Manyalo a Thabišago ao a Godišago Jehofa

Welsh le Elthea ba ile ba nyalana Soweto, Afrika Borwa, ka 1985. nako le nako ba lebelela alepamo ya bona ya lenyalo le morwedi wa bona Zinzi, gomme ba gopola letšatši leo le thabišago. zinzi o rata go hlaola batho bao ba bego ba tlile lenyalong gomme kudu-kudu o thabela diswantšho tša mmagwe yo a aperego gabotse kudu.

LENYALO le thomile ka polelo ya lenyalo yeo e ilego ya neelwa holong ya setšhaba kua Soweto. Ka morago ga moo sehlopha sa diopedi sa bafsa ba Bakriste se ile sa opelela Modimo dikoša tša tumišo ka dikarolo tše nne tšeo di dumelelanago. Ka morago ga moo, baeng ba ile ba thabela dijo ge theipi ya mmino wa diletšo ya Mmušo e be e bapalela fase ge go le gare go lewa. Go be go se na dino tše di tagago moo, gape go be go se na mmino o llelago godimo goba motantsho. Go e na le moo, baeng ba ile ba thabela go ba gotee le go lebogiša banyalani. Ditiragalo ka moka di ile tša tšea diiri tše e ka bago tše tharo. Mogolo wa Mokriste e lego Raymond o gopola gore: “E bile lenyalo leo le tla dulago le ntlišetša dikgopolo tše di rategago.”

Ka nako ya lenyalo la bona, Welsh le Elthea e be e le bašomi ba baithapi lekaleng la Watch Tower Bible and Tract Society la Afrika Borwa. Ba be ba ka kgona go fihlelela lenyalo leo le lekanetšego feela. Bakriste ba bangwe ba ile ba kgetha go tlogela bodiredi bja nako e tletšego ke moka ba hwetše mešomo ya boiphedišo e le gore ba kgone go akaretša ditshenyagalelo tša lenyalo la maemo. Lega go le bjalo, Welsh le Elthea ga se ba ka ba itshola gore ba ile ba kgetha go ba le lenyalo le le lekanetšego ka gobane le ile la ba dumelela gore ba tšwele pele ba hlankela Modimo e le badiredi ba nako e tletšego go fihlela Zinzi a belegwa.

Lega go le bjalo, go thwe’ng ge e ba bao ba itokišeletšago lenyalo ba kgetha gore go be le mmino wa lefase le motantsho lenyalong la bona? Go thwe’ng ge e ba ba nyaka gore go nwewe beine goba dino tše dingwe tše di tagago? Go thwe’ng ge e ba ba ka kgona go fihlelela lenyalo le legolo le leo le kukelwago godimo? Ba ka kgonthišetša bjang gore tiragalo e tla feleletša ka go ba tiragalo e thabišago yeo e swanelago barapedi ba Modimo? Dipotšišo tše bjalo di nyaka go naganišišwa ka kelohloko, ka gobane Beibele e laela gore: “Xe Le e-ja, xe Le e-nwa, tšohle tše Le di diraxo Le di dirê xore Modimo a retwê ka tšôna.”​—1 Ba-Korinthe 10:31.

Go Phema Moletlo wa Mašata

Go thata go nagana ka lenyalo leo le sa thabišego. Go na le kotsi e kgolo kudu ya go ya boemong bjo bongwe bjo bo feteletšego le go ba le lešata le lentši kudu leo le sa laolegego. Manyalong a mantši ao e sego a Dihlatse, go direga dilo tšeo di hlomphollago Modimo. Ka mohlala, go dirišwa ga dino tše di tagago go fihla boemong bja gore go be go tagwe ke mo go tlwaelegilego. Ka manyami, se se ile sa ba sa direga le manyalong a mangwe a Bakriste.

Beibele e lemoša gore “sebelá se n’e mašata.” (Diema 20:1) Lentšu la Sehebere leo le fetoletšwego e le “mašata” le bolela “go dira lešata le legolo.” Ge e ba bjala bo kgona go dira motho o tee gore a be le lešata, anke o nagane seo bo ka se dirago lešabeng le legolo la batho bao ba bokanago gotee gomme ba e-nwa kudu! Go molaleng gore ditiragalo tše bjalo di ka fetoga gabonolo gore e be “botaxwa, le [meletlo ya mašata, NW], le tše di swanaxo le tšeo,” tšeo di balwago ka Beibeleng e le “medirô ya nama.” Mekgwa e bjalo e dira gore batho le ge e le bafe bao ba sa itsholego ba se ke ba swanelegela go hwetša bophelo bjo bo sa felego ka tlase ga pušo ya Mmušo wa Modimo.​—Ba-Galatia 5:19-21.

Lentšu la Segerika bakeng sa “meletlo ya mašata” le be le dirišwa bakeng sa go hlalosa molokeloke wa mašata wa setarateng wa bafsa bao ba tagilwego go se nene bao ba bego ba opela, ba tantsha le go bapala mmino. Ge e ba go nwewa kudu lenyalong, le gona ge e ba mmino o llela godimo e bile go e-na  le motantsho woo o sa laolegego, go na le kotsi ya kgonthe ya gore tiragalo e tla fetoga selo se swanago le moletlo wa mašata. Tikologong e bjalo, batho bao ba fokolago ba ka wela tekong gabonolo gomme ba dire mediro e mengwe ya nama e bjalo ka “bootswa, le dithšila, le bohlôtlôlô [gomme ba ineela go ba] boxale.” Ke eng seo se ka dirwago bakeng sa go thibela mediro e bjalo ya nama gore e se ke ya šitiša lethabo la lenyalo la Bokriste? Bakeng sa go araba potšišo yeo, anke re eleng hloko seo Beibele e se bolelago mabapi le lenyalo le itšego.

Lenyalo Leo Jesu a Ilego a ya go Lona

Jesu le barutiwa ba gagwe ba ile ba laletšwa go ba gona lenyalong kua Kana ya Galilea. Ba ile ba amogela taletšo, gomme Jesu o ile a ba a tsenya le letsogo lethabong la tiragalo yeo. Ge beine e be e hlaela, ka mohlolo o ile a dira e nngwe e bose kudu. Ka morago ga lenyalo, yeo e ilego ya šala ka ntle le pelaelo e ile ya kgotsofatša dinyakwa tša monyadi yo a thabilego le ba lapa la gabo lebaka la nako e itšego.​—Johane 2:3-11.

Go na le dithuto tše mmalwa tšeo re ka ithutago tšona lenyalong leo Jesu a ilego a ya go lona. Ya mathomo, Jesu le barutiwa ba gagwe ga se ba ikela feela monyanyeng wa lenyalo ba sa laletšwa. Beibele e bolela ka go lebanya gore ba be ba laleditšwe. (Johane 2:1, 2) Ka mo go swanago, diswantšhong tše pedi tša menyanya ya manyalo, Jesu o ile a bolela leboelela ka baeng e le bao ba bilego gona ka gobane ba be ba laleditšwe.​—Mateo 22:2-4, 8, 9; Luka 14:8-10.

Dinageng tše dingwe ke mo go tlwaelegilego gore yo mongwe le yo mongwe setšhabeng a ikwe a lokologile go ka ya lenyalong go sa šetšwe gore o laleditšwe goba go se bjalo. Lega go le bjalo, se se ka lebiša mathateng a tša ditšhelete. Babeeletšani bao ba sa ikemelago ditšheleteng ba ka tsena dikolotong bakeng sa go kgonthišetša gore go na le dijo tše lekanego le dino bakeng sa batho ba sa lekanyetšwago. Ka gona, ge e ba Bakriste bao ba itokišeletšago lenyalo ba kgetha go ba le pokano ya bogwera e lekanyeditšwego le baeng ba palo e itšego, se se swanetše go kwešišwa le go hlompšha ke Bakriste-gotee le bona bao ba sa laletšwago. Monna yo a nyaletšego Cape Town, Afrika Borwa, o gopola a laletša baeng ba 200 lenyalong la gagwe. Lega go le bjalo, go ile gwa tla ba 600 gomme kapejana batho ba ile ba hlaelwa ke dijo. Gare ga batho bao ba bego ba sa laletšwa go be go e-na le sehlopha sa pese sa baeng seo go diragetšego gore se be se boga Cape Town ka mafelo-beke a lenyalo. Molaodi wa pese ye ya batho bao ba bogago naga e be e le motswalo wa kgole wa monyadiwa gomme a dumela gore o be a e-na le tshwanelo ya go ka tliša sehlopha ka moka ka ntle le go ka boledišana le monyadiwa goba monyadi!

Ka ntle le ge e ba go boletšwe gore pokano ya bogwera e buletšwe motho yo mongwe le yo mongwe, molatedi wa kgonthe wa Jesu o tla phema go ba gona dipokanong tša bogwera tša manyalo a sa laletšwa gaešita le go tšea karolo dijong le dinong tšeo di lokišeleditšwego baeng bao ba laleditšwego. Bao ba lekegago go ya ba se ba laletšwa ba swanetše go ipotšiša gore, ‘Na go ya ga-ka monyanyeng wo wa lenyalong go ka se bontšhe go hloka lerato go banyalani ba bafsa? Na nka se bake mathata le go šitiša lethabo la moletlo?’ Go e na le go kgopišwa ke go se laletšwe, Mokriste yo a kwešišago ka lerato a ka romela molaetša bakeng sa go lebogiša banyalani le go ba lakaletša ditšhegofatšo tša Jehofa. A ka ba a nagana go thuša banyalani ka go ba romela mpho go okeletša lethabong la letšatši la lenyalo la bona.​—Mmoledi 7:9; Ba-Efeso 4:28.

Ke Mang yo a Ikarabelago?

Dikarolong tša Afrika, ke tlwaelo gore metswalo yeo e godilego e dire ditokišetšo tša lenyalo. Bao ba itokišeletšago lenyalo ba ka ikwa ba thabile ka se, ka ge se ba imolla boikarabelong bja bona bja tša ditšhelete. Gape ba ka ba ba nagana gore se se ba imolla le boikarabelong bja selo se sengwe le se sengwe seo se ka diregago. Lega go le bjalo, pele ga ge ba ka amogela mohuta le ge e le ofe wa thušo go metswalo yeo e nago le maikemišetšo a mabotse, bao ba itokišeletšago lenyalo ba swanetše go kgonthišega gore dikganyogo tša bona tša motho ka noši di tla hlompšha.

Gaešita le ge Jesu e be e le Morwa wa Modimo yo a “foloxilexo lexodimong,” ga go na pontšho ya gore o ile a itšeela taolo ka diatleng gomme a laola dilo tše dintši lenyalong la kua Kana. (Johane 6:41) Go e na le moo, pego ya Beibele e re botša gore go be go kgethilwe motho yo mongwe yo a itšego gore a šome bjalo ka “molaodi wa monyanya.” (Johane 2:8, NW) Ka morago monna yo, o be a kgona go nea dikarabo go hlogo e mpsha ya lapa e lego monyadi ge a botšišwa.​—Johane 2:9, 10.

Metswalo ya Bakriste e swanetše go hlompha hlogo e kgethilwego ke Modimo ya lapa le lefsa. (Ba-Kolose 3:18-20) Ke yena yo a swanetšego go rwala boikarabelo bja seo se diregago lenyalong la gagwe.  Ee, monyadi o swanetše go ba le teka-tekano gomme ge e ba go kgonega, a kgone go itumelelanya le dikganyogo tša monyadiwa wa gagwe, batswadi ba gagwe le ba bogweng bja gagwe. Go sa dutše go le bjalo, ge e ba metswalo e phegelela go lokišetša ditaba ka mo go fapanego le dikganyogo tša bao ba itokišeletšago lenyalo, gona ba ka swanelwa ke gore ba gane thušo ya bona ka botho gomme ba lefe ditshenyagalelo bakeng sa go dira lenyalo la bona leo le lekanetšego. Ka tsela ye, ga go na selo seo se tla diregago seo se tlogelago banyalani ka dikgopolo tšeo di sa thabišego. Ka mohlala, lenyalong la Bakriste Afrika, motswalo yo a sa dumelego yo e bego e le moswara-marapo wa monyanya o ile a emišetša digalase godimo le go di bethantšha bakeng sa go hlompha bagologolo!

Ka dinako tše dingwe banyalani ba tšea leeto la bona la go ya maikhutšong a ka morago ga lenyalo pele ga ge moletlo wa lenyalo o ka fela. Boemong bjo bjalo, monyadi o swanetše go rulaganya gore go be le batho bao ba nago le boikarabelo e le gore ba kgonthišetše gore ditekanyetšo tša Beibele di a kgomarelwa le gore moletlo o fela nako e sa le gona.

Go Rulaganya ka Bohlale le Teka-tekano

Go molaleng gore go be go e-na le dijo tše dintši tše dibose lenyalong leo Jesu a ilego a ya go lona ka gobane Beibele e le hlalosa e le monyanya wa lenyalo. Bjalo ka ge go bontšhitšwe, go be go bile go e-na le beine e ntši. Ka ntle le pelaelo, go be go e-na le mmino o swanetšego le motantsho o hlomphegago ka gobane se e be e le mokgwa woo ba-Juda ba bego ba tlwaetše go phela ka wona. Jesu o ile a bontšha se seswantšhong sa gagwe seo se tumilego sa morwa wa lehlaswa. Tate yo a humilego wa kanegelo yeo o be a thabetše kudu go boa ga morwa wa gagwe yo a bego a itshola moo a ilego a re: “Re tlê re jê re thabê.” Go ya ka Jesu, mokete o be o akaretša “diletšô le dikoša.”​—Luka 15:23, 25.

Lega go le bjalo, ka mo go kgahlišago, Beibele ga e bolele ka go lebanya ka mmino le motantsho lenyalong la Kana. Ge e le gabotse, ga go na mo go bolelwago ka motantsho dipegong le ge e le dife tša Beibele tša manyalo. Go be go tla bonala eka gare ga bahlanka ba Modimo ba botegago ba mehleng ya Beibele, motantsho o be o e-ba gona ka sewelo gomme e se selo se segolo bakeng sa manyalo a bona. Na re ka ithuta se itšego go se?

Manyalong a mangwe a Bakriste Afrika, go dirišwa didirišwa tše matla tša modumo tša electronic. Mmino o ka llela godimo kudu moo e lego gore baeng ba ka palelwa ke go swara mehlamu ka bolokologi. Ka dinako tše dingwe go ba le go hlaela ga dijo mo go bonagalago, eupša ga go ke go e-ba le go hlaela ga motantsho wo o fetogago woo o sa laolegego. Go e na le go ba moletlo wa lenyalo, meletlo e bjalo e ka fetoga gabonolo lebaka la go itšhireletša la go ba pokano ya motantsho. Go oketša moo, mmino o llelago godimo gantši o gogela batho bao ba bakago mathata, le batho bao ba sa tsebjego bao ba fo go tla ba se ba laletšwa.

Ka ge pego ya Beibele ya manyalo e sa gatelele mmino le motantsho, na se ga se sa swanela go hlahla bao ba itokišeletšago lenyalo bao ba rulaganyetšago go ba le lenyalo leo le tlago go godiša Jehofa? Lega go le bjalo, go lokišetšweng ga manyalo a mantši ao a sa tšwago go feta ka borwa bja Afrika, bafsa ba Bakriste bao ba bego ba kgethilwe bakeng sa go ba karolo ya bafelegetši ba monyadi le monyadiwa ba be ba fetša diiri tše dintši ba itokišeletša ditepe tša motantsho tše thata. Lebaka la dikgwedi tše dintši nako ya bona e ntši ka mo go feteletšego e be e šomišwa ka mokgwa wo. Eupša Bakriste ba swanetše go ‘thakanela sebaka se sebotse’ bakeng sa ‘dilo tše bohlokwa kudu,’ tše bjalo ka modiro wa boebangedi, thuto ya motho ka noši le go ba gona dibokeng tša Bokriste.​—Ba-Efeso 5:16; Ba-Filipi 1:10, bapiša le NW.

Go ya ka tekanyo ya beine yeo Jesu a ilego a e dira, go bonagala gore lenyalo la kua Kana e be e le legolo le la maemo a godimo. Lega go le bjalo, re ka kgonthišega gore moletlo e be e se wa lešata le gore baeng ga se ba ka ba šomiša bjala ka mo go feteletšego bjalo ka ge go be go e-ba bjalo manyalong a mangwe a ba-Juda. (Johane 2:10) Re ka kgonthišega bjang ka se? Ka gobane Morena Jesu Kriste o be a le gona. Go batho ka moka, Jesu e be e tla ba yena yo a elago hloko kudu go feta bohle tabeng ya go kwa taelo ya Modimo e lego mabapi le ditlwaelano tše mpe: “O se kê wa tlwaêlana le dihori tša sebelá.”​—Diema 23:20.

 Ka gona ge e ba bao ba itokišeletšago lenyalo ba phetha ka gore go be le beine goba dino le ge e le dife tše di tagago lenyalong la bona, ba swanetše go lokišeletša gore se se dirwe ka tlase ga taolo e tiilego ya batho bao ba nago le boikarabelo. Gomme ge e ba ba kgetha go ba le mmino, ba swanetše go kgetha melodi yeo e swanetšego gomme go be le motho yo a ikarabelago yo a tla bego a hlokometše modumo. Baeng ga se ba swanelwa go dumelelwa gore ba itšeele dilo ka diatleng gomme ba tšweletše mmino wo o belaetšago goba ba oketše modumo go fihla bokgoleng bjoo o dirago lešata kudu. Ge e ba go tlo ba le motantsho, o swanetše go dirwa ka tsela e nago le seriti le tsela e laolegago. Ge e ba metswalo yeo e sa dumelego goba Bakriste bao ba sego ba gola moyeng ba dira metantsho yeo e sa hlomphegego goba ya go tsoša kganyogo ya kopano ya botona le botshadi, monyadi o tla swanela ke go fetoša mohuta wa mmino wo o bapalwago goba ka bohlale a kgopele gore motantsho woo o kgaotše. Ge e ba go ka se be bjalo, lenyalo le ka fetoga tiragalo e gobogilego gomme la bakela ba bangwe go kgopišega.​—Ba-Roma 14:21.

Ka baka la dikotsi tšeo di lego gona mehuteng e mengwe ya metantsho ya sebjale-bjale, mmino o llelago godimo le go ntšhwa ga bjala ka bolokologi, banyadi ba mmalwa ba ile ba phetha ka gore ba se ke ba akaretša dilo tše lenyalong la bona. Ba bangwe ba ile ba solwa bakeng sa se, eupša go e-na le moo ba swanetšwe go retwa ka baka la kganyogo ya bona ya go kganyoga go phema selo le ge e le sefe seo se ka tlišago kgobošo leineng le lekgethwa la Modimo. Ka lehlakoreng le lengwe, banyadi ba bangwe ba lokišeletša mmino o swanetšego, nako ya go tantsha gomme bjala bo newa ka tekanyetšo. Boemong le ge e le bofe monyadi o ikarabela bakeng sa seo a dumelelago gore se direge lenyalong la gagwe.

Afrika ba bangwe bao ba sego ba gola gabotse moyeng ba tšeela fase manyalo ao a nago le seriti a Bokriste gomme ba bolela gore go swana le gore ba ile lehung. Lega go le bjalo, yeo ga se pono e leka-lekanego. Mediro ya sebe ya nama e ka tliša lethabo la nakwana, eupša e tlogela Bakriste ka letswalo le le tshwenyegilego le go tliša kgobošo leineng la Modimo. (Ba-Roma 2:24) Ka lehlakoreng le lengwe, moya o mokgethwa wa Modimo o tšweletša lethabo la kgonthe. (Ba-Galatia 5:22) Banyalani ba bantši ba Bakriste ba gadima morago ka boikgantšho letšatšing la bona la lenyalo, ba tseba gore e be e le tiragalo e thabišago e sego ‘e kgopišago.’​—2 Ba-Korinthe 6:3.

Welsh le Elthea ba sa dutše ba gopola ditlhaloso tše botse tša metswalo e sa dumelego yeo e ilego ya ba gona lenyalong la bona. Yo mongwe o itše: “Re lapišitšwe kudu ke manyalo a mašata ao a bago gona matšatšing a. Go be go le bose go ba gona lenyalong le le nago le seriti gatee.”

Selo sa bohlokwa kudu, manyalo a Bokriste ao a thabišago le ao a nago le seriti a tumiša Mothomi wa lenyalo, Jehofa Modimo.

[Lepokisi/Seswantšho go letlakala 22]

LELOKELELO LA DILO TŠEO DI KA DIRWAGO POKANONG YA LENYALO

• Ge e ba o laletša motswalo yo a sa dumelego gore a nee polelo, na o kgonthišeditše gore a ka se tsenye meetlo e mengwe e sego ya Bokriste?

• Ge e ba mmino o tla bapalwa, na o kgethile dikoša tše di swanetšego feela?

• Na mmino wa gago o tla bapalwa ka modumo o lekanyeditšwego?

• Ge e ba motantsho o dumeletšwe, na o tla dirwa ka tsela e nago le seriti?

• Na bjala bo tla newa ka mokgwa wa go lekanyetša?

• Na bao ba ikarabelago ba tla laola go ntšhwa ga bjona?

• Na o beile nako e lekanetšego bakeng sa gore monyanya wa lenyalo o fele?

• Na go tla ba le bao ba ikarabelelago bakeng sa go kgonthišetša taolo go fihla mafelelong?