Na o Lebelela Batho ba Šoro go Etša Kamoo Modimo a ba Lebelelago ka Gona?

Batho go tloga kgale ba be ba dutše ba hlompha le go godiša banna ba dinatla, bao ba bontšhago matla a bona a mmele le go ba le sebete ga bona. yo mongwe wa ba bjalo e be e le mogale wa dinonwane wa Gerika ya bogolo-golo, Heracles goba Hercules bjalo ka ge a be a tsebega bjalo go Ba-roma.

 HERACLES e be e le mogale wa bagale wa botumo bjo bogolo, molwi yo matla kudu. Go ya ka nonwane, e be e le seka-modimo, ngwana wa modimo wa Gerika Zeus le Alcmene e lego mma yo e lego motho. Ditiro tša gagwe di thomile ge e be e sa le ngwana bjaneng bja gagwe. Ge modimogadi wa lehufa a be a romela dinoga tše pedi tše dikgolo gore di mmolaye, Heracles o ile a di kgama. Bophelong bja gagwe bja ka morago o ile a lwa dintweng, a fenya dibata tše di boifišago gomme a katana le lehu bakeng sa go phološa mogwera wa gagwe. O ile a ba a fediša le metse, a kata basadi, a lahlela mošemane ka ntle go tloga toreng gomme a bolaya mosadi wa gagwe le bana ba gagwe.

Gaešita le ge e se motho wa kgonthe, go tloga dinakong tša kgale Heracles wa nonwane o be a bontšhwa dikanegelong tša dinaga tša kgale tšeo di tsebjago ke ba-Gerika. Ba-Roma ba be ba mo rapela e le modimo; bagwebi le basepedi ba be ba mo rapela bakeng sa gore a ba nee katlego le go ba šireletša kotsing. Dikanegelo tšeo di bolelago ka ditiro tša gagwe di ile tša kgahliša batho ka nywaga e dikete.

Mathomo a Nonwane

Na dikanegelo tša Heracles le bagale ba bangwe ba dinonwane di theilwe therešong? Ka kgopolo e itšego, go ka ba go le bjalo. Beibele e bolela ka nako ya pele historing ya motho ge “medimo” le “dika-medimo” di ile tša sepela lefaseng ka kgonthe.

Ge a hlalosa mehla yeo Moše o ngwadile gore: “Ya re xe batho ba thôma xo ata lefaseng, bà belexetšwe barwedi, barwa ba Modimo ba bôna barwedi ba batho e le bôná ba babotse, ba tšea basadi mo xo bôná-bao bohle ba ba bexo ba ba kxahla.”​—Genesi 6:1, 2.

‘Barwa bao ba Modimo’ e be e se batho; e be e le barwa ba Modimo ba barongwa. (Bapiša le Jobo 1:6; 2:1; 38:4, 7.) Mongwadi wa Beibele Juda o bega gore barongwa ba bangwe ga se ba ka “ba lôtôla boxoši bya bôná ’me ba tloxa madulong a bôná.” (Juda 6) Ka mantšu a mangwe, ba ile ba tlogela madulo a bona ao ba a abetšwego mokgatlong wa Modimo wa legodimong ka gobane ba ile ba kgetha go dula le basadi ba babotse mo lefaseng. Juda o oketša ka gore barongwa ba ba marabele ba be ba swana le batho ba Sodoma le Gomora, bao ba ‘dirilego ka mokgwa wa batho bao ba otswa ya ba ba latela nama e šele.’​—Juda 7.

Beibele ga e nee ditaba ka mo go feletšego mabapi le ditiro tša barongwa ba ba sa kwego. Lega go le bjalo, dinonwane tša bogologolo tša Gerika le mafelong a mangwe di hlalosa ka medimo e mmalwa le medimogadi yeo e ilego ya tsena magareng ga batho, e ka ba e le ka mo go bonagalago goba ka mo go sa bonagalego. Ge ba be ba ikapeša mebele ya batho, ba be ba e-ba ba babotse kudu. Ba be ba e-ja, ba e-nwa, ba robala ba bile ba e-ba le dikopano tša botona le botshadi le seng sa bona gotee le batho. Le ge go thwe e be e le ba bakgethwa e bile ba sa hwe, ba be ba bolela maaka gomme ba fora, ba ngangišana le go lwa gomme ba goketša le go kata. Dipego tše bjalo tša dinonwane mo gongwe di ka bonagatša, gaešita le ge di le ka mokgwa o kgabišitšwego le o kgopamego, maemo a kgonthe a pele ga Meetse-fula a bolelwago ka Beibeleng pukung ya Genesi.

Dinatla tša Bogologolo, Banna ba Botumo

Barongwa bao ba sa kwego ba ba bego ba ikapešitše mebele ya nama ba ile ba ba le dikopano tša botona le botshadi le basadi, gomme basadi ba ba le bana. Ba e be e se bana bao ba tlwaelegilego. E be e le ba-Nefilimi, e le batho ka mo, ka mo e le barongwa. Pego ya Beibele e re: “Mehleng yeo mo lefaseng xo be xo na le ba ditšitširipa, ba ba xôna le mehleng ya moraxo; ka xobane barwa ba Modimo ba be ba tsêna xó barwedi ba batho, ba ba bêlêxêla bana. Bôná bao ké baxale bala ba boxolo-xolo, banna ba maina a a tumilexo.”​—Genesi 6:4.

Lentšu la Sehebere “nefilimi” ge e le gabotse le bolela “bagale” bao ba gatakelago ba bangwe goba bao ba wišago ba bangwe ka ditiro tša bošoro. Ka gona, ga se mo go makatšago gore pego ya Beibele e oketša ka gore: “Lefase lè [be le] tletše tša sehloxo.” (Genesi 6:11) Dika-medimo tša nonwane, tše bjalo ka Heracles le mogale wa Babele Gilgamesh, di swana le ba-Nefilimi e le ka kgonthe.

Ela hloko gore ba-Nefilimi ba be ba bitšwa “baxale” le “banna ba maina a a tumilexo.” Ka go se swane le monna wa moloki Noage, yo a phetšego nakong e swanago le bona, ba-Nefilimi ba be ba se na kgahlego ya go godiša botumo bja Jehofa. Ba be ba kgahlegela botumo bja bona, letago leina le lebotse. Ka ditiro tše matla tšeo ka ntle le pelaelo di bego di akaretša bošoro le tšhollo ya madi, ba ile ba ikhweletša botumo bjo ba bego ba bo kganyoga lefaseng le le sa boifego Modimo leo le ba dikologilego. E be e le bagale ba bagale ba mehleng ya bona​—ba boifša, ba hlompšha gomme go bonagala ba sa fenyege.

Le ge ba-Nefilimi le bo-tatago bona ba barongwa bao ba gobogilego ba ka ba ba ile ba thabela botumo bja bona mahlong a batho bao ba bego ba phela nakong ya bona, ruri ba be ba se ba tuma mahlong a Modimo. Tsela ya bona ya go phela e be e le e hlaswegago. Mafelelong, Modimo o ile a tšea mogato malebana le barongwa bao ba rakilwego. Moapostola Petro o ngwadile gore: “Le Barongwa ba ba kilexo ba senya, Modimo xa a ka a ba tsebafa; ó ba lahletše moleteng bà tlemilwe ka ditlêmô tša lefsifsi, a ba xafêla xo bolokêlwa thsêkô. Le lefase lela la kxalê xa a ka a le tsebafa, a phološa batho ba seswai ka Noaxe sexoeledi sa tokô mola lefase la banyatši à le ribexetša ka meetse-fula.”​—2 Petro 2:4, 5. 

Meetse-fuleng a lefase ka moka, barongwa ba marabele ba ile ba iphetola lebopo gomme ba boela lefelong la moya ka dihlong. Modimo o ile a ba otla ka go ba thibela gore ba se sa hlwa ba iphetola mebele ya nama gape. Ba-Nefilimi, bana ba ba phagametšego batho ba barongwa bao ba sa kwego, ka moka ba ile ba fedišwa. Ke Noage feela le lapa la gagwe le lenyenyane bao ba ilego ba phologa Meetse-fula.

Banna Bao ba Tumilego Lehono

Lehono, medimo le dika-medimo ga di sa sepela lefaseng. Lega go le bjalo, bošoro bo atile. Banna ba lehono bao ba tumilego ba tumišwa ka dipukung, dipaesekopong, thelebišeneng le mminong. Ba ka se tsoge ba naganne ka go sekegela motho lerama le lengwe, go rata manaba a bona, go tsoma khutšo goba go sepelela kgole le bošoro. (Mateo 5:39, 44; Ba-Roma 12:17; Ba-Efeso 4:32; 1 Petro 3:11) Go e na le moo, dinatla tša mehleng yeno di hlompšha ka baka la matla a tšona le ka bokgoni bja tšona bja go lwa, go itefeletša le go bušetša bošoro ka bošoro bjo bongwe bjo bo fetišago. *

 Pono ya Modimo ka batho ba bjalo ga se ya fetoga ga e sa le go tloga mehleng ya Noage. Jehofa ga a rate barati ba bošoro, e bile ga a tlošwe bodutu ke ditiro tša bona. Mopsalme o opetše ka gore: “Morêna ó šetša ba ba lokilexo le ba babe; xomme ó hloile ba ba rataxo bosenyi.”​—Psalme 11:5.

Mohuta o Fapanego wa Matla

Motho yo a bego a fapane ka mo go feletšego le dinatla tša bošoro ke motho yo a tumilego kudu yo a kilego a phela, Jesu Kriste, monna wa khutšo. Ge a be a le mo lefaseng, ga se a ka a “dira tša sehloxo.” (Jesaya 53:9) Ge manaba a gagwe a be a tlo mo golega serapeng sa Getsemane, balatedi ba gagwe ba be ba swere ditšhoša. (Luka 22:38, 47-51) Ba ka be ba ile ba bopa sehlopha sa ba-hlola-mpherefere seo se lwago bakeng sa go leka go thibela gore a se ke a gafelwa go ba-Juda.​—Johane 18:36.

Ge e le gabotse, moapostola Petro o ile a ntšha  tšhoša ya gagwe bakeng sa go lwela Jesu, eupša Jesu o itše go yena: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.” (Mateo 26:51, 52) Ee, bošoro bo tswala bošoro, bjalo ka ge histori ya motho e bontšhitše leboelela. Ka ntle le sebaka seo a bego a na le sona sa go iphemela ka dibetša, Jesu o be a na le tsela e nngwe ya go iphemela. Ka morago o ile a botša Petro gore: “A O re nka se kxône xo kxopêla Tate, a nthomêla Barongwa ba ba fetišaxo madirá a lesome le metšô e mebedi?”​—Mateo 26:53.

Go e na le go retologela ntweng goba tšhireletšong ya barongwa, Jesu o ile a itumelela gore a tlaišwe ke bao ba ilego ba mmolaya. Ka baka la’ng? Lebaka le lengwe e be e le gore o be a tseba gore e be e se ya hlwa e e-ba nako ya gore Tatagwe wa legodimong a fediše bobe lefaseng. Go e na le go itšeela ditaba matsogong, Jesu o ile a bota Jehofa.

Se e be e se pono ya bofokodi eupša e be e le ya matla a ka gare a magolo. Jesu o ile a bontšha tumelo e tiilego ya gore Jehofa o be a tla lokiša ditaba ka nako le ka tsela ya Gagwe. Ka baka la go kwa ga gagwe, Jesu o ile a bewa maemong a botumo ao a lego maemong a bobedi go tloga go Jehofa ka noši. Moapostola Paulo o ile a ngwala mabapi le Jesu gore: “A ikokobetša a ba e a kwaxo le xo iša lehung, lehung la [koteng ya tlhokofatšo, NW]. Ké ka ’baka leo Modimo a mo xodišitšexo xa-xolo, a mo sétša ka Leina le le fetaxo maina ohle, xore Leineng la Jesu xo khunamê matôlô ohle a ba lexo kwa lexodimong le mo lefaseng le ka tlase xa lefase; maleme ohle a dumêlê a re: Jesu Kriste ké Yêna Morêna, ’me ya tlo ba xo rêta Modimo Tat’axwe.”​—Ba-Filipi 2:8-11.

Kholofetšo ya Modimo ya go Fediša Bošoro

Bakriste ba therešo ba aga maphelo a bona go ya ka mohlala le dithuto tša Jesu. Ga ba dume goba go ekiša batho ba lefase bao ba tumilego le ba šoro. Ba a tseba gore ka nako ya Modimo e beilwego, batho ba bjalo ba tla fedišetšwa sa ruri, feela bjalo ka ge batho ba kgopo ba ile ba fedišwa mehleng ya Noage.

Modimo ke Mmopi wa lefase le wa batho. Gape ke Mmuši yo a swanetšego. (Kutollo 4:11) Ge e ba moahlodi yo e lego motho a e-na le matla a taolo a go ka dira diphetho tša kahlolo, Modimo o na le matla a magolo kudu a taolo a go ka dira bjalo. Tlhompho ya gagwe ya go hlompha melao ya gagwe ya motheo ya go loka, gotee le lerato la gagwe bakeng sa bao ba mo ratago di tla mo tutueletša gore a fediše bobe ka moka le bao ba bo dirago.​—Mateo 13:41, 42; Luka 17:26-30.

Se se tla lebiša khutšong ya ka mo go sa felego mo lefaseng, khutšo yeo e theilwego ka go tia tokeng le go lokeng. Se se ile sa bolelwa e sa le pele boporofeteng bjo bo tsebjago kudu mabapi le Jesu Kriste: “Xobane re tswaletšwe ngwana, re neilwe morwa, yo pušô e lexo lexetleng la xaxwe. Leina la xaxwe ké: Matete, Moeletši, Modimo yo matla, Tatê wa xo sa felexo, Kxoši ya kaxišô. Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe, ké wa xo tlo tia, le wa xo thêkxwa ka molaô le ka tokô byale le mehleng ya neng le neng. Tšeo di tlo dirwa ke xo pelofala xa Morêna wa mašaba.”​—Jesaya 9:5, 6. 

Ka gona, ka lebaka leo le kwagalago, Bakriste ba ela hloko keletšo e buduletšwego ya kgale-kgale e rego: “Wa mexabaru O se mo kxanyoxê; O se ithlaolêlê tsela xo tša xaxwe ’tsela. Xobane Morêna ó hlaswa sehlôla, ó kwana le baloki.”​—Diema 3:31, 32.

[Mengwalo ya ka tlase]

[Ntlhakgolo go letlakala 29]

DINATLA TŠA MEHLENG YENO DI HLOMPŠHA KA BAKA LA MATLA A TŠONA LE BOKGONI BJA TŠONA BJA GO BUŠETŠA BOŠORO KA BOŠORO BJO BONGWE BJO BO FETIŠAGO

[Mothopo wa Seswantšho go letlakala 26]

Alinari/Art Resource, NY