Thekga Thuto ya Modimo ka go Tia

“Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”​—DIEMA 3:5, 6.

1. Re hwetša bjang tsebo ya motho kudu go feta le ge e le neng pele?

MO NAKONG ye, go na le dikuranta tša letšatši le letšatši tše ka bago 9 000 tšeo di abjago lefaseng ka bophara. Ngwageng o mongwe le o mongwe go gatišwa dipuku tše ka bago 200 000 kua United States e nnoši. Go ya ka kakanyetšo e nngwe, ka March 1998, go be go na le matlakala a Web a ka bago dimilione tše 275 go Internet. Go thwe palo ye e gola ka tekanyo ya matlakala a dimilione tše 20 ka kgwedi. Go feta le ge e le neng pele, batho ba kgona go hwetša tsebišo e lego mabapi le taba e nngwe le e nngwe. Le ge boemo bjo bo e-na le dibopego tša bjona tše kgahlišago, fela boati bjo bogolo gakaalo bja tsebišo bo bakile mathata.

2. Ke mathata afe ao a ka bakwago ke go hwetša tsebišo e ntši kudu?

² Batho ba bangwe ba fetogile bao ba lemaletšego tsebišo, ka mehla ba kgotsofatša kganyogo ya bona yeo e sa kgotsofatšwego gore e dule e le nakong mola ba hlokomologa dilo tšeo di lego bohlokwa kudu. Ba bangwe ba hwetša tsebišo e sa felelago mabapi le mahlakore a tseneletšego a tsebo ke moka ba itšea e le ditsebi. Ba ithekgile ka kwešišo e lekanyeditšwego feela, ba ka dira diphetho tše dikgolo tšeo di ka gobatšago bona goba batho ba bangwe. Kotsi yeo e dulago e le gona ke ya go hwetša tsebišo ya maaka goba yeo e sa nepagalago. Gantši ga go ke go e-ba le tsela e ka botwago ya go kgonthišetša gore tsebišo e ntši ke e nepagetšego le e leka-lekanego.

3. Ke ditemošo dife mabapi le go phegelela bohlale bja batho tšeo di hwetšwago ka Beibeleng?

³ Go rata go tseba ke seka seo e lego kgale batho ba e-na le sona. Dikotsi tša go senya nako e ntši kudu go phegeleleng tsebišo e se nago mohola goba gaešita le yeo e bilego e le e gobatšago di ile tša lemogwa morago kua mehleng ya Kgoši Salomo. O itše: “A nke ke Xo eletšê. Tša xo ngwala mangwalô a mantši xa di fêle, ’me xo ithuta tše ntši xo lapiša mmele.” (Mmoledi 12:12) Nywaga-kgolo ka morago Paulo o ile a ngwalela Timotheo gore: “Diša tše di dixetšwexo wene. Ilá merêrô ya lefêla ye e sa holexo selô, le diphetolanô tša ba aketšaxo ba re ké yôna tsebô. Ké tsebô ye ba bangwê ba ipolêlaxo ka yôna, ’me ya ba xo aroxa tumêlô.” (1 Timotheo 6:20, 21) Ee, Bakriste lehono ba swanetše go phema go itebanya ka mo go sa nyakegego le dikgopolo tše di gobatšago.

4. Tsela e nngwe yeo ka yona re ka bontšhago go bota ga rena Jehofa le dithuto tša gagwe ke efe?

⁴ Batho ba Jehofa gape ba dira gabotse go kwa mantšu a Diema 3:5, 6: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Go bota Jehofa go akaretša go gana kgopolo le ge e le efe yeo e thulanago le Lentšu la Modimo, go sa šetšwe gore e tšwa mabakeng a rena goba go a mogagabo rena. Bakeng sa go šireletša boemo bja rena bja moya, ke gabohlokwa gore re tlwaetše matla a rena a go nagana e le gore re ka kgona go lemoga tsebišo e gobatšago ke moka re e pheme. (Ba-Hebere 5:14) Anke re ahla-ahleng e mengwe ya methopo ya tsebišo e bjalo.

Lefase Leo le Fenywago ke Sathane

5. Mothopo o mongwe wa dikgopolo tše di gobatšago ke ofe, gomme ke mang yo a o hlohleletšago?

⁵ Lefase ke mothopo o atlegago wa dikgopolo  tše di gobatšago. (1 Ba-Korinthe 3:19) Jesu Kriste o ile a rapela Modimo mabapi le barutiwa ba gagwe ka gore: “Xa ke kxopele xore O ba tlošê lefaseng; ke ba kxopêlêla xo phêmêlwa [go yo mobe, NW].” (Johane 17:15) Kgopelo ya Jesu ya go kgopela gore barutiwa ba gagwe ba šireletšwe go “yo mobe” e ile ya bontšha tutuetšo yeo Sathane a nago le yona lefaseng. Go ba ga rena Bakriste ga go re šireletše ka go itiragalela feela ditutuetšong tše mpe tša lefase le. Johane o ngwadile gore: “Re a tseba gore re tšwa go Modimo, eupša lefase ka moka le rapaletše matleng a yo mobe.” (1 Johane 5:19, NW) Kudu-kudu karolong ye ya mafelelo ya mehla ya bofelo, go ka letelwa gore Sathane le batemona ba gagwe ba tla tlatša lefase ka tsebišo e gobatšago.

6. Lefase la boithabišo le ka baka bjang go se sa tshwenyega ka boitshwaro?

⁶ Gape go ka letelwa gore karolo e nngwe ya tsebišo ye e gobatšago e ka bonagala e le yeo e sa gobatšego. (2 Ba-Korinthe 11:14) Ka mohlala, ela hloko boithabišo bja lefase bjoo bo nago le dipontšho tša bjona tše dintši tša TV, dipaesekopo, mmino le dipuku. Ba bantši ba dumela gore mabakeng a mantši kudu, dibopego tše itšego tša boithabišo di kgothaletša mekgwa e gobošago, e bjalo ka boitshwaro bjo bo gobogilego, bošoro le go diriša dihlare-tagi gampe. Ka go ba sebopegong se itšego sa boithabišo bjo bo gobogilego kudu la mathomo, batho ba ka tšhoga. Eupša go ba go bjona leboelela go ka retetša motho. Le ka mohla ga se ra swanela go lebelela boithabišo bjo bo kgothaletšago dikgopolo tše di gobatšago e le bjo bo amogelegago goba bjo bo sa gobatšego.​—Psalme 119:37.

7. Ke bohlale bja mohuta ofe bja motho bjo bo ka gogolago go bota ga rena Beibele?

⁷ Ela hloko mothopo o mongwe wa tsebišo yeo e ka bago e gobatšago​—dikgopolo tše dintši tšeo di gatišwago ke bo-rathutamahlale ba bangwe gotee le diithuti tšeo di belaelago go nepagala ga Beibele. (Bapiša le Jakobo 3:15.) Taba e bjalo e tšwelelela leboelela dimakasineng tše dikgolo le dipukung tše di ratwago kudu, gomme e ka gogola go bota ga motho Beibele. Batho ba bangwe ba ikgantšha ka taba ya go fokodiša matla a Lentšu la Modimo ka go dira dikakanyo tše di sa felego. Go bile le kotsi e swanago mehleng ya baapostola, ka ge e bontšhwa gabotse ke mantšu a moapostola Paulo a rego: “Le phafoxê xore xo se bê le a kaxo Le thopa ka mabohlale, ka xo Le fora ka mafêla, ka xo ya ka melawana ya batho, le ka dithutô tša mathômô a lexohle, è se xo ya le Kriste.”​—Ba-Kolose 2:8.

Manaba a Therešo

8, 9. Bohlanogi bo iponagatša bjang lehono?

⁸ Bahlanogi ba ka baka kotsi e nngwe gape boemong bja rena bja moya. Moapostola Paulo o ile a bolela e sa le pele gore bohlanogi bo be bo tla tšwelela magareng ga bao ba ipolelago gore ke Bakriste. (Ditiro 20:29, 30; 2 Ba-Thesalonika 2:3) E le go phethagala ga mantšu a gagwe, ka morago ga lehu la baapostola, bohlanogi bjo bogolo bo ile bja lebiša go tšweleleng ga Bojakane. Lehono, ga go na bohlanogi bjo bogolo bjo bo diregago gare ga batho ba Modimo. Lega go le bjalo, batho ba mmalwa ba re tlogetše, gomme ba bangwe gare ga bona ba ikemišeditše go senya Dihlatse tša Jehofa leina ka go gaša maaka le tsebišo e fošagetšego. Ke ba mmalwa ba šomago le dihlopha tše dingwe mokgweng o rulagantšwego wa go ganetšana le borapedi bjo bo sekilego. Ka go dira bjalo, ba ema lehlakoreng la mohlanogi wa pele-pele, e lego Sathane.

⁹ Bahlanogi ba bangwe ba diriša ka mo go oketšegilego dibopego tše di fapa-fapanego tša mekgwa e mentši ya poledišano, go akaretša le Internet, bakeng sa go gaša tsebišo ya maaka ka Dihlatse tša Jehofa. Ka baka leo, ge batho ba botegago ba dira nyakišišo ka ditumelo tša rena, ba ka no gahlana le dipolelo tša maaka tša bahlanogi. Gaešita le Dihlatse tše dingwe di ile tša itebanya le tsebišo ye e gobatšago ka go se tsebe. Go oketša moo, bahlanogi ba fela ba tšea karolo mananeong a thelebišene le a radio. Ke tsela efe e bohlale yeo e ka latelwago tabeng ye?

10. Karabelo e bohlale dipolelong tša maaka tša bahlanogi ke efe?

¹⁰ Moapostola Johane o ile a laela Bakriste gore ba se ke ba amogela bahlanogi magaeng a bona. O ngwadile gore: “Motho e a kaxo tla xo lena, ’me a se tlišê thutô yé, se mo amoxeleng ka xaê, Le lesê le xo mo dumediša. Xobane e a kaxo re: Thabang! à e-ra motho eo, ó ikôpanya le medirô e mebe ya xaxwe.” (2 Johane 10, 11) Go phema ka go mo go feletšego go ikopanya le baganetši ba go tla re šireletša kgopolong ya bona e gobogilego. Go itebanya le dithuto tša bahlanogi ka mekgwa e fapa-fapanego ya poledišano ya mehleng yeno go kotsi go etša go amogela mohlanogi ka boyena magaeng a rena. Le ka mohla ga se ra swanela go dumelela go rata go tseba go re gokeletša tseleng e bjalo e gobatšago!​—Diema 22:3.

Ka Phuthegong

11, 12. (a) Ke eng seo e bego e le mothopo wa dikgopolo tše di gobatšago phuthegong ya lekgolong la pele la nywaga? (b) Bakriste ba bangwe ba ile ba palelwa bjang ke go thekga dithuto tša Modimo ka go tia?

¹¹ Ela hloko seo e ka bago mothopo o mongwe wa dikgopolo tše di gobatšago. Le ge a ka ba a sa rera go ruta maaka, Mokriste yo a ineetšego a ka ba le mokgwa wa go bolela ka go se nagane. (Diema 12:18) Ka baka la go se phethagale ga rena, ka moka ga rena ka dinako tše dingwe re tla senya ka leleme la rena. (Diema 10:19; Jakobo 3:8) Go bonagala mehleng ya moapostola Paulo go be go e-na le ba bangwe ka phuthegong bao ba bego ba palelwa ke go laola leleme la bona gomme ba akaretšwa dingangišanong tše di hlabago ka mantšu. (1 Timotheo 2:8) Go be go e-na le ba bangwe bao ba bego ba ikgopola kudu ka dikgopolo tša bona ka noši e bile ba ba ba ya le bokgoleng bja go hlohla matla a Paulo a taolo. (2 Ba-Korinthe 10:10-12) Moya o bjalo o ile wa feleletša ka dintwa tše di sa nyakegego.

¹² Ka dinako tše dingwe go se kwane mo go be go golela go beng “diphapang tša lefêla” tšeo di bego di šitiša khutšo ya phuthego. (1 Timotheo 6:5; Ba-Galatia 5:15) Paulo ge a ngwala ka bao ba bakago diphapang tšeo o itše: “Xe motho a ka ruta tše šele à sa ye ka Mantšu a Mong wa rena Jesu Kriste, ka Mantšu a a se naxo bolwetši, le ka thutô ye e amanaxo le borapedi, ó foufetše ka boikxoxomošô, mola a sa tsebe selô; bolwetši bya xaxwe ké xo bata dikxang le diphetolanô tša xo tsoša moná le thšitanô le maroxa le kxônônô tše mpe.”​—1 Timotheo 6:3, 4.

13. Boitshwaro bja Bakriste ba bantši ba lekgolong la pele la nywaga e be e le bofe?

¹³ Ka mo go thabišago, mehleng ya baapostola bontši bja Bakriste bo ile bja botega gomme bja dula bo lebišitše tlhokomelo modirong wa go bolela ditaba tše di lokilego tša Mmušo wa Modimo. Ba be ba swaregile ka “xo hlôla dišuana le bahlôlôxadi mahlokong a bôná,” gomme ba ipoloka ‘gore lefase le se ba šilafatše,’ ba sa senye nako ya bona dingangišanong tše di sa rego selo mabapi le mantšu. (Jakobo 1:27) Ba ile ba phema “ditlwaelano tše mpe” gaešita le ka phuthegong ya Bokriste e le gore ba šireletše boemo bja bona bja moya.​—1 Ba-Korinthe 15:33, NW; 2 Timotheo 2:20, 21.

14. Ge e ba re sa hlokomele, go fana dikgopolo mo go tlwaelegilego go ka golela bjang dingangišanong tše di gobatšago?

¹⁴ Ka mo go swanago, maemo ao a hlalositšwego go serapa 11 ga se ao a tlwaelegilego diphuthegong tša Dihlatse tša Jehofa lehono. Lega go le bjalo, re dira gabotse go hlokomela kgonagalo ya dingangišano tše bjalo tša lefeela. Ke therešo gore ke gatlhago go boledišana ka dipego tša Beibele goba go ipotšiša mabapi le dibopego tša lefase le lefsa le le holofeditšwego tšeo di sa hlwago di utollwa. Le gona ga go na phošo tabeng ya go fana dikgopolo ditabeng tša motho ka noši, tše bjalo ka moaparo le go itokiša goba kgetho ya boithabišo. Lega go le bjalo, ge e ba re kgomarela pono e sa fetogego mabapi le dikgopolo tša rena gomme re kgopišega ge ba bangwe ba sa dumelelane le rena, phuthego e ka feleletša e arogane ka baka la dikgang tše dinyenyane. Polelo yeo e thomago e le yeo e sa gobatšego e ka fetoga yeo e gobatšago e le ka kgonthe.

Go Šireletša Thoto ya Rena

15. “Dithuto tša batemona” di ka re gobatša moyeng go fihla bokgoleng bofe, gomme ke keletšo efe yeo e newago ka Mangwalong?

¹⁵ Moapostola Paulo o lemoša ka gore: “Môya ó boletše xwa kwala, wa re mehleng e tl’o xo tla ba bangwê ba tlo hlanoxêla tumêlô, ba ya le meôya ya xo fora batho, ba ya le dithutô tša meôya e mebe.” (1 Timotheo 4:1) Ee, dikgopolo tše di gobatšago di ka rotoša kotsi e kgolo. Ka mo go kwešišegago, Paulo o ile a lopa mogwera wa gagwe yo a rategago Timotheo ka gore: “Timotheo! Diša tše di dixetšwexo wene. Ilá merêrô ya lefêla ye e sa holexo selô, le diphetolanô tša ba aketšaxo ba re ké yôna tsebô. Ké tsebô ye ba bangwê ba ipolêlaxo ka yôna, ’me ya ba xo aroxa tumêlô.”​—1 Timotheo 6:20, 21.

16, 17. Modimo o re neile eng, gomme re swanetše go e diša bjang?

¹⁶ Lehono re ka holwa bjang ke temošo ye e lerato? Timotheo o be a filwe thoto​—selo se bohlokwa seo se bego se swanetše go hlokomelwa le go šireletšwa. E be e le eng? Paulo o hlalosa gore: “Mantšu ao a se naxo senyalô, a O a kwilexo xo nna, O tšeê ka mohlala wa ôna, ka tumêlô le ka leratô, le re le hwetšaxo xo Jesu Kriste. Se O beetšwexo sôna, O ipolokêlê sôna ka Môya-mokxêthwa wo o axilexo mo xo rena.” (2 Timotheo 1:13, 14) Ee, thoto ya Timotheo e be e akaretša “mantšu ao a se naxo bolwetši,” “thutô ye e amanaxo le borapedi.” (1 Timotheo 6:3) Ka go dumelelana le mantšu a, lehono Bakriste ba ikemišeditše go šireletša tumelo ya bona le tekanyo ya therešo yeo ba e neilwego.

¹⁷ Go šireletša thoto yeo go akaretša go hlagolela dilo tše bjalo ka mekgwa e mebotse ya go ithuta Beibele le go phegelela thapelong, mola re le gare re ‘dira botse, re bo direla batho bohle, gagolo re bo direla batho babo rena ba tumelo.’ (Ba-Galatia 6:10; Ba-Roma 12:11-17) Paulo o nea keletšo e tšwelago pele e rego: “O phêxêlêlê tokô, le borapedi, le tumêlô le leratô, le kxôtlêlêlô, le bonôlô. Hlabana thlabanô e botse ya tumêlô, O thopê bophelô byo bo sa felexo, byo O bileditšwexo byôna, wa ipolêla o botse pele xa dihlatse tše ntši.” (1 Timotheo 6:11, 12) Go diriša ga Paulo dipolelwana tše swanago le “hlabana thlabanô e botse” le “o thopê” go hlalosa taba ka mo go kwalago gore re swanetše go gana ka mafolofolo le ka boikemišetšo ditutuetšo tšeo di gobatšago moyeng.

Go Nyakega ga Temogo

18. Re ka bontšha bjang teka-tekano ya Bokriste tseleng yeo re lebelelago tsebišo ya lefase ka gona?

¹⁸ Ee, ge re e-lwa ntwa e botse ya tumelo, go nyakega temogo. (Diema 2:11; Ba-Filipi 1:9) Ka  mohlala, e tla ba mo go hlokago tlhaologanyo go se bote tsebišo ka moka ya lefase. (Ba-Filipi 4:5; Jakobo 3:17) Ga se dikgopolo ka moka tša batho tšeo di thulanago le Lentšu la Modimo. Jesu o ile a bontšha go nyakega ga gore batho ba babjago ba ye ngakeng yeo e nago le mangwalo​—e lego modiro wa ditsebi wa lefase. (Luka 5:31) Go sa šetšwe go ba ga kalafo ya dihlare yeo e bego e le maemong a tlase mehleng ya Jesu, o be a dumela gore go be go e-na le mohola o itšego wo o hwetšwago thušong ya ngaka. Bakriste lehono ba bontšha teka-tekano tabeng ya tsebišo ya lefase, eupša ba phema go itebanya le tsebišo le ge e le efe yeo e ka ba gobatšago moyeng.

19, 20. (a) Bagolo ba gata mogato bjang ka temogo ge ba thuša bao ba bolelago ka tsela ya go se nagane? (b) Phuthego e swaragana bjang le bao ba phegelelago go kgothaletša dithuto tša maaka?

¹⁹ Temogo e bile e a nyakega le go bagolo ge ba biditšwe gore ba tlo thuša bao ba bolelago ka tsela e sego ya bohlale. (2 Timotheo 2:7) Ka dinako tše dingwe, ditho tša phuthego di ka tsenela dingangišano tše di lego mabapi le ditaba tša lefeela le dipolelo tša go ikgopolela. Bakeng sa go šireletša botee bja phuthego, bagolo ba swanetše go akgofela go bolela ka mathata a bjalo. Ka nako e swanago, ba phema go latofatša banababo bona ka maikwelo a fošagetšego e bile ga ba akgofele go ba tšea e le bahlanogi.

²⁰ Paulo o hlalositše moya woo thušo e ka newago ka wona. O itše: “Bana bešo, xe motho a thšoxa à wetše molatong, lena ba Le lexo ba Môya, Le mo tsošê ka môya o bonôlô.” (Ba-Galatia 6:1) Juda ge a bolela ka go lebanya malebana le Bakriste bao ba swarišitšwego bothata ke dipelaelo, o itše: “Xe xo na le ba ba dika-dikaxo, Le ba eletšê, Le ba phološê byalo ka xe Le ubula motho mollong.” (Juda 22, 23) Ee, ge e ba motho yo mongwe a phegelela go kgothaletša dithuto tša maaka ka morago ga ge a neilwe dikeletšo leboelela, bagolo ba swanetše go gata mogato wa makgaola-kgang bakeng sa go šireletša phuthego.​—1 Timotheo 1:20; Tito 3:10, 11.

Go Tlatša Menagano ya Rena ka Dilo tše di Tumišegago

21, 22. Re swanetše go ba bao ba kgethago mabapi le eng, gomme re swanetše go tlatša menagano ya rena ka eng?

²¹ Phuthego ya Bokriste e phema mantšu a gobatšago a go “phêra bo-ka lephêra.” (2 Timotheo 2:16, 17; Tito 3:9) Se ke sa therešo go sa šetšwe gore mantšu a bjalo a ka ba a bonagatša “bohlale” bjo bo timetšago bja lefase, dipolelo tša maaka tša bahlanogi goba polelo ya go se nagane ka phuthegong. Le ge kganyogo e botse ya go kganyoga go ithuta dilo tše difsa e ka ba e holago, go rata go tseba mo go sa laolegego go ka lebanya motho le dikgopolo tše di gobatšago. Ga se gore ga re tsebe makatika a Sathane. (2 Ba-Korinthe 2:11) Re a tseba gore o dira boiteko bjo bogolo bja go leka go re šitiša e le gore re ka nyefiša tirelong ya rena go Modimo.

²² Bjalo ka bahlanka ba babotse, anke re thekgeng thuto ya Modimo ka go tia. (1 Timotheo 4:6) Anke re dirišeng nako ya rena ka bohlale ka go ba bao ba kgethago mabapi le tsebišo yeo re kgethago go e monya. Ka gona re ka se ke ra šikinywa gabonolo ke dipolelo tša maaka tše di hlohleletšwago ke Sathane. Ee, anke re tšweleng pele re nagana ka “tše e lexo therešô, le tše e lexo bokwala, le tše e lexo tokô le tše e lexo pelo-thereši, le tše di yaxo ka leratô, tša tumo e botse, tše e lexo boló, tše di kaxo ratiwa.” Ge e ba re tlatša menagano ya rena le dipelo tša rena ka dilo tše bjalo, Modimo wa khutšo o tla ba le rena.​—Ba-Filipi 4:8, 9.

Re Ithutile’ng?

• Bohlale bja lefase bo ka bea bjang boemo bja rena bja moya kotsing?

• Re ka dira eng bakeng sa go itšhireletša tsebišong e gobatšago ya bahlanogi?

• Ke polelo ya mohuta mang yeo e swanetšego go phengwa ka phuthegong?

• Teka-tekano ya Bokriste e bontšhwa bjang ge re swaragana le tsebišo e ntši kudu ya mehleng yeno?

[Dipotšišo tša Thuto]

[Seswantšho go letlakala 9]

Dimakasine le dipuku tše dintši tše di ratwago kudu di thulana le ditekanyetšo tša rena tša Bokriste

 [Seswantšho go letlakala 10]

Bakriste ba ka fana dikgopolo ka ntle le gore e be bao ba kgomarelago pono e sa fetogego