Moya wa Modimo o Šoma Bjang Lehono?

O BE a belegwe e le segole go tšwa popelong ya mmagwe. Letšatši le letšatši, o be a dula kgorong ya tempele yeo e bitšwago Botse gore a kgopele dineo tša kgaugelo go bao ba tsenago ka tempeleng. Lega go le bjalo, lebakeng le lengwe mokgopedi yo wa segole o ile a amogela mpho yeo e bego e phala kgole disente tše sego kae ka bogolo. O ile a fodišwa!​—Ditiro 3:2-8.

Le ge baapostola Petro le Johane e be e le bona bao ba ‘mo emišitšego’ gore ‘maoto a gagwe le dikokoilane tša gagwe di be di tie,’ ga se ba ka ba itheta ka baka la phodišo. Ke ka baka la’ng? Petro o hlalositše ka boyena gore: “Lena banna ba Isiraele, Le kxotsetša’ng taba yé? Le re’ng Lè lebêlêla rena, e ke xo dirile rena ka matla a rena, xoba ka borapedi bya rena xe motho é à sepela?” Ka kgonthe, Petro gotee le Johane ba ile ba lemoga gore e be e se ka matla a bona, eupša ka moya o mokgethwa wa Modimo gore go dirwe selo seo.​—Ditiro 3:7-16; 4:29-31.

Ka nako yeo, “ditirô [tše bjalo] tše matla” di be di dirwa bakeng sa go bontšha gore phuthego e mpsha ya Bokriste e be e thekgwa ke Modimo. (Ba-Hebere 2:4) Eupša ka morago ga ge di phethile morero wa tšona, moapostola Paulo o boletše gore di be di tla “fêla.” * (1 Ba-Korinthe 13:8) Ka go rialo, mo nakong ye ka phuthegong ya therešo ya Bokriste ga re bone diphodišo le ge e le dife tše di laetšwego ke Modimo, melaetša ya boporofeta goba go ntšhwa ga batemona.

Ka gona, na se se bolela gore moya o mokgethwa wa Modimo ga o sa šoma? Ruri ga go bjalo! Anke re eleng hloko ditsela tše dingwe tšeo moya wa Modimo o bego o šoma ka tšona lekgolong la pele la nywaga le tšeo o šomago ka tšona mehleng ya rena.

“Môya wa Therešô”

Tsela e nngwe yeo moya wa Modimo o šomago ka yona ke go tsebiša, go sedimoša le go utolla ditherešo. Pejana ga lehu la gagwe, Jesu o ile a botša barutiwa ba gagwe gore: “Ke sa na le tše ntši tša xo Le botša; fêla xe e le byale Le ka se kxône xo di rwala. Mohla xò tlile Môya wa therešô, ó tlo Le sepediša tsela ya therešô-moka.”​—Johane 16:12, 13.

“Môya wa therešô” o ile wa tšhollwa ka Pentekoste ya 33 C.E. ge barutiwa ba ka bago 120 bao ba bego ba bokane ka phapošing ya ka godimo kua Jerusalema ba be ba kolobetšwa ka moya o mokgethwa. (Ditiro 2:1-4) Moapostola Petro o be a le gona gare ga bao ba bego ba le gona bakeng sa monyanya woo wa ngwaga le ngwaga. A tladitšwe ka moya o mokgethwa, Petro o ile a “êma” gomme a atološa goba a hlalosa ka mo go kwalago ditherešo tše dingwe mabapi le Jesu. Ka mohlala, o ile a hlalosa kamoo “Jesu wa Natsaretha” a ilego a ‘godišwa ka letsogong le letona la Modimo’ ka gona. (Ditiro 2:14, 22, 33) Moya wa Modimo gape o ile wa tutuetša Petro gore a bolele ka sebete le batheetši ba gagwe ba ba-Juda ka gore: “Moloko ka moka wa Isiraele a o kê o tsebê ruri, xore Jesu eo Le mmapotšexo, ke Yêna yo Modimo a mmeilexo a ba Morêna, a ba Yêna Kriste.” (Ditiro 2:36) Ka baka la molaetša wa Petro o buduletšwego ke moya, batho ba ka bago dikete tše tharo ba ile ba ‘dumela therešo ka go rata’ gomme ba kolobetšwa. Ka tsela ye, moya o mokgethwa wa Modimo o ile wa thuša go ba hlahlela therešong.​—Ditiro 2:37-41.

Moya o mokgethwa wa Modimo gape o ile wa šoma e le morutiši le mogopotši. Jesu o itše: “Yêna Molwedi Môya-mokxêthwa, wo Tate a tl’o xo o roma ka Leina la-ka, o tlo Le ruta tšohle, o tlo Le xakolla tšohle tše ke Le boditšexo tšôna.”​—Johane 14:26.

Moya o mokgethwa o ile wa šoma bjang e le morutiši? Moya wa Modimo o ile wa bula dikgopolo tša barutiwa bakeng sa dilo tšeo ba bego ba kile ba di kwa go Jesu eupša e le tšeo ba sa kago ba di kwešiša ka botlalo. Ka mohlala, baapostola ba be ba tseba gore nakong ya go sekišwa ga gagwe, Jesu o ile a botša mmušiši wa mo-Roma wa Judea, Pontio  Pilato gore: “Mmušô wa-ka xa se o tšwaxo ’faseng leno.” Lega go le bjalo, nakong ya ge Jesu a rotogela legodimong ka morago ga matšatši a 40, baapostola ba be ba sa dutše ba e-na le kgopolo e fošagetšego ya gore Mmušo o be o tla hlongwa gona mo lefaseng. (Johane 18:36; Ditiro 1:6) Go bonagala gore baapostola ga se ba ka ba kgona go kwešiša ka mo go feletšego seo se bolelwago ke mantšu a Jesu go ba go fihla ka morago ga go tšhollwa ga moya o mokgethwa wa Modimo ka Pentekoste ya 33 C.E.

Gape moya wa Modimo o ile wa dira e le mogopotši ka go ba gopotša dithuto tše di fapa-fapanego tša Jesu. Ka mohlala, diporofeto tše di bolelago ka lehu la Kriste le tsogo ya gagwe di ile tša hlaloswa ka tsela e mpsha ka thušo ya moya o mokgethwa. (Mateo 16:21; Johane 12:16) Go gopola dithuto tša Jesu go ile gwa kgontšha baapostola gore ba lwele ka sebete boemo bja bona ka pele ga dikgoši, bo-maseterata le baetapele ba bodumedi.​—Mareka 13:9-11; Ditiro 4:5-20.

Go oketša moo, moya o mokgethwa wa Modimo o ile wa thuša go hlahleng Bakriste ba pele tšhemong e enywago dienywa bodireding. (Ditiro 16:6-10) Gape moya wa Modimo o ile wa tutuetša Bakriste ba pele gore ba be le karolo go ngwalweng ga Lentšu la Modimo, Beibele, bakeng sa go hola batho bohle. (2 Timotheo 3:16) Ka gona go molaleng gore moya o mokgethwa o be o dira ka ditsela tše di fapa-fapanego lekgolong la pele la nywaga. O be o sa newe bakeng sa go dira mehlolo feela.

Moya o Mokgethwa Mehleng ya Rena

Moya o mokgethwa o be o dutše o dira ka mo go swanago bakeng sa Bakriste ba therešo mehleng  ya rena. Se se ile sa bonagala sehlopheng se senyenyane sa barutwana ba Beibele kua Allegheny, Pennsylvania, U.S.A., karolong ya mafelelo ya lekgolo la bo-19 la nywaga. Barutwana ba ba mafolofolo ba Beibele ba be ba fišegela go tseba “therešô.”​—Johane 8:32; 16:13.

Setho se sengwe sa sehlopha se, Charles Taze Russell, se boletše mabapi le go tsongwa mo ga therešo ya Mangwalo ka gore: “Ke ile ka rapelela . . . gore ke kgontšhwe gore ke tloše monaganong wa-ka le pelong ya-ka kgethollo le ge e le efe yeo e ka bago e le tšhitišo gomme ke hlahlwe ke moya wa gagwe go ya kwešišong e nepagetšego.” Modimo o ile a šegofatša thapelo ye ya boikokobetšo.

Ka ge Russell le bagwera ba gagwe ba ile ba fatišiša ka mafolofolo ka Mangwalong, dilo tše dintši di ile tša bonagala gabotse. Russell o hlalositše gore: “Re ile ra hwetša gore ka nywaga-kgolo e mentši dihlopha tše di fapa-fapanego di ile tša aroganya dithuto tša Beibele magareng ga tšona, di di kopanya le dikakanyo le diphošo tša batho.” Se se ile sa feleletša ka seo a se biditšego “go arošwa ga therešo.” Ka kgonthe, ditherešo tša Mangwalo di ile tša epelwa ka tlase ga lelokelelo la dithuto tša boheitene tšeo di ilego tša šwahlela Bojakaneng go theoša le nywaga-kgolo. Eupša Russell o be a ikemišeditše go tseba therešo le go e tsebatša.

Ka matlakala a Zion’s Watch Tower and Herald of Christ’s Presence, Russell le bagwera ba gagwe ba ile ba sola ka sebete dithuto tša maaka tša bodumedi tšeo di bego di bolela Modimo gampe. Ba ile ba lemoga gore​—ka go fapana le kgopolo e tumilego ya bodumedi​—moya (soul) o a hwa, gore ge re e-hwa re ya lebitleng le gore Jehofa ke Modimo a nnoši wa therešo gomme ka baka leo ga se karolo ya Boraro botee.

Ka gona, ka ge o ka nagana, go pepentšhwa mo go bjalo ga dithuto tša maaka go ile gwa galefiša baruti ba Bojakane. E le ge ba fagahletše go swarelela maemong a bona a nago le tutuetšo, baruti ba bantši ba Katholika le ba Protestanta ba ile ba rulaganya masolo ao a bego a reretšwe go hlompholla Russell. Eupša yena le bagwera ba gagwe ga se ba ka ba langwa. Ba ile ba lebelela ka kholofelo moyeng wa Modimo gore o ba hlahle. Russell o itše: “Kgonthišetšo ya Morena wa rena ke gore . . . moya o mokgethwa wa Tate, wo o rometšwego ka baka la Jesu Molopolodi wa rena, Mmoelanyi le Hlogo ya rena le ka baka la kgopelo ya gagwe, e tla ba morutiši wa rena.” Gomme o ile wa ruta e le ka kgonthe! Barutwana ba ba Beibele ba botegago ba ile ba tšwela pele ba e-nwa meetse a sekilego a therešo a tšwago ka Beibeleng gomme ba a tsebatša lefaseng ka bophara.​—Kutollo 22:17.

Mokgatlo wa mehleng yeno wa Dihlatse tša Jehofa o ile wa dula o arabela tlhahlong ya moya o mokgethwa wa Modimo ka lebaka le le šetšego le le ka godimo ga nywaga e lekgolo ga bjale. Ge moya wa Jehofa o tšwela pele go sedimoša pono ya tšona ya moya, Dihlatse di dira dipeakanyo tše di nyakegago ka go rata bakeng sa go dumelelana le kwešišo yeo e lego nakong.​—Diema 4:18.

“La tlo ba Dihlatse Tša-ka”

Jesu o ile a hlaola ponagatšo e nngwe gape ya moya o mokgethwa wa Modimo ge a be a botša barutiwa ba gagwe gore: “Lena Le tlo fiwa matla xe Môya-mokxêthwa ò theoxêla xo lena, la tlo ba  dihlatse tša-ka . . . xo fihla maxomong a lefase.” (Ditiro 1:8) Kholofetšo ya Jesu ya go nea barutiwa ba gagwe “matla” le “Môya-mokxêthwa” gore ba phethe modiro wa bona wo ba o abetšwego ke Modimo e sa dutše e šoma le lehono.

E le sehlopha, Dihlatse tša Jehofa di tsebja ka modiro wa tšona wa go bolela. (Bona lepokisi.) Ka kgonthe, Dihlatse tša Jehofa di bolela molaetša wa therešo dinageng tša ka godimo ga 230 le dihlaka-hlakeng. Di hlatloša mantšu a tšona ka sebete bakeng sa go thekga Mmušo wa Modimo ka tlase ga boemo bjo bongwe le bjo bongwe bjo bo ka naganwago, go akaretša le go bea maphelo a tšona kotsing dinageng tše di hlagaditšwego ke ntwa. Go fišegela ga tšona bodiredi bja Bokriste go nea bohlatse bjo matla bja gore moya o mokgethwa o a šoma lehono. Le gona go molaleng gore Jehofa Modimo o šegofatša maiteko a tšona.

Ka mohlala, ngwagola go ile gwa dirišwa diiri tše ka godimo ga dimilione tše sekete go boleleng ditaba tše di lokilego tša Mmušo wa Modimo. Ka mafelelo afe? Batho ba ka bago 323 439 ba ile ba bontšha boineelo bja bona go Modimo ka go kolobetšwa meetseng. Go oketša moo, go ile gwa swarwa dithuto tša legae tša Beibele tša beke le beke tše 4 433 884 le batho bao ba sa tšwago go thabela. Ka kakaretšo, go ile gwa sepedišwa dipuku tše 24 607 741, dimakasine tše 631 162 309 le diporoutšha gotee le dipukwana tše 63 495 728. A bohlatse bjo matla gakaakang bjo bo bontšhago gore moya wa Modimo o a šoma!

Moya wa Modimo le Wena

Ge motho a arabela ka mo go kgahlišago ditabeng tše di lokilego, a dumelelanya bophelo bja gagwe le ditekanyetšo tša Modimo e bile a bontšha tumelo tokišetšong ya topollo, o bulegelwa ke tsela ya go ba le boemo bjo bo hlwekilego le Modimo. Moapostola Paulo o boletše le ba bjalo a re: ‘Modimo o le neile moya o mokgethwa wa gagwe wa ba mo go lena.’​—1 Ba-Thesalonika 4:7, 8; 1 Ba-Korinthe 6:9-11.

Go ba le moya wa Modimo go feleletša ka ditšhegofatšo tše dintši tše dibotse. Ke ditšhegofatšo tša mohuta mang? Gare ga tše dingwe, Lentšu la Modimo le le buduletšwego le re: “Dienywa tša Môya, tšôna ke leratô, le lethabô, le moláô; ke xo se fêle pelo, le botho, le bonôlô, le pôtêxô le bolêta, le boithswarô.” (Ba-Galatia 5:22, 23) Ka gona, moya o mokgethwa wa Modimo ke tutuetšo e matla ya go tutueletša botse, o kgontšha motho go bonagatša dika tša go boifa Modimo.

Go tlaleletša moo, ge o bala Beibele gomme o diriša seo o ithutago sona, moya wa Modimo o ka go thuša gore o gole bohlaleng, tsebong, temogong, kahlolong e botse le bokgoning bja go nagana. Kgoši Salomo o ile a fiwa “pelo e bohlale le temogo e kgolo kudu le pelo e ahlamilego tsebong,” ka gobane o be a tsoma go kgahliša Modimo go e na le go kgahliša batho. (1 Dikxoši 4:29, PK) Ka ge Jehofa a ile a nea Salomo moya o mokgethwa, ruri a ka se ke a tima bao ba tsomago go mo kgahliša lehono moya wa gagwe o mokgethwa.

Moya o mokgethwa wa Modimo gape o thuša Bakriste gore ba ganetše Sathane le batemona, tshepedišo ye e kgopo ya dilo le ditshekamelo tša sebe tša nama ya bona ya sebe. Seo se kgonega bjang? Moapostola Paulo o araba ka gore: “Ke kxôna tšohle ka Eo a mphaxo matla.” (Ba-Filipi 4:13) Moya o mokgethwa o ka no se tloše diteko; lega go le bjalo, o ka go thuša gore o di kgotlelele. Ka go ithekga ka moya wa Modimo, re ka fiwa “matla a fetišago a tlwaelegilego” gore re lebeletšane le bothata goba kgateletšo le ge e le efe.​—2 Ba-Korinthe 4:7, NW; 1 Ba-Korinthe 10:13.

Ge o nagana ka bohlatse bjo ka moka, ga go na pelaelo gore moya o mokgethwa wa Modimo o a šoma lehono. Moya wa Jehofa o nea bahlanka ba gagwe matla gore ba nee bohlatse ka merero ya gagwe e megolo. O tšwela pele o utolla seetša sa moya, gomme o matlafatša tumelo ya rena le go re thuša gore re dule re botegela Mmopi wa rena ka go se kwanantšhe. Re ka leboga gakaakang gore Modimo o ile a dula a kgomaretše kholofetšo ya gagwe ka go nea bahlanka ba gagwe ba botegago moya o mokgethwa lehono!

[Mongwalo wa ka tlase]

[Lepokisi go letlakala 10]

Seo ba Bangwe ba se Bolelago ka Dihlatse tša Jehofa

“Mola dikereke tše dingwe di hira ditsebi gore di gokeletše batho gore ba tsene ka dikerekeng goba ba phenkgišane ka dikgang tša mehleng yeno tše bjalo ka bosodoma le go ntšha dimpa, Dihlatse ga di kwanantšhe le gatee le lefase le le fetogago. Di sa dutše di bolela ka thulaganyo Lefaseng.”​—The Orange County Register ya Orange County, California, U.S.A.

“Ge go tliwa tabeng ya go phatlalatša tumelo, ke dihlopha tše sego kae tše di lego mafolofolo go swana le . . . Dihlatse tša Jehofa.”​—The Republic ya Columbus, Indiana, U.S.A.

“Ke tšona di nnoši tše di yago ka ntlo le ntlo ka ‘ditaba tše di lokilego,’ di diriša melao ya motheo ya Beibele.”​—Życie Literackie, Poland.

“Lesolong le legolo-golo la go bolela leo le bego le dutše le tsebja, Dihlatse tša Jehofa di išitše molaetša wa Jehofa lefaseng ka moka.”​—News-Observer, Tamaqua, Pennsylvania, U.S.A.

[Diswantšho go letlakala 9]

Moya o mokgethwa wa Modimo o re sedimoša moyeng,

. . . o godiša dika tše dibotse tša Bokriste,

. . . le go re thekga modirong wa go bolela wa lefase ka bophara