“Diša Pelo Y’axo”

JEHOFA o boditše moporofeta Samuele gore: “[Modimo ga a bone ka tsela yeo motho a bonago ka yona, NW]. Motho ó bôna se se lebanaxo le mahlô a xaxwe; Morêna Yêna ó bôna pelo.” (1 Samuele 16:7) Gape ge a lebiša tlhokomelo pelong ya seswantšhetšo, mopsalme Dafida o ile a opela ka gore: “Xe O [Jehofa] ka lekola pelo ya-ka, wa e hlôla bošexo, wa mphênyêka, O ka se hwetše seakanyô se ke sa kaxo ka se bua ka molomo.”​—Psalme 17:3.

Ee, Jehofa o lebelela pelong go bona seo ge e le gabotse re lego sona. (Diema 17:3) Ka gona, ka lebaka le le kwagalago, Kgoši Salomo wa Isiraele ya bogologolo o eletša gore: “Mo xo tšohle di dišwaxo, diša pelo y’axo; xobane bophelô bo hlaxa xo yôna.” (Diema 4:23) Re ka diša bjang pelo ya rena ya seswantšhetšo? Diema kgaolo 4 e re nea karabo ya potšišo yeo.

Theetša Tayo ya Tate

Kgaolo ya bo-4 ya Diema e thoma ka mantšu a: “Hee Ban’a-ka! Kwang tayô ya rra-weno! Theetšang, Le ithutê thlaloxanyô. Ke Le ruta thuto-boló; se nyatšeng molaô wa-ka.”​—Diema 4:1, 2. 

Keletšo go bafsa ke gore ba theetše thuto e kwalago ya batswadi ba bona ba boifago Modimo, kudu-kudu ya tate. O na le boikarabelo bja Mangwalo bja go nea lapa la gagwe dinyakwa tša nama le tša moya. (Doiteronomio 6:6, 7; 1 Timotheo 5:8) Ka ntle le tlhahlo e bjalo, go tla ba thata kudu gakaakang go motho yo mofsa go gola go fihlelela a gotše ka botlalo! Ka gona, na ngwana ga se a swanela go amogela tayo ya tatagwe ka tlhompho?

Ka gona go thwe’ng ka mofsa yo a se nago tate yo a ka mo rutago? Ka mohlala, Jason wa nywaga e 11 o ile a hlokofalelwa ke tatagwe ge a e-na le nywaga e mene. * Ge mogolo wa Mokriste a mmotšiša gore ke eng seo se mo tshwenyago kudu bophelong bja gagwe, kapejana Jason o ile a fetola ka gore: “Ke hlologelwa gore nkabe ke e-na le tate. Ka dinako tše dingwe ke ikwa ke nyamile.” Lega go le bjalo, keletšo e homotšago e gona bakeng sa bafsa bao ba se nago tlhahlo ya botswadi. Jason le ba bangwe ba swanago le yena ba ka nyaka le go hwetša keletšo e bjalo ka ya tate go bagolo le ba bangwe ba godilego ka tsebo ka phuthegong ya Bokriste.​—Jakobo 1:27.

Ge a gopola ka thuto ya gagwe, Salomo o tšwela pela ka gore: “Ke be ke le morwa [wa kgonthe, “NW”] wa tate, kè le ngwana-ngwakô wa mmê.” (Diema 4:3) Go bonala kgoši e be e gopola kgodišo ya yona ka lerato. E le “morwa wa kgonthe” yo a nweletšago keletšo ya tatagwe pelong, Salomo yo mofsa o swanetše go ba a bile le tswalano ya kgaufsi le e borutho le tatagwe, Dafida. Go feta moo, Salomo e be e le “ngwana-ngwakô” goba yo a ratwago kudu. Ke gabohlokwa gakaakang gore ngwana a golele lapeng leo go lona go nago le moya o borutho le mekero ya go boledišana le batswadi yeo e dulago e bulegile!

Rua Bohlale le Tlhaologanyo

Ge a gopola keletšo e lerato ya tatagwe, Salomo o anega gore: “Ka rutwa ke thwe: Pelo y’axo a e swarê mantšu a-ka; hlôkômêla ditaêlô, ké mo O tl’o xo phela. Rua bohlale; rua thlaloxanyô; O se lebalê puô ya molomo wa-ka wa e lahla. Se di tloxêlê; di Xo lôtôlê. Di ratê, di Xo dišê. Mathômô a bohlale ké xo re: Rua bohlale! Nthša tšohle O di ruilexo, O rêkê thlaloxanyô.”​—Diema 4:4-7.

Ke ka baka la’ng bohlale e le “selo se segolo”? (PK) Bohlale bo bolela go šomiša tsebo le tlhaologanyo gore di šome ka tsela yeo e tla tlišago mafelelo a mabotse. Tsebo​—go tlwaelana le dintlha tšeo o di hwetšago ka go bona le phihlelo goba ka go bala le go ithuta​—ke ya bohlokwa bakeng sa bohlale. Eupša ge e ba re se na bokgoni bja go e diriša gabotse, tsebo ya rena e ka ba le mohola o monyenyane. Ga se ra swanela go bala feela ka mehla Beibele le dipuku tšeo di theilwego Beibeleng tšeo di newago ke “molaki e a bôtêxaxo yo bohlale” eupša gape re swanetše go dira boiteko bja go šomiša seo re ithutago sona go tšona.​—Mateo 24:45.

Go ba le kwešišo le gona ke gabohlokwa kudu. Ka ntle le yona, na re ka kgona go bona gabotse gore dintlha di tswalana bjang le go hwetša taba e feletšego yeo e ahla-ahlwago? Ge e ba re hlaelelwa ke kwešišo, re ka kwešiša bjang mayo le matšo a dilo gomme ra rua tlhaologanyo le temogo? Ee, gore re kgone go bea mabaka ka tsela e kwagalago le go fihlelela phetho e nepagetšego, re nyaka kwešišo.​—Daniele 9:22, 23.

Salomo o tšwela pele go anega mantšu a tatagwe ka gore: ‘Bo phagamiše, bo go godiše. Bo tla go retiša, ge o ka bo gokarela. Bo tlo go rweša mphapahlogo o botse, bo tlo go tlemelela seala sa botšhephi.’ (Diema 4:8, 9) Bohlale bja go boifa Modimo bo šireletša motho yo a bo gokarelago. Go feta moo, bo mo tlišetša tlhompho le go mo dira yo mobotse. Ka gona, a re kataneleng go hwetša bohlale kamoo re ka kgonago.

“Xomarêla Thutô!”

Ge a boeletša keletšo ya tatagwe, kgoši ya Isiraele se se latelago e re: “Ngwan’a-ka! Theetša, O amoxêlê mantšu a-ka; O tlê O atêlwê ke mengwaxa ya xo phela. Ke Xo ruta tsela ya bohlale; ke Xo xatiša mehlaleng e lokilexo. X’O ka swara ka yôna, ’naô tš’axo xa di tanywe; x’O kitima, O ka se kê wa kxopya. Xomarêla thutô! Se e lahlê! E boloke. Ké yôna bophelô bya xaxo.”​—Diema 4:10-13.

E le morwa wa kgonthe go tatagwe, Salomo o swanetše go ba a ile a lemoga mohola wa tayo e lerato yeo e rutago le e phošollago. Ka ntle le keletšo e leka-lekanego, re ka letela bjang go gatela pele kgolong ya moya goba go holofela go kaonefatša boemo bja bophelo bja rena? Ge e ba re sa ithute go tšwa diphošong tša rena goba ge e ba re palelwa ke go lokiša dikgopolo tše di fošagetšego, tšwelopele ya rena ya moya e tla hlokomologwa e le ka kgonthe. Tayo e leka-lekanego e lebiša  boitshwarong bja go boifa Modimo gomme ka go rialo ya re thuša go ‘gata mehlaleng e lokilego.’

Mohuta o mongwe wa tayo gape o feleletša ka go dira gore re “atêlwê ke mengwaxa ya xo phela.” Bjang? Go ba gona, Jesu Kriste o itše: “Mmotexi-dinyaneng, le ka tše kxolo ó a bôtêxa. Mo-se-loke-dinyaneng, le ka tše kxolo xa a loke.” (Luka 16:10) Na go itaya dilong tše nyenyane go ka se dire gore go be bonolo go rena go dira ka mo go swanago le dilong tše dikgolo, tšeo maphelo a rena a ka bago a ithekgile ka tšona? Ka mohlala, ge e ba re tlwaetša leihlo go se ‘lebelele mosadi gomme wa mo kganyoga,’ ga go bonale re tla ineela boitshwarong bjo bo gobogilego. (Mateo 5:28) Ka tlwaelo, molao wo wa motheo o šoma go banna gotee le basadi. Ge e ba re laya menagano ya rena bakeng sa go “iša megopolo ka moka bothopša,” go na le kotsi e nyenyane ya gore re ka dira diphošo tše dikgolo ka mantšu goba ka ditiro.​—2 Ba-Korinthe 10:5, PK.

Ke therešo gore gantši go thata go amogela tayo gomme e ka bonagala e le e thibelago. (Ba-Hebere 12:11) Lega go le bjalo, kgoši e bohlale e re kgonthišetša gore ge e ba re gomarela tayo, tsela ya rena e tla ba yeo e re lebišago go direng tšwelopele. Go fo etša ge tlwaetšo e swanetšego e dumelela mokitimi go tšwela pele a kitima ka lebelo le itšego leo le lekanyeditšwego ka ntle le gore a we goba a ikgobatše, go kgomarela tayo go re dumelela gore re tšwele pele re le tseleng e išago bophelong ka lebelo le lekanyeditšwego ka ntle le gore re kgopše. Ee, re swanetše go ba bao ba elago hloko mabapi le tsela yeo re e kgethago.

Phema “Mmila wa Bakxôpô”

Ka maikwelo a go akgofa, Salomo o lemoša gore: “O se kê wa wêla mmila wa bakxôpô; O se xatê tsela ya ba babe. Šikoloxa! Se e batamêlê; e fularêlê ’me O iphetêlê. Xobane bao, xa ba rôbale bà sešo ba dira bobe, borôkô mo xo bôná xa bo sware bà sešo ba uša motho. Xobane ba phela ka boxôbê bya bokxôpô; ba nwa morara wa thlakolô.”​—Diema 4:14-17.

Ba babe, bao Salomo a nyakago re phema ditsela tša bona, ba iphediša ka ditiro tša bona tše mpe. Go dira seo se sa lokago go swana le dijo le dino go bona. Ga ba kgone go robala ka ntle le gore ba dire ditiro tša bošoro. Botho bja bona bo gobogile! Na ruri re ka diša dipelo tša rena ge re phela le bona? Ke ga bošilo gakaakang go ‘se šikologe mmila wa babe’ ka go itlwaelanya le bošoro bjo bo bontšhwago bogolong bja boithabišo lefaseng la lehono! Go katanela go ba le kwelobohloko e lerato gabotse-botse ga go sepedišane le go bogela ditiragalo tše mpe tše di retetšago letswalo thelebišeneng goba difiliming.

Dula Seetšeng

A sa dutše a diriša seswantšho sa tsela, Salomo o re: “Xe e le mmila wa baloki ó étša bo-ka mahuba xe a hlatloxa, ’tšatši la bá la hlaba.” (Diema 4:18) Go ba le thuto ya Beibele le go leka go diriša seo e se bolelago bophelong go ka swantšhwa le go thoma leeto lefsifsing la ge e sa le ka masa. Ge boso bja leratadima la bošego bo etša go ya go botala bjo bo tebilego, ga re kgone go bona selo. Eupša ge mahube a hlatloga ganyenyane-ganyenyane, re kgona go bona ganyenyane-ganyenyane dilo tšeo di re dikologilego. Mafelelong, letšatši le a phadima gomme re bona selo se sengwe le se sengwe gabotse kudu. Ee, therešo e ba yeo e kwagalago gabotse ganyenyane-ganyenyane go rena ge re dutše re phegelela go ithuta Mangwalo ka go se fele pelo le ka mafolofolo. Go fepa pelo ka dijo tša moya ke gabohlokwa ge e ba re tla e diša kgopolong ya maaka.

Seo se bolelwago ke diporofeto tša Beibele le sona se phuthologa ka mo go tšwelago pele. Diporofeto e ba tšeo di kwagalago gabotse go rena ge moya o mokgethwa wa Jehofa o hlabišetša seetša godimo ga tšona le ge di phethagatšwa ke ditiragalo tša lefase goba diphihlelong tša batho ba Modimo. Go e na le go retologela ka go fela pelo dikakanyong tšeo di lego mabapi le phethagatšo ya tšona, re swanetše go letela gore ‘seetša se etše bo-ka mahuba ge a hlatloga.’

Go thwe’ng ka bao ba ganago tlhahlo ya Modimo ka go gana go sepela seetšeng? Salomo o re: “Tsela ya bakxôpô e byalo ka lefsifsi; xa ba tsebe se se t’lo xo ba kxopa.” (Diema 4:19) Ba babe ba swana le monna yoo a kgopšago lefsifsing a sa tsebe seo se mo kgopilego. Gaešita le ge batho bao ba sa boifego Modimo go bonagala ba atlega ka baka la bobe bja bona, katlego ya bona ke ya lebakanyana feela. Mabapi le ba bjalo mopsalme o opetše ka gore: “Anthe O ba beile mo matheleding; O [Jehofa] ba uša ba rôbêxa.”​—Psalme 73:18.

Dula o Phafogile

Kgoši ya Isiraele e tšwela pele ka gore: “Ngwan’a-ka! Theetša mantšu a-ka, O sekêxêlê dipolêlô tša-ka tsêbê. A di se kê tša Xo široxêla; di boloke mo pelong ya xaxo. Xobane di phediša ba ba di hwetšaxo; di ba fodiša mmele wohle. Mo xo tšohle di dišwaxo, diša pelo y’axo; xobane bophelô bo hlaxa xo yona.”​—Diema 4:20-23.

Mohlala wa Salomo ka noši o hlatsela mohola wa keletšo ye bakeng sa go diša pelo. Ke therešo gore e be “e le morwa wa kgonthe” go tatagwe bofseng bja gagwe gomme a dula e le yo a botegelago Jehofa go fihla kgole ge e šetše e le motho yo mogolo. Lega  go le bjalo, Beibele e laodiša gore: “Ya re lebakeng la xe Salomo a tšofetše, basadi ba xaxwe ba aroša pelo ya xaxwe ya latêla medimo e šele, pelo ya xaxwe ya se kê ya hlwa e êma le Morêna ka botlalô byalo ka pelo ya Dafida tat’axwe.” (1 Dikxoši 11:4) Ka ntle le go dula re phafogile, gaešita le dipelo tše lokilego kudu di ka goketšwa go dira selo seo se sa lokago. (Jeremia 17:9) Re swanetše go boloka dikeletšo tšeo di lego ka Lentšung la Modimo kgaufsi le dipelo tša rena​—‘ka gare-gare ga yona.’ Se se akaretša tlhahlo yeo e newago kgaolong ya bo-4 ya Diema.

Hlahloba Boemo bja Pelo ya Gago

Na re diša dipelo tša rena tša seswantšhetšo ka katlego? Re ka tseba bjang boemo bja motho wa ka gare? Jesu Kriste o itše: “Xobane molomo o bolêla tše pelo e di falatšaxo.” (Mateo 12:34) Gape o itše: “Mo pelong ké mo xo tšwaxo dikxopolô tše mpe, le dipolaô, le dithlalô, le maotswa, le bohodu, le bohlatse bya maaká, le maroxa.” (Mateo 15:19, 20) Ee, mantšu a rena le ditiro tša rena di bolela kudu mabapi le seo re lego sona ka pelong.

Ka mo go swanetšego, Salomo o re lemoša gore: “Bofora bya molomo, kxaoxana nabyô’; maaká a molomo a bê kxolê naxô’. A mahlô a xaxo e bê a teba-thwii; dinthši tša xaxo di nêpê se O lebanexo nasô’. Lekanya boxatô bya ’naô tša xaxo, ditsela tša xaxo ka moka di lokê. Se fapoxêlê ka xo le letona, le xe e le xo la ntsôxôšô, O efošê ’oto l’axo bobe.”​—Diema 4:24-27.

Ka baka la temošo ya Salomo, re swanetše go hlahloba polelo ya rena le ditiro tša rena. Ge e ba re tla diša pelo le go kgahliša Modimo, dipolelo tše di sa lokago le bomenetša di swanetše go phengwa. (Diema 3:32) Ka baka leo, re swanetše go nagana ka thapelo seo mantšu a rena le ditiro tša rena di se utollago ka rena. Ka gona, anke re nyakeng thušo ya Jehofa e le gore a re phošolle bofokoding le ge e le bofe bjoo re ka bo lemogago.​—Psalme 139:23, 24.

Go feta tše ka moka anke ‘mahlo a rena e be teba-thwii.’ Anke re a boloke e le ao a tsepeletšego pakaneng ya go direla Tatago rena wa legodimong tirelo ya pelo ka moka. (Ba-Kolose 3:23) Ge wena ka noši o dutše o katanela tsela e bjalo e lokilego, eka Jehofa a ka go nea katlego ‘ditseleng tša gago ka moka,’ gomme a go šegofatše ka mo go humilego bakeng sa go ela hloko keletšo e buduletšwego ya go “diša pelo y’axo.”

[Mongwalo wa ka tlase]

[Ntlhakgolo go letlakala 22]

Na o phema boithabišo bjoo bo bontšhago bošoro?

 [Seswantšho go letlakala 21]

Holwa ke keletšo ya bao ba nago le phihlelo

 [Seswantšho go letlakala 23]

Keletšo ga e fokodiše lebelo la tšwelopele ya gago

[Seswantšho go letlakala 24]

E-ba yo a phegelelago thutong ya gago ya Beibele