Boloka ‘Kholofelo ya Gago ya Phološo’ e Tagile!
Boloka ‘Kholofelo ya Gago ya Phološo’ e Tagile!
‘Apara . . . kuane e be go holofela phološo.’—1 BA-THESALONIKA 5:8.
1. ‘Kholofelo ya phološo’ e re thuša bjang tabeng ya go kgotlelela?
KHOLOFELO ya go phološwa e ka thuša motho gore a swarelele gaešita le maemong a thata ka kudu. Motho yo a robegetšwego ke sekepe yo a phaphametšego godimo ga meetse ka sephaphamadi a ka kgotlelela nako e telele ge e ba a tseba gore o kgaufsi le go hwetša thušo. Ka mo go swanago, ka nywaga e dikete tše dintši, go ba le kholofelo ‘phološong ya Jehofa’ go ile gwa boloka banna le basadi ba tumelo ba phela dinakong tša mathata, gomme kholofelo ye ga se ya ka ya lebiša go nyameng. (Ekisodo 14:13; Psalme 3:8; Ba-Roma 5:5; 9:33) Moapostola Paulo o swantšhitše ‘kholofelo ya phološo’ le “kuane” ya ditlhamo tša moya tša Mokriste. (1 Ba-Thesalonika 5:8; Ba-Efeso 6:17) Ee, kgodišego ya rena ya gore Modimo o tla re phološa e šireletša matla a rena a go nagana, e lego seo se re thušago gore re dule re hlaphogetšwe go sa šetšwe tlaišego, kganetšo le moleko.
2. Ke ka ditsela dife ‘kholofelo ya phološo’ e lego motheo borapeding bja therešo?
2 The International Standard Bible Encyclopedia e re “kholofelo yeo e lego mabapi le bokamoso e be e se leswao leo le hlaolago lefase la baheitene,” e lego lefase leo le bego le dikologile Bakriste ba lekgolong la pele la nywaga. (Ba-Efeso 2:12; 1 Ba-Thesalonika 4:13) Lega go le bjalo, ‘kholofelo ya phološo’ ke karolo ya motheo ya borapedi bja therešo. Bjang? Sa pele, phološo ya bahlanka ba Jehofa e kgokagane le leina la gagwe ka noši. Mopsalme Asafa o rapetše ka gore: “Re hlakodišê, Wene Modimo wa xo re phološa, xore xo rêtwê leina la xaxo. Re namolêlê.” (Psalme 79:9; Hesekiele 20:9) Go feta moo, go kgodišega ka ditšhegofatšo tša Jehofa tše di holofeditšwego go a nyakega bakeng sa go ba le tswalano e botse le yena. Paulo o beile taba ka gore: “Xo kxahla Modimo xa xo kxônexe xe xo se tumêlô. E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.” (Ba-Hebere 11:6) Go feta moo, Paulo o hlalositše gore phološo ya bao ba itsholago e be e le lebaka la motheo la go dira gore Jesu a tle lefaseng. O itše: “Ké taba ye e tiilexo, ye e swanetšexo xo amoxêlwa ka botlalô, yé ya xore Jesu Kriste ó tlile lefaseng xore a phološê ba-dira-dibe.” (1 Timotheo 1:15) Le gona moapostola Petro o boletše ka phološo e le ‘mafelelo a tumelo ya rena.’ (1 Petro 1:9, bapiša le NW.) Go molaleng gore ke mo go swanetšego go holofela phološo. Eupša ge e le gabotse phološo ke’ng? Go nyakega’ng bakeng sa go e fihlelela?
Phološo Ke’ng?
3. Ke phološo ya mohuta mang yeo bahlanka ba Jehofa ba mehleng ya kgale ba ilego ba e bona?
3 Ka Mangwalong a Sehebere, “phološo” gantši e bolela go hlakodiša goba go lopolla kgatelelong goba lehung le šoro leo le sa letelwago. Ka mohlala, Dafida ge a bitša Jehofa “Monamoledi,” o itše: “Modimo ké lefsika la-ka, . . . le ’thšabêlô sa-ka, Monamodi wa-ka, mo-nnamola-bošorong. Morêna-moretiwa, ka na ka Xo bitša. Wa nnamola manabeng.” (2 Samuele 22:2-4) Dafida o be a tseba gore Jehofa o a theetša ge bahlanka ba Gagwe ba botegago ba kgopela thušo.—Psalme 31:22, 23; 145:19.
4. Ke kholofelo efe ya bophelo bja nakong e tlago yeo bahlanka ba Jehofa ba mehleng ya pele ga Bokriste ba bego ba e-na le yona?
4 Bahlanka ba Jehofa ba mehleng ya pele ga Bokriste le bona ba be ba e-na le kholofelo ya bophelo bja nakong e tlago. (Jobo 14:13-15; Jesaya 25:8; Daniele 12:13) Ge e le gabotse, bontši bja dikholofetšo tša tlhakodišo tše di hwetšwago ka Mangwalong a Sehebere e be e le boporofeta bja phološo e kgolwanyane—yeo e lebišago bophelong bjo bo sa felego. (Jesaya 49:6, 8; Ditiro 13:47; 2 Ba-Korinthe 6:2) Mehleng ya Jesu, ba-Juda ba bantši ba be ba holofetše bophelo bjo bo sa felego, eupša ba ile ba gana go amogela Jesu e le senotlelo sa gore ba bone phethagatšo ya kholofelo ya bona. Jesu o ile a botša baetapele ba bodumedi ba mehleng ya gagwe gore: “Latišang mangwalong, ka xobane lena Le re Le na le bophelô byo bo sa felexo ka ôna; xomme ké ôna-xê a a hlatsêlaxo Nna.”—Johane 5:39.
5. Phološo mafelelong e bolela’ng?
5 Ka Jesu, Modimo o ile a utolla tlhathollo e feletšego ya seo se bolelwago ke phološo. E akaretša go lokollwa pušong ya sebe, bokgobeng bja bodumedi bja maaka, lefaseng leo le lego ka tlase ga taolo ya Sathane, poifong ya go boifa motho gaešita le poifong ya lehu. (Johane 17:16; Ba-Roma 8:2; Ba-Kolose 1:13; Kutollo 18:2, 4) Mafelelong, bakeng sa bahlanka ba botegago ba Modimo, phološo ya Modimo ga e bolele feela go lopollwa kgatelelong le kgateletšong, eupša e bolela le go hwetša sebaka sa go ba le bophelo bjo bo sa felego. (Johane 6:40; 17:3) Jesu o ile a ruta gore go “mohlatswana o monyenyane,” phološo e bolela go tsošetšwa ga bona bophelong bja legodimong bakeng sa go yo ba le karolo gotee le Kriste pušong ya Mmušo. (Luka 12:32) Bakeng sa batho ba bangwe ka moka, phološo e bolela go bušetšwa bophelong bjo bo phethagetšego le tswalanong le Modimo tšeo Adama le Efa ba bego ba di thabela tšhemong ya Edene pele ba dira sebe. (Ditiro 3:21; Ba-Efeso 1:10) Bophelo bjo bo sa felego ka tlase ga maemo a bjalo a paradeise e be e le morero wa Modimo wa mathomong bakeng sa batho. (Genesi 1:28; Mareka 10:30) Ka gona, go bušetšwa maemong a bjalo go kgonega bjang?
Motheo Bakeng sa Phološo—Topollo
6, 7. Ke tema efe yeo e kgathwago ke Jesu phološong ya rena?
6 Phološo ya ka mo go sa felego e kgonega feela ka sehlabelo sa Kriste sa topollo. Ka baka la’ng? Beibele e hlalosa gore ge Adama a be a dira sebe, o ile a ‘ithekišetša’ le go rekišetša le ditlogolwana tša gagwe ka moka tšeo a bego a tla ba le tšona, go akaretša le rena sebeng—e lego seo se ilego sa dira gore go nyakege gore go be le topollo ge e ba batho ba be ba tla ba le kholofelo le ge e le efe e kwalago. (Ba-Roma 5:14, 15; 7:14) Taba ya gore Modimo o be a tla lokišeletša batho topollo e ile ya swantšhetšwa ke dihlabelo tša diphoofolo ka tlase ga Molao wa Moše. (Ba-Hebere 10:1-10; 1 Johane 2:2) Jesu e bile yena yoo sehlabelo sa gagwe se ilego sa phethagatša diswantšho tše tša boporofeta. Morongwa wa Jehofa o ile a tsebiša pele ga matswalo a Jesu gore: “Ké Yêna a tl’o xo phološa sethšaba sa xaxwe dibeng tša sôna.”—Mateo 1:21; Ba-Hebere 2:10.
7 Jesu o ile a belegwa ka tsela ya mohlolo ke Maria kgarebe, gomme ka ge e le Morwa wa Modimo, ga se a ka a abela lehu go Adama. Therešo ye gotee le tsela ya gagwe ya potego e phethagetšego e ile ya nea bophelo bja gagwe mohola wo o bego o nyakega bakeng sa go rekolla batho sebeng le lehung. (Johane 8:36; 1 Ba-Korinthe 15:22) Ka go se swane le batho ba bangwe ka moka, Jesu o be a sa ahlolelwa go hwa ka baka la sebe. O ile a tla lefaseng ka morero wa go tlo “neêla bophelô bya xaxwe xore e bê topollô ya ba bantši.” (Mateo 20:28) Ka ge a šetše a dirile bjalo, Jesu yoo ga bjale a tsošitšwego e bile a beilwe sedulong sa bogoši o boemong bja go ka phološa bohle bao ba fihlelelago tšeo Modimo a di nyakago.—Kutollo 12:10.
Ke Eng Seo se Nyakegago Bakeng sa go Hwetša Phološo?
8, 9. (a) Jesu o ile a araba bjang potšišo ya mmuši wa lesogana yo a humilego mabapi le phološo? (b) Jesu o ile a diriša bjang sebaka se go ruta barutiwa ba gagwe?
8 Ka nako e nngwe, mmuši wa lesogana yo a humilego wa mo-Isiraele o kile a botšiša Jesu gore: “Ke tlo dira’ng xore ke ruê bophelô byo bo sa felexo?” (Mareka 10:17) Potšišo ya gagwe e swanetše go ba e ile ya bonagatša monagano wo o bego o atile wa ba-Juda ba mehleng ya gagwe—wa gore Modimo o nyaka gore go dirwe mediro e itšego e mebotse le gore ka go dira mediro yeo ka mo go lekanego, motho a ka hwetša phološo go Modimo. Eupša mohuta woo wa boineelo bja molao o be o ka bakwa ke merero ya boithati. Mediro e bjalo e be e palelwa ke go nea kholofelo e kgonthišeditšwego ya phološo, ka ge go se na motho yo a sa phethagalago yoo gabotse-botse a ka fihlelelago ditekanyetšo tša Modimo.
9 Ge a araba potšišo ya monna yo, Jesu o ile a mo gopotša feela gore o swanetše go kwa ditaelo tša Modimo. Mmuši wa lesogana o ile a kgonthišetša Jesu ka go akgofa gore o be a di bolokile go tloga bofseng. Karabelo ya gagwe e ile ya tutueletša Jesu gore a ikwe a mo rata. Jesu o ile a re go yena: “O sa hlaêlêlwa ke se sengwê. Sepela O y’o rekiša tšohle tše O naxo natšô’, O di abêlê bahloki. Ké mo O tl’o xo ba le lehumô kwa lexodimong; ’me O tlê O ntatêlê.” Lega go le bjalo, lesogana le ile la sepela le nyamile, ‘ka gobane le be le na le mahumo a mantši.’ Jesu ka morago ga moo o ile a gatelela go barutiwa ba gagwe gore go kgomarela ka mo go feteletšego dilong tša lefase le go thibela tsela ya go hwetša phološo. O ile a oketša ka gore ga go na motho yo a ka hwetšago phološo ka maiteko a gagwe ka noši. Eupša Jesu o ile a tšwela pele a ba kgonthišetša gore: “Mo xo batho seo xa se kxônexe; se kxônêxa xo Modimo; xobane xo Modimo ké mo xo kxônêxaxo tšohle.” (Mareka 10:18-27; Luka 18:18-23) Phološo e kgonega bjang?
10. Ke maemo afe ao re swanetšego go a fihlelela gore re hwetše phološo?
10 Phološo ke mpho e tšwago go Modimo, eupša ga e itlele feela. (Ba-Roma 6:23) Go na le maemo a itšego a motheo ao motho yo mongwe le yo mongwe a swanetšego go a fihlelela gore a swanelegele mpho yeo. Jesu o itše: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” Le gona moapostola Johane o okeditše ka gore: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna.” (Johane 3:16, 36) Go molaleng gore Modimo o nyaka tumelo le go kwa mothong yo mongwe le yo mongwe yo a holofelago go hwetša phološo ya ka mo go sa felego. Yo mongwe le yo mongwe o swanetše go dira phetho ya go amogela topollo le go gata mehlaleng ya Jesu.
11. Motho yo a sa phethagalago a ka hwetša bjang kamogelo ya Jehofa?
11 Ka ge re sa phethagala, go kwa ga se tshekamelo ya rena ya tlhago gomme ga go kgonege gore re kwe ka mo go phethagetšego. Ke ka baka leo Jehofa a ilego a lokišeletša topollo bakeng sa go khupetša dibe tša rena. Lega go le bjalo, re swanetše go tšwela pele re katanela go phela ka go dumelelana le ditsela tša Modimo. Bjalo ka ge Jesu a ile a botša mmuši wa lesogana yo a humilego, re swanetše go boloka ditaelo tša Modimo. Go dira bjalo ga go tliše feela kamogelo ya Modimo eupša go tliša le lethabo le legolo, ka gobane “melaô ya xaxwe xa se e thata,” ke “tapološo.” (1 Johane 5:3; Diema 3:1, 8, PK) Lega go le bjalo, go kgomarela kholofelo ya phološo ga go bonolo.
“Hlabanêla Tumêlô”
12. Kholofelo ya phološo e matlafatša Mokriste bjang gore a gane diteko tša boitshwaro bjo bo gobogilego?
12 Morutiwa Juda o be a nyaka go ngwalela Bakriste ba pele mabapi le ‘phološo ye ba lego batee ka yona.’ Lega go le bjalo, boemo bjo bobe bja boitshwaro bjo bo bego bo apareditše bo ile bja mo gapeletša gore a eletše banababo gore ba ‘hlabanele tumelo.’ Ee, gore re hwetše phološo ga go a lekana go ba le tumelo, go kgomarela tumelong ya Bokriste bja therešo le go kwa ge dilo tšohle di sepela gabotse ka go thelela. Boineelo bja rena go Jehofa e swanetše go ba bjo bo tiilego ka mo go lekanego go ka re thuša go ganetša diteko le ditutuetšo tše di gobogilego. Lega go le bjalo, mekgwa e feteletšego ya tša botona le botshadi le kgobogo ya gona, go se hlomphe matla a taolo, dikarogano le dipelaelo di be di iphile matla moyeng wa phuthego ya lekgolong la pele la nywaga. Bakeng sa go ba thuša gore ba lwantšhe ditshekamelo tše bjalo, Juda o ile a kgothaletša Bakriste-gotee le yena gore ba gopole gabotse morero wa bona: “’Me lena Baratexi Le bê ba ba ikaxetšexo xodimo xa mothêô wa tumêlô ya lena e kxêthwa-kxêthwa, Le rapêlê Lè le ba Môya o mokxêthwa. Le dulê Lè ipatile ka leratô la Modimo Lè letetše kxauxêlô ya Mong wa rena Jesu Kriste ye e išaxo bophelong byo bo sa felexo.” (Juda 3, 4, 8, 19-21) Kholofelo ya go hwetša phološo e be e ka ba matlafatša ntweng ya bona ya go lwela go dula ba hlwekile boitshwarong.
13. Re ka bontšha bjang gore ga re bao ba sa holwego ke kgaugelo ya Modimo?
13 Jehofa Modimo o letetše gore bao a tlago go ba nea phološo ba bontšhe boitshwaro bjo bo beago mohlala. (1 Ba-Korinthe 6:9, 10) Lega go le bjalo, go kgomarela ditekanyetšong tša Modimo tša boitshwaro ga go bolele go ahlola ba bangwe. Ga se rena re tla ahlolelago magagabo rena boyo bja bona bja mafelelo. Go e na le moo, Modimo ke yena a tla dirago bjalo, go etša ge Paulo a boditše ba-Gerika ba Athene gore: “Ka xobane ó beile ’tšatši a tl’o xo ahlola lefase ka lôna ka tokô. Moahlodi ké Monna yo a mmeilexo”—Jesu Kriste. (Ditiro 17:31; Johane 5:22) Ge e ba re phela ka tumelo topollong ya Jesu ga go nyakege gore re boife letšatši le le tlago la kahlolo. (Ba-Hebere 10:38, 39) Selo sa bohlokwa ke gore le ka mohla ga se ra swanela ‘go amogela kgaugelo ya Modimo [poelano ya rena le yena ka topollo] gomme ya se re hole selo’ ka go ba bao ba itumelelago gore re lekwe re wele monaganong o fošagetšego le boitshwarong bjo bo fošagetšego. (2 Ba-Korinthe 6:1) Go oketša moo, ka go thuša ba bangwe go hwetša phološo, re bontšha gore ga se ra lahlegelwa ke morero wa kgaugelo ya Modimo. Re ka ba thuša bjang?
Go Abelana Kholofelo ya Phološo
14, 15. Ke bomang bao Jesu a ilego a ba abela gore ba phatlalatše ditaba tše dibotse tša phološo?
14 Paulo ge a tsopola moporofeta Joele, o ngwadile gore: “Ba xo tlo phološwa ké ba ba bitšaxo ’ina la Morêna.” Ke moka o ile a oketša ka gore: “Xomme byale ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?” Ditemaneng tše mmalwa ka morago, Paulo o bontšha gore tumelo ga e itlele feela; go e na le moo “e tšwa xo kweng,” ke gore, “lentšu le lego mabapi le Kriste.”—Ba-Roma 10:13, 14, 17, bapiša le NW; Joele 2:32.
15 Ke mang yo a tlago go iša “lentšu le lego mabapi le Kriste” ditšhabeng? Jesu o ile a abela barutiwa ba gagwe modiro woo—bao ba šetšego ba rutilwe “lentšu” leo. (Mateo 24:14; 28:19, 20; Johane 17:20) Ge re tšea karolo modirong wa go bolela ka Mmušo le wa go dira barutiwa, re dira sona seo moapostola Paulo a ngwadilego ka sona, lebakeng le a tsopola Jesaya ka gore: “A ratêxa bya’ng maoto a motseta wa ditaba tše botse!” Gaešita le ge ba bantši ba sa amogele ditaba tše dibotse tšeo re ba išetšago tšona, maoto a rena a sa dutše a “ratêxa” go Jehofa.—Ba-Roma 10:15; Jesaya 52:7.
16, 17. Ke morero ofe o lego gabedi woo modiro wa rena wa boboledi o o phethago?
16 Go phethagatša thomo ye go phetha merero e mebedi e bohlokwa. Wa pele, ditaba tše dibotse di swanetše go bolelwa e le gore leina la Modimo le tle le godišwe gomme bao ba nyakago phološo ba tle ba tsebe moo ba ka retologelago gona. Paulo o be a kwešiša karolo ye ya thomo. O itše: “Ké tšôna tše Morêna a re laetšexo tšôna, xe a re: Ke Xo bea seetša sa dithšaba, xore O bê phološô ’pheletšong tša lefase.” Ka gona, bjalo ka barutiwa ba Kriste, yo mongwe le yo mongwe wa rena o swanetše go ba le karolo go išeng molaetša wa phološo bathong.—Ditiro 13:47; Jesaya 49:6.
17 Wa bobedi, go bolelwa ga ditaba tše dibotse go ala motheo bakeng sa kahlolo ya Modimo e lokilego. Jesu ge a be a bolela ka kahlolo yeo, o itše: “Mohla Morwa-motho a tlaxo ka letaxô la xaxwe à na le Barongwa ba xaxwe ka moka, ó tlo dula sedulong sa xaxwe sa boxoši sa letaxô. ’Me dithšaba ka moka di tlo phuthêlwa pele xa xaxwe, ’me ó tlo ba kxêtholoxanya byalo ka modiši xe a kxêtholoxanya dinku le dipudi.” Le ge go ahlola le go kgethologanya go tla dirwa “mohla Morwa-motho a tlaxo ka letaxô la xaxwe,” modiro wa boboledi o nea batho lehono sebaka sa go lemoga banababo Kriste ba moya gomme ka go rialo ba šomele go ba thekga bakeng sa phološo ya bona ka noši ya ka mo go sa felego.—Mateo 25:31-46.
Kgomarela “Phethego ya Kholofelo”
18. Re ka boloka bjang ‘kholofelo ya rena ya phološo’ e tagile?
18 Go tšea ga rena karolo ka mafolofolo modirong wa boboledi gape ke tsela ya go re thuša gore re boloke kholofelo ya rena e tagile. Paulo o ngwadile gore: “Re a duma gore yo mongwe le yo mongwe wa lena a bontšhe phišego yona yeo, go nyaka phethego ya kholofelo go fihla bofelong.” (Ba-Hebere 6:11, PK) Ka gona, anke yo mongwe le yo mongwe wa rena a apare “kuane e bê xo holofêla phološô,” ka go rialo re gopola gore “se Modimo a re beetšexo sôna xa se xo tlo xalefêlwa; ó re beetše xo fihlêla phološô ka Mong wa rena Jesu Kriste.” (1 Ba-Thesalonika 5:8, 9) Le gona anke re eleng hloko keletšo ya Petro e rego: “Itlemeng mathêka kxopolong ya lena, Le phelê Lè phafoxile; ’me kxauxêlô . . . Le e holofêlê ka kholofêlô ye e tletšexo.” (1 Petro 1:13) Bohle bao ba dirago bjalo ba tla bona ‘kholofelo ya bona ya phološo’ e phethagatšwa ka botlalo!
19. Ke eng seo re tlago go se ahla-ahla sehlogong se se latelago?
19 Go sa dutše go le bjalo, na re swanetše go ba le pono efe ka nako yeo e šaletšego tshepedišo ye? Re ka diriša bjang nako yeo bakeng sa go ikhweletša phološo le go e hweletša ba bangwe? Re tla ahla-ahla dipotšišo tše sehlogong se se latelago.
Na o ka Hlalosa?
• Ke ka baka la’ng re swanetše go boloka ‘kholofelo ya rena ya phološo’ e tagile?
• Phološo e akaretša’ng?
• Ke eng seo re swanetšego go se dira gore re amogele mpho ya phološo?
• Ke eng seo modiro wa rena wa boboledi o se phethago mabapi le morero wa Modimo?
[Dipotšišo tša Thuto]
[Diswantšho go letlakala 10]
Phološo e bolela se se fetago go fo lopollwa tshenyegong