Re Mohuta o Nago le Tumelo

Go Aga Tumelo ka Thuto ya Beibele Kua India

GO TLOGA Dithabeng tša Himalaya tše dikgolo le tšeo di apešitšwego ke lehlwa ka leboa go ya mabopong a fišago kudu-kudu a Lewatle la India go ya ka borwa, India ke lefelo la dilo tše di fapa-fapanego, ka mafelo le ka bodumedi. Go baagi ba yona ba ka godimo ga dimilione tše sekete, mo e ka bago 83 lekgolong ke ma-Hindu, 11 lekgolong ke ma-Moseleme gomme karolo e šetšego e bopša kudu ke bao e lego Bakriste ka leina feela, ma-Sikh, ma-​Bhuddah le ma-Jain. Ka moka ga bona ba thabela tokologo ya borapedi. The World Book Encyclopedia e re: “Bodumedi bo bapala karolo e bohlokwa tseleng ya se-India ya bophelo.”

Go phela ka go dumelelana le tumelo ya bona ya Bokriste go hlalosa gabotse Dihlatse tša Jehofa tšeo di balelwago go palo ya ka godimo ga 21 200 kua India. Go swana le bagwera ba tšona ba moya dikarolong tše dingwe tša lefase, Dihlatse tša kua India di go lebelela e le tokelo go thuša baagišani ba tšona go aga tumelo e tiilego Lentšung la Modimo, Beibele e Kgethwa. (2 Timotheo 3:16, 17) Ela hloko kamoo lapa le lengwe kua Chennai ka borwa bja India le ilego la hwetša tsebo ya therešo ya Beibele ka gona.

Pele ga ge le kopana le Dihlatse tša Jehofa, lapa le le be le akaretšwa ka mafolofolo mekgatlong ya Katholika ya go tsenwa ke moya, le ipolela gore le bona dipono, le bolela ka maleme gomme le fodiša balwetši. Le be le tumile kerekeng le setšhabeng, batho ba be ba bile ba bitša ditho tše dingwe tša lapa ka la “swami,” yeo e bolelago “morena.” Ka gona, letšatši le lengwe Hlatse e ile ya etela lapa leo gomme ya le bontšha go tšwa Beibeleng gore Jesu ke Morwa wa Modimo, e sego Modimo Ra-matla-ohle, bjalo ka ge go dumelwa bjalo ka tlwaelo. Hlatse gape e ile ya le bontšha gore leina la Modimo ke Jehofa le gore morero wa Jehofa ka lefase ke go le dira paradeise e botse.​—Psalme 68:4; Luka 23:43; Johane 3:16.

Ka baka la ge di be di hlompha Lentšu la Modimo gomme di rata seo di se kwelego, ditho tša lapa le di ile tša dumelelana ka thuto ya Beibele ya ka mehla le Dihlatse tša Jehofa. Se se ile sa tliša dikwero go tšwa go bao ba tsenago le bona kereke. Lega go le bjalo, lapa le ile la dula le ikemišeditše go tšwela pele ka thuto ya lona ya Beibele. Ge tsebo ya lona e tšwela pele e oketšega le tumelo ya lona e tia, le ile la tlogela mekgwa ya bodumedi bja lona bja maaka. Lehono, ditho tše tharo tša lapa le ke Dihlatse tše mafolofolo tšeo di kolobeditšwego, gomme mma o hlankela bjalo ka mmulamadibogo wa go thuša le ge e le neng ge go kgonega.

Tumelo Bakeng sa go Fenya Mapheko

Sunder Lal, lesogana leo le dulago motseng wa Punjab, le be le nyaka tumelo e kgolo le sebete e le gore le be le karolo go abelaneng ditaba tše di lokilego tša Mmušo wa Modimo le ba bangwe. (Mateo 24:14) Lebaka le lengwe ke gore le ile la tlogela ditumelo tša medimo e mentši ya lapa la gabo le ya motsana wa gabo bakeng sa go rapela Modimo wa therešo, Jehofa. Le lengwe gape ke gore Sunder Lal ga a na maoto.

Sunder Lal o be a phela bophelo bjo bo tlwaelegilego go ba go fihla ka 1992. O be a šoma bjalo ka mothuši wa ngaka gomme a kopanela le lapa la gabo bakeng sa go rapela medimo e fapa-fapanego ka tlase ga tlhahlo ya guru (mohlahli wa moya) wa bona yo a kgethilwego. Ke moka, bošegong bjo bongwe o ile a wa ge a be a tshela seporo. Setimela se ile sa mo gata gomme sa mo ripa maoto a gagwe ka bobedi diropeng. Gaešita le ge a ile a phela, lefase la gagwe le ile la šwalalanywa. Ka mo go kwešišegago, Sunder Lal o ile a gateletšega kudu gomme a nagana le go ipolaya. Lapa la gabo le be le  mo nea thekgo kudu, eupša bokamoso bja gagwe bo be bo bonagala bo se na kholofelo.

Ka gona yo mongwe wa Dihlatse tša Jehofa o ile a etela Sunder Lal a mo laetša go tšwa ka Beibeleng gore Modimo o holofeditše go dira lefase paradeise e kgahlišago le go nea bophelo bjo bo phethagetšego go bao ba mo ratago le go mmoifa. Sunder Lal o ile a dumela thuto ya Beibele, gomme o ile a ithuta ka mafolofolo lebaka la ngwaga. O ile a laletšwa gore a be gona dibokeng tša Bokriste gomme mafelelong a tla a nametše ka morago ga paesekele ya mogwera wa gagwe. Gaešita le ge e be e le leeto le bohloko, moputso e be e le o mogolo. Seo a bego a ithutile sona thutong ya gagwe ya motho ka noši ya Beibele se ile sa kgonthišetšwa ge a be a kopana le ba bangwe bao ba bego ba dumela e le ka kgonthe dikholofetšong tša Lentšu la Modimo gomme ba phela ka go dumelelana le dithuto tša Beibele.

Sunder Lal o ile a thoma go abelana ditaba tše dibotse le baagišani ba gagwe, gomme ka 1995 o ile a kolobetšwa. Mathomong o ile a tšea karolo bodireding ka go ikgoga go ya ka ntlo le ntlo motsaneng wa gabo, bjalo ka ge e be e le mokgwa wa gagwe wa tlwaelo wa go sepela. Eupša ga bjale o na le mpho e tšwago go banababo ba moya​—koloyana ya maotwana a mararo yeo e diretšwego ka mo go kgethegilego go “sepedišwa” ka letsogo. Ka thušo ya koloyana ya gagwe ya maotwana a mararo, ga bjale o ikemetše kudu gomme o kgona go sepela a nnoši leeto la dikhilomithara tše 12 bakeng sa go ba gona dibokeng tša phuthego. Ka dinako tše dingwe o ikgokološa dipuleng tša matlorotloro; ka dinako tše dingwe thempheretšha e ba ka godimo ga 43°C.

Go tlaleletša tabeng ya go ba gona dibokeng, Sunder Lal o swara dithuto tša Beibele tše dintši le ba bangwe bao ba kganyogago go aga tumelo e tiilego go Modimo wa therešo, Jehofa. Ge e le gabotse, ba šupago bao e bego e le barutwana ga gagwe ba Beibele ga bjale ba kolobeditšwe, bjalo ka ge go le bjalo ka batho ba bangwe ba bararo bao a ilego a kopana le bona eupša e le bao Dihlatse-gotee le yena di ilego tša ithuta Beibele le bona.

Go ya ka Beibele, “tumêlô xa se ya bohle.” (2 Ba-Thesalonika 3:2) Eupša bakeng sa bao “ba hlaoletšwexo bophelô byo bo sa felexo,” thuto ya ka mehla ya Lentšu la Modimo e ka aga tumelo e tiilego. (Ditiro 13:48) Thuto e bjalo gape e ka dira gore mahlo a rena a phadime ka kholofelo ya bokamoso bjo bo kgahlišago​—selo seo palo e oketšegago ya batho kua India e bontšhago tumelo go sona.

[Mmapa go letlakala 30]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Mothopo]

Mountain High Maps® Copyright © 1997 Digital Wisdom, Inc.