Go Dira Dilo ka Moka tše Mpsha—Bjalo ka ge go Boletšwe e sa le Pele

“E a dutšexo sedulong sa boxoši a re: Šidio; dilô tšohle ke di dira tše mphsa.​—. . . A re: Ngwala, xobane ’taba tšé ké tša xo rereša le xo bôtêxa.”​—KUTOLLO 21:5.

1, 2. Ke ka baka la’ng batho ba bantši ka mo go swanetšego ba dika-dika go nagana ka seo bokamoso bo tla se tlišago?

NA O kile wa bolela goba wa nagana gore, ‘Ke mang yo a tsebago gore la gosasa le tla hlaba le eng?’ O ka kgona go kwešiša lebaka leo ka lona batho ba dika-dikago go phopholetša seo bokamoso bo tla se tlišago goba go holofela bao ba ka ipolelago gore ba kgona go bolela e sa le pele seo se lego ka pele. Batho ba tloga ba sa kgone go bolela e sa le pele ka go nepa seo se tlago go direga dikgweding goba nywageng e lego ka pele.

² Makasine wa Forbes ASAP o ile wa gafela taba ye nakong. Ka go wona mogaši wa dipontšho tše di hlatsetšwego tša TV, Robert Cringely o ngwadile gore: “Mafelelong nako e a re kokobetša ka moka ga rena, eupša ga go na motho yo a tlaišegago kudu ge nako e dutše e feta go phala didupe. Go phopholetša bokamoso ke papadi yeo re fenywago go yona mo e nyakago e le ka mehla. . . . Lega go le bjalo, bao go thwego ke ditsebi ba tšwela pele go bolelela pele.”

3, 4. (a) Ba bangwe ba na le kholofelo efe ka ngwaga-kete o mofsa? (b) Ke tebelelo efe ya kgonthe yeo ba bangwe ba nago le yona ka bokamoso?

³ Mo gongwe o ka ba o lemogile gore ka baka la tlhokomelo e kgolo gakaakaa yeo e lebišwago go ngwaga-kete o mofsa, go ka bonagala eka batho  ba bantši kudu ba nagana ka bokamoso. Mathomong a ngwagola, makasine wa Maclean’s o itše: “Ngwaga wa 2000 mo gongwe e ka no ba feela ngwaga o mongwe almanakeng go ma-Canada a mantši, eupša go ka direga gore o welane le mathomo a mafsa e le ka kgonthe.” Moprofesara Chris Dewdney wa Yunibesithi ya York o neile lebaka le bakeng sa go ba le kholofelo: “Ngwaga-kete o bolela gore re ka ntšha ka hlogo ngwaga-kgolong o boifišago e le ka kgonthe.”

⁴ Na seo se kwagala e le feela lehutšo? Canada ke feela tekanyo ya 22 lekgolong ya batho bao go dirilwego nyakišišo go bona bao “ba dumelago gore ngwaga-kete wa 2000 o tla tliša mathomo a mafsa bakeng sa lefase.” Ge e le gabotse, mo e nyakago e le seripa-gare “se letetše kgohlano e nngwe ya lefase”​—ntwa ya lefase​—lebakeng la nywaga e 50. Ka mo go kwagalago, ba bantši ba dumela gore ngwaga-kete o mofsa o ka se fediše mathata a rena le go dira gore dilo ka moka e be tše mpsha. Morena Michael Atiyah, yo e kilego ya ba mopresidente wa Royal Society ya Brithania o ngwadile gore: “Phetogo e diregago ka lebelo . . . e bontšha gore ngwaga-kgolo wa masome-pedi-tee o tla tliša ditlhohlo tše bohlokwa tlhabologong yohle ya rena. Mathata a kgolo ya thari, go hlaelela ga matlotlo, tšhilafatšo ya tikologo le go ata ga bodiidi a šetše a le gare a re tlaiša gomme go swanetšwe go swaraganwa le ona e le ao a nyakago go akgofelwa.”

5. Re ka hwetša kae tsebišo e ka botwago mabapi le seo se letšego ka pele?

⁵ Mo gongwe o ka ipotšiša gore, ‘Ka ge motho a sa kgone go bolela e sa le pele seo bokamoso bja rena bo se huperego, na ga se ra swanela go fo hlokomologa bokamoso?’ Karabo ke aowa! Ke therešo gore batho ba ka se kgone go bolela e sa le pele seo se lego ka pele ka go nepa, eupša ga se ra swanela go nagana gore ga go na yo a ka kgonago. Ka gona ke mang yo a ka kgonago, le gona ke ka baka la’ng re swanetše go ba le kholofelo ka bokamoso? O ka hwetša dikarabo tše di kgotsofatšago dipolelelong-pele tše nne tše lebanyago. Di begilwe ka pukung e hwetšagalago ka bophara le e balwago kudu, yeo gape e kwelwago thoko le go hlokomologwa kudu​—Beibele. Go sa šetšwe seo o se naganago ka Beibele, le gona go sa šetšwe kamoo o ka bago o tlwaelane gabotse le yona, o tla ikhola ka go hlahloba mangwalo a a mane a motheo. Ge e le gabotse a bolelela pele bokamoso bjo bo holofetšago kudu. Go feta moo, diporofeto tše tše nne tše bohlokwa di akaretša seo bokamoso bja gago le bja baratiwa ba gago bo ka bago sona.

6, 7. Jesaya o porofetile neng, gomme dipolelelo-pele tša gagwe di bile bjang le phethagatšo e makatšago?

⁶ Ya pele e hwetšwa go Jesaya kgaolo 65. Pele o e bala, naganišiša gabotse ka boemo​—gore taba ye e ngwadilwe neng le gore e be e šomana le boemo bofe. Jesaya moporofeta wa Modimo yo a ngwadilego mantšu a, o phetše lebaka la ka godimo ga ngwaga-kgolo pele mmušo wa Juda o fedišwa. Phedišo e tlile ge Jehofa a tloša tšhireletšo ya gagwe go ba-Juda ba sa botegego, a dumelela ba-Babele gore ba šwalalanye Jerusalema gomme ba iše batho bao ba dulago gona bothopša. Seo se diregile nywaga e fetago e lekgolo ka morago ga ge Jesaya a boletše ka yona e sa le pele.​—2 Koronika 36:15-21.

⁷ Ge e le mabapi le ditaba tša histori tša phethagatšo, gopola gore Jesaya ka tlhahlo ya Modimo o ile a bolela e sa le pele leina la Korese wa mo-Peresia yo a bego a se a belegwa, yo mafelelong a ilego a phekgola Babele. (Jesaya 45:1) Korese o ile a thea motheo bakeng sa go boela ga ba-Juda nageng ya gabo bona ka 537 B.C.E. Ka mo go tlabago, Jesaya o ile a bolela e sa le pele ka tsošološo yeo, bjalo ka ge re ka bala go kgaolo 65. O ile a lebiša tlhokomelo boemong bjo ba-Isiraele ba bego ba tla bo thabela ge ba boetše nageng ya gabo bona.

8. Jesaya o ile a bolela e sa le pele ka bokamoso bofe bjo bo thabišago, gomme ke polelo efe yeo e kgahlišago ka mo go kgethegilego?

⁸ Re bala go Jesaya 65:17-19 gore: “Le tsebê xore ke tlo hlôla maxodimo a mafsa le lefase le lefsa; tša kxalê di ka se hlwê di tsebywa, le mo pelong ya motho di ka se hlwê di rotoxa. ’Me lena hlalalang Le fêlê Lè thabêla tše Nna ke tl’o xo di hlôla. Tsebang xe e le Nna Mohlodi wa Jerusalêma motse wa thlalalô, Mohlodi wa lethabô la sethšaba sa xôna. Motse wa Jerusalêma, le Nna ke tlo o thabêla, ka hlalalêla ’thšaba sa-ka; xo bôná xo ka se hlwê xo kwala dillô, le xe e le ’ntšu la motho a kwaxo bohloko.” Ka kgonthe Jesaya o ile a hlalosa maemo ao a bego a tla ba kaone kudu go feta ao ba-Juda ba bego ba phetše go ona kua Babele. O ile a bolela e sa le pele ka lethabo le go hlalala. Bjale ela hloko polelo “maxodimo a mafsa le lefase le lefsa.” Le ke lekga la pele go makga a mane ao ka  ona polelwana yeo e tšwelelago ka ona ka Beibeleng, gomme ditemana tše tše nne di ka kgoma bokamoso bja rena ka go lebanya, gaešita le go bolela ka bjona e sa le pele.

9. Ba-Juda ba bogologolo ba be ba akaretšwa bjang phethagatšong ya Jesaya 65:17-19?

⁹ Phethagatšo ya mathomo ya Jesaya 65:17-19 e ile ya akaretša ba-Juda ba bogologolo bao bjalo ka ge Jesaya a boletše ka go nepa e sa le pele, ba ilego ba boela nageng ya gabo bona moo ba ilego ba tsošološa borapedi bjo bo sekilego. (Esera 1:1-4; 3:1-4) Go ba gona, o lemoga gore ba ile ba boela nageng ya gabo bona polaneteng e swanago, e sego lefelong le lengwe legohleng. Go lemoga seo go ka re thuša go kwešiša seo Jesaya a bego a se bolela ka magodimo a mafsa le lefase le lefsa. Ga go nyakege gore re phopholetše, bjalo ka ge ba bangwe ba dira, mabapi le diporofeto tše sa kwagalego tša Nostradamus goba tša batho ba bangwe ba didupe. Beibele ka boyona e a hlalosa seo se bego se bolelwa ke Jesaya.

10. Re swanetše go kwešiša bjang “lefase” le lefsa leo Jesaya a boletšego ka lona e sa le pele?

¹⁰ Ka Beibeleng, “lefase” ga se ka mehla le šupago nkgokolo ya rena. Ka mohlala, Psalme 96:1 ka go lebanya e re: “Hlabêlang Morêna sefela se sefsa, lena mafase ohle!” Re a tseba gore polanete ya rena​—naga e omilego le mawatle a magolo​—ga e kgone go opela. Batho ba a opela. Ee, Psalme 96:1 e šupa go batho ba lego lefaseng. * Eupša Jesaya 65:17 e bolela gape le ka “maxodimo a mafsa.” Ge e ba “lefase” le emela lekoko le lefsa la batho nageng ya ba-Juda, gona “maxodimo a mafsa” ke eng?

11. Polelwana “maxodimo a mafsa” e be e šupa go eng?

¹¹ Cyclopedia of Biblical, Theological, and Ecclesiastical Literature ya McClintock le Strong e re: “Neng le neng ge go bolelwa ka boemo bja pono ya boporofeta, legodimo le swantšhetša . . . lekgotla ka moka la matla a bušago . . . ao a lego ka godimo le ao a bušago balata, bjalo ka ge legodimo la tlhago le le ka godimo gomme le buša lefase.” Mabapi le go kopanywa ga polelwana “lexodimo le lefase,” Cyclopedia e hlalosa gore ‘ka polelo ya boporofeta polelwana e šupa boemo bja dipolitiki bja batho ba maemo a sa swanego. Legodimo ke bogoši; lefase ke balata, batho bao ba bušwago ke bao ba phagamego.’

12. Ba-Juda ba bogologolo ba ile ba bona bjang “maxodimo a mafsa le lefase le lefsa”?

¹² Ge ba-Juda ba boetše nageng ya gabo bona, ba ile ba hwetša seo mo gongwe se ka bitšwago tshepedišo e mpsha ya dilo. Go be go e-na le sehlopha se sefsa se bušago. Serubabele, setlogolo sa Kgoši Dafida, e be e le mmušiši, gomme Jošua e  be e le moperisita yo mogolo. (Hagai 1:1, 12; 2:21; Sakaria 6:11) Ba ba ile ba bopa “maxodimo a mafsa.” Godimo ga eng? “Maxodimo a mafsa” a be a ukametše “lefase le lefsa,” e lego lekoko le hlwekišitšwego la batho bao ba bego ba boetše nageng ya gabo bona e le gore ba tle ba tsošološe Jerusalema le tempele ya yona bakeng sa go rapela Jehofa. Ka gona, ka yona kgopolo ye ya kgonthe, go be go e-na le magodimo a mafsa le lefase le lefsa phethagatšong ye e bego e akaretša ba-Juda nakong yeo.

13, 14. (a) Ke boemo bofe bjo bongwe bja polelwana “maxodimo a mafsa le lefase le lefsa” bjoo re swanetšego go bo ela hloko? (b) Ke ka baka la’ng boporofeta bja Petro e le bjo bo kgahlišago ka mo go kgethegilego nakong ye?

¹³ Ela hloko gore o se ke wa lahlegelwa ke ntlha. Se ga se go leka go hlatholla Beibele goba go fo lahlela mahlo historing ya kgale. O ka bona se ka go fetela moo polelwana “maxodimo a mafsa le lefase le lefsa” e tšwelelago gona gape. Go 2 Petro kgaolo 3, o tla hwetša go tšwelela mo, gomme wa bona gore bokamoso bja rena bo a akaretšwa.

¹⁴ Moapostola Petro o ngwadile lengwalo la gagwe lebakeng la nywaga e fetago e 500 ka morago ga ge ba-Juda ba boetše nageng ya gabo bona. Ka ge e be e le yo mongwe wa baapostola ba Jesu, Petro o be a ngwalela balatedi ba Kriste, e lego “Morêna” yo a boletšwego go 2 Petro 3:2. Go temana 4, (NW) Petro o bolela ka “go ba gona mo go holofeditšwego” ga Jesu, e lego seo se dirago gore boporofeta e be bja maleba kudu lehono. Bohlatse bjo bo lekanego bo bontšha gore ga e sa le go tloga Ntweng ya I ya Lefase, Jesu o bile gona ka kgopolo ya go ba le matla a taolo e le Mmuši Mmušong wa Modimo wa legodimong. (Kutollo 6:1-8; 11:15, 18) Se se ba le tlhaloso e kgethegilego ka baka la selo se sengwe seo Petro a se boletšego e sa le pele kgaolong ye.

15. Boporofeta bja Petro mabapi le “maxodimo a mafsa” bo phethagatšwa bjang?

¹⁵ Re bala go 2 Petro 3:13 gore: “Se re se letetšexo ka xo kwa dikholofedišô tša xaxwe ké maxodimo a mafsa le lefase le lefsa, moo xo axilexo tokô.” Mo gongwe o ka ba o šetše o ithutile gore Jesu yo a lego legodimong, ke Mmuši yo mogolo ‘magodimong a mafsa.’ (Luka 1:32, 33) Lega go le bjalo, ditemana tše dingwe tša Beibele di bontšha gore ga a buše a nnoši. Jesu o holofeditše gore baapostola le ba bangwe ba swanago le bona ba tla ba le sebaka legodimong. Ka pukung ya Ba-Hebere, moapostola Paulo o hlalositše ba bjalo e le ‘ba ba nago le kabelo pitšong ya legodimo.’ Gape Jesu o boletše gore bao ba sehlopha se ba tla dula ditulong tša bogoši legodimong gotee le yena. (Ba-Hebere 3:1; Mateo 19:28; Luka 22:28-30; Johane 14:2, 3) Ntlha ke gore ba bangwe ba buša le Jesu legodimong e le karolo ya magodimo a mafsa. Ka gona Petro o be a bolela eng ka polelwana “lefase le lefsa”?

16. “Lefase le lefsa” leo le šetšego le le gona ke lefe?

¹⁶ Go etša phethagatšong ya bogologolo​—go boela ga ba-Juda nageng ya gabo bona​—phethagatšo ya gona bjale ya 2 Petro 3:13 e akaretša batho bao ba ikokobeletšago pušo ya magodimo a mafsa. O ka hwetša ba dimilione bao lehono ba ikokobeletšago pušo e bjalo ka lethabo. Ba holwa ke lenaneo la yona la thuto e bile ba katanela go latela melao ya yona e hwetšwago ka Beibeleng. (Jesaya 54:13) Ba ba bopa motheo wa “lefase le lefsa” ka kgopolo ya gore ba bopa lekoko la lefase ka moka la ditšhaba, maleme le merafo ka moka gomme ba šoma gotee ka go ikokobeletša Kgoši e bušago, Jesu Kriste. Therešo e bohlokwa ke ya gore o ka ba karolo ya se!​—Mika 4:1-4.

17, 18. Ke ka baka la’ng mantšu a lego go 2 Petro 3:13 a re nea lebaka la go lebelela bokamosong?

¹⁷ O se ke wa nagana gore se ke bofelo bja ditaba le gore ga re kgone go ba le temogo mabapi le ditaba ka botlalo tša nakong e tlago. Ge e le gabotse, ge o dutše o hlahloba moko wa 2 Petro kgaolo 3, o tla bona ditšhupo tša phetogo e kgolo e lego ka pele. Go ditemana 5 le 6, Petro o ngwala mabapi le Meetse-fula a mehleng ya Noage, Meetse-fula ao a ilego a fediša lefase le kgopo morago nakong yeo. Go temana 7, Petro o bolela gore “maxodimo a mehla yeno le lefase la mehla yeno,” e lego mebušo gotee le mašaba-šaba a batho, di boloketšwe “letšatši la kahlolô la xo tlo lôba xa batho ba banyatši.” Se se kgonthišetša gore polelwana “maxodimo a mehla yeno le lefase la mehla yeno” ga e šupe legohle la kgonthe, eupša e šupa batho le dipušo tša bona.

¹⁸ Petro o hlalosa ka morago gore letšatši le le tlago la Jehofa le tla tliša tlhwekišo e kgolo, la bula tsela bakeng sa magodimo a mafsa le lefase le lefsa tše di boletšwego temaneng ya 13. Hlokomela mafelelo a temana yeo​—“moo xo axilexo tokô.” Na  seo ga se bolele gore diphetogo tše dingwe tše dikgolo tše kaone di swanetše go direga? Na ga se rotoše tebelelo ya dilo tše mpsha e le ka kgonthe, e lego nako yeo ka yona batho ba tla thabelago bophelo kudu go phala kamoo ba dirago ka gona lehono? Ge e ba o kgona go bona seo, gona o hweditše temogo go seo Beibele e se bolelago e sa le pele, temogo yeo e lego ba sego kae feela bao ba nago le yona.

19. Puku ya Kutollo e šupa “maxodimo a mafsa le lefase le lefsa” tšeo di sa tlago di le boemong bofe?

¹⁹ Eupša anke re nabeng go se nene. Re hlahlobile lekga la pele moo polelwana “maxodimo a mafsa le lefase le lefsa” e tšwelelago gona go Jesaya kgaolo 65 le lekga le lengwe go 2 Petro kgaolo 3. Bjale phetla go Kutollo kgaolo 21, yeo e lego lekga le lengwe moo polelo ye e tšwelelago ka Beibeleng. Mo le gona, go kwešiša boemo go tla thuša. Dikgaolong tše pedi tša pele ga mo, go Kutollo kgaolo 19, re hwetša ntwa e hlaloswago ka tshwantšhetšo e kwalago​—eupša e sego ntwa magareng ga ditšhaba tšeo e lego manaba. Ka lehlakoreng le lengwe la ntwa ye ke “Lentšu la Modimo.” Mo gongwe o lemoga seo e le sereto seo se šupago Jesu Kriste. (Johane 1:1, 14) O legodimong, gomme pono ye e mmontšha a e-na le madira a gagwe a legodimong. Ba lwa le mang? Kgaolo e bolela ka “maxoši,” “matona” le batho ba maemo a fapa-fapanego, ‘ba banyenyane le ba bagolo.’ Ntwa ye e mabapi le letšatši le le tlago la Jehofa, phedišo ya bokgopo. (2 Ba-Thesalonika 1:6-10) Ge re tšwela pele, Kutollo kgaolo 20 e thoma ka go hlalosa go tlošwa ga “Nôxa yela ya mehleng, e lexo yêna Diabolo le Sathane.” Se se re bea boemong bja gore re lebiše tlhokomelo go Kutollo kgaolo 21.

20. Kutollo 21:1 e bontšha gore ke phetogo efe e bohlokwa yeo e letšego ka pele?

²⁰ Moapostola Johane o thoma ka mantšu a kgahlišago a rego: “Ka bôna lexodimo le lefsa, le lefase le lefsa. Xobane lexodimo la pele le be le tloxile, le lôna lefase la pele. Le lewatlê xa le sa le xôna.” Re ithekgile ka seo re se bonego go Jesaya kgaolo 65 le 2 Petro kgaolo 3, re ka kgodišega gore se ga se bolele go tšea sebaka sa magodimo a kgonthe le polanete ya rena gotee le mawatle a yona. Bjalo ka ge dikgaolo tše di fetilego di bontšhitše, batho ba kgopo le dipušo tša bona go akaretša le mmuši yo a sa bonagalego e lego Sathane, ba tla fedišwa. Ee, se se holofetšwago mo ke tshepedišo e mpsha ya dilo yeo e akaretšago batho lefaseng.

21, 22. Johane o re kgonthišetša ka ditšhegofatšo dife, gomme go phumolwa ga megokgo go bolela’ng?

²¹ Re kgonthišetšwa ka se ge re tšwela pele boporofeteng bjo bjo bo kgahlišago. Temana 3 e feleletša ka go bolela ka nako ya ge Modimo a tla be a e-na le batho, a lebiša tlhokomelo ya gagwe e botho bathong bao ba dirago thato ya gagwe. (Hesekiele 43:7) Johane o tšwela pele go ditemana 4, 5 ka gore: “’Me Yêna [Jehofa] ó tlo phumola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile. E a dutšexo sedulong sa boxoši a re: Šidio; dilô tšohle ke di dira tše mphsa.​—Nna a ntaêla a re: Ngwala, xobane ’taba tšé ké tša xo rereša le xo bôtêxa.” A boporofeta bjo bo kgothatšago gakaakang!

²² Ema go se nene o thabele seo Beibele e se bolelago e sa le pele mo. ‘Modimo o tla phumola megokgo ka moka mahlong a bona.’ Seo se ka se šupe go megokgo ya tlhago yeo e hlatswago mahlo a rena a kwago bohloko, e bile se ka se šupe go megokgo ya lethabo. Aowa, megokgo yeo Modimo a tlago go e phumola ke megokgo e bakwago ke tlaišego, manyami le bohloko. Re ka kgodišega bjang? Ee, kholofetšo ye ye e kgahlišago ya Modimo e tswalanya go phumolwa ga megokgo le ‘go se sa ba gona ga lehu, go lla le bohloko.’​—Johane 11:35.

23. Boporofeta bja Johane bo kgonthišetša go fedišwa ga maemo afe?

²³ Na se ga se hlatsele gore kankere, bolwetši bja  go hwa lehlakore le bolwetši bja pelo gaešita le lehu di tla be di fedišitšwe? Ke mang wa rena yo a sa kago a lahlegelwa ke motho yo a mo ratago ka baka la bolwetši goba kotsi goba kotsi ya tlhago? Modimo mo o holofetša gore lehu le ka se hlwe le e-ba gona, e lego se se bolelago gore bana bao mo gongwe ba tla belegwago nakong yeo ba ka se phele ba e-na le tebelelo ya go gola, gomme ka morago ba tšofala​—ba feleletša ka lehu. Boporofeta bjo gape bo bolela gore go ka se sa ba le bolwetši bja Alzheimer, bolwetši bja marapo, go ruruga ga ditlhalenama, bolwetši bja mahlo bjo bo bakago bofofu, goba gaešita le mara a mahlo​—malwetši ao a tlwaelegilego kudu botšofading.

24. ‘Legodimo le lefsa le lefase le lefsa’ di tla ipontšha bjang e le tšhegofatšo, gomme ke eng seo re sa tlago go se ahla-ahla?

²⁴ Ga go pelaelo gore o tla dumela gore go nyama le go lla go tla fokotšega ge go tlošitšwe lehu, botšofadi le bolwetši. Lega go le bjalo, go thwe’ng ka bodiidi bjo bo gwahlafatšago, go gobošwa ga bana le kgethollo e gatelelago ka baka la setlogo goba mmala wa letlalo? Ge feela dilo tše bjalo​—tše tlwaelegilego kudu lehono​—di dutše di tšwela pele, re ka se tlogele go nyama le go lla. Ka go rialo, bophelo ka tlase ga “maxodimo a mafsa le lefase le lefsa” bo ka se senywe ke dibaki tše tša gona bjale tša manyami. A phetogo e kgolo gakaakang! Lega go le bjalo, go fihla ga bjale re hlahlobile makga a mararo go a mane ao go wona polelwana “maxodimo a mafsa le lefase le lefsa” e tšwelelago go wona ka Beibeleng. Go na le le lengwe gape leo le kgokaganago le seo re se hlahlobilego le leo le bontšhago lebaka leo ka lona re nago le lebaka la go lebelela pele nakong yeo ka yona le mokgweng woo ka wona Modimo a tlago go phethagatša kholofetšo ya gagwe ya ‘go dira dilo ka moka tše difsa.’ Sehlogo se se latelago se ahla-ahla boporofeta bjoo le seo bo ka se bolelago bakeng sa lethabo la rena.

[Mengwalo ya ka tlase]

O Gopola’ng?

• Makga a mararo ao go wona Beibele e bolelago e sa le pele ka “maxodimo a mafsa le lefase le lefsa” ke afe?

• Ba-Juda ba bogologolo ba ile ba akaretšwa bjang phethagatšong ya “maxodimo a mafsa le lefase le lefsa”?

• Ke diphethagatšo dife tšeo di kwešišwago ka “maxodimo a mafsa le lefase le lefsa” bjalo ka ge Petro a boletše?

• Kutollo kgaolo 21 e re šupa bjang bokamosong bofe bjo bo tagilego?

[Dipotšišo tša Thuto]

[Seswantšho go letlakala 10]

Go fo etša ge Jehofa a be a boletše e sa le pele, Korese o ile a thea motheo bakeng sa go boela ga ba-Juda nageng ya gabo bona ka 537 B.C.E.