Na o Iponatša Gabotse go ba Bangwe?

‘Ga ke na taba le gore ba bangwe ba nagana eng ka nna!’ Mohlomongwe o ile wa ikhwetša o bolela bjalo ka sebete nakong ya ge o galefile goba o ferekane. Eupša ge maikwelo ao a go ba sebete a šetše a kokobetše, o ka ikwa o e-na le maikwelo a go tshwenyega kudu. Ka baka la’ng? Ka gobane bontši bja rena re tloga re tshwenyega ka seo ba bangwe ba se naganago ka rena.

KA KGONTHE, re swanetše go ba le taba ka maikwelo a ba bangwe. Kudu-kudu rena Bakriste, badiredi ba ineetšego ba Jehofa Modimo, re swanetše go kgomega ka mo go swanetšego mabapi le kamoo ba bangwe ba re lebelelago ka gona. Go ba gona, re “seboxêlô sa lefase.” (1 Ba-Korinthe 4:9) Go 2 Ba-Korinthe 6:3, 4, (PK) re hwetša keletšo ya moapostola Paulo e kwalago e rego: “Re rialo ba re sa neego motho kgopišo ka se sengwe, gore bodiredi bja rena bo se ke bja ba le bosodi, eupša dilong ka moka re iponatša go ba re bahlanka ba Modimo.”

Ka gona, go iponatša gabotse go ba bangwe go bolela’ng? Na go bolela go ikgodiša goba go gogela tlhokomelo e sa nyakegego go rena gotee le bokgoning bja rena? Aowa. Eupša go nyaka gore re diriše mantšu a 1 Petro 2:12: “Tsela ye Le tšeaxo ka yôna Lè le xare xa ba-ntlê, a e bê e botse, xore . . . ba bônê medirô e botse ya lena ’me ba rêtê Modimo.” Bakriste ba iponatša gabotse ka go dira gore boitshwaro bja bona bo ipolelele! Mafelelong, se se tlišetša Modimo theto, e sego rena. Lega go le bjalo, go iponatša ga rena gabotse go ba bangwe gape go ka ba le mehola ya motho ka noši. Anke re hlahlobeng mafelo a mararo ao se se ka ipontšhago e le sa therešo go wena.

O le yo a Tlago go ba Molekane wa Lenyalo

Ka mohlala, tšea taba ya lenyalo. Ke mpho e tšwago go Jehofa Modimo, yena “yo lapa le lengwe le le lengwe le le lego legodimong le  lefaseng le bitšwago ka yena.” (Ba-Efeso 3:15, NW) Mohlomongwe o na le kganyogo ya go tsena lenyalong ka letšatši le lengwe. Ge e ba go le bjalo, gona o iponatša gabotse gakaaka’ng o le yo a tlago go ba molekane wa lenyalo? Ee, o itiretše botumo bja mohuta mang o le monna goba mosadi wa Mokriste yo a sego lenyalong?

Dinageng tše dingwe malapa a tshwenyega kudu ka taba ye. Ka mohlala, kua Ghana, ge batho ba babedi ba rata go nyalana, setšo sa gona ke gore bao e tlago go ba banyalani ba tsebiše batswadi ba bona. Ka morago, batswadi ba tsebiša ditho tše dingwe tša lapa. Ka morago lapa la gabo monna le thoma go nyakišiša ka botumo bja mosadi tikologong ya gabo. Ge batswadi ba kgodišegile ka go swanelega ga mosadi, ba tla botša lapa labo mosadi ka maikemišetšo a morwa wa bona a go nyaka go nyala morwedi wa bona. Bjale lapa la gabo mosadi le nyakišiša ka botumo bja monna pele le ka dumelelana ka tša lenyalo. Ka gona polelo ya se-Ghana e re, “Botšiša bao ba swanetšego go ba ba tseba pele o ka tsena lenyalong.”

Go thwe’ng ka dinaga tša ka Bodikela, moo batho ka tlwaelo ba dumeletšwego go ka ikgethela balekane ba bona ba lenyalo? Le gona moo, monna goba mosadi wa Mokriste yo a budulego a ka dira ka bohlale gore a tsome keletšo ya potego go bao ba tsebago gabotse yoo a tlago go ba molekane wa gagwe, bjalo ka batswadi goba bagwera ba ba gotšego tsebong. Go ya ka puku ya Sephiri sa Lethabo la Lapa, kgarebe mo gongwe e ka botšiša gore: “‘Monna yo o na le botumo bja mohuta ofe? Bagwera ba gagwe ke bomang? Na o bontšha boitshwaro? O swara batšofadi bjang? O tšwa lapeng la mohuta ofe? O phedišana bjang le bona? Boemo bja gagwe bja kgopolo ka tšhelete ke bofe? Na o diriša dino-tagi gampe? Na ke yo a fela-felago pelo, gaešita le go ba yo šoro? Ke boikarabelo bofe bja phuthego bjo a nago le bjona, gomme o bo swara bjang? Na nka mo hlompha ka mo go tseneletšego?’​—Lefitiko 19:32; Diema 22:29; 31:23; Ba-Efeso 5:3-5, 33; 1 Timotheo 5:8; 6:10; Tito 2:6, 7.” *

Monna le yena ka mo go swanago a ka rata go botšiša mabapi le mosadi le ge e le ofe wa Mokriste yo a naganago go mo nyala. Go ya ka Beibele, Boase o ile a bontšha kgahlego e bjalo go Ruthe, mosadi yo ka morago a ilego a mo nyala. Ge Ruthe a be a botšiša gore: “Botho byó mahlong a xaxo ke bo hwetša ka ’baka la’ng? Etšwe kè le motho wa mohuta o šele!” Boase o itše: “Tše O di dirilexo . . . ba ntsebišitše xa-botse tšohle.” (Ruthe 2:10-12) Ee, ga se feela gore Boase o ile a iponela ka boyena gore Ruthe e be e le mosadi yo a botegago ka go se kwanantšhe, yo a ineetšego le wa seroto, eupša o ile a ba a hwetša le ditlhaloso tše di kgahlišago tše di tšwago go ba bangwe.

Ka mo go swanago, boitshwaro bja gago bo tla kgoma taba ya ge e ba ba bangwe ba go lebelela o le yo a ka swanelegelago go ka ba molekane wa lenyalo. O iponatša gabotse bjang go ba bangwe tabeng ye?

O le Mošomi

Lefelo la mošomo ke lefelo le lengwe leo go kgomarela boitshwaro bjo bobotse go ka go holago. Go phenkgišana ka mešomo go ka ipha matla. Bašomi bao ba tsebjago ka go se kwe, go latelwa  ka mehla le go se botege gantši ba rakwa mešomong. Dikhamphani le tšona di ka kgaotša go thwala bašomi bao ba nago le phihlelo e le gore di ka fokotša ditshenyagalelo. Ge bao ba se nago mešomo ba nyaka mešomo e mefsa, mo gongwe ba ka hwetša gore dikhamphani di tla boledišana le bao e kilego ya ba bathwadi ba bona ba pele bakeng sa go nyakišiša ka mekgwa ya bona ya go šoma, boemo bja kgopolo le phihlelo yeo ba nago le yona. Bakriste ba bantši ba ile ba iponatša gabotse ka katlego go bathwadi ba bona ka boitshwaro bja bona bjo bo hlomphago, go apara gabotse, seemo sa lethabo le dika tše di kgethegilego tša Bokriste.

Potego ke seka se se bjalo​—seo bathwadi ba bantši ba se elago hloko kudu. Ka go swana le moapostola Paulo, re nyaka “xo ya ka tsela e botse dilong tšohle.” (Ba-Hebere 13:18) Khamphaning e nngwe ya meepo kua Ghana, go ile gwa begwa go utswiwa ga dilo leboelela. Molaodi wa lefelong la go hlwekiša, yo e lego Hlatse, o ile a dula mošomong wa gagwe mola ba bangwe ba ile ba rakwa. Ka baka la’ng? Balaodi ba ile ba bona potego ya gagwe ka nywaga e mentši. Go šoma ga gagwe ka thata le tlhompho yeo a bego a hlompha bolaodi ka yona le tšona di be di tsebja gabotse. Ee, boitshwaro bja gagwe bjo bo tsepamego bo ile bja šireletša mošomo wa gagwe!

Ke dilo dife tše dingwe tšeo Mokriste a ka di dirago bakeng sa go iponatša gabotse mafelong a mošomo? Ithute go ba le bokgoni mošomong le ge e le ofe woo o newago. (Diema 22:29) Šoma ka mafolofolo le ka potego. (Diema 10:4; 13:4) Swara mothwadi wa gago le molaodi wa gago ka tlhompho. (Ba-Efeso 6:5) Go boloka nako, potego, bokgoni le go šoma ka thata ke dika tšeo bathwadi ba di tšeelago godimo, gomme dika tšeo di ka go thuša gore o hwetše mošomo gaešita le nakong ya ge mešomo e hlaelela.

Ditokelo tša ka Phuthegong

Mo nakong ye go feta le ge e le neng pele, go nyakega banna bao ba gotšego tsebong bakeng sa go etelela phuthego ya Bokriste pele. Lebaka ke lefe? Jesaya o porofetile ka gore: “Katološa madulo a tente ya gago, o phurolle mašela a boago bja gago.” (Jesaya 54:2, PK) Phethagatšong ya boporofeta bjo, phuthego ya Jehofa ya lefase ka bophara e tšwela pele e gola.

Ka gona ge e ba o le monna wa Mokriste, o ka iponatša bjang gabotse o le yo a swanelegelago go ka hlankela maemong a go kgethelwa? Ela hloko mohlala wa lesogana Timotheo. Luka o bega gore Timotheo o ile a ‘fiwa bohlatse bjo bobotse ke bana b’abo ba tumelo ba Lisitara le ba Ikonio.’ Ee, ka boitshwaro bja lona bjo bobotse, lesogana le le ile la iponatša gabotse go ba bangwe metseng e mebedi e sa swanego. Ka baka leo Paulo o ile a laletša Timotheo gore a sepele le yena bodireding bja bosepedi.​—Ditiro 16:1-4, bapiša le PK.

Na lehono monna a ka ‘katanela bjang modiro wa bolebeledi’ ka tsela e nepagetšego le ya go boifa Modimo? Ruri ga se ka go tšwa lesolo la go nyaka go kgethwa eupša ke ka go hlagolela dika tša moya bakeng sa boikarabelo bjo bo bjalo. (1 Timotheo 3:1-10, 12, 13, bapiša le PK; Tito 1:5-9.) A ka bontšha gape gore o “duma modirô o botse” ka go ba le karolo ka mo go tletšego modirong wa go bolela le wa go dira barutiwa. (Mateo 24:14; 28:19, 20) Bao ba iponatšago gabotse e le banna ba nago le boikarabelo ba Bakriste ba bontšha kgahlego ya kgonthe katlegong ya banababo bona ba moya. Ba latela keletšo ya moapostola Paulo e rego: “Bakxêthwa xe ba hlôka Le ba kwêlê bohloko; xo sétša baeti e bê mokxwa wa lena.” (Ba-Roma 12:13) Ka go dira dilo tše bjalo, monna wa Mokriste a ka ‘iponatša gabotse e le mohlanka wa Modimo’ e le ka kgonthe.

Ka Dinako Tšohle

Go iponatša gabotse go ba bangwe ga go bolele gore re apara boikaketši goba go ba “ba-kxahla-batho.” (Ba-Efeso 6:6) Mafelelong, se se bolela go iponatša gabotse go Mmopi wa rena, Jehofa Modimo, ka go latela melao ya gagwe gotee le melao ya motheo ka kelohloko. Ge e ba o hlagolela boemo bja gago bja moya gomme o matlafatša tswalano ya gago le Jehofa Modimo, ba bangwe ba tla lemoga kaonefatšo tseleng yeo o dirišanago le ditho tša lapa la gago, bašomi-gotee le Bakriste-gotee. Gape ba tla lemoga go tsepama ga gago le teka-tekano ya gago, kahlolo ya gago e botse ditabeng, bokgoni bja gago bja go rwala boikarabelo le boikokobetšo bja gago. Se se tla dira gore ba go nee lerato la bona le tlhompho ya bona gape, sa bohlokwa kudu, se tla dira gore o amogelwe ke Jehofa Modimo ka baka la ge o iponatša gabotse go ba bangwe!

[Mengwalo ya ka tlase]

[Seswantšho go letlakala 19]

Batswadi ba bantši ba nyakišiša ka bohlale mabapi le botumo bja motho yoo morwa goba morwedi wa bona a kgahlegelago go nyalana le yena

[Seswantšho go letlakala 20]

Ngwanabo rena o iponatša gabotse e le yo a swanelegelago ditokelo tša tirelo ka go ba yo a naganelago ba bangwe