O ka Retologela Kae Bakeng sa Keletšo e Botse?

“Intasteri ya dikeletšo” bjale e fetogile kgwebo yeo e dirago diranta tše dimilione tše dintši ka ngwaga. Batho ba nyaka thušo. Setsebi sa tša bophelo bjo bobotse bja monagano Heinz Lehmann se hlalosa gore: “[Lekokong la lehono] go na le tlhaelelo go tša thuto le go tša leago. Ditekanyetšo tša bodumedi ga di sa le ka tsela yeo di bego di tlwaetšwe di le ka yona. Malapa ke ao a sa tsepamago . . . , gomme mafelelong batho ba ba le mathata.” Mongwadi Eric Maisel o re: “Bao ba kilego ba retologela go moperisita wa maleatlana wa setšo, moruti goba ngaka ya lapa bakeng sa go nyaka thušo ka mathata a tša monagano, a moya le a mmele ga bjale ba retologela dipukung tšeo go ka ikhweletšwago thušo go tšona bakeng sa go ba nea dikarabo.”

AMERICAN Psychological Association e hlomile sehlopha sa bašomi bakeng sa go nyakišiša ka kgwebo ye e atlegago kudu. Sehlopha se boletše gore ka ge go e-na le “kgonagalo e kgolo ya go ka thuša batho go ikwešiša le go kwešiša ba bangwe . . . , dipolelo tša phatlalatšo gotee le maina tšeo di sepedišanago le mananeo a ke tšeo di feteletšwago ka mo go oketšegago.” Mongwadi wa Toronto Star o re: “Hlokomela bogolo bja bofora bja tša bodumedi le bja dilo tša moya. . . . Hlokomela kudu-kudu dipuku ka moka tšeo go ikhweletšwago thušo go tšona, dikhasete goba diseminari tšeo di neago mo gontši kudu ka nako e nyenyane kudu, ka boiteko bjo bonyenyane kudu goba boitayo.” Ke therešo gore go na le ba bantši kudu bao ba nyakago go thekga e le ka kgonthe bao ba nyakago thušo. Lega go le bjalo, therešo e kwešago bohloko yeo e lego gona ke gore baradia ba bantši ba ikhola ka bodutu le tlaišego tšeo batho ba lego go tšona, ba sa ba nee thušo ya kgonthe goba ditharollo.

Ka baka la se, mothopo o mogolo wa thušo woo re ka o botago ke ofe? Ke kae moo re ka hwetšago keletšo e šomago yeo e tlago go šoma ka mehla?

Mothopo wa Tlhahlo Yeo e sa Palelwego

Moruti wa mo-Amerika wa lekgolong la bo-19 la nywaga Henry Ward Beecher o itše: “Beibele ke mmapa wa Modimo wa lewatleng bakeng sa go go hlahla, go go šireletša go robegelweng ke sekepe le go go bontšha moo boemakepe bo lego gona gotee le gore o ka fihla go bjona bjang ka ntle le go sepela mafsikeng goba maribeng.” Monna yo mongwe o boletše ka Beibele gore: “Le ka mohla ga go na motho yo a ka golelago Mangwalo; puku ye ke e katologago le e nwelelago le nywaga ya rena.” Ke ka baka la’ng o swanetše go naganišiša kudu ka mothopo wo?

Beibele ge e ipolelela e re: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, xore motho wa Modimo e bê yo boló-ka-tlalô, a kxonišwê xo dira medirô e botse ka moka.” (2 Timotheo 3:16, 17) Dikagare tša Beibele di tšwa Mothopong wa bophelo, Jehofa Modimo. (Psalme 36:9) A le bjalo, o lemoga ka mo go tseneletšego mokgwa woo re bopilwego ka wona, bjalo ka ge Psalme 103:14 e re gopotša gore: “Xobane Yena  ó tseba lebopô le re lexo ka lôna, xa a lebale xe re le lerole.” Ka gona, re ka bota mohola wa Beibele ka mo go tletšego.

Ge e le gabotse, Beibele e na le melao ya motheo e mentši le ditlhahlo tše dintši tšeo di ka dirišwago ka mo go holago maemong le ge e le afe ao o ka ikhwetšago o le ka gare ga ona. Ka yona Modimo o re go rena: “Tsela šé! Tšeang ka yôna!” (Jesaya 30:21) Na Beibele ruri e ka kgotsofatša dinyakwa tša batho lehono? A nke re bone.

Beibele e Kgotsofatša Dinyakwa tša Rena . . .

Ge re Lebeletšane le Dipelaelo. Beibele e re botša gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Na thapelo e itlhatsetše e le e šomago bakeng sa go lebeletšana le dipelaelo tša maikwelo tšeo di sepedišanago le mathata a tša boiphedišo, go gobošwa ka tša botona le botshadi le ka mantšu, goba lehu la moratiwa? Ela hloko phihlelo ye e latelago.

Jackie ka morago ga go kwa ka kgobošo ya tša botona le botshadi ya morwedi wa gagwe, o ile a dumela ka gore: “Maikwelo a go ipona molato ka go hloka matla a go šireletša ngwana ga a hlalosege. Ke ile ka swanela ke go lwantšhana le maikwelo a go šulafalelwa, go kgopišega le pefelo. Maikwelo a a be a thoma go senya bophelo bja-ka. Ke be ke tloga ke nyaka gore Jehofa a šireletše pelo ya-ka.” Ka morago ga go bala le go badišiša Ba-Filipi 4:6, 7, o ile a šoma ka thata gore a diriše keletšo ya yona. Jackie o anega gore: “Ke rapela letšatši le lengwe le le lengwe, ke kgopela leboelela gore ke se ke ka itlogelela go fenywa ke maikwelo a fošagetšego, gomme Jehofa o nthušitše gore ke be le pelo e kokobetšego le e thabilego. Ke tloga ke ikwa ke e-na le khutšo.”

Le wena ka mo go swanago o ka ikhwetša o le boemong bjo bo lego ka godimo ga matla a gago gore o ka bo laola goba go bo rarolla le bjo bo go tlišetšago dipelaelo tša maikwelo. Ka go latela keletšo ya Beibele ya go rapela, o ka lebeletšana le se ka katlego. Mopsalme o re kgothatša ka mantšu a: “Xafêla Morêna ditsela tša xaxo, O mmôtê; Yêna ó tlo dira.”​—Psalme 37:5.

Bakeng sa Kgothatšo. Mopsalme o ile a bolela mantšu a a tebogo: “Morêna, ke rata maaxô a Ngwakô wa xaxo le felô mo xo dutšexo ’taxô la xaxo. A dinaô tša-ka di êmê moláleng; ke Xo rêtê, Morêna, ke le mo diphuthexong.” (Psalme 26:8, 12) Re kgothatšwa ka Beibeleng gore re bokane gotee ka mehla bakeng sa go rapela Jehofa. Go kopanela mo go ka kgotsofatša bjang dinyakwa tša gago? Ke eng seo ba bangwe ba se hweditšego?

Becky o anega gore: “Batswadi ba-ka ga ba hlankele Jehofa, ka gona ba nkganetša ge ke leka go dira selo le ge e le sefe seo se lego mabapi le tirelo go Modimo. Se se nnyaka gore ke dire boiteko bjo bogolo gore ke be gona dibokeng.” Becky o nagana gore o atetšwe ke ditšhegofatšo ka baka la gore o ile a katana gore a be gona dibokeng ka mehla. “Diboka di tiiša tumelo ya-ka e le gore nka kgona go lebeletšana le dikgateletšo tša letšatši le letšatši bjalo ka morutwana, morwedi le mohlanka wa Jehofa. Batho ba Holong ya Mmušo ke bao ba fapanego kudu le barutwana sekolong! Ke bao ba nago le tlhokomelo le bao ba thušago, e bile dipoledišano tša rena ka mehla ke tšeo di kgothatšago. Ke bagwera ba kgonthe.”

Ee, ka go latela taelo ya Beibele ya gore re bokane gotee ka mehla, Jehofa a ka kgona go kgotsofatša senyakwa sa rena sa kgothatšo. Mo ke moo re bonago therešo ya mantšu a mopsalme a rego: “Modimo ké sebô sa rena le matla a rena; ké Mohlakodiši, re mo lemoxile dikotsing tše ntši.”​—Psalme 46:1.

Bakeng sa Mošomo o Kgotsofatšago le wo o Nago le Mohola. “Tiang matla, Le se kê la têkêma, Le tiêlêlê modirong wa Morêna mo xo fêla, Lè tseba xore xo itapiša xa lena xa se xa lefêla Moreneng.” (1 Ba-Korinthe 15:58) Na ‘modiro wa Morena’ ke o kgotsofatšago e le ka kgonthe? Na bodiredi bja Bokriste bo phetha selo se itšego seo se nago le mohola?

 Amelia o bolela ka mo a ikwago ka gona: “Ke ile ka ithuta Beibele le banyalani bao ba bego ba le mollwaneng wa go tlogelana. Ke ile ka ba ka thuša le mosadi yoo morwedi wa gagwe a ilego a bolawa ka sehlogo. Mosadi o be a tlaišwa ke go se tsebe gabotse ka boemo bja bahu. Maemong a ka bobedi, go dirišwa ga melao ya motheo ya Beibele go ile gwa tliša khutšo le kholofelo maphelong a bona. Ke ikwa ke e-na le lethabo le legolo le kgotsofalo ka gobane ke bile le karolo go ba thušeng.” Scott o re: “Ge e ba o e-ba le phihlelo e botse bodireding bja tšhemo, wa thoma thuto ya Beibele goba o atlega ka tsela e itšego go neeng bohlatse bjo bo sa rulaganyetšwago, o tla bolela ka yona nywageng e mentši e latelago. Maikwelo a swanago le lethabo di ba gona nako e nngwe le e nngwe ge o anega! Bodireding ke moo lethabo le legolo le la ka mo go sa felego le tšwago gona.”

Go molaleng gore go diriša tlhahlo ya Beibele bakeng sa go ba badiredi ba mafolofolo go kgotsofaditše senyakwa sa batho ba bakeng sa mošomo o kgotsofatšago le o nago le mohola. Le wena ka mo go swanago o laletšwa go ba le karolo modirong wo wa go ruta ba bangwe ka ditsela tša Modimo le melao ya motheo, ka nako e swanago le wena o holega.​—Jesaya 48:17; Mateo 28:19, 20.

Go Holwa ke Lentšu la Modimo

Ka ntle le pelaelo, Beibele ke mothopo o ka botwago wa ditaelo tše di šomago lefaseng la lehono. Bakeng sa go holwa ke yona, re swanetše go dira boiteko bjo bo sa kgaotšego. Re swanetše go e bala ka mehla, re ithute yona gomme re naganišiše ka yona. Paulo o eleditše ka gore: “Hlôkômêla tšôna-tšeo, O ineêlê tšôna, xore dilong tšohle xo bônalê xe O tšwêlêla pele.” (1 Timotheo 4:15; Doiteronomio 11:18-21) Modimo o kgonthišetša gore ge e ba o šomela go diriša keletšo ya gagwe bjalo ka ge e hwetšwa ka Beibeleng, o tla atlega. O holofetša gore: “Bô’ta Modimo . . . Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”​—Diema 3:5, 6. 

[Diswantšho go letlakala 31]

Go latela keletšo ya Beibele go dira gore bophelo e be bjo bo kgotsofatšago