Na o tla ba Gona Lefaseng le Lefsa?

“Xa xo se se botse mo xo bôná, xe e se xo thaba le xo dira tše botse xe ba sa phela. Le xôna, ké neô ya Modimo, xe motho a e-ja, a e-nwa, ’me a bôna tše di botse ka ’tapišô tš’axwe tšohle.”​—MMOLEDI 3:12, 13.

1. Ke ka baka la’ng re ka ba le kholofelo ka bokamoso?

BATHO ba bantši ba nagana ka Modimo Ra-matla-ohle e le yo a tiišago letsogo kudu le yo bogale. Lega go le bjalo, temana e lego ka mo godimo ke therešo yeo o tla e hwetšago ka Lentšung la gagwe le le buduletšwego. E dumelelana le go ba ga gagwe “Modimo yo a thabilego” le go bea ga gagwe batswadi ba rena ba pele paradeiseng ya lefaseng. (1 Timotheo 1:11; Genesi 2:7-9) Ge re tsoma go ba le temogo bokamosong bjoo Modimo a bo holofetšago batho ba gagwe, ga se ra swanela go makatšwa ke go kwa ka maemo ao a tla re tlišetšago lethabo la ka mo go sa felego.

2. Ke dilo dife tše dingwe tšeo o lebeletšego pele go tšona?

² Sehlogong se se fetilego, re ile ra hlahloba a mararo go a mane a makga ao go ona Beibele e bolelago e sa le pele ka “maxodimo a mafsa le lefase le lefsa.” (Jesaya 65:17) E nngwe ya dipolelelo-pele tšeo di botegago e ngwadilwe go Kutollo 21:1. Ditemana tše di latelago di bolela ka nako yeo ka yona Modimo Ra-matla-ohle a tlago go fetošetša maemo a lefase bokaoneng ka tekanyo e kgolo. O tla phumola megokgo ya manyami. Batho ba ka se sa hwa ka baka la botšofadi, bolwetši goba dikotsi. Go lla le bohloko di tla be di fedile.  A tebelelo e kgahlišago gakaakang! Eupša na re ka kgodišega gore e tla tla, gomme tebelelo yeo e ka re kgoma bjang gona bjale?

Mabaka a go ba le Kholofelo

3. Ke ka baka la’ng re ka bota dikholofetšo tša Beibele ka bokamoso?

³ Ela hloko kamoo Kutollo 21:5 e tšwelago pele ka gona. E tsopola Modimo a dutše sedulong sa gagwe sa bogoši sa legodimong a tsebatša gore: “Šidio; dilô tšohle ke di dira tše mphsa.” Kholofetšo yeo ya Modimo e kaone kudu go feta kgoeletšo le ge e le efe ya setšhaba ya boipušo, molao-kakanywa le ge e le ofe wa mehleng yeno wa ditshwanelo tša batho goba tlhologelo le ge e le efe ya batho ya bokamoso. Ke kgoeletšo e botegago ka mo go feletšego ya Yo Beibele e rego ke ‘yo a ka se kego a aketša.’ (Tito 1:2) Ka mo go kwešišegago, mo gongwe o ka ba o ikwa gore re ka ema gona mo gomme ra no thabela tebelelo ye e botse ke moka ra bota Modimo. Eupša ga se ra swanela go ema. Go na le mo gontši mo re swanetšego go ithuta gona mabapi le bokamoso bja rena.

4, 5. Ke diporofeto dife tša Beibele tše di šetšego di ahla-ahlilwe tšeo di ka tiišago kholofelo ya rena ka seo se letšego ka pele?

⁴ Naganišiša ka seo sehlogo se se fetilego se se ahla-ahlilego mabapi le dikholofetšo tša Beibele tša magodimo a mafsa le lefase le lefsa. Jesaya o boletše e sa le pele ka tshepedišo e bjalo e mpsha, gomme boporofeta bja gagwe bo ile bja phethagatšwa ge ba-Juda ba be ba boela nageng ya gabo bona gomme ba tsošološa borapedi bja therešo. (Esera 1:1-3; 2:1, 2; 3:12, 13) Lega go le bjalo, na seo ke sona feela se boporofeta bja Jesaya bo bego bo se šupa? Ga go bjalo le gatee! Dilo tše a di boletšego e sa le pele di be di tla phethagatšwa gape ka tsela e kgolwanyane nakong e lego kgole e tlago. Ke ka baka la’ng re fihlelela phetho yeo? Ka baka la seo re se balago go 2 Petro 3:13 le Kutollo 21:1-5. Ditemana tšeo di šupa go magodimo a mafsa le lefase le lefsa tšeo di tla tlišetšago Bakriste mehola lefaseng ka bophara.

⁵ Bjalo ka ge go boletšwe pejana, Beibele e diriša polelwana “maxodimo a mafsa le lefase le lefsa” ka makga a mane. Re šetše re ahla-ahlile a mararo a ona gomme re fihleletše diphetho tše di kgothatšago. Beibele e bolela e sa le pele ka go lebanya gore Modimo o tla fediša bokgopo le dilo tše dingwe tše di bakago tlaišego le gore ka morago o tla šegofatša batho ka mo go tšwelago pele tshepedišong ya gagwe e mpsha ye a e holofeditšego.

6. Ke eng seo boporofeta bja bone bjo bo bolelago ka “maxodimo a mafsa le lefase le lefsa” bo se bolelelago pele?

⁶ Bjale a re hlahlobeng tiragalo e nngwe e šetšego ya polelo ya “maxodimo a mafsa le lefase le lefsa” go Jesaya 66:22-24: “’Me moloko wa lena ó tlo dula ò le xôna; le maina a lena a tlo dula à le xôna, bo-ka lexodimo le lefase le lefsa le ke tl’o xo le dira, xe di tlo dula di le xôna pele xa-ka. ’Me e tlo fêla e re kxwedi è balama, le ka Sabatha e nngwê le e nngwê nama ka moka e tlo tla ya khutša pele xa-ka. Ó r’yalo Morêna. Ba tlo tšwa ba yo bôna ditoto tša bao ba nthlanoxetšexo; xobane seboko sa bôná se ka se kê sa hwa, ’me mollô wa bôná o ka se kê wa tima; ’me e tlo ba selaloxi xo nama ka moka.”

7. Ke ka baka la’ng re ka phetha ka gore Jesaya 66:22-24 e tla phethagala matšatšing a tlago?

⁷ Boporofeta bjo bo bile le kamoo bo dirago ka gona gare ga ba-Juda bao ba bego ba bušeditšwe nageng ya gabo bona, eupša go be go tla ba le phethagatšo e nngwe. Se se be se swanetše go direga lebakeng le letelele ka morago ga ge lengwalo la bobedi la Petro le puku ya Kutollo di ngwadilwe, ka gobane di be di šupa go ‘legodimo le lefsa le lefase le lefsa.’ Re ka letela phethagalo yeo e kgolo le e feletšego tshepedišong e mpsha. Hlokomela a mangwe a maemo ao re ka lebelelago pele go tlo a thabela.

8, 9. (a) Ke ka kgopolo efe batho ba Modimo ‘ba tla dulago ba eme’? (b) Ke eng seo se bolelwago ke boporofeta bja gore bahlanka ba Jehofa ba tla rapela ge “kxwedi e balama, le ka Sabatha e nngwê le e nngwe”?

⁸ Kutollo 21:4 e bontšhitše gore lehu le ka se hlwe le e-ba gona. Temana ye e lego go Jesaya kgaolo 66 e dumelelana le seo. Re ka bona go temana 22 gore Jehofa o a tseba gore magodimo a mafsa le lefase le lefsa e ka se be tša lebakanyana, tša nako e lekanyeditšwego. Go feta moo, batho ba gagwe ba tla ba gona ka mo go sa felego; ba tla ‘dula ba le gona’ pele ga gagwe. Seo Modimo a šetšego a se diretše batho ba gagwe ba kgethilwego se re nea lebaka la go ba le kholofelo. Bakriste ba therešo ba ile ba lebana le tlaišo e šoro, gaešita le maiteko a magolo a go leka go ba fediša. (Johane 16:2; Ditiro 8:1) Lega go le bjalo, gaešita  le manaba a matla kudu a batho ba Modimo a bjalo ka Mmušiši wa Roma Nero le Adolf Hitler, ga se a ka a kgona go fediša batho ba Modimo ba botegago ka go se kwanantšhe, bao ba rwelego leina la gagwe. Jehofa o šireleditše phuthego ya batho ba gagwe, gomme re ka kgonthišega gore o tla tšwela pele go e boloka e eme ka mo go sa felego.

⁹ Ka mo go swanago, bao ba botegelago Modimo e le karolo ya lefase le lefsa, lekoko la barapedi ba therešo lefaseng le lefsa, ba tla dula ba eme e le motho ka o tee ka o tee ka gobane ba tla be ba neela borapedi bjo bo sekilego go Mmopi wa dilo tšohle. Seo e ka se ke ya ba borapedi bja sewelo goba bja go hloka ntlha le thito. Molao wa Modimo wo o bego o neilwe ba-Isiraele ka Moše, o be o nyaka ditiro tše itšego tša borapedi kgwedi e nngwe le e nngwe, bjalo ka ge di be di hlaolwa ka kgwedi e mpsha, le beke e nngwe le e nngwe bjalo ka ge di be di hlaolwa ka letšatši la Sabatha. (Lefitiko 24:5-9; Numeri 10:10; 28:9, 10; 2 Koronika 2:4) Ka gona Jesaya 66:23 e bolela ka borapedi bja Modimo bja ka mehla le bjo bo tšwelago pele, beke le beke le kgwedi le kgwedi. Boila-Modimo gotee le boikaketši bja bodumedi di ka se sa ba gona ka nako yeo. “Nama ka moka e tlo tla ya khutša pele” ga Jehofa.

10. Ke ka baka la’ng o ka kgodišegago gore lefase le lefsa le ka se ke la senyetšwa sa ruri ke ba kgopo?

¹⁰ Jesaya 66:24 e re kgonthišetša gore khutšo le go loka tša lefase le lefsa le ka mohla di ka se ke tša ba kotsing. Batho ba kgopo ba ka se ke ba le senya. Gopola gore 2 Petro 3:7 e bolela gore seo se lego ka pele ga rena ke “letšatši la kahlolô la xo tlo lôba xa batho ba banyatši.” Bao ba tlago go fedišwa e tla ba bao ba sa boifego Modimo. Ga go na kotsi yeo e tlago go wela ba se nago molato, go fapana le seo gantši se diregago dintweng tša batho, moo mahu a baagi bao e sego bahlabani a fetago a bao e lego bahlabani. Moahlodi yo Mogolo o re tiišetša gore letšatši la gagwe e tla ba la go tlo fedišwa ga ba sa boifego Modimo.

11. Ke eng seo Jesaya a bontšhago gore e tla ba bokamoso bja bohle bao ba hlanogelago Modimo le borapedi bja gagwe?

¹¹ Baphologi bao e lego baloki ba tla bona gore lentšu la Modimo la boporofeta ke la therešo. Temana 24 e bolela e sa le pele gore ‘ditoto tša bao ba hlanogetšego’ Jehofa e tla ba bohlatse bja kahlolo ya gagwe. Polelo e kwagalago yeo Jesaya a e dirišitšego e ka kwagala e tšhoša. Lega go le bjalo, e dumelelana le therešo ya histori. Ka ntle ga marako a Jerusalema ya bogologolo go be go e-na le mafelo a go lahlela ditlakala, gomme ka dinako tše dingwe go be go lahlelwa ditopo tša disenyi tše šoro tše bolailwego tšeo di ahlotšwego e le tše di sa swanelwego ke poloko e hlomphegago. * Moo diboko le mollo o fišago lore-lore kapejana di be di fediša ditlakala gotee le ditopo tšeo. Ka mo go lego molaleng, polelo ya Jesaya ya seswantšho e swantšha makgaola-kgang a kahlolo ya Jehofa ya go ahlola bafoši.

Seo a se Holofeditšego

12. Jesaya o nea dipontšho dife tše dingwe mabapi le bophelo lefaseng le lefsa?

¹² Kutollo 21:4 e re botša ka dilo tše dingwe tšeo di ka se kego tša ba gona tshepedišong e mpsha e tlago. Lega go le bjalo, ke eng seo se tlago go ba gona nakong yeo? Bophelo bo tla ba bjang? Na re ka nyetlelwa ka tsela le ge e le efe e botegago? Ee. Jesaya kgaolo 65 e hlalosa ka tsela ya boporofeta maemo ao re tla a thabelago ge e ba re amogelwa ke Jehofa gore re phele ge mafelelong a hlola magodimo a a mafsa le lefase le lefsa. Bao ba šegofaditšwego ka bodulo bjo bo sa felego lefaseng le lefsa ba ka se ke ba tšofala gomme ka mo go sa efogegego ba hwa. Jesaya 65:20 e re kgonthišetša gore: “Xo ka se hlwê xo e-ba le lesea la xo phela matšatšana fêla; xo ka se bê le mokxalabyê e a sa tlatšexo mehla e mo lekanexo; xo tlo hwa e mofsa à n’e nywaxa e lekxolo; mo-dira-dibe xo tlo roxwa wa nywaxa e lekxolo.”

13. Jesaya 65:20 e re kgonthišetša bjang gore batho ba Modimo ba tla thabela polokego?

¹³ Ge se mathomong se be se phethagatšwa bathong ba gabo Jesaya, se be se bolela gore masea a nageng a be a bolokegile. Go be go se na manaba a tsenago, go etša ge ba-Babele ba be ba kile ba tsena, bakeng sa go thopa masea goba go bolaya banna bao e bego e sa le banna-tia. (2 Koronika 36:17, 20) Lefaseng le lefsa leo le tlago, batho ba tla bolokega, ba šireletšega, ba kgona go thabela bophelo. Ge e ba motho a kgetha go rabela malebana le Modimo, a ka se ke a dumelelwa go tšwela pele a phela. Modimo o tla mo fediša. Go thwe’ng ge e ba modira-dibe yo a rabelago a e-na le nywaga e lekgolo? O tla hwa e sa le ‘e mofsa’ go fapana le go thabela bophelo bjo bo sa felego.—1 Timotheo 1:19, 20; 2 Timotheo 2:16-19.

14, 15. Go ya ka Jesaya 65:21, 22, ke mediro efe e putsago yeo o ka lebelelago pele go yona?

¹⁴ Go e na le go dulela go nagana kamoo modira-dibe wa ka boomo a tla fedišwago ka gona, Jesaya o hlalosa maemo a bophelo ao a tla bago gona lefaseng le lefsa. Leka go ipea boemong bjo. Sa mathomo se o ka se bonago ka leihlo la gago la kgopolo ke dilo tšeo motho a di kgahlegelago. Seo ke se Jesaya a se ahla-ahlago go ditemana 21 le 22: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.”

¹⁵ Ge e ba o se wa hlwa o e-ba le phihlelo ya go aga goba o se wa ka wa šoma ka serapaneng, boporofeta bja Jesaya bo bolela gore o sa letetšwe ke thuto. Lega go le bjalo, na o ka se ke wa thabela go ithuta ka thušo ya barutiši ba nago le bokgoni, mohlomongwe le baagišani ba botho bao ba tsenyago letsogo? Jesaya ga se a bolela ge e ba ngwako wa gago o tla ba le mafasetere a magolo ao a nago le diširo, e le gore o ka thabela moya o lapološago wa molatšatšing, goba mafasetere a tswaletšwego ka digalase ao ka wona o ka kgonago go bogela dihla tše fetogago. Na o tla hlama ngwako wa gago gore e be wa tlhaka  e sekamego bakeng sa go falatša pula le lehlwa? Goba na tlelaemete ya lefelong e tla biletša gore tlhaka e be ya phaphathi​—go swana le e nngwe ya tšeo di lego ka Bohlabela bja Magareng​—tlhaka yeo le ka kgobokanago go yona le ba lapa la gago bakeng sa dijo tše dibose le go swara mehlamu?​—Doiteronomio 22:8; Nehemia 8:16.

16. Ke ka baka la’ng o ka letela gore lefase le lefsa e be le le kgotsofatšago ka mo go sa fetogego?

¹⁶ Sa bohlokwa kudu go feta go tseba ditaba tše bjalo ke gore o tla ba le lefelo la gago la bodulo. E tla ba la gago​—e sego go swana le lehono moo o ka šomago bjalo ka lekgoba wa aga, gomme ka morago gwa holega motho yo mongwe. Jesaya 65:21 e bolela gape gore o tla bjala gomme wa ja dienywa tša gona. Ka mo go kwagalago, seo se akaretša boemo ka kakaretšo. O tla hwetša kgotsofalo e tseneletšego modirong wa gago o thata, dienywa tša boitapišo bja gago ka noši. O tla kgona go dira seo lebakeng le letelele la bophelo​—go “lekana le matšatši a sehlare.” Seo ruri se swanela tlhaloso e rego “dilô tšohle ke . . . tše mphsa”!​—Psalme 92:12-14.

17. Ke kholofetšo efe yeo batswadi ba tla hwetšago e le e kgothatšago ka mo go kgethegilego?

¹⁷ Ge e ba o motswadi, mantšu a a tla go kgwatha pelo: “Ba ka se itapiše, ’me ya ba lefêla; ba ka se tswale bana ba xo tlo hwa ka pela; xobane e tlo ba mohuta wa bašexofatšwa ba Morêna, bôná le bana ba bôná. E tlo re bà sešo ba bitša, ka ba ke šetše ke araba; e tlo re bà sa bolêla, ka ba ke šetše ke e-kwa.” (Jesaya 65:23, 24) Na o tseba go tšwa phihlelong bohloko bja ‘go tswala bana ba go hwa ka pela’? Ga go nyakege gore re lokeletše lelokelelo la mathata ao bana ba ka bago le ona ao a tlišago pherekano go batswadi ba bona le go ba bangwe. Go dumelelana le seo, ka moka ga rena re lemogile batswadi bao ba swaregilego kudu ka mediro ya bona ya bophelo ka moka goba ka maipshino moo ba fetšago nako e nyenyane ba e-na le bana ba bona. Ka mo go fapanego, Jehofa o re kgonthišetša gore o tla re kwa le go arabela dinyakweng tša rena, gaešita le go di letela.

18. Ke ka baka la’ng o ka letela go thabela diphoofolo lefaseng le lefsa?

¹⁸ Ge o dutše nagana ka seo mo gongwe o ka se thabelago lefaseng le lefsa, akanya ka boemo bjo lentšu la Modimo la boporofeta le bo hlalosago: “Phiri le kwana di tlo fula xotee; tau e tlo fula byang wa kxomo; noxa, dijô tša yôna e tlo ba lerole. Xo ka se hlwê xo senywa xo dirwa bošula thabeng e kxêthwa ya-ka yohle. Ó r’yalo Morêna.” (Jesaya 65:25) Bathadi ba diswantšho ba batho ba ile ba leka go swantšha boemo bjo, eupša se ga se feela seswantšho-kgopolo seo se tšweleditšwego ka tokologo ya tša go thala diswantšho. Boemo bjo e tla ba bja kgonthe. Khutšo e tla aparela gare ga batho, gomme e tla swanelana le go ba le khutšo le diphoofolo. Bo-ra-thutaphedi ba bantši gotee le barati ba diphoofolo ba fetša nywaga e mentši ya maphelo a bona ba ithuta ka mehuta e sego kae ya diphoofolo goba mohuta o tee feela o nyakilego o swana. Ka mo go fapanego, akanya ka seo o tla kgonago go ithuta sona ge diphoofolo di tla  be di se sa hlwa di bušwa ke go tšhaba batho. Ka nako yeo o tla kgona go batamela gaešita le dinonyana le diphedi tše dinyenyane tšeo bodulo bja tšona e lego sethokgwa goba lešoka​—ee, wa di bogela, wa ithuta go tšona le go di thabela. (Jobo 12:7-9) O tla kgona go dira bjalo o bolokegile kudu, go se kotsi yeo e ka go welago go tšwa go motho goba go phoofolo. Jehofa o re: “Xo ka se hlwê xo senywa xo dirwa bošula thabeng e kxêthwa ya-ka yohle.” Yeo e tla ba phetogo e fapanego gakaakang le seo re se bonago le seo se re diragalelago lehono!

19, 20. Ke ka baka la’ng batho ba Modimo ba fapane kudu le batho ba bantši lehono?

¹⁹ Ka ge go boletšwe pejana, batho ga ba kgone go bolela bokamoso e sa le pele ka go nepa, go sa šetšwe go kgomega mo go aparetšego mo go tswalanago le ngwaga-kete o mofsa. Seo se tlogela ba bantši ba ferekane, ba gakanegile goba ba itlhobogile. Peter Emberley, e lego molaodi yunibesithing ya Canada, o ngwadile gore: “Batho ba bantši [ba bagolo] mafelelong ba lebeletšana le dipotšišo tša motheo tša go ba gona ga bona. Ke nna mang? Ge e le gabotse ke katanela’ng? Ke bohwa bofe bjo ke bo tlogelelago moloko o latelago? Ba a katana ge ba le nywageng ya magareng gore ba fihlelele toka le morero maphelong a bona.”

²⁰ O ka kgona go kwešiša lebaka leo ka lona go lego bjalo ka ba bantši. Ba ka tsoma go thabela bophelo ka ditloša-bodutu goba dibopego tše di thabišago tša boitapološo. Lega go le bjalo, ga ba tsebe seo bokamoso bo se swerego, ka gona bophelo e ka ba bjo bo se nago mohola, taolo le morero wa kgonthe. Bjale bapetša seo le pono ya gago ka bophelo go ya ka seo re se ahla-ahlilego. O a tseba gore magodimong a mafsa le lefaseng le lefsa tšeo Jehofa a di holofeditšego, re tla kgona go gaša mahlo go re dikologa gomme ra bolela go tšwa dipelong tša rena gore, ‘Ka kgonthe Modimo o dirile dilo ka moka gore e be tše mpsha!’ Re tla thabela seo kudu gakaakang!

21. Ke lebaka lefe le swanago leo re le hwetšago go Jesaya 65:25 le Jesaya 11:9?

²¹ Ga se go ba le boikgantšho go ipona re phela lefaseng le lefsa la Modimo. O a re laleletša, gaešita le go re kgothaletša gore re mo rapele ka therešo gona bjale le go swanelegela bophelo nakong ya ge ‘ba ka se hlwe ba senya goba ba dira bošula thabeng e kgethwa ya gagwe yohle.’ (Jesaya 65:25) Lega go le bjalo, na o be o hlokometše gore pejana Jesaya o ile a diriša tlhaloso e swanago, le gore o ile a akaretša lebaka leo le lego bohlokwa bakeng sa go thabela ga rena e le ka kgonthe bophelo lefaseng le lefsa? Jesaya 11:9 e re: “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”

22. Go hlahloba ga rena diporofeto tše nne tša Beibele go swanetše go matlafatša boikemišetšo bja rena bakeng sa go dira’ng?

²² “Xo tseba [Jehofa, NW].” Ge Modimo a mpshafatša dilo ka moka, baagi ba lefase ba tla ba le tsebo e nepagetšego ka yena gotee le ka thato ya gagwe. Seo se tla akaretša mo gontši kudu go feta go ithuta go diphoofolo. Lentšu la gagwe le le buduletšwego le a akaretšwa. Ka mohlala, nagana ka tekanyo e kgolo yeo re e bonego ka go hlahloba diporofeto tše nne feela tšeo di bolelago ka “maxodimo a mafsa le lefase le lefsa.” (Jesaya 65:17; 66:22; 2 Petro 3:13; Kutollo 21:1) O na le lebaka le lebotse la go bala Beibele letšatši le letšatši. Na seo ke karolo ya mokgwa wa gago wa ka mehla? Ge e ba go se bjalo, o ka dira dipeakanyo dife e le gore letšatši le letšatši o tle o bale ka tše dingwe tša tšeo di bolelwago ke Modimo? O tla hwetša gore ka kua ga go lebelela pele go tlo thabela lefase le lefsa, o tla hwetša lethabo le le oketšegilego gona bjale, go etša ge mopsalme a dirile.​—Psalme 1:1, 2.

[Mengwalo ya ka tlase]

O tla Araba Bjang?

• Ke ka baka la’ng re ka phetha ka gore Jesaya 66:22-24 e bolela e sa le pele ka seo se sa dutšego se letše ka pele?

• Ke eng seo o lebeletšego pele go sona ka mo go kgethegilego gare ga dilo tše go boletšwego ka tšona diporofetong tšeo di ngwadilwego go Jesaya 66:22-24 le Jesaya 65:20-25?

• Ke mabaka afe ao o nago le ona bakeng sa gore o kgonthišege ka bokamoso bja gago?

[Dipotšišo tša Thuto]

[Seswantšho go letlakala 15]

Jesaya, Petro le Johane ba boletše e sa le pele ka dibopego tša “maxodimo a mafsa le lefase le lefsa”