Dipotšišo tše Tšwago go Babadi

Tše tharo tša Diebangedi di bolela ka pelaelo mabapi le go tlotšwa ga Jesu ka oli ya theko ya godimo. Na baapostola ba bantši ba ile ba belaela, goba na e be e le Judase ka mo go kgethegilego?

Re hwetša tiragalo ye e anegwa Diebangeding tša Mateo, Mareka le Johane. Go bonagala eka Judase o be a eteletše pele go belaeleng, bonyenyane go e-na le baapostola ba bangwe bao ka nako yeo ba bego ba dumelelana le yena. Tiragalo ye e bontšha lebaka leo ka lona re ka lebogago bakeng sa go ba le dipego tše nne tša Diebangedi. Seo mongwadi yo mongwe le yo mongwe a se ngwadilego se be se nepagetše, eupša ga ba nee ditaba tše di swanago ka moka ga bona. Ka go bapiša dipego tše di nyakilego di swana, re hwetša pono e tletšego kudu le e nabišago ditaba ya ditiragalo tše dintši.

Pego e lego go Mateo 26:6-13 e nea lefelo​—ntlo ya Simone wa molephera, kua Bethani​—eupša ga e bolele leina la mosadi yo a ilego a thoma go tšhela oli e nkgago bose hlogong ya Jesu. Mateo o ngwala gore: “Barutiwa xe ba di bôna ba hlonama” gomme ba belaela ka gore oli e ka be e ile ya rekišwa gomme tšhelete ya yona ya fiwa badiidi.​—Mongwalo o sekamego ke wa rena.

Pego ya Mareka e akaretša bontši bja ditaba tšeo. Eupša o oketša ka gore o ile a khurumolla sebjana. Se be se e-na le oli e nkgago bose yeo e bego e le ya “thêkô e kxolo,” yeo e swanago le yeo mo gongwe e ka bago e be e rekilwe India. Ge e le mabapi le pelaelo, Mareka o bega gore “ba bangwê ba mo tsôta” gomme “ba mo nyamiša.” (Mareka 14:3-9, mongwalo o sekamego ke wa rena.) Ka gona dipego tše pedi di bontšha gore go be go akaretšwa baapostola ba fetago o tee pelaelong. Lega go le bjalo se se thomile bjang?

Johane yo e bego e le hlatse e bonego ka mahlo, o ile a tlaleletša ka ditaba tša maleba. O bolela ka leina la mosadi​—Maria, ngwanabo Mareta le Latsaro. Johane o boletše le taba ye, yeo re ka e tšeago e le e tlaleletšago go e na le go ba e ganetšago: “A tlotša dinaô tša Jesu, a di phomola ka meriri ya xaxwe.” (Mongwalo o sekamego ke wa rena.) Ka go kopanya dipego tše, re kgona go bona gore Maria o swanetše go ba a ile a tšhela oli, yeo Johane a tiišetšago gore e be e le ya “thêkô e kxolo,” hlogong ya Jesu gotee le maotong. Johane o be a le kgaufsi kudu le Jesu gomme o be a fela a galefišwa ke go kwa go bolelwa gampe ka Yena. Re bala gore: “E mongwê wa barutiwa ba xaxwe, Judase . . . Isikariothe, yola wa xo tlo mo êka a re: Ké xo re’ng setlôlô seo sè sa ka sa rekišwa ka mašeleng a makxolo a mararo, a newa badiitšana?”​—Johane 12:2-8.

Ee, Judase e be e le ‘yo mongwe wa barutiwa ba gagwe,’ eupša o ka kgona go lemoga kgalefo ya Johane ya gore motho yo mongwe yo a lego boemong bja gagwe o be a rera go eka Jesu. Mofetoledi Dr. C. Howard Matheny o boletše ka Johane 12:4 gore: “Modirišo-hlaodi wa lebjale e lego ‘go ba kgaufsi le go’ [goba “o be a le kgaufsi le go”] le modirišo-go wa lebjale wa ‘go ba yo a ekago’ [goba “o be a le kgaufsi le go eka”] bobedi di šupa tirong e tšwelago pele. Se se bontšha gore go ekwa ga Jesu e be e se tiro ya tšhoganetšo yeo e bego e dirwa ka go ponya ga leihlo ka gobane e be e nagannwe pele e bile e rerilwe ka matšatši a mantši.” Johane o okeditše ka taba ya gore ge Judase a be a belaela “ó be a sa boledišwe ke xo setša badiitšana, ké ka xobane e be e le lehodu, à swere sekhwama sa tše ba bexo ba di fiwa.”

Ka gona ke mo go kwalago gore lehodu Judase le ile la thoma go belaela ka gobane le be le tla ba le mo gontši mo le ka go utswago ge e ba oli ya theko ya godimo e be e ka rekwa gomme tšhelete ya tsenywa lepokising la tšhelete leo a bego a le swere. Ge Judase a rotošitše pelaelo ye, baapostola ba bangwe ba swanetše go ba ba ile ba bolela mantšu a dumelelanago le seo se bego se bonagala e le ntlha e kwalago. Lega go le bjalo, Judase e be e le mohlohleletši yo mogolo wa pelaelo.