Godišang Bao ba Neilwego Matla a Taolo Godimo ga Lena
Godišang Bao ba Neilwego Matla a Taolo Godimo ga Lena
“Godišang batho ka moka, ratang bana b’abo lena, boifang Modimo, neang kgoši kgodišo.”—1 PETRO 2:17, PK.
1, 2. Batho ba lebelela maemo a taolo bjang lehono? Ka baka la’ng?
MMA yo mongwe o ngongorega ka gore: “Bana ba na le ditshwanelo ka moka. Batswadi ga ba hlompšhe.” Pampiri yeo e kgomaretšwago pampareng ya koloi e re: “Sola Matla a Taolo.” Tšeo e fo ba diponagatšo tše pedi feela tša boemo bjoo bo apareditšego lehono, ka ge o swanetše go tseba. Go hlokega ka kakaretšo ga tlhompho ya go hlompha batswadi, barutiši, bathwadi le bahlankedi ba mmušo go atile lefaseng ka moka.
2 Ba bangwe ba ka no goletša magetla gomme ba re, ‘Ee, bao ba lego maemong a taolo ga ba swanelwe ke gore ke ba hlomphe.’ Ka dinako tše dingwe go ka ba thata go ganetša seo. Re lebeletšane le tšweletšo e sa kgaotšego ya ditaba tšeo di lego mabapi le kgobogo ya bahlankedi ba mmušo, bathwadi ba megabaru, barutiši bao ba se nago bokgoni le batswadi bao ba gobošago. Ka mo go thabišago, ke Bakriste ba sego nene bao ba lebelelago bao ba lego maemong a taolo ka phuthegong ka pono e bjalo.—Mateo 24:45-47.
3, 4. Ke ka baka la’ng Bakriste ba swanetše go bontšha tlhompho bakeng sa bao ba lego maemong a taolo?
3 Ka ge re le Bakriste, re na le “lebaka le le gapeletšago” bakeng sa go hlompha bao e lego babuši ba lefase. Moapostola Paulo o ile a eletša Bakriste gore “ba se xanê xo bušwa ke ba ba filwexo matla a xo buša; xobane xa xo na mmušô o sa tšwexo xo Modimo; mmušô wo o lexo xôna o beilwe ke Modimo.” (Ba-Roma 13:1, 2, 5, bapiša le NW; 1 Petro 2:13-15.) Paulo gape o ile a bontšha lebaka le le kwalago bakeng sa go kwa bao ba laolago ka lapeng: “Lena Basadi! Kwang banna ba lena; ké sôna se se swanetšexo Moreneng. Lena Bana! Kwang batswadi ba lena dilong tšohle; xobane ké sôna se se kxahlaxo Morêna.” (Ba-Kolose 3:18, 20) Bagolo ba phuthego ba swanelwa ke gore re ba godiše ka gobane ‘moya o mokgethwa o ba kgethetše gore e be badiši, ba diše phuthego ya Modimo.’ (Ditiro 20:28) Re godiša babuši ba batho ka baka la go hlompha Jehofa. Ka tlwaelo, go godiša bolaodi bja Jehofa go tla pele maphelong a rena.—Ditiro 5:29.
4 Re dutše re nagana ka bolaodi bja Jehofa bjo bo phagamego, anke re eleng hloko mehlala ya ba bangwe bao ba ilego ba se ke ba hlompha bao ba lego maemong a taolo le ba bangwe bao ba ilego ba ba hlompha.
Go Hloka Tlhompho go Lebiša go se Amogelweng
5. Ke boemo bofe bja kgopolo bja go se hlomphe bjoo Mikala a ilego a bo bontšha go Dafida, gomme seo se ile sa lebiša go eng?
5 Go tloga historing ya Kgoši Dafida, re kgona go bona kamoo Jehofa a lebelelago bao ba nyatšago taolo yeo e neilwego ke Modimo. Nakong ya ge Dafida a be a tliša areka ya kgwerano Jerusalema, mosadi wa gagwe Mikala o ile “a bôna kxoši Dafida à tšama a sela à bina pele xa Morêna; a mo nyatša pelong ya xaxwe.” Mikala o be a swanetše go ba a ile a tšea Dafida e se feela hlogo ya lapa eupša gape e le kgoši ya naga. Lega go le bjalo, o ile a ntšha maikwelo a gagwe ka tsela ya go kodutla a re: “Lehono kxoši ya Isiraele e be e thathankxa è hlobotše è bônwa ke balata ba yôna ba basetsana le ba masoxana, è hlobotše wa dikobaobane.” Se se ile sa feleletša ka gore Mikala ga se a ka a belega bana le ka mohla.—2 Samuele 6:14-23.
6. Jehofa o ile a lebelela bjang go hloka tlhompho ga Kora go motlotšwa wa Gagwe?
6 Mohlala o mobe ka go fetišiša wa go se godiše boetapele bja pušo ya Modimo bjo bo kgethilwego ke Modimo e bile wa Kora. Bjalo ka mo-Kahathe, o be a thabela tokelo e kgolo gakaakang ya go hlankela Jehofa tabarenakeleng! Lega go le bjalo, o ile a swaya Moše le Arone diphošo, e lego baetapele ba tloditšwego ba Modimo ba ba-Isiraele. Kora o ile a ipopa ngatana le dikgošana tše dingwe tša Isiraele gomme ba botša Moše le Arone ka bogale gore: “Hleng ba phuthêxô bohle ké ba bakxêthwa ka moka xa bôná, ’me Morêna ó mo xo bôná! Le re’ng Lè ipea xodimo xa phuthêxô ya Morêna?” Jehofa o ile a lebelela bjang boemo bja kgopolo bja Kora le bathekgi ba gagwe? Modimo o ile a lebelela tiro ya bona e le ya go hlompholla Jehofa ka boyena. Ka morago ga go bona bohle bao ba bego ba eme le bona ba metšwa ke lefase, Kora le dikgošana tše 250 ba ile ba fedišwa ka mollo o tšwago go Jehofa.—Numeri 16:1-3, 28-35.
7. Na ‘baapostola ba maipei’ ba be ba na le lebaka le ge e le lefe la go swaya matla a Paulo a taolo phošo?
7 Phuthegong ya Bokriste ya lekgolong la pele la nywaga, go be go e-na le bao ba bego ba nyatša taolo ya pušo ya Modimo. ‘Baapostola ba maipei’ phuthegong ya Korinthe ba be ba e-na le boemo bja kgopolo bja go se hlomphe Paulo. Ba be ba sola bokgoni bja gagwe bja go bolela ba re: ‘Ge a le gona ka sebele, o a fokola, gomme polelo ya gagwe, ba re, e a nyatšega.’ (2 Ba-Korinthe 10:10; 11:5) Go sa šetšwe gore Paulo e be e le seboledi se se tumilego goba go se bjalo, o be a swanelwa ke go newa tlhompho bjalo ka moapostola. Eupša na polelo ya Paulo e be e nyatšega e le ka kgonthe? Dipolelo tša gagwe tša phatlalatša tšeo di ngwadilwego ka Beibeleng di nea bohlatse bja kamoo e bego e le seboledi se se kgodišago ka gona. Ka gona, ka baka la poledišano e kopana yeo a bilego le yona le Heroda Agaripa II, “setsebi . . . dingangišanong ka moka gare ga ba-Juda,” Paulo o ile a fihliša kgoši bokgoleng bja gore e be e re: “O kxaufsi le xo mphenya, ka ba mokriste”! (Ditiro 13:15-43; 17:22-34; 26:1-28, bapiša le NW.) Lega go le bjalo, baapostola ba maipei ba Korinthe ba be ba mo phara molato wa gore polelo ya gagwe e a nyatšega! Jehofa o ile a lebelela bjang boemo bja bona bja kgopolo? Molaetšeng woo o ngwaletšwego balebeledi ba phuthego ya Efeso, Jesu Kriste o ile a bolela ka tsela e kgahlišago ka bao ba gannego go gogwa ke ‘bao ba bego ba re ke baapostola, mola e se bona.’—Kutollo 2:2.
Tlhompho go sa Šetšwe go se Phethagale
8. Dafida o ile a bontšha bjang gore o be a hlompha matla a taolo ao Jehofa a bego a a neile Saulo?
8 Go na le mehlala e mentši ka Beibeleng ya bao ba ilego ba godiša batho bao ba lego maemong a taolo, gaešita le ge ba ba be ba diriša matla a bona a taolo gampe. Dafida e bile mohlala o mongwe o bjalo o mobotse. Kgoši Saulo, yo Dafida a bego a hlankela ka tlase ga gagwe, o ile a thoma go ba le mona ka dilo tšeo a bego a di fihlelela gomme a tsoma go mmolaya. (1 Samuele 18:8-12; 19:9-11; 23:26) Lega go le bjalo, le ge a be a hwetša dibaka tša go ka bolaya Saulo, Dafida o ile a re: “Ge e le nna, go iša letsogo la-ka go motlotšwa wa Jehofa go mmolaya, Jehofa a dire gore taba yeo e be kgole le nna.” (1 Samuele 24:4-7; 26:7-13, bapiša le PK.) Dafida o be a tseba gore Saulo o be a fošitše, eupša o ile a mo tlogelela gore a ahlolwe ke Jehofa. (1 Samuele 24:13, 16; 26:22-24) Ga se a ka a bolela gampe ka Saulo goba go bolela le yena ka tsela e bjalo.
9. (a) Dafida o ile a ikwa bjang ge a be a swerwe gampe ke Saulo? (b) Re lemoga bjang gore tlhompho ya Dafida go Saulo e be e le ya kgonthe?
9 Na Dafida o ile a nyama ge a be a swerwe gampe? Dafida o ile a llela Jehofa ka gore: “Ke theilwe ke batho ba bašoro.” (Psalme 54:3) O ile a tšhollela pelo ya gagwe go Jehofa ka gore: “Modimo wa-ka, nnamolêlê manabeng . . . Ba matla ba rapile xo mpoka, mola ké sa ka ka senya, kè sa ka ka dira sebe; Morêna! Ba kxanyêla xo ithlama mola xò se n’e molato. Nanoxa O nkêmêlê, O bônê.” (Psalme 59:1-4) Na o kile wa ikwa ka tsela e swanago—gore ga se wa direla motho yo a lego maemong a taolo phošo, eupša o ile a tšwela pele a go rwešitše bothata? Dafida ga se a ka a palelwa ke go bontšha tlhompho go Saulo. Ka lehu la Saulo, go e na le gore a hlalale ka lethabo, Dafida o ile a hlama kopelo ya sello yeo e rego: “Saulo le Jonathane! Baratwa ba xo nkxahla bà sa phela! . . . Ka lebelô, Le be Le šia ’nong! Ka matla, Le be Le phala tau. Banenyana ba Isiraele! Llêlang Saulo.” (2 Samuele 1:23, 24) A mohlala o mobotse gakaakang wa tlhompho ya kgonthe bakeng sa motlotšwa wa Jehofa, gaešita le ge Dafida a be a fošeditšwe ke Saulo!
10. Ke mohlala ofe o mobotse woo Paulo a o beilego go godišeng maemo a taolo ao a neilwego ke Modimo a sehlopha se bušago, gomme seo se ile sa lebiša go eng?
10 Mehleng ya Bokriste le gona re hwetša mehlala e mebotse kudu ya bao ba godišago maemo a taolo ao a neilwego ke Modimo. Tšea mohlala wa Paulo. O ile a bontšha tlhompho diphethong tša sehlopha se bušago sa lekgolong la pele nywaga sa phuthego ya Bokriste. Ketelong ya mafelelo ya Paulo Jerusalema, sehlopha se bušago se ile sa mo eletša gore a itlhwekiše ka tsela e tlwaelegilego bakeng sa go bontšha ba bangwe gore o be a se na maikwelo a fošagetšego ka Molao wa Moše. Paulo a ka be a ile a fahlela ka gore: ‘Bana bao bešo nakong e fetilego ba ile ba ntaela gore ke tloge Jerusalema nakong ya ge bophelo bja-ka bo be bo le kotsing. Bjale ba nyaka gore ke bontšhe phatlalatša gore ke hlompha Molao wa Moše. Ke šetše ke ngwaletše ba-Galatia lengwalo leo le ba eletšago gore ba tlogele go boloka Molao. Ge ke e-ya tempeleng, ba bangwe ba ka no se kwešiše tiro ya-ka, ba nagana gore ke kwanantšha le ba sehlopha se se bolotšego.’ Lega go le bjalo, go bonagala Paulo a se a ka a nagana ka tsela yeo. Ka ge go be go se na moo go akaretšwago go kwanantšha melao ya motheo ya Bokriste, o ile a hlompha le go dira ka go dumelelana le keletšo ya sehlopha se bušago sa lekgolong la pele la nywaga. Mafelelo a kapejana e bile gore Paulo o ile a swanelwa ke go efošwa sehlopheng sa bahlola-mpherefere sa ba-Juda, gomme ka morago ga moo a fetša nywaga e mebedi a le kgolegong. Mafelelong, go ile gwa dirwa thato ya Modimo. Paulo o ile a nea bohlatse ka pele ga bahlankedi ba phagamego kua Kesarea gomme ka morago a išwa Roma ka ditshenyagalelo tša mmušo bakeng sa go yo nea bohlatse ka pele ga Kesara ka noši.—Ditiro 9:26-30; 21:20-26; 23:11; 24:27; Ba-Galatia 2:12; 4:9, 10.
Na o Bontšha Tlhompho?
11. Re ka bontšha bjang tlhompho bakeng sa babuši ba lefase?
11 Na o bontšha tlhompho e swanetšego go bao ba lego maemong a taolo? Bakriste ba laelwa gore “nthšetšang bohle tše di ba lebanexo. . . . E a swanetšexo xo xodišwa Le mo xodišeng.” Ka kgonthe, go ikokobeletša ga rena “babuši ba bagolo” ga go akaretše feela gore re lefe metšhelo ya rena eupša go akaretša le gore re godiše babuši ka boitshwaro bja rena le polelo ya rena. (Ba-Roma 13:1-7, bapiša le NW.) Re arabela bjang ge re lebane le bahlankedi ba mmušo bao ba ka bago ba le bogale? Kua Chiapas State, Mexico, babuši setšhabeng se sengwe ba ile ba tšea polasa ya malapa a 57 a Dihlatse tša Jehofa ka gobane Bakriste ba ba be ba sa tšee karolo meletlong e mengwe ya bodumedi. Dipitšong tšeo di ilego tša swarwa bakeng sa go rarolla taba ye, Dihlatse, di hlwekile e bile di apere gabotse, ka mehla di be di bolela ka seriti le ka tlhompho. Lebaka la ka godimo ga ngwaga ka morago, ba ile ba ahlolelwa gabotse. Boemo bja bona bja kgopolo bo ile bja dira gore ba hlompšhe ke babogedi ba bangwe go fihla bokgoleng bja gore le bona ba ile ba nyaka go ba Dihlatse tša Jehofa!
12. Ke ka baka la’ng e le gabohlokwa gore motho a be le “tlhompho e tseneletšego” go monna wa gagwe yo a sa dumelego?
12 O ka bontšha bjang tlhompho bakeng sa maemo a taolo ao a neilwego ke Modimo ka lapeng? Ka morago ga go hlalosa mohlala wa Jesu tabeng ya go tlaišwa, moapostola Petro o itše: “Le lena Basadi, bušwang ke banna ba lena, xore xe xo na le ba ba xanaxo xo kwa Lentšu, ba tlê ba ruiwê ka xo bôna tsela ye e swerwexo ke basadi, xò se lentšu le le bolêlwaxo, xe ba lemoxile tsela ya lena è le ya xo boifa [“tlhompho e tseneletšego,” NW] le xo ila thšila.” (1 Petro 3:1, 2; Ba-Efeso 5:22-24) Petro mo o be a gatelela bohlokwa bja gore mosadi a ikokobeletše monna wa gagwe ka “tlhompho e tseneletšego,” gaešita le ge banna ba bangwe ba ka ba ba sa dire selo gore ba swanelwe ke tlhompho e bjalo. Boemo bja mosadi bja kgopolo bja go hlompha bo ka thopa pelo ya monna wa gagwe yo a sa dumelego.
13. Basadi ba ka godiša banna ba bona bjang?
13 Tabeng e dikologilego ya mangwalo a, Petro o lebiša tlhokomelo ya rena mohlaleng wa Sara, yoo monna wa gagwe Aborahama e bego e le mohlala o mogolo wa tumelo. (Ba-Roma 4:16, 17; Ba-Galatia 3:6-9; 1 Petro 3:6) Na basadi bao ba nago le banna ba ba dumetšego ba swanetše go ba nea kgodišo e nyenyane go phalwa ke yeo basadi bao ba nago le balekane bao ba sa dumelego ba ba neago yona? Go thwe’ng ge e ba o sa dumelelane le monna wa gago ka taba e itšego? Jesu o neile keletšo yeo e ka dirišwago ka tsela ya kakaretšo mo: “E a Xo xapeletšaxo xo sepela sekxala se tee, sepela naê O fetšê tše pedi.” (Mateo 5:41) Na o godiša monna wa gago ka go dumelelana le dikganyogo tša gagwe? Ge e ba se se bonala se le thata, mo ntšhetše maikwelo a gago ka taba yeo. O se ke wa nagana gore o tseba kamoo o ikwago ka gona. Eupša ge e ba o mo tsebiša dikganyogo tša gago, dira bjalo ka tsela ya tlhompho. Beibele e re eletša gore: “Polêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.”—Ba-Kolose 4:6.
14. Go bontšha kgodišo go batswadi go akaretša’ng?
14 Go thwe’ng ka lena bana? Lentšu la Modimo le laela gore: “Lena Bana! Kwang batswadi ba lena Moreneng, xobane ké xôna xo loka. Xodiša tat’axo le mm’axo, ké wôna molaô wa pele o naxo le kholofedišô.” (Ba-Efeso 6:1-3) Ela hloko gore go kwa batswadi ba gago go lebelelwa go swana le ‘go godiša tatago le mmago.’ Lentšu la Segerika leo le fetoletšwego e le “kgodišo” le na le tlhaloso ya “go beela theko” goba “go lekanyetša theko go.” Ka gona, go kwa go nyaka se se fetago go latela ka go ngongorega melao ya batswadi yeo o ka e lebelelago e le yeo e sa kwagalego. Modimo o nyaka gore o tšeele batswadi ba gago godimo le go tšea tlhahlo ya bona e le ya bohlokwa.—Diema 15:5.
15. Bana ba ka kgomarela bjang tlhompho ya bona gaešita le ge ba ikwa gore batswadi ba bona ba dirile phošo?
15 Ge e ba batswadi ba gago ba dira selo se sengwe seo se dirago gore o felelwe ke tlhompho yeo o ba hlomphago ka yona, gona go ka dirwa’ng? Leka go lebelela dilo go ya ka tsela yeo ba di lebelelago ka yona. Na ga se ba ‘go tswala’ le go go hlokomela? (Diema 23:22) Na ga ba hlohleletšwe ke lerato la bona go wena? (Ba-Hebere 12:7-11) Bolela le batswadi ba gago ka tlhompho, o ba hlalosetše ka moya o boleta kamoo o ikwago ka gona. Gaešita le ge ba ka arabela ka tsela yeo o sa e ratego, phema go bolela le bona ka tsela yeo e se nago tlhompho. (Diema 24:29) Gopola kamoo Dafida a ilego a kgomarela tlhompho ya gagwe ka gona go Saulo gaešita le ge kgoši e be e aroga go lateleng keletšo ya Modimo. Kgopela Jehofa gore a go thuše go swaragana le maikwelo a gago. Dafida o itše: “Thšollang dipelo tša lena pele xa xaxwe. Modimo ké Yêna ’thšabêlô sa rena.”—Psalme 62:8; Dillo tša Jeremia 3:25-27.
Godiša Bao ba Etelelago Pele
16. Re ka ithuta’ng mehlaleng ya barutiši ba maaka le barongwa?
16 Bagolo ba phuthego ba kgethilwe ke moya o mokgethwa, lega go le bjalo ba sa dutše ba sa phethagala gomme ba dira diphošo. (Psalme 130:3; Mmoledi 7:20; Ditiro 20:28; Jakobo 3:2) Ka baka leo, ba bangwe ka phuthegong ba ka ikwa ba sa kgotsofale ka bagolo. Re swanetše go arabela bjang ge re nagana gore selo se sengwe ka phuthegong ga se dirwe gabotse, goba bonyenyane go bonala go le bjalo? Ela hloko phapano magareng ga barutiši ba maaka ba lekgolong la pele la nywaga le barongwa: “Ke ba mereba, ke baithati, ga ba [barutiši ba maaka] šie go rogaka ba letago; le ge barongwa, ba ba ba fetago ka thata le ka matla, ba sa [ba latofatše ka dipolelo tša maroga, ba sa dire bjalo ka baka la go hlompha Jehofa, NW].” (2 Petro 2:10-13, PK) Le ge barutiši ba maaka ba be ba bolela gampe ka “ba letago”—bagolo bao ba bego ba neilwe matla a taolo phuthegong ya Bokriste ya lekgolong la pele la nywaga—barongwa ga se ba ka ba bolela gampe ka barutiši ba maaka bao ba bego ba baka karogano gare ga banababo rena. Barongwa bao ba lego boemong bjo bo phagamego e bile ba kwešiša toka kudu go feta batho, ba be ba lemoga seo se bego se direga ka phuthegong. Lega go le bjalo, “ka baka la go hlompha Jehofa,” ba ile ba tlogelela kahlolo go Modimo.—Ba-Hebere 2:6, 7; Juda 9.
17. Tumelo ya gago e tsena bjang tabeng ya go swaragana le mathata ao go ona o naganago gore bagolo ba fošitše?
17 Le ge selo se sengwe se sa dirwe ka tsela yeo se swanetšego go dirwa ka yona, na ga se ra swanela go bontšha tumelo go Jesu Kriste e le Hlogo e phelago ya phuthego ya Bokriste? Na ga a tsebe seo se diregago phuthegong ya gagwe ya lefase ka bophara? Na ga se ra swanela go hlompha tsela ya gagwe ya go swaragana le boemo le go lemoga bokgoni bja gagwe bja go laola ditaba? Ka kgonthe, ‘re bomang mo re ka bago ra ahlola ba bangwe?’ (Jakobo 4:12; 1 Ba-Korinthe 11:3; Ba-Kolose 1:18) Ke ka baka la’ng o sa tliše dilo tšeo di go tshwenyago go Jehofa dithapelong tša gago?
18, 19. O ka dira’ng ge e ba o ikwa gore mogolo o fošitše?
18 Ka baka la go se phethagale ga batho, mathata a ka rotoga. Go ka ba gwa ba le dinako tšeo mogolo a dirago phošo, a bakela ba bangwe gore ba tshwenyege. Go gata ga rena mogato ka go akgofa ka tlase ga maemo a bjalo go ka se fetoše boemo. Go ka dira feela gore bothata bo gole. Bao ba nago le temogo ya moya ba tla letela Jehofa gore a lokiše ditaba le gore a nee tayo le ge e le efe yeo e ka bago e nyakega ka nako ya gagwe le ka tsela ya gagwe.—2 Timotheo 3:16; Ba-Hebere 12:7-11.
19 Go thwe’ng ge e ba o ikwa o nyamišitšwe ke taba e itšego? Go e na le gore o bolele le ba bangwe ka phuthegong, ke ka baka la’ng o sa batamele bagolo ka tlhompho bakeng sa go nyaka thušo? Ka ntle le go sola, hlalosa kamoo o kgomegilego ka gona. Ka mehla ba ‘kwele bohloko,’ gomme o kgomarele tlhompho ge o dutše o ba tšhollela sa mafahleng. (1 Petro 3:8) O se ke wa retologela kodutlong, eupša holofela kgolo ya bona ya Bokriste. Leboga kgothatšo le ge e le efe ya Mangwalo yeo ba ka e neago ka botho. Ge e ba go bonagala go nyakega gore go tšewe megato e mengwe ya go phošolla, kgonthišega gore Jehofa o tla hlahla bagolo gore ba dire se sebotse le se se nepagetšego.—Ba-Galatia 6:10; 2 Thesalonika 3:13.
20. Ke eng seo re tlago go se ahla-ahla sehlogong se se latelago?
20 Lega go le bjalo, go sa na le lehlakore le lengwe leo le swanetšego go elwa hloko mabapi le go godiša le go hlompha bao ba lego maemong a taolo. Na bao ba beilwego maemong a taolo ga ba a swanela gore ba hlomphe bao ba beilwego tlhokomelong ya bona? Anke re hlahlobeng seo sehlogong se se latelago.
O tla Araba Bjang?
• Ke lebaka lefe le lebotse leo re nago le lona bakeng sa go godiša bao ba lego maemong a taolo?
• Jehofa le Jesu ba lebelela bjang bao ba sa hlomphego maemo a taolo ao a neilwego ke Modimo?
• Ke mehlala efe e mebotse yeo re nago le yona ya bao ba ilego ba godiša bao ba neilwego maemo a taolo?
• Ke eng seo re ka se dirago ge e ba yo a nago le matla a taolo godimo ga rena a bonala a fošitše?
[Dipotšišo tša Thuto]
[Seswantšho go letlakala 12]
Sara o be a hlompha boemo bja taolo bja Aborahama ka mo go tseneletšego gomme o be a thabile
[Seswantšho go letlakala 13]
Mikala o ile a palelwa ke go hlompha boemo bja taolo bja Dafida bjalo ka hlogo ya lapa le kgoši
[Seswantšho go letlakala 15]
“Ge e le nna, go iša letsogo la-ka go motlotšwa wa Jehofa go mmolaya, . . . taba yeo e be kgole le nna”
[Seswantšho go letlakala 16]
Ke ka baka la’ng o sa tliše dilo tšeo di go tshwenyago go Jehofa dithapelong tša gago?