E-ba le Tumelo Lentšung la Modimo la Boporofeta!

“Re na le lentšu la boporofeta leo le kgonthišeditšwego kudu.”​—2 PETRO 1:19, NW.

1, 2. Ke boporofeta bofe bja pele bjo bo kilego bja begwa, gomme potšišo e nngwe ya tšeo bo ilego bja di rotoša ke efe?

JEHOFA e be e le yena Mothopo wa boporofeta bja pele bjo bo kilego bja begwa. Ka morago ga ge Adama le Efa ba dirile sebe, Modimo o ile a botša noga gore: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:1-7, 14, 15) Go be go tla feta nywaga e makgolo pele ga ge mantšu ao a boporofeta a be a ka kwešišwa ka botlalo.

² Boporofeta bjoo bja pele bo ile bja nea batho ba sebe kholofelo ya kgonthe. Ka morago Mangwalo a ile a hlaola Sathane Diabolo e le “nôxa e kxolo.” (Kutollo 12:9) Eupša ke mang yo e bego e tla ba Peu e holofeditšwego ya Modimo?

Go Tsoma Peu

3. Abele o ile a bontšha bjang tumelo boporofeteng bja pele?

³ Ka go se swane le tatagwe, Abele yo a boifago Modimo o ile a bontšha tumelo boporofeteng bja pele. Go bonagala Abele a ile a lemoga gore go be go tla nyakega gore madi a tšhollwe bakeng sa go khupetša sebe. Ka baka leo tumelo e ile ya mo šušumeletša gore a dire sehlabelo sa phoofolo seo se ilego sa amogelwa ke Modimo. (Genesi 4:2-4) Lega go le bjalo, go hlaolwa ga Peu e holofeditšwego go ile gwa dula e le sephiri.

4. Modimo o ile a nea Aborahama kholofetšo efe, gomme e ile ya laetša eng mabapi le Peu e holofeditšwego?

⁴ Nywaga e ka bago e 2 000 ka morago ga mehla ya Abele, Jehofa o ile a nea mopatriareka Aborahama kholofetšo ye ya boporofeta: “Ke tlo Xo šexofatša xaxolo; bana ba xaxo ke tlo ba atiša xaxolo byalo ka dinaledi tša lexodimong . . . Xomme dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.” (Genesi 22:17, 18) Mantšu ao a ile a kgokaganya Aborahama le phethagatšo ya boporofeta bja pele. A be a laetša gore Peu yeo ka yona mediro ya Sathane e bego e tla fedišwa e be e tla tšwelela lešikeng la Aborahama. (1 Johane 3:8) “[Ka baka la, NW] kholofedišô ya Modimo [Aborahama] xa a ka a e belaêla ka xo se dumêle” gomme le dihlatse tše dingwe tša Jehofa tša pele ga mehla ya Bokriste le ge tšeo ‘di di holofeditšwego di sa ka tša di bona ka mahlo’ le tšona ga se tša belaela. (Ba-Roma 4:20, 21; Ba-Hebere 11:39) Go e na le moo, di ile tša kgomarela tumelo lentšung la Modimo la boporofeta.

5. Kholofetšo ya Modimo ya Peu e phethagaditšwe ka mang, gomme ke ka baka la’ng o araba bjalo?

⁵ Moapostola Paulo o ile a hlaola Peu e holofeditšwego ya Modimo ge a be a ngwala gore: “Tše Aborahama a di boditšwexo è le kholofedišô, di lebane peu ya xaxwe. Xa xo thwe: Dipeu, e ke ké tše ntši. Xo bolêlwa Peu e tee, xe xo thwe: Ka Peu ya xaxo. ’Me yôna Peu yeo ké Kriste.” (Ba-Galatia 3:16) Peu yeo ditšhaba di bego di tla itšhegofatša ka  yona e be e sa akaretše ditlogolwana ka moka tša Aborahama. Ditlogolwana tša morwa wa gagwe Isimaele le tša barwa ba gagwe ka Ketura ga se tša dirišwa bakeng sa go šegofatša batho. Peu ya tšhegofatšo e tlile ka morwa wa gagwe Isaka le setlogolo sa gagwe Jakobo. (Genesi 21:12; 25:23, 31-34; 27:18-29, 37; 28:14) Jakobo o ile a bontšha gore “dithšaba” di be di tla kwa Silo wa moloko wa Juda, eupša ka morago Peu e ile ya lekanyetšwa lešikeng la Dafida feela. (Genesi 49:10; 2 Samuele 7:12-16) Ba-Juda ba lekgolong la pele la nywaga ba be ba letetše gore go tle motho o tee e le Mesia goba Kriste. (Johane 7:41, 42) Le gona boporofeta bja Modimo bja Peu bo ile bja phethagatšwa ka Morwa wa gagwe, Jesu Kriste.

Mesia o a Tšwelela!

6. (a) Re swanetše go kwešiša bjang boporofeta bja dibeke tše 70? (b) Jesu o ‘fedišitše sebe’ neng le gona bjang?

⁶ Moporofeta Daniele o ile a ngwala boporofeta bjo bohlokwa bja Mesia. Ngwageng wa pele wa Dario wa mo-Meda, o ile a lemoga gore go dirwa ga Jerusalema lešope ka nywaga e 70 go be go batametše go fela. (Jeremia 29:10; Daniele 9:1-4) Ge Daniele a le gare a rapela, morongwa Gabariele o ile a tla gomme a utolla gore ‘dibeke tše masome a šupago di be di reretšwe gore di fediše sebe.’ Mesia o be a tla bolawa bogareng bja beke ya bo-70. ‘Dibeke tše masome-šupa tša nywaga’ di thomile ka 455 B.C.E., nakong ya ge Kgoši ya Peresia Arithasasitha I ‘a be a romela lentšu la gore Jerusalema e tsošološwe.’ (Daniele 9:20-27; Moffatt; Nehemia 2:1-8) Mesia o be a tla tla ka morago ga dibeke tše 7 ge di hlakanywa le dibeke tše 62. Nywaga ye e 483 e thomile go tloga ka 455 B.C.E. go fihla ka 29 C.E., ge Jesu a be a kolobetšwa gomme Modimo a mo tlotša e le Mesia goba Kriste. (Luka 3:21, 22) Jesu o ‘fedišitše sebe’ ka go nea bophelo bja gagwe e le topollo ka 33 C.E. (Mareka 10:45) A mabaka a kwalago gakaakang bakeng sa go ba le tumelo lentšung la Modimo la boporofeta! *

7. Bontšha kamoo Jesu a phethagaditšego boporofeta bja Mesia ka gona, o diriša Mangwalo.

⁷ Go ba le tumelo lentšung la Modimo la boporofeta go dira gore re kgone go hlaola Mesia. Gare ga boporofeto bja Mesia bjo bontši bjo bo begilwego ka Mangwalong a Sehebere, bjo bontši bo be bo lebišitšwe ka go lebanya go Jesu ke bangwadi ba bantši ba Mangwalo a Bakriste a Segerika. Ka mohlala: Jesu o belegwe ke kgarebe kua Betlehema. (Jesaya 7:14; Mika 5:2; Mateo 1:18-23; Luka 2:4-11) O ile a bitšwa kua Egipita, gomme masea a ile a bolawa ka morago ga go belegwa ga gagwe. (Jeremia 31:15; Hosea 11:1; Mateo 2:13-18) Jesu o ile a rwala malwetši a rena. (Jesaya 53:4; Mateo 8:16, 17) Go etša ge go be go boletšwe e sa le pele, o ile a tsena Jerusalema a nametše pokolwana. (Sakaria 9:9; Johane 12:12-15) Mantšu a mopsalme a ile a phethagatšwa ka morago ga go kokotelwa ga Jesu ge mašole a be a arolelana diaparo tša gagwe gomme a dira matengwa bakeng sa seaparo sa gagwe sa ka gare. (Psalme 22:18; Johane 19:23, 24) Therešo ya gore marapo a Jesu ga se a ka a robja le ya gore o ile a hlabja le yona e ile ya phethagatša boporofeta. (Psalme 34:20; Sakaria 12:10; Johane 19:33-37) Ye e fo ba mehlala e sego kae ya diporofeto tša Mesia tšeo di bego di šupša go Jesu ke bangwadi ba Beibele bao ba buduletšwego ke Modimo. *

Retang Kgoši ya Mesia!

8. Motala wa Mabaka ke mang, gomme boporofeta bjo bo ngwadilwego go Daniele 7:9-14 bo phethagaditšwe bjang?

⁸ Ngwageng wa pele wa Kgoši Belesatsara wa Babele, Jehofa o ile a nea moporofeta wa gagwe Daniele toro le dipono tše di makatšago. Moporofeta o ile a thoma ka go bona dibata tše nne tše dikgolo. Morongwa wa Modimo o ile a di hlaola e le “dikxoši tše nne,” ka go rialo a bontšha gore di be di swantšhetša mebušo ya lefase e hlatlamanago. (Daniele 7:1-8, 17) Ke moka Daniele o ile a bona Jehofa, “Motala-wa-mabaka,” a dutše sedulong sa bogoši sa letago. A ahlola dibata o šoro, Modimo o di amoga pušo gomme a fediša sebata sa bone. Pušo ya neng le neng godimo ga “dithšaba ka moka le merafô le maleme” e ile ya gafelwa ka tshwanelo go “e mongwê . . . e kexo ké Morwa-motho.” (Daniele 7:9-14) A boporofeta bjo bobotse gakaakang bjo bo tswalanago le go bewa ga  “Morwa-motho,” Jesu Kriste, sedulong sa bogoši magodimong ngwageng wa 1914!​—Mateo 16:13.

9, 10. (a) Dikarolo tše di fapa-fapanego tša seswantšho sa torong di be di šupa go eng? (b) O be o ka hlalosa bjang phethagatšo ya Daniele 2:44?

⁹ Daniele o be a tseba gore Modimo o ‘be a raka magoši, a bea magoši.’ (Daniele 2:21) Ka go ba le tumelo go Jehofa, “Moutolodi wa diphiri,” (NW) moporofeta o ile a utolla seo se bolelwago ke toro ya seswantšho se segolo ya Kgoši Nebukadinetsara wa Babele. Dikarolo tša sona tše di fapa-fapanego di be di šupa go go tsoga le go wa ga mebušo ya lefase e bjalo ka Babele, ba-Meda le ba-Peresia, Gerika le Roma. Modimo gape o ile a diriša Daniele go hlalosa ditiragalo tša lefase go ba go fihla mehleng ya rena le go fetela ka kua ga yona.​—Daniele 2:24-30.

¹⁰ Boporofeta bo itše: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Nakong ya ge “mabaka a ba-ntlê” a be a fela ka 1914, Modimo o ile a hloma Mmušo wa legodimong ka tlase ga Kriste. (Luka 21:24; Kutollo 12:1-5) Ka matla a Modimo a Mmušo wa Mesia, “lefsika” le ile la kgomoga “thabeng” ya bogoši bja Modimo bja legohle. Ka Haramagedone lefsika leo le tlo pšhatla seswantšho gomme la se šilakanya. Bjalo ka mmušo wo o lego thabeng wo o kgomago “lefase ka moka,” Mmušo wa Mesia o tla ema ka mo go sa felego.​—Daniele 2:35, 45; Kutollo 16:14, 16. *

11. Go fetolwa ga Jesu lebopo e be e le ponelo-pele ya eng, gomme pono yeo e ile ya kgoma Petro bjang?

¹¹ Ge a be a naganne ka pušo ya Mmušo wa gagwe, Jesu o ile a botša barutiwa ba gagwe gore: “Mo xo ba ba emexo fá xo na le ba ba tl’o xo bôna Morwa-motho à e-tla à le mmušong wa xaxwe, bôná ba sešo ba kwa lehu.” (Mateo 16:28) Ka morago ga matšatši a tshelelago, Jesu o ile a tšea Petro, Jakobo le Johane a ba iša thabeng e telele moo a ilego a fetolwa lebopo ba mo lebeletše. Ge baapostola ba apešwa ke leru le le tagilego, Modimo o ile a re: “Yó ké Yêna Morwa-moratwa wa-ka, yo ke kxahlwaxo ke Yêna; Le mo kwê.” (Mateo 17:1-9; Mareka 9:1-9) A ponelo-pele e kgahlišago gakaakang ya Mmušo wa Kriste wa letago! Ga go makatše ge Petro a ile a bolela ka pono yeo e kgahlišago gomme a re: “Re na le lentšu la boporofeta leo le kgonthišeditšwego kudu.”​—2 Petro 1:16-19, NW. *

12. Ke ka baka la’ng ye ka mo go kgethegilego e le nako ya go bontšha tumelo ya rena lentšung la Modimo la boporofeta?

¹² Mohlomongwe “lentšu la boporofeta” ga le akaretše feela diporofeto tša Mangwalo a Sehebere mabapi le Mesia eupša le akaretša le polelo ya Jesu ya gore o be a tla tla “ka matla le ka letaxô le lexolo.” (Mateo 24:30) Go fetolwa lebopo go ile gwa tiišetša lentšu la boporofeta mabapi le go tla ga Kriste ka letago a le matleng a Mmušo. Kgaufsinyane, go utologa ga gagwe a le letagong go tla bolela phedišo go bao ba se nago tumelo le ditšhegofatšo go bao ba bontšhago tumelo. (2 Ba-Thesalonika 1:6-10) Phethagatšo ya boporofeta bja Beibele e bontšha gore ye ke ‘mehla ya bofelo.’ (2 Timotheo 3:1-5, 16, 17; Mateo 24:3-14) Bjalo ka Mophethi yo Mogolo wa Kahlolo wa Jehofa, Mikaele, e lego Jesu Kriste, o šetše a itokišeditše go tliša bofelo tshepedišong ye e kgopo ya dilo nakong ya ‘masetlapelo a magolo.’ (Mateo 24:21; Daniele 12:1) Ka gona, ye ruri ke nako ya gore re bontšhe gore re na le tumelo lentšung la Modimo la boporofeta.

Kgomarela Tumelo Lentšung la Modimo la Boporofeta

13. Ke eng seo se ka re thušago go kgomarela lerato la rena la go rata Modimo le go boloka tumelo ya rena e phela lentšung la gagwe?

¹³ Ga go na pelaelo gore re ile ra thaba ge re be re thoma go ithuta ka diphethagatšo tša lentšu la Modimo la boporofeta. Eupša na e ka ba e le gore ga e sa le go tloga ka nako yeo tumelo ya rena e hweletše le lerato la rena le fodile? Anke le ka mohla re se ke ra swana le Bakriste ba kua Efeso bao ba ilego ba ‘lahla lerato la bona la pele.’ (Kutollo 2:1-4) Go sa šetšwe gore ke lebaka le lekaakang re hlankela Jehofa, re ka lahlegelwa bjalo ge e ba re sa ‘tsome Mmušo wa Modimo pele le go loka ga gagwe’ e le gore re ipolokele mahumo legodimong.  (Mateo 6:19-21, 31-33, bapiša le NW.) Go ithuta Beibele ka mafolofolo, go tšea karolo ka mehla dibokeng tša Bokriste le modiro o mafolofolo wa go bolela ka Mmušo di tla re thuša gore re kgomarele lerato la rena la go rata Jehofa, Morwa wa gagwe le Mangwalo. (Psalme 119:105; Mareka 13:10; Ba-Hebere 10:24, 25) Ke moka, se se tla boloka tumelo ya rena e phela lentšung la Modimo.​—Psalme 106:12.

14. Bakriste ba tloditšwego ba putswa bjang bakeng sa tumelo ya bona lentšung la Jehofa la boporofeta?

¹⁴ Go fo etša ge lentšu la Modimo la boporofeta le ile la phethagatšwa nakong e fetilego, le rena re ka ba le tumelo go seo a se bolelago e sa le pele bakeng sa bokamoso. Ka mohlala, go ba gona ga Kriste a le letagong la Mmušo bjale ke selo sa kgonthe, gomme Bakriste ba tloditšwego bao ba ilego ba botega go fihla lehung ba bone phethagatšo ya kholofetšo ya boporofeta e rego: “E a fenyaxo ke tlo mo nea a ja sehlare sa bophelô se se lexo Paradiseng ya Modimo.” (Kutollo 2:7, 10; 1 Ba-Thesalonika 4:14-17) Jesu o nea bafenyi ba tokelo ya ‘go ja sehlare sa bophelo’ “Paradeiseng ya Modimo” ya legodimong. Tsogong ya bona le ka Jesu Kriste, e ba bao ba sa hwego le bao ba sa bolego mo ba go newago ke Jehofa, “Kxoši Ra-mabaka-a-neng-le-neng, Yêna Modimo wa xo se fetoxe, wa xo se bônwe ke motho.” (1 Timotheo 1:17; 1 Ba-Korinthe 15:50-54; 2 Timotheo 1:10) A moputso o mogolo gakaakang wo ba o newago bakeng sa lerato la bona le le sa hwego la go rata Modimo le tumelo e sa šišinyegego lentšung la gagwe la boporofeta!

15. Motheo wa “lefase le lefsa” o theilwe go bomang, gomme bagwera ba bona ke bomang?

¹⁵ Kapejana ka morago ga ge ba botegago ba tloditšwego bao ba hwilego ba tsošeditšwe ‘paradeiseng ya Modimo’ ya legodimong, mašaledi a ba-Isiraele ba moya lefaseng a ile a lokollwa go ‘Babele o Mogolo,’ mmušo wa lefase wa bodumedi bja maaka. (Kutollo 14:8; Ba-Galatia 6:16) Go bona go theilwe motheo wa “lefase le lefsa.” (Kutollo 21:1) Ka go rialo go ile gwa tswalwa “naxa,” gomme e ile ya agwa ya ba paradeise ya moya yeo e atlegago lefaseng ka bophara lehono. (Jesaya 66:8) Ga bjale mašaba-šaba a bagwera ba ba-Isiraele ba moya ba swanago le dinku ba kgeregela go yona, “bofelong bya mabaka.”​—Jesaya 2:2-4; Sakaria 8:23; Johane 10:16; Kutollo 7:9.

Bokamoso bja Batho bo Boletšwe e sa le Pele ka Lentšung la Modimo la Boporofeta

16. Ditebelelo tša bathekgi ba botegago ba batlotšwa ke dife?

¹⁶ Ditebelelo tša bathekgi ba botegago ba batlotšwa ke dife? Le bona ka mo go swanago ba na le tumelo lentšung la Modimo la boporofeta,  gomme kholofelo ya bona e ithekgile ka go tsena ga bona Paradeiseng ya lefaseng. (Luka 23:39-43) Moo ba tla nwa ‘nokeng ya meetse a bophelo’ yeo e thekgago bophelo gomme ba tla fodišwa ke ‘matlakala a dihlare’ tšeo di bjetšwego leribeng la yona. (Kutollo 22:1, 2) Ge e ba o e-na le kholofelo e bjalo e kgahlišago, o ka tšwela pele o bontšha lerato le le tseneletšego la go rata Jehofa le tumelo lentšung la gagwe la boporofeta. Eka o ka ba gare ga bao ba ipshinago ka lethabo le le se nago mellwane la bophelo bjo bo sa felego Paradeiseng ya lefaseng.

17. Bophelo Paradeiseng ya lefaseng bo tla akaretša ditšhegofatšo dife?

¹⁷ Batho ba sa phethagalago ga ba kgone go hlalosa ka botlalo bophelo Paradeiseng e tlago ya lefaseng, eupša lentšu la Modimo la boporofeta le re nea temogo ka ditšhegofatšo tša nakong yeo tšeo di boloketšwego batho ba kwago. Ge Mmušo wa Modimo o buša ka mo go sa ganetšwego gomme thato ya gagwe e dirwa lefaseng bjalo ka ge e dirwa legodimong, ga go na batho ba šoro​—gaešita le diphoofolo​—bao ba tlago ‘go dira tše mpe goba go senya.’ (Jesaya 11:9, bapiša le PK; Mateo 6:9, 10.) Ba boleta ba tla dula lefaseng, gomme “ba tlo thaba ka botlalô bya moláô.” (Psalme 37:11) Go ka se sa ba le mašaba-šaba ao a bolawago ke tlala, ka gobane “xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.” (Psalme 72:16) Go ka se sa ba le megokgo le manyami. Bolwetši bo tla be bo se sa le gona, gaešita le lehu le ka se hlwe le e-ba gona. (Jesaya 33:24; Kutollo 21:4) Na o ka akanya ka boemo​—go se na dingaka, dihlare le dipetlele goba mafelo a kalafo ya monagano, go se na dipoloko. A ditebelelo tše di kgahlišago gakaakang!

18. (a) Daniele o ile a newa kgonthišetšo ka eng? (b) “Kabêlô” ya Daniele e tla ba eng?

¹⁸ Gaešita le lebitla le le tlwaelegilego la batho le tla gorullwa ge lehu le šuthela tsogo tseleng. Monna wa go loka Jobo o be a e-na le kholofelo e bjalo. (Jobo 14:14, 15) Moporofeta Daniele le yena o be a e-na le yona, ka gobane morongwa wa Jehofa o ile a mo nea kgonthišetšo e homotšago ya gore: “Wene byalo, sepela Ò lebeletše bofêlô; O tlo khutša, wa tlo bá wa tsoxa xo tlo amoxêla kabêlô ya xaxo bofelong bya matšatši.” (Daniele 12:13) Daniele o ile a hlankela Modimo ka potego go fihla bofelong bja bophelo bja gagwe. Ga bjale o khuditše lehung, eupša o tla “tsoxa” “tsogong ya ba ba lokilego” nakong ya Pušo ya Kriste ya Nywaga e Sekete. (Luka 14:14, PK) “Kabêlô” ya Daniele e tla ba eng? Go ba gona, phethagatšong ya bjona ya Paradeise, boporofeta bja Hesekiele bo bontšha gore batho bohle ba Jehofa ba tla ba le sebaka, gaešita le naga yeo e arotšwego ka tsela ya toka le ya thulaganyo. (Hesekiele 47:13–48:35) Ka gona Daniele o tla ba le sebaka Paradeiseng, eupša kabelo ya gagwe moo e tla akaretša se segolo go feta naga. E tla akaretša le sebaka sa gagwe morerong wa Jehofa.

19. Ke eng seo se nyakegago bakeng sa go phela Paradeiseng ya lefaseng?

¹⁹ Go thwe’ng ka wena le kabelo ya gago? Ge e ba o e-na le tumelo Lentšung la Modimo, Beibele, ga go na pelaelo gore o hlologetše go phela Paradeiseng ya lefaseng. Mo gongwe o ka ba wa ipona o le moo, o thabela ditšhegofatšo tša yona tše dintši, o hlokomela lefase gomme o amogela bahu ka lethabo. Go ba gona, Paradeiseng ke moo batho ba swanetšego go ba gona. Modimo o be a bopetše batho ba babedi ba pele gore ba dule lefelong le bjalo. (Genesi 2:7-9) Gape o nyaka gore batho ba kwago ba phele ka mo go sa felego Paradeiseng. Na o tla itshwara ka go dumelelana le Mangwalo e le gore o kgone go ba gare ga ba dimilione tše dikete bao mafelelong ba tla phelago lefaseng la Paradeise? O ka ba moo ge e ba o e-na le lerato la kgonthe la go rata Tatago rena wa legodimong, Jehofa, le tumelo e swarelelago lentšung la Modimo la boporofeta.

[Mengwalo ya ka tlase]

O tla Araba Bjang?

• Boporofeta bja pele e be e le bofe, gomme Peu e holofeditšwego e be e le mang?

• Diporofeto tše dingwe tša Mesia tšeo di ilego tša phethagatšwa ka Jesu ke dife?

• Daniele 2:44, 45 e tla phethagatšwa bjang?

• Lentšu la Modimo la boporofeta le bolela ka bokamoso bofe bakeng sa batho ba kwago?

[Dipotšišo tša Thuto]

[Seswantšho go letlakala 18]

Na o holofela go tlo phela Paradeiseng ya lefaseng?