Diebangedi​—Ngangišano e Tšwela Pele

Na dipego tša Diebangedi mabapi le matswalo a Jesu Kriste ke tša therešo?

Na o ile a nea Thuto ya Thabeng?

Na Jesu o ile a tsošwa e le ka kgonthe?

Na o ile a bolela e le ka kgonthe gore: “Tsela ké Nna, le therešô le bophelô”?—JOHANE 14:6.

DITABA tše swanago le tše di ile tša ahla-ahlwa ke diithuti tše ka bago 80 Seminareng sa Jesu, seo se bego se dutše se swarwa gabedi ka ngwaga ga e sa le go tloga ka 1985. Sehlopha se sa diithuti se arabile dipotšišo tšeo ka tsela e sa tlwaelegago. Batšea-karolo ba Seminari ba ile ba boutela polelo e nngwe le e nngwe yeo e tswalanywago le Jesu ka Diebangeding. Pampiri e khwibidu ya go bouta e bontšha kgopolo ya gore taba e be e tloga e boletšwe ke Jesu e le ka kgonthe. Pampiri e pinki ya go bouta e be e bontšha gore e ka ba e le taba e swanago le yeo Jesu mo gongwe a ka bago a e boletše. Pampiri e tshehla ya go bouta e bontšha gore dikgopolo di ka ba di nyakile di swana le tša Jesu, eupša  taba ga e tšwe go yena. Pampiri e ntsho ya go bouta ke yeo e ganetšago ka mo go feletšego, e bontšha kgopolo ya gore taba e tšwa thutong ya ka morago.

Ka go latela mokgwa wo, batšea-karolo ba Seminari sa Jesu ba ile ba hlokomologa dintlha ka moka tše nne tšeo di tšweleditšwego ka mokgwa wa dipotšišo mathomong. Ge e le gabotse, di boutetše karolo e ntsho ka tekanyo e ka bago 82 lekgolong ya mantšu ao a boletšwego ke Jesu ka Diebangeding. Go ya ka bona, ke 16 lekgolong feela ya ditiragalo tšeo di anegilwego mabapi le Jesu Diebangeding le mengwalong e mengwe tšeo di bonagalago e le tšeo di nepagetšego.

Tsheka-tsheko e bjalo ya Diebangedi ga se e mpsha. Tlhaselo ya Diebangedi e ile ya tšwelela ka 1774 ge mongwalo wa seatla wa matlakala a 1 400 ka Hermann Reimarus, e lego moprofesara wa maleme a ka Bohlabela kua Hamburg, Jeremane, o be o gatišwa ka morago ga lehu la gagwe. Ka gare ga wona Reimarus o be a sohla dipelaelo tše di tseneletšego mabapi le go ba ga histori ga Diebangedi. Diphetho tša gagwe di be di theilwe tsheka-tshekong ya leleme le tšeo di bonagalago e le dithulano tšeo di hwetšagalago dipegong tša Diebangedi tše nne tša bophelo bja Jesu. Ga e sa le go tloga ka nako yeo, bantšha-diphošo ba ile ba tšweletša dipelaelo tša bona gantši mabapi le go nepagala ga Diebangedi, go fihla bokgoleng bjoo ba ilego ba senya go bota ga batho mengwalo ye.

Tshekamelo e tlwaelegilego gare ga diithuti tšeo ke ya gore di tšea dipego tša Diebangedi e le nonwane ya bodumedi yeo e fetišitšwego ke batho ba fapa-fapanego. Dipotšišo tše di tlwaelegilego tšeo di rotošwago ke diithuti tšeo di belaelago ke tšeo di rego: Na ditumelo tša bona di ka ba di baketše bangwadi ba Diebangedi tše nne gore ba kgabiše therešo? Na dipolitiki tša setšhaba sa Bakriste ba pele di ile tša ba bakela gore ba ngwale goba ba tlaleletše pego ya Jesu? Ke dikarolo dife tša Diebangedi tšeo di bonalago di bega ka go lebanya go e na le go ba tšeo di hlamago dinonwane?

Batho bao ba godišeditšwego lekokong la baila-Modimo goba leo le phegelelago dilo tša lona le sa re selo ka bodumedi ba dumela gore Beibele​—go akaretšwa le Diebangedi​—ke puku yeo e tletšego ka dinonwane. Go sa dutše go le bjalo ba bangwe ba boifišwa ke histori ya Bojakane ya tšhollo ya madi, kgatelelo, go hloka botee le boitshwaro bja go se boife Modimo. Batho ba bjalo ga ba bone go e-na le lebaka la gore ba ele hloko mengwalo yeo e tšewago e le e mekgethwa Bojakaneng. Ba nagana gore mediro yeo e fihleletšwego ka boiteko yeo e tšweleditšego bodumedi bja boikaketši e ka se be selo se sengwe ka ntle le dinonwane tšeo di se nago mohola.

Na o nagana eng ka se? Na o swanetše go dumelela diithuti tše dingwe tšeo di belaelago go ba ga histori ga Diebangedi di go bakela gore o be le dipelaelo tše di swanago monaganong wa gago? Ge o e-kwa dipolelo tše di lego mabapi le dinonwane tšeo go thwego di dirwa ke bangwadi ba Diebangedi, na o swanetše go dumelela se se šišinya kholofelo ya gago mengwalong ya bona? Na pego ya go se boife Modimo ya Bojakane e swanetše go go dira gore o belaele go botega ga Diebangedi? Re go laletša gore o hlahlobe tše dingwe tša ditherešo tše.

[Seswantšho go letlakala 4]

Na Diebangedi di hupere dinonwane goba ditherešo?

[Mothopo]

Jesus Walking on the Sea/The Doré Bible Illustrations/Dover Publications

[Mothopo wa Seswantšho go letlakala 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.