Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Ke eng seo se ilego sa dira gore go be bonolo gore Keresemose e amogelege Korea?

Go be go na le tumelo ya kgale kua Korea le dinageng tše dingwe mabapi le modimo wa ka khitšhing yo a bego a rutilwe go tsena ka tšhemele gomme a tliše dimpho ka December. Gape, ka morago ga Ntwa ya II ya Lefase mašole a United States a ile a aba dimpho le ditlabakelo dikerekeng tša lefelong leo.​—12/15, matlakala 4, 5. 

• Phethagatšong ya Jesaya 21:8, ke “mohlapetši” wa mohuta mang yo Modimo a bilego le yena mehleng ya rena?

Bakriste ba tloditšwego ka moya, bao ba hlankelago e le sehlopha sa mohlapetši, ba lemošitše batho ka seo se bolelwago ke ditiragalo tša lefase tšeo di phethagatšago boporofeta bja Beibele. Gape ba thušitše barutwana ba Beibele go hlaola le go phema dithuto le mekgwa yeo e sego ya Mangwalo.​—1/1, matlakala 8, 9. 

• “Barwarre ba Mapoliši” e be e le bomang?

E be e le sehlopha se senyenyane sa bodumedi lekgolong la bo-16 le la bo-17 la nywaga kua Poland seo se bego se kgothaletša go kgomarela Beibele gomme ka baka leo sa gana dithuto tše di apareditšego tša kereke, tše bjalo ka Boraro botee, go kolobetšwa ga masea le mollo wa dihele. Ge nako e dutše e e-ya, ba ile ba tlaišwa o šoro gomme ba gapeletšega gore ba phatlalalele dinageng tše dingwe.​—1/1, matlakala 21-3.

• Ke ka baka la’ng diporofeto tša Beibele di ka botwa go e na le go bota dipolelelo-pele tša baboleledi ba bokamoso goba balepi ba dinaledi?

Batho bao ba bego ba ipolela e le baporofeta ba itlhatsetše e le bao ba ka se kego ba botwa ka gobane ba hlokomologa Jehofa le Beibele. Ke diporofeto tša Beibele feela tšeo di ka go thušago go tseba kamoo ditiragalo tše di tsenago ka gona morerong wa Modimo, tša hola wena gotee le lapa la gago ka mo go sa felego.​—1/15, letlakala 3. 

• Mabaka a mangwe a bohlatse ao a bontšhago gore re phela mehleng ya bofelo ke afe?

Re bona mafelelo a go rakwa ga Sathane legodimong. (Kutollo 12:9) Re phela mehleng ya “kgoši” ya mafelelo yeo go bolelwago ka yona go Kutollo 17:9-11. Palo ya Bakriste ba tloditšwego ba kgonthe e a fokotšega, lega go le bjalo, le ge ba bangwe go bonagala eka ba tla be ba sa le gona mo lefaseng ge masetla-pelo a magolo a thoma.​—1/15, matlakala 12, 13.

• Puku ya Habakuku e ngwadilwe neng, gomme ke ka baka la’ng re swanetše go bontšha kgahlego go yona?

Puku ye ya Beibele e ngwadilwe mo e ka bago ka 628 B.C.E. E na le dikahlolo tša Jehofa malebana le Juda ya bogologolo le malebana le Babele. Gape e bolela ka kahlolo ya Modimo yeo kgaufsinyane e tla tlelago tshepedišo ya gona bjale e kgopo ya dilo.​—2/1, letlakala 8. 

• Ke kae ka Beibeleng moo re ka hwetšago keletšo e bohlale ya mma bakeng sa basadi ba dithakga?

Kgaolo ya mafelelo ya puku ya Diema, kgaolo 31, ke mothopo o mobotse wa keletšo e bjalo.​—2/1, matlakala 30, 31.

• Ke ka baka la’ng re ka leboga gore Jehofa o re utolletše “kelêlô ya Kriste”? (1 Ba-Korinthe 2:16)

Ka pego ya Ebangedi, Jehofa o dirile gore re kgone go ithuta ka dikgopolo tša Jesu, maikwelo a gagwe, mediro ya gagwe le dilo tšeo di bego di e-tla pele bophelong bja gagwe. Se se ka re thuša gore re swane le Jesu kudu, kudu-kudu tabeng ya kamoo re gatelelago modiro wa boboledi wa go phološa maphelo ka gona.​—2/15, letlakala 25.

• Na Modimo o araba dithapelo lehono?

Ee. Gaešita le ge Beibele e bontšha gore Modimo ga a arabe dithapelo ka moka, diphihlelo tša mehleng yeno di bontšha gore gantši o ile a araba batho bao ba bego ba rapelela khomotšo le thušo ditabeng tše bjalo ka tša go rarolla mathata a lenyalo.​—3/1, matlakala 3-7.

• Ke eng seo re ka se dirago bakeng sa go ithekga ka matla a Modimo?

Re ka a kgopela ka thapelo, ra ithekga ka Beibele bakeng sa go hwetša matla a moya, gomme ra matlafatšwa ke bogwera bja Bokriste.​—3/1, matlakala 15, 16.

• Batswadi ba ka thuša bjang bana ba bona go holega kudu dibokeng tša Bokriste?

Ba ka thuša bana ba bona gore ba dule ba phafogile, mohlomongwe ka go dira gore ba robale pele ga diboka. Bana ba ka kgothaletšwa go ngwala “dintlha,” bjalo ka go swaya letlakaleng nako le nako ge go dirišwa mantšu goba maina a tlwaelegilego.​—3/15, matlakala 17, 18.

• Ke dilo dife tše dingwe tšeo re ka ithutago tšona mohlaleng wa Jobo?

Jobo o be a etišitše tswalano ya gagwe le Modimo pele, o be a dirišana le magagabo ka toka, a katanela go botegela molekane wa gagwe wa lenyalo ka go se kwanantšhe, o be a bontšha go kgomega ka boemo bja moya bja lapa la gagwe gomme a kgotlelela ka potego ka tlase ga teko.​—3/15, matlakala 25-7.

• Na Beibele e na le maswao a utegilego ao a neago temogo melaetšeng e logeletšwego?

Aowa. Dipolelo mabapi le seo go thwego ke maswao a utegilego di ka dirwa ka mo go swanago mabapi le dipuku tše itšego tša lefase. Tšeo go thwego ke maswao a ka Beibeleng di tla bakelwa ke go fapa-fapana ga mongwalelo mengwalong ya seatla ya se-Hebere gore di se be le seo di se bolelago.​—4/1, matlakala 30, 31.