa-ka, yo ke kxahlwaxo ke Yêna; Le mo kwê. Barutiwa xe ba e-kwa lentšu leo, ba wa ka difahloxô, ba boifa ka kudu. Jesu a tla xo bôná a ba kxwatha a re: Tsoxang, Le se boifê.”

6. (a) Ke ka baka la’ng Jesu a ile a bitša go fetošwa lebopo pono? (b) Go fetošwa lebopo e be e le ponelo-pele ya eng?

⁶ Tiragalo ye e boifišago go bonagala e ile ya direga go o mongwe wa meboto ya Thaba ya Herimone, moo Jesu le baapostola ba gagwe ba bararo ba feditšego bošego ba le gona. Ga go pelaelo gore go fetošwa lebopo go diregile bošego, e lego seo se ilego sa dira gore go bonagale gabotse kudu. Lebaka le lengwe leo ka lona Jesu a ilego a go bitša pono e be e le ka gore Moše le Eliya bao e bego e le kgale ba hwile ba be ba se gona moo ka tsela ya kgonthe. Ge e le gabotse ke Kriste a nnoši yo a bego a le moo. (Mateo 17:8, 9) Ponagalo e bjalo e phadimago e ile ya nea Petro, Jakobo le Johane ponelo-pele e botse ya go ba gona ga letago ga Jesu a le matleng a Mmušo. Moše le Eliya ba swantšhetša gabotse baja-bohwa-gotee le Jesu ba tloditšwego gomme pono e ile ya tiiša ka matla bohlatse bja gagwe mabapi le Mmušo le bogoši bja gagwe bja nakong e tlago.

7. Re tseba bjang gore Petro o be a sa gopola gabotse ka tiragalo ya go fetošwa lebopo?

⁷ Tiragalo ya go fetošwa lebopo e ile ya thuša go matlafatša tumelo ya baapostola ba ba bararo ba ba bego ba tla kgatha tema e kgolo ka phuthegong ya Bokriste. Sefahlego sa Kriste se se phadimago, diaparo tša gagwe tšeo di tagilego le lentšu la Modimo ka noši leo le bolelago gore Jesu e be e le Morwa-moratwa wa Gagwe yo ba swanetšego go mo kwa​—se ka moka se ile sa phetha morero wa sona ka mo go atlegilego kudu. Eupša baapostola ba be ba sa swanela go anegela motho le ge e le mang pono ye go fihla ka morago ga ge Jesu a tsošitšwe. Mo e ka bago ka morago ga nywaga e 32, pono ye e be e sa dutše e gopolega mogopolong wa Petro. Ge a bolela ka yona le ka seo e se bolelago, o ngwadile gore: “Xobane xe re Le tsebiša matla a Mong wa rena Jesu Kriste le xo tla xa xaxwe, e be e se xo Le anêxêla dinonwane tša mahlajana a batho; rena boxolo bya xaxwe re bo bone ka mahlô. Boxolo le borêna ó neilwe ke Modimo Tat’axwe mola a tlêlwa ke Lentšu le lexolo lela la xo tšwa letaxong le lexolo le le šiišaxo la re: Yó ké Yêna Morwa-moratwa wa-ka, yo ke kxahlwaxo ke Yêna! Lentšu leo re le kwile lè e-tšwa lexodimong mola rè na le Yêna thabeng yela e kxêthwa.”​—2 Petro 1:16-18.

8. (a) Tsebišo ya Modimo mabapi le Morwa wa gagwe e be e lebišitše tlhokomelo go eng? (b) Ke eng seo se bontšhitšwego ke leru leo le ilego la tšwelela tiragalong ya go fetošwa lebopo?

⁸ Sa bohlokwa ka go fetišiša e bile kgoeletšo ya Modimo ye e rego: “Yó ké Yêna Morwa-moratwa wa-ka, yo ke kxahlwaxo ke Yêna; Le mo kwê.” Polelo ye e lebiša tlhokomelo go Jesu e le Kgoši ya Modimo yeo e beilwego setulong sa bogoši, yo tlholo ka moka e swanetšego go mo kwa. Leru leo le širago le bontšhitše gore phethagatšo ya pono ye e be e ka se bonagale. E be e tla lemogwa feela ka mahlo a kwešišo ke bao ba lemogago “pontšho” ya go ba gona ga Jesu ka mo go sa bonagalego matleng a Mmušo. (Mateo 24:3, NW) Ge e le gabotse, taelo ya Jesu ya gore ba se ke ba botša motho le ge e le ofe ka pono go ba go fihla ge a tsogile bahung e bontšha gore go godišwa ya gagwe le go tagafatšwa ga gagwe go be go tla tla ka morago ga tsogo ya gagwe.

9. Ke ka baka la’ng tiragalo ya go fetošwa lebopo e swanetše go matlafatša tumelo ya rena?

⁹ Ka morago ga go bolela ka go fetošwa lebopo, Petro o itše: “Xomme re na le Lentšu leo la porofetô le le tiilexo ruri; Le dira xabotse xe Le le šetša bo-ka lebônê le le etšaxo mo xo lexo lefsifsi, xore xo bê xo sê xohle, ’me naledi ya mesô e hlabê dipelong tša lena. Se sexolo-thata ké xore Le tsebê xe xo se porofetô e kaxo hlathollwa ka boithatêlô, xobane xa xo ešo xwa bá xwa tšwêlêla porofetô ka xo ithatêla xa motho, xobane batho ba bakxêthwa ba Modimo ba boletše bà išwa ke Môya o mokxêthwa.” (2 Petro 1:19-21) Tiragalo ya go fetošwa lebopo e gatelela go botega ga lentšu la Modimo la boporofeta. Re swanetše go ela lentšu leo hloko gomme re se ke ra latela “dinonwane tša mahlajana a batho,” tšeo di sa thekgwego ke Modimo goba go amogelwa ke yena. Go ba ga rena le tumelo lentšung la boporofeta go swanetše go matlafatšwa ke go fetošwa lebopo ka gobane ponelo-pele yeo ya pono ya letago la Jesu le matla a Mmušo e bile ya kgonthe. Ee, re na le bohlatse bjo bo sa ganetšegego bja gore Kriste o gona lehono e le Kgoši e matla ya legodimong.

Kamoo Naledi ya Meso e Rotogago ka Gona

10. “Naledi ya mesô” yeo Petro a boletšego ka yona ke mang goba ke eng, gomme ke ka baka la’ng o araba bjalo?

¹⁰ Petro o ngwadile gore: “Le dira xabotse xe Le . . . šetša [lentšu la boporofeta] bo-ka lebônê le le etšaxo mo xo lexo lefsifsi, xore xo bê xo sê xohle, ’me naledi ya mesô e hlabê dipelong tša lena.” “Naledi ya mesô” ke mang goba ke eng? Polelwana “naledi ya mesô” e tšwelela gatee feela ka Beibeleng gomme e bolela se se swanago le “naledi ya masa.” (NW) Kutollo 22:16 e bitša Jesu Kriste “naledi e phadimaxo ya mesô.” Dinakong tše dingwe tša dihla tša ngwaga, dinaledi tše bjalo ke tšona di rotogago la mafelelo ka bohlabela. Di rotoga pejana ga ge letšatši le ka tšwelela gomme ka go rialo di eta pele mahube a letšatši le lefsa. Petro o dirišitše polelwana “naledi ya mesô” e le go šupa go Jesu ka morago ga gore A amogele matla a Mmušo. Ka nako yeo, Jesu o ile a rotoga legohleng ka moka, go akaretša le lefase la rena! Ka ge e le Naledi ya Meso yeo e lego Mesia, o swantšhetša mahube a letšatši le lefsa goba mehla yeo e tlelago batho ka moka bao ba kwago.

11. (a) Ke ka baka la’ng 2 Petro 1:19 e sa bolele gore “naledi ya mesô” e rotoga dipelong tša kgonthe tša batho? (b) O be o ka hlalosa bjang 2 Petro 1:19?

¹¹ Diphetolelo tše dintši tša Beibele di thekga kgopolo ya gore mantšu a moapostola Petro ao a ngwadilwego go 2 Petro 1:19 a šupa go pelo ya motho ya kgonthe. Pelo ya motho yo a godilego e imela digrama tše 250 go ya go tše 300. Jesu Kriste​—yo ga bjale e lego sebopiwa sa moya se se sa hwego sa letago legodimong​—a ka kgona bjang go rotoga ka gare ga ditho tše tše dinyenyane tša motho? (1 Timotheo 6:16) Go ba gona, dipelo tša rena tša seswantšhetšo di a akaretšwa tabeng ye, ka gobane re ela hloko lentšu la Modimo la boporofeta ka tšona. Eupša lebeledišiša 2 Petro 1:19, gomme o tla bona gore New World Translation e diriša difegelwana bakeng sa go aroganya polelwana e lego ka gare ga mašakanabora “go ba go fihla ge e e-ba mahube gomme naledi ya masa e rotoga,” bakeng sa go e aroganya le mantšu a a etago pele temaneng gotee le lefokwana le le rego “dipelong tša lena.” Temana ye e ka hlaloswa ka tsela ye: ‘Re na le lentšu la boporofeta leo le kgonthišeditšwego kudu; gomme le dira gabotse ge  le le ela hloko bjalo ka lebone leo le bonešitšego lefelong la lefsifsi, ke gore, dipelong tša lena, go fihlela ge letšatši le hlaba gomme naledi ya meso e rotoga.’

12. Boemo bja dipelo tša batho ka kakaretšo ke bofe, eupša therešo ke efe ka Bakriste ba therešo?

¹² Boemo bja dipelo tša seswantšhetšo tša batho ba nago le sebe ka kakaretšo ke bofe? Ee, dipelo tša bona di lefsifsing la moya! Lega go le bjalo, ge e ba re le Bakriste ba therešo, go bjalo ka ge eka re na le lebone leo le phadimago dipelong tša rena, tšeo ge nkabe go se bjalo di bego di tla ba lefsifsing. Bjalo ka ge mantšu a Petro a bontšhitše, e be e tla ba ka go ela hloko lentšu la Modimo la boporofeta le le bonešago moo Bakriste ba therešo ba bego ba tla dula ba phafogetše le go edišetšwa go ya mahubeng a letšatši le lefsa. Ba be ba tla lemoga therešo ya gore Naledi ya Meso ga e a rotoga ka dipelong tša nama tša batho, eupša ka pele ga tlholo ka moka.

13. (a) Ke ka baka la’ng re ka kgodišega gore Naledi ya Meso e šetše e rotogile? (b) Ke ka baka la’ng Bakriste ba kgona go kgotlelela maemo a thata ao Jesu a boletšego ka ona e sa le pele bakeng sa mehla ya rena?

¹³ Naledi ya Meso e šetše e rotogile! Ka go ela hloko boporofeta bjo bogolo bja Jesu mabapi le go ba gona ga gagwe, re ka kgonthišega ka seo. Lehono, re bona phethagalo ya bjona ditiragalong tše bjalo ka dintwa tšeo di sa kago tša ba gona pele, ditlala, ditšhišinyego tša lefase le go bolelwa ga ditaba tše di lokilego lefaseng ka bophara. (Mateo 24:3-14) Le ge maemo a thata ao Jesu a boletšego ka ona e sa le pele a re kgoma bjalo ka Bakriste, re kgona go kgotlelela ka khutšo le lethabo la pelo. Ka baka la’ng? Ka gobane re ela hloko lentšu la Modimo la boporofeta gomme re na le tumelo go seo a se holofetšago bakeng sa bokamoso. Re a tseba gore re serepuding sa mehla e phalago yohle ka gobane re gare-gare ‘lebakeng la bofelo’! (Daniele 12:4) Lefase le mathateng a hlobaetšago ao a boletšwego e sa le pele go Jesaya 60:2: “Xobane še-leo lefsifsi le khurumeditše lefase, boso bo thibile dithšabeng.” Motho le ge e le ofe a ka bona bjang tsela ya gagwe lefsifsing le? Motho o swanetše go ela hloko ka boikokobetšo lentšu la Modimo la boporofeta gona bjale, pele a šiwa ke nako. Batho ba dipelo tše di botegago ba swanetše go retologela go Jehofa Modimo, Mothopo wa bophelo le seetša. (Psalme 36:9; Ditiro 17:28) Ke feela ka go dira se moo motho le ge e le mang a ka hwetšago tshedimošo ya kgonthe le kholofelo ya go thabela bokamoso bjo bo kgahlišago bjoo Modimo a bo reretšego batho ba ba kwago.​—Kutollo 21:1-5.

“Seetša se Tlile Lefaseng”

14. Re swanetše go dira’ng bakeng sa gore re bone go phethagala ga diporofeto tše di kgahlišago tša Beibele?

¹⁴ Mangwalo a hlalosa ka mo go kwalago gore Jesu Kriste gona bjale o buša e le Kgoši. Ka baka la go ba ga gagwe matleng ka 1914, diporofeto tše di kgahlišago di sa tlo phethagala. Bakeng sa go bona go phethagala ga tšona, re swanetše go ipontšha re le ba boleta bao ba bontšhago tumelo go Jesu Kriste, re sokologe medirong ya sebe le diphošong tšeo di dirwago ka go se tsebe. Ee, bao ba ratago lefsifsi ba ka se ke ba amogela bophelo bjo bo sa felego. Jesu o itše: “Kahlolô yôna šé: Seetša se tlile lefaseng; xomme batho ba rata lefsifsi xa-xolo, ba nyatša seetša xobane medirô ya bôná e le e mebe. Xobane mo-dira-tše-mpe mang le mang ó hloile seetša, xa a tle xo sôna, xore medirô ya xaxwe e se kê ya kxalwa. Mo-dira-therešô yêna ó tla seetšeng, xore medirô ya xaxwe e bônaxalê, xobane e dirilwe Modimo à le mo xo yôna.”​—Johane 3:19-21.

15. Ke eng seo se tla diregago ge e ba re hlokomologa phološo yeo Modimo a dirilego gore e kgonege ka Morwa wa gagwe?

¹⁵ Seetša sa moya se tlile lefaseng ka Jesu, gomme go mo theetša ke gabohlokwa. Paulo o ngwadile gore: “Modimo kxalê ó boletše le bô-tata-wešo xa-ntši le ka mekxwa e mentši ka Baporofeta; mehleng yeno ya bofêlô a tla a bolêla le rena ka Morwa yo a mmeilexo mo-ja-bohwa wa tšohle.” (Ba-Hebere 1:1, 2) Ke eng seo se tlago go direga ge e ba re hlokomologa phološo yeo Modimo a dirilego gore e kgonege ka Morwa wa gagwe? Paulo o tšwetše pele ka go re: “Xobane mola xo tlile Lentšu lela la xo bolêlwa ke Barongwa, xo le sela le xo se kwê xohle xe xo e-ba xo ôba kôtlô ya xôna, re tlo phônyôkxa bya’ng xe re ka nyatša phološô e kxolo yé, ye e thomilexo ka xo bolêlwa ke Morêna, ya tla ya tia mo xo rena ka ba ba e kwilexo, ’me Modimo a e hlatsêla ka mehlôlô, le ka matete, le ka ditirô tše matla tša mehuta-huta, le ka xo abêla batho Môya ka mo a ithatetšexo ka xôna?” (Ba-Hebere 2:2-4) Ee, Jesu ke motheo go tsebatšeng lentšu la boporofeta.​—Kutollo 19:10.

16. Ke ka baka la’ng re ka ba le tumelo e tletšego diporofetong ka moka tša Jehofa Modimo?

¹⁶ Bjalo ka ge go ngwadilwe, Petro o itše: “Ga go porofeto mangwalong e diregilego ka go itlhathollela ga motho.” (PK) Batho ka bobona ba ka se ke ba thoma boporofeta bja therešo, eupša re ka ba le tumelo e tletšego diporofetong ka moka tša Modimo. Tše di tšwa go Jehofa Modimo ka boyena. Ka moya o mokgethwa o dirile gore bahlanka ba gagwe ba kgone go kwešiša kamoo diporofeto tša Beibele di phethagalago ka gona. Ka kgonthe, re leboga Jehofa gore re bone phethagalo ya diporofeto tše bjalo tše dintši ga e sa le go tloga ka 1914. Le gona, re kgodišegile ka mo go feletšego gore diporofeto tše di šetšego tša mabapi le bofelo bja tshepedišo ye e kgopo di tla phethagala ka moka. Ke gabohlokwa gore re tšwele pele re ela hloko dipolelelo-pele tša Modimo ge re dutše re dira gore seetša sa rena se phadime. (Mateo 5:16) Re leboga gakaakang gore Jehofa o dira gore ‘seetša se re hlabele lefsifsing le leso’ leo le khupetšago lefase lehono!​—Jesaya 58:10.

17. Ke ka baka la’ng re nyaka seetša sa moya se se tšwago go Modimo?

¹⁷ Seetša sa kgonthe se dira gore re kgone go bona. Gape se dira gore dibjalo tšeo di re fepago ka dijo tša mehuta-huta di gole. Ka ntle le seetša sa kgonthe re ka se kgone go tšwela pele re phela. Go thwe’ng ka seetša sa moya? Se re nea tlhahlo gomme se re bontšha bokamoso bjalo ka ge bo boletšwe ka Lentšung la Modimo, Beibele. (Psalme 119:105) Jehofa Modimo ka lerato o ‘roma seetša sa gagwe le therešo ya gagwe.’ (Psalme 43:3)  Ka kgonthe re swanetše go bontšha tebogo e tseneletšego bakeng sa ditokišetšo tše bjalo. Ka gona, anke re direng sohle seo re ka se kgonago go monya seetša sa “xo tseba letaxô la Modimo” e le gore se bonegele dipelo tša rena tša seswantšhetšo.​—2 Ba-Korinthe 4:6; Ba-Efeso 1:8.

18. Naledi ya Meso ya Jehofa e loketše go dira’ng ga bjale?

¹⁸ Re šegofaditšwe gakaakang go tseba gore ka 1914, Jesu Kriste, Naledi ya Meso, o ile a rotoga legohleng ka moka gomme a thoma go phethagatša pono ya go fetošwa lebopo! Naledi ya Meso ya Jehofa e gona ga bjale, e loketše go phethagatša morero wa Modimo phethagalong e tšwelago pele ya tiragalo ya go fetošwa lebopo​—‘ntwa ya mohla-mogolo ya Modimo Ra-matla-ohle.’ (Kutollo 16:14, 16) Ka morago ga ge tshepedišo ye ya kgale e fedišitšwe, Jehofa o tla phethagatša kholofetšo ya gagwe ya “maxodimo a mafsa le lefase le lefsa,” moo re ka kgonago go mo reta ka mo go sa felego e le Morena yo a Phagamego wa legohle le Modimo wa boporofeta bja therešo. (2 Petro 3:13) Go ba go fihlela ge letšatši leo le legolo le fihla, anke re tšweleng pele re sepela seetšeng sa Modimo ka go lebiša tlhokomelo lentšung la Modimo la boporofeta.

O be o tla Araba Bjang?

• O ka hlalosa bjang go fetošwa lebopo ga Jesu?

• Go fetošwa lebopo go aga tumelo bjang?

• Naledi ya Meso ya Jehofa ke mang goba ke eng, gomme e rotogile neng?

• Ke ka baka la’ng re swanetše go ela hloko lentšu la Modimo la boporofeta?

[Dipotšišo tša Thuto]

[Seswantšho go letlakala 13]

Na o ka hlalosa seo se bolelwago ke go fetošwa lebopo?

[Seswantšho go letlakala 15]

Naledi ya Meso e šetše e rotogile. Na o tseba gore e rotogile bjang, le gona neng?