Bagoeldi ba Mmušo ba a Bega

Bophelo bja Lapa bjo bo Thabišago bo Gogela ba Bangwe go Modimo

JEHOFA o ile a šegofatša Josefa ka bohlale bjo bogolo le temogo. (Ditiro 7:10) E le mafelelo a se, temogo ya Josefa “Farao le bahlanka ba xaxwe ba bone è le e botse.”​—Genesi 41:37.

Ka mo go swanago le lehono, Jehofa o nea batho ba gagwe temogo ka go ithuta ga bona Beibele. (2 Timotheo 3:16, 17) Bohlale bjo le temogo di tšweletša dienywa tše dibotse ge keletšo e theilwego Beibeleng e dirišwa. Boitshwaro bja bona bjo bobotse gantši ‘bo bonwa e le bjo bobotse mahlong a bao ba bo bonago,’ bjalo ka ge phihlelo e latelago e tšwago Zimbabwe e bontšha.

• Mosadi o be a e-na le baagišani bao e bego e le Dihlatse tša Jehofa. Gaešita le ge a be a sa rate Dihlatse, o be a duma boitshwaro bja tšona, kudu-kudu bophelong bja tšona bja ka gae. O ile a hlokomela gore monna le mosadi ba be ba e-na le tswalano e botse kudu, le gore bana ba bona e be e le bao ba kwago. O ile a lemoga ka mo go kgethegilego gore monna o rata mosadi wa gagwe kudu.

Tumelo e tlwaelegilego ditšong tše dingwe tša se-Afrika ke gore ge e ba monna a rata mosadi wa gagwe, mosadi o swanetše go ba a dirišitše boloi bakeng sa go mo “tanya.” Ka gona mosadi o ile a batamela mosadi wa Hlatse gomme a mo kgopela gore: “Na o ka se ke wa mpha sehlare seo o se filego monna wa gago gore monna wa-ka a tle a nthate kudu ka mokgwa woo wa gago a go ratago ka gona?” Hlatse e ile ya araba ka gore: “Ee, ke tla go tlišetša sona gosasa thapama.”

Letšatšing le le latelago, kgaetšedi o ile a etela moagišani wa gagwe ka “sehlare” sa gagwe. E be e le eng? E be e le Beibele gotee le puku ya Tsebo e Išago Bophelong bjo bo sa Felego. Ka morago ga go ahla-ahla taba yeo e lego ka pukung ya Tsebo sehlogong seo se rego “Go Aga Lapa Leo le Hlomphago Modimo,” o ile a botša mosadi gore: “Se ke ‘sehlare’ seo nna le monna wa-ka re se dirišago bakeng sa go ‘tanyana’ gomme ke ka baka leo re ratanago kudu ka mokgwa wo.” Thuto ya Beibele e ile ya thongwa, gomme mosadi kapejana o ile a dira tšwelopele go fihla ntlheng ya gore a bontšhe boineelo bja gagwe go Jehofa ka go inwa meetseng.

• Babulamadibogo ba babedi ba kgethegilego bao ba ilego ba abelwa phuthegong e nyenyane kgaufsi le mollwane wa ka leboa-bohlabela bja Zimbabwe le Mozambique ga se ba ka ba tšwa go ya bodireding bja ntlo le ntlo lebaka la dibeke tše pedi. Ka baka la’ng? Ka gobane batho ba be ba e-tla go bona go tla go theeletša seo ba se bolelago. Yo mongwe wa babulamadibogo o anega gore se se diregile bjang: “Re be re sepela dikhilomithara tše 15 bakeng sa go yo swara thuto ya legae ya Beibele ya beke le beke le motho yo a thabelago. Go be go se bonolo go rena go fihla tikologong ye. Re be re swanela ke go sepela lerageng, gape re be re swanela ke go tshela dinoka tšeo di tletšego go fihla ka megolo. Se se akaretša go rwala le go swareletša diaparo tša rena le dieta dihlogong tša rena, re tshele noka gomme re apare gape ka mošola.

“Baagišani ba motho yo a thabelago ba ile ba kgongwa kudu ke phišego ya rena. Gare ga bao ba ilego ba ela se hloko e be e le moetapele wa mokgatlo wa lefelong leo wa bodumedi. O ile a botša balatedi ba gagwe gore: ‘Na ga le nyake go ba bao ba fišegago go swana le banna bale ba babedi bao e lego Dihlatse tša Jehofa?’ Letšatšing le le latelago, ba bantši ba balatedi ba gagwe ba ile ba tla legaeng la rena bakeng sa go nyaka go tseba lebaka leo ka lona re lego bao ba phegelelago gakaakaa. Go oketša moo, lebakeng la dibeke tše pedi tšeo di latelago, re ile ra ba le baeng ba bantši kudu moo re bego re bile re palelwa le ke go itirela dijo!”

Yo mongwe wa batho bao ba ilego ba etela legaeng la babulamadibogo lebakeng le la dibeke tše pedi e be e le moetapele wa bodumedi. Anke o nagane ka lethabo leo babulamadibogo ba bilego le lona ge a be a amogela thuto ya legae ya Beibele!