E-kwa Seo Moya o se Bolelago

“Gomme ditsebe tša lena ka noši di tla kwa lentšu ka morago ga lena le re: ‘Tsela še. Sepelang ka yona, lena batho,’ ge go ka direga gore lena batho le ye ka go le letona goba ge go ka direga gore le ye ka go le letshadi.”​—JESAYA 30:21, NW.

1, 2. Go theoša le histori, Jehofa o be a dutše a boledišana bjang le batho?

SEHLAKAHLAKA sa Puerto Rico ke legae la thelesekopo ya radio ya go ba le se-amogela-melaetša se tee yeo e lego e kgolo go di feta tšohle lefaseng le yeo e swarago medumo ka pela kudu. Ka nywaga-some e mentši, bo-rathutamahlale ba be ba dutše ba holofetše gore ba tla amogela melaetša e tšwago dipolaneteng tše dingwe, ba diriša sedirišwa se se segolo. Eupša ga go na melaetša e bjalo yeo e kilego ya amogelwa. Lega go le bjalo, ka mo go segišago, go na le melaetša e kwalago gabotse e tšwago tikologong ya ka ntle ga ya batho yeo yo mongwe le yo mongwe wa rena a ka e amogelago ka nako le ge e le efe​—ka ntle le go diriša sedirišwa se se raranego. Ye e tšwa Mothopong o phagamego kudu go feta methopo le ge e le efe yeo e akanywago ya dipolaneteng tše dingwe. Mothopo wa dipoledišano tše bjalo ke mang, gomme di amogelwa ke bomang? Melaetša e re’ng?

² Pego ya Beibele e na le dipego tše dintši tša ditiragalo tšeo ka tšona melaetša e tšwago go Modimo e bego e dirwa gore e kwewe ke batho. Ka dinako tše dingwe melaetša ye e be e tlišwa ke dibopiwa tša moya tšeo di hlankelago e le batseta ba Modimo. (Genesi 22:11, 15; Sakaria 4:4, 5; Luka 1:26-28) Mabakeng a mararo, Lentšu la Jehofa le ile la kwewa. (Mateo 3:17; 17:5; Johane 12:28, 29) Modimo o ile a bolela gape le ka baporofeta ba batho, bao bontši bja bona ba ilego ba ngwala seo a  bego a ba buduletše gore ba se bolele. Lehono, re na le Beibele, yeo e akaretšago pego e ngwadilwego ya dipoledišano tše, gotee le dithuto tša Jesu le barutiwa ba gagwe. (Ba-Hebere 1:1, 2) Jehofa ka kgonthe o be a dutše a fetišetša tsebišo go dibopiwa tša gagwe tša batho.

3. Morero wa melaetša ya Modimo ke ofe, gomme ke eng seo re letetšwego gore re se dire?

³ Melaetša ye ka moka e buduletšwego e tšwago go Modimo e utolla mo gonyenyane mabapi le legohle la kgonthe. E lebiša tlhokomelo ditabeng tšeo e lego tša bohlokwa kudu, tšeo di nago le seo se di bolelago bakeng sa bophelo bja rena bja gona bjale le bja nakong e tlago. (Psalme 19:7-11; 1 Timotheo 4:8) Jehofa o e dirišetša go tsebiša ka thato ya gagwe le go re nea tlhahlo ya gagwe. Ke tsela e nngwe yeo mantšu a moporofeta Jesaya a phethagatšwago ka yona: “Gomme ditsebe tša lena ka noši di tla kwa lentšu ka morago ga lena le re: ‘Tsela še. Sepelang ka yona, lena batho,’ ge go ka direga gore lena batho le ye ka go le letona goba ge go ka direga gore le ye ka go le letshadi.” (Jesaya 30:21, NW) Jehofa ga a re gapeletše gore re theetše “lentšu” la gagwe. Go ithekgile ka rena gore re latele tlhahlo ya Modimo gomme re sepele tseleng ya gagwe. Ka baka leo Mangwalo a re eletša gore re theetše melaetša e tšwago go Jehofa. Pukung ya Kutollo, kgothatšo ya gore re ‘kwe seo moya o se bolelago’ e tšwelela ka makga a šupago.​—Kutollo 2:7, 11, 17, 29; 3:6, 13, 22.

4. Na ke mo go kwalago mehleng ya rena go letela gore Modimo a bolele ka go lebanya go tšwa legodimong?

⁴ Lehono, Jehofa ga a bolele le rena ka go lebanya go tšwa legodimong. Gaešita le mehleng ya Beibele, dipoledišano tše tše di phagametšego tlhago di be di direga ka sewelo, ka dinako tše dingwe di direga ka morago ga nywaga-kgolo e mentši. Go theoša le histori, Jehofa gantši o be a fela a boledišana le batho ba gagwe ka ditsela tše di sa lebanyego. Go bjalo le mehleng ya rena. Anke re eleng hloko ditsela tše tharo tšeo Jehofa a boledišanago le rena ka tšona lehono.

“Lengwalo ka Moka le Buduletšwe”

5. Sedirišwa sa Jehofa sa motheo sa poledišano lehono ke sefe, gomme se ka re hola bjang?

⁵ Sedirišwa sa motheo sa poledišano magareng ga Modimo le batho ke Beibele. E buduletšwe ke Modimo, gomme tšohle tšeo di lego ka go yona di ka ipontšha e le tše di re holago. (2 Timotheo 3:16) Beibele e tletše ka mehlala ya batho ba kgonthe bao ba bego ba diriša tokologo ya bona go direng phetho tabeng ya ge e ba ba nyaka go kwa lentšu la Jehofa goba go se le kwe. Mehlala e bjalo e re gopotša lebaka leo ka lona go lego bohlokwa go kwa seo moya wa Modimo o se bolelago. (1 Ba-Korinthe 10:11) Beibele gape e na le bohlale bja kgonthe, bjo bo re neago keletšo bakeng sa dinakong tša ge re lebeletšane le go dira diphetho bophelong. Go bjalo ka ge eka Modimo o ka morago ga rena, a re sebela ka tsebeng mantšu a rego: “Tsela še. Sepelang go yona.”

6. Ke ka baka la’ng Beibele e phagametše mengwalo e mengwe ka moka?

⁶ E le gore re tle re kwe seo moya o se bolelago ka matlakala a Beibele, re swanetše go e bala ka mehla. Beibele ga e fo ba puku yeo e ngwadilwego gabotse, yeo e ratwago le go ba e nngwe ya tše dintši tšeo di hwetšagalago lehono. Beibele e buduletšwe ka moya gomme e na le dikgopolo tša Modimo. Ba-Hebere 4:12 e re: “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.” Ge re dutše re bala Beibele, dikagare tša yona di phuleletša dikgopolong tša rena tša ka gare-gare le dikakanyong bjalo ka tšhoša, gomme di utolla tekanyo yeo ka yona maphelo a rena a dumelelanago le thato ya Modimo.

7. Ke ka baka la’ng go bala Beibele e le gabohlokwa, gomme re kgothaletšwa gore re e bale gantši gakaaka’ng?

⁷ “Diakanyô le kxopolô tša pelo” di ka fetoga ge  nako e dutše e feta gomme ge re dutše re kgongwa ke dilo tšeo re gahlanago le tšona bophelong​—bobedi tše di thabišago le tše thata. Ge e ba re sa ithute Lentšu la Modimo ka mo go sa kgaotšego, dikgopolo tša rena, dikakanyo le maikwelo di ka se sa dumelelana le melao ya motheo ya Modimo. Ka gona, Beibele e re eletša ka gore: “Itebeledišeng lena beng Le bônê xe Le na le tumêlô; iphenyekeng!” (2 Ba-Korinthe 13:5, mongwalo o sekamego ke wa rena.) Ge e ba re nyaka go tšwela pele re e-kwa seo moya o se bolelago, re swanetše go ela hloko keletšo ya gore re bale Lentšu la Modimo letšatši le letšatši.​—Psalme 1:2.

8. Ke mantšu afe a moapostola Paulo ao a re thušago go itlhahloba mabapi le taba ya go bala Beibele?

⁸ Kgopotšo e bohlokwa bakeng sa babadi ba Beibele ke ye: Iphe nako e lekanego bakeng sa go naganišiša ka seo o se balago! Boitekong bjo re bo dirago bja go leka go dumelelana le keletšo ya go bala Beibele letšatši le letšatši, re ka se rate go ikhwetša re bala ka lebelo dikgaolo tše mmalwa re sa kwešiše seo re se balago. Le ge go bala Beibele ka mehla e le gabohlokwa, boikemišetšo bja rena ga se ya swanela go fo ba go sepedišana le thulaganyo; re swanetše go ba le kganyogo ya kgonthe ya go nyaka go ithuta ka Jehofa le merero ya gagwe. Tabeng ye, re ka diriša mantšu a a moapostola Paulo bakeng sa go itlhahloba. Ge a ngwalela Bakriste-gotee le yena, o itše: “Ké tšôna tše di nkhunamišaxo ka matôlô, kè khunamêla Tata xo Mong wa rena . . . xore Kriste a axê dipelong tša lena ka tumêlô, Le bê ba ba tsemilexo medu leratong. Ké mo Le tl’o xo kxôna xo lemoxa leratô la Kriste, bophara bya lôna, le botelele bya lôna, le xo iša xa lôna, le xo phaxama xa lôna; la di lemoxa le bakxêthwa bohle. Ké mo Le tl’o xo tseba leratô la Kriste xe e le le-pala-tsebô, la tlatšwa botlalô-moka bya Modimo.”​—Ba-Efeso 3:14, 16-19.

9. Re ka hlagolela bjang le go nweletša kganyogo ya rena ya go ithuta go Jehofa?

⁹ Ke therešo gore ba bangwe ba rena ka tlhago ga re thabele go bala, mola ba bangwe e le babadi ba fišegago. Lega go le bjalo, go sa šetšwe boemo bja kgopolo bja yo mongwe le yo mongwe wa rena, re ka hlagolela le go nweletša kganyogo ya rena ya go ithuta go Jehofa. Moapostola Petro o hlalositše gore re swanetše go kganyoga go ba le tsebo ya Beibele, gomme o ile a lemoga gore kganyogo e bjalo e ka swanelwa ke gore e hlagolelwe. O ngwadile gore: “Le etšê masea a sa tš’o xo bêlêxwa, Le [bope kganyogo bakeng sa, NW] lebese la Lentšu lé le sa forexo, xore Le xolê ka lôna Le fihlêlê phološô.” (1 Petro 2:2) Ke gabohlokwa go itaya ge e ba re tla “bopa kganyogo” ya go ithuta Beibele. Go fo swana le ge re ka hlagolela go rata sejo se sefsa ka morago ga go se ja ka makga a mmalwa, boemo bja kgopolo bjo re nago le bjona ka go bala le go ithuta bo ka kaonefala ge e ba re itaya gore re latele mokgwa wa ka mehla.

“Dijô ka Lebaka la Xôna”

10. Ke bomang bao ba bopago “molaki e a bôtêxaxo yo bohlale,” gomme Jehofa o ba diriša bjang lehono?

¹⁰ Tsela e nngwe yeo Jehofa a e dirišago go boledišana le rena ka yona lehono e boletšwe ke Jesu go Mateo 24:45-47. Moo o boletše ka phuthego ya Bokriste yeo e tloditšwego ka moya​—“molaki e a bôtêxaxo yo bohlale” yo a kgethetšwego gore a nee ‘dijo tša moya ka lebaka la gona.’ E le motho ka o tee ka o tee, ditho tša sehlopha se ke “bahlanka” ba Jesu. Ba, gotee le “lešaba le lexolo” la “dinku tše dingwê,” ba hwetša kgothatšo le tlhahlo. (Kutollo 7:9; Johane 10:16) Bontši bja dijo tše tše di tlago ka lebaka la gona di tla ka sebopego sa dipuku tše di gatišwago, tše bjalo ka Morokami, Phafoga! le dipuku tše dingwe. Dijo tše di oketšegilego tša moya di newa ka sebopego sa dipolelo le dipontšho dikopanong tše dikgolo, dikopanong tše dinyenyane le dibokeng tša phuthego.

11. Re ipontšha bjang re le ba amogelago seo moya o se bolelago ka “molaki e a bôtêxaxo yo bohlale”?

¹¹ Tsebišo yeo e newago ke “molaki e a bôtêxaxo yo bohlale” e reretšwe go matlafatša tumelo ya rena le go tlwaetša matla a rena a go nagana. (Ba-Hebere 5:14) Keletšo e bjalo e ka ba e akaretšago e le gore e dumelele yo mongwe le yo mongwe go e diriša ka boyena. Nako le nako, re amogela gape le keletšo yeo e bolelago ka dikarolo tše di lebanyago tša boitshwaro bja rena. Re swanetše go ba le boemo bja mohuta ofe bja kgopolo ge e ba re e-kwa e le ka kgonthe seo moya o se botšago diphuthego ka sehlopha sa molaki? Moapostola Paulo o araba ka gore: “Kwang baruti [bao ba etelelago pele, NW] ba lena, Le laiwê ke bôná.” (Ba-Hebere 13:17) Ke therešo gore bohle bao ba akaretšwago thulaganyong ye ke batho ba sa phethagalago. Lega go le bjalo, Jehofa o thabela go diriša bahlanka ba gagwe ba batho, le ge ba sa phethagala, bakeng sa go re hlahla mehleng ye ya bofelo.

Tlhahlo e Tšwago Letswalong la Rena

12, 13. (a) Ke mothopo ofe o mongwe wa tlhahlo wo Jehofa a re neilego wona? (b) Letswalo le ka ba le tutuetšo efe e nepagetšego le bathong bao ba se nago tsebo e nepagetšego ya Lentšu la Modimo?

¹² Jehofa o re neile mothopo o mongwe wa tlhahlo​—letswalo la rena. O bopile motho a e-na le maikwelo a ka gare a go lemoga se se nepagetšego le se se fošagetšego. Ke karolo ya tlhago ya rena. Lengwalong la gagwe leo a le ngwaletšego ba-Roma, moapostola Paulo o hlalositše gore: “Xobane ba-ntlê ba ba se naxo Molaô wó, xe ka nnoši ba dira tše di bolêlwaxo ke wôna Molaô, ké xo re mo xo bôná Molaô o xôna, le xe ba se ba wôna Molaô. Molaô wa bôná ke bôná beng; ba šupetša xore mo dipelong tša bôná xo ngwadilwe se Molaô o rataxo xe se dirwa; matswalô a bôná a ba hlatsêla xotee le mexopolô xe e bexana, le xe e êmêlana.”​—Ba-Roma 2:14, 15.

¹³ Ba bantši bao ba sa tlwaelanago le Jehofa, ka tekanyo e itšego ba ka kgona go dumelelanya dikgopolo tša bona le ditiro tša bona le melao ya motheo ya go boifa Modimo ya se se nepagetšego le se se fošagetšego. Go bjalo ka ge eka ba be ba e-kwa lentšu la tlasana leo le ba lebišago lehlakoreng le le nepagetšego. Ge e ba se se kgona go direga ka batho bao ba se nago tsebo e nepagetšego ya Lentšu la Modimo, gona lentšu leo la ka gare e swanetše go ba leo le bolelago kudu gakaakang go Bakriste ba therešo! Ka kgonthe, letswalo la Mokriste leo le louditšwego ke tsebo e nepagetšego ya Lentšu la Modimo le leo le šomago ka go dumelelana le moya o mokgethwa wa Jehofa le ka nea tlhahlo yeo e ka botwago.​—Ba-Roma 9:1.

14. Letswalo leo le tlwaeditšwego ka Beibele le ka re thuša bjang go latela tlhahlo ya moya wa Jehofa?

¹⁴ Letswalo le lebotse, leo le tlwaeditšwego ka Beibele, le ka re gopotša tsela yeo moya o nyakago re sepela ka yona. Go ka ba le dinako tšeo ka tšona Mangwalo goba dipuku tša rena tšeo di theilwego Beibeleng di sa bolelego ka go lebanya ka boemo bjo itšego bjo re ka ikhwetšago re le go bjona. Lega go le bjalo, letswalo la rena le ka re nea temošo, la re hlokomediša malebana le tsela yeo e ka bago e le e gobatšago. Maemong a bjalo, go hlokomologa ditaelo tša letswalo la rena ge e le gabotse go ka bolela go hlokomologa seo moya wa Jehofa o se bolelago. Ka lehlakoreng le lengwe, ka go ithuta go ithekga ka letswalo la rena la Bokriste leo le tlwaeditšwego, re ka dira dikgetho tše bohlale gaešita le ge go se na tlhahlo e lebanyago yeo e ngwadilwego. Lega go le bjalo, ke gabohlokwa gore re dule re gopola gore ge go se na molao wa motheo goba molao wo o tšwago go Modimo, e ka se be mo go swanetšego go rweša Bakriste-gotee dikahlolo tša letswalo la rena go seo e lego ditaba tša motho ka noši ka mo go feletšego.​—Ba-Roma 14:1-4; Ba-Galatia 6:5.

15, 16. Ke eng seo se ka bakelago letswalo la rena gore le se ke la šoma gabotse, gomme re ka thibela seo bjang gore se se ke sa direga?

¹⁵ Letswalo le le hlwekilego le le tlwaeditšwego ka Beibele ke mpho e botse e tšwago go Modimo. (Jakobo 1:17) Eupša re swanetše go šireletša mpho ye ditutuetšong tše di gobošago ge e ba re nyaka le šoma gabotse bjalo ka sedirišwa sa tšhireletšo ya boitshwaro. Meetlo ya lefelong, metlwae le mekgwa yeo e thulanago le ditekanyetšo tša Modimo e ka bakela letswalo la rena gore le se ke la šoma gabotse le go palelwa ke go re lebiša lehlakoreng le le nepagetšego ge e ba e latelwa. Re ka ipontšha re le bao ba sa kgonego go ahlola ditaba gabotse gomme re ka ba ra iphora ka go dumela gore tiro e mpe ge e le gabotse e lokile.​—Bapiša le Johane 16:2.

¹⁶ Ge e ba re tšwela pele re hlokomologa ditaelo tša letswalo la rena, lentšu la lona le tla fela matla go fihlela ge re retela boitshwarong. Mopsalme o boletše ka batho ba bjalo ge a be a re: “Dipelo tša bôná di reteletše wa makhura.” (Psalme 119:70) Ba bangwe bao ba hlokomologago ditemošo tša letswalo la bona ba lahlegelwa ke bokgoni bja go nagana gabotse. Ga ba sa hlahlwa ke melao ya motheo ya go boifa Modimo gomme ga ba kgone go dira diphetho tše di nepagetšego. Bakeng sa go phema boemo bjo bjalo, re swanetše go ba bao ba arabelago tlhahlong ya letswalo la rena la Bokriste gaešita le ge dikgang tšeo di belaelwago di ka bonagala e le tše nyenyane.​—Luka 16:10.

Go Thabile Bao ba Theetšago le Bao ba Kwago

17. Ge re dutše re theetša ‘lentšu leo le lego ka morago ga rena’ le go ya ka letswalo la rena le le tlwaeditšwego ka Beibele, re tla šegofatšwa bjang?

¹⁷ Ge re hlama mokgwa wa go theetša ‘lentšu leo le lego ka morago ga rena’​—bjalo ka ge o newa ka Mangwalo le ka molaki yo a botegago le yo bohlale​—le ge re dutše re ela hloko dikgopotšo tša letswalo la rena le le tlwaeditšwego ka Beibele, Jehofa o tla re šegofatša ka moya wa gagwe. Ke moka, moya o mokgethwa o tla loutša bokgoni bja rena bja go amogela le go kwešiša seo Jehofa a re botšago sona.

18, 19. Tlhahlo ya Jehofa e ka re hlahla bjang bodireding bja rena gotee le bophelong bja rena ka noši?

¹⁸ Moya wa Jehofa gape o tla re matlafaletša go lebeletšana le maemo a thata ka bohlale le ka sebete. Go swana le tabeng ya baapostola, moya wa Modimo o ka tutuetša matla a rena a monagano le go re thuša ka mehla gore re itshware le go bolela ka go dumelelana le melao ya motheo ya Beibele. (Mateo 10:18-20; Johane 14:26; Ditiro 4:5-8, 13, 31; 15:28) Moya wa Jehofa le maiteko a rena ka noši ge di kopantšwe di tla re tlišetša katlego ge re dira diphetho tše bohlokwa bophelong, tša re nea sebete sa go phethagatša diphetho tšeo. Ka mohlala, mo gongwe o ka ba o nagana ka go beakanya mokgwa wa gago wa go phela e le gore o dire nako e oketšegilego bakeng sa dilo tša moya. Goba mo gongwe o ka ba o lebeletšane le dikgetho tše bohlokwa tšeo di fetošago bophelo tše bjalo ka go kgetha molekane, go naganišiša ka mošomo wo motho a o newago goba go reka ntlo. Go e na le go dumelela maikwelo a rena a botho gore e be ona lebaka le nnoši tabeng ya go dira diphetho, re swanetše go theetša seo moya wa Modimo o se bolelago gomme re dire ka go dumelelana le tlhahlo ya wona.

¹⁹ Re tloga re leboga dikgopotšo tše botho gotee le dikeletšo tšeo re di amogelago di e-tšwa go Bakriste-gotee, go akaretša le bagolo. Lega go le bjalo, ga go nyakege gore ka mehla re letele gore ba bangwe ba re hlokomediše dilo. Ge e ba re tseba tsela e bohlale yeo re swanetšego go e latela le dipeakanyo tšeo re swanetšego go di dira boemong bja rena bja kgopolo le boitshwarong bja rena e le gore re kgahliše Modimo, a re direng bjalo. Jesu o itše: “Xe Le tseba tšeo, Le ba lehlôxônôlô xe Le di dira.”​—Johane 13:17.

20. Ke tšhegofatšo efe yeo e tlelago bao ba theetšago ‘lentšu leo le lego ka morago ga bona’?

²⁰ Go molaleng gore, gore re tsebe kamoo re ka kgahlišago Modimo ka gona, ga go nyakege gore Bakriste ba kwe lentšu la kgonthe le le tšwago legodimong, e bile ga go nyakege gore ba etelwe ke barongwa. Ba šegofaditšwe ka go ba le Lentšu la Modimo le le ngwadilwego le tlhahlo e lerato e tlago ka sehlopha sa gagwe se tloditšwego sa lefaseng. Ge e ba ba e-kwa ‘lentšu leo le lego ka morago ga bona’ ka kelohloko gomme ba latela tlhahlo ya letswalo la bona le le tlwaeditšwego ka Beibele, ba tla atlega go direng thato ya Modimo. Ke moka ba tla bona e le ka kgonthe kholofetšo ya moapostola Johane e phethagatšwa: “E a tl’o xo dula à le xôna xo ya xo ile, ké eo a diraxo tše Modimo a di rataxo.”​—1 Johane 2:17.

Poeletšo e Kopana

• Ke ka baka la’ng Jehofa a boledišana le tlholo ya gagwe yeo e lego batho?

• Re ka holwa bjang ke thulaganyo ya go bala Beibele ka mehla?

• Re swanetše go arabela bjang tlhahlong e tšwago go sehlopha sa molaki?

• Ke ka baka la’ng re sa swanela go hlokomologa ditaelo tša letswalo le le tlwaeditšwego ka Beibele?

[Dipotšišo tša Thuto]

[Seswantšho go letlakala 13]

Motho ga a nyake gore a be le sedirišwa se se raraganego gore a amogele melaetša e tšwago go Modimo

[Mothopo]

Courtesy Arecibo Observatory/David Parker/Science Photo Library

[Seswantšho go letlakala 15]

Jehofa o bolela le rena ka Beibele le ka “molaki e a bôtêxaxo yo bohlale”