Ke ka Baka La’ng re Swanetše go Fenya Tshekamelo ya go Nyaka Gore Dilo di Dirwe ka Mokgwa o Phethagetšego?

Na ka mehla o katana ka matla go dira ka mo o ka kgonago ka gona? Ka mo go lego molaleng, go dira ga gago bjalo go ka go hola gotee le go hola bao ba go dikologilego ka ditsela tše dintši. Ka lehlakoreng le lengwe, ba bangwe ba ile ba fihliša ditaba boemong bjo bo feteletšego gomme ba fetoga bao ba nyakago phethego. Seo se bontšha’ng?

EE, TLHALOSO e nngwe ya polelwana “go nyaka gore dilo di dirwe ka mokgwa o phethagetšego” ke “tshekamelo ya go lebelela selo se sengwe le se sengwe seo se hlaelelwago ke phethego e le seo se sa amogelegego.” Mohlomongwe o šetše o kile wa gahlana le batho bao ba nago le tshekamelo e bjalo. O ka bona gore dinyakwa tše dintši ka mo go feteletšego tšeo ba di lebeletšego go ba bangwe di ka baka mathata a mantši, tša bakela boemo bja go se kgotsofale le bja go nolega moko. Batho ba bantši bao ba nago le teka-tekano ba lemoga gore go nyaka dilo gore di dirwe ka mokgwa o phethagetšego ka kgopolo e feteletšego le dinyakwa tše di sa leka-lekanago ditabeng ka moka tša bophelo e tloga e le mo go sa kgahlišego. Ke selo seo se nyakago gore se fenywe. Lega go le bjalo, bothata ke gore ge go tliwa mokgweng wa rena wa go bona dilo goba tshekamelong ya rena, go ka ba thata go lemoga tshekamelo e bjalo ya go nyaka gore dilo di dirwe ka mokgwa o phethagetšego, ka gona ke tlhohlo go e fenya.

Nelson o na le boikarabelo bjo bogolo le mathata a mantši ao a swanetšego go a rarolla. Ka mehla o seka-seka dipalo-palo gomme o lebelela tšweletšo e le selo sa bohlokwa kudu. Go nyaka gore dilo di dirwe ka mokgwa o phethagetšego gantši go lebelelwa e le mo go nyakegago bakeng sa go atlega mebarakeng yeo e phadišanago ya mošomo. Gaešita le ge ba bangwe ba ka ba ba leboga bokgoni bja Nelson, go nyaka ga gagwe gore dilo di dirwe ka mokgwa o phethagetšego go mmakela mathata a mmele a bjalo ka go opša ke hlogo le kgateletšego. Na o ipona o swana le Nelson?

Bafsa le bona ba kgongwa ke tshekamelo ya go nyaka gore dilo di dirwe ka mokgwa o phethagetšego. Ge e sa le ngwana, Rita yo a tšwago Rio de Janeiro o be a rata go tsena sekolo. O be a leka go uta gore a se ke a bonagala e le motho yo a ratago maemo, lega go le bjalo, fela o be a nyama kudu ge a be a hwetša gore ga se a hwetša meputso ya godimo kudu. Rita o re: “Go tloga bjaneng ke be ke ipapetša le ba bangwe bao ba bego ba e-na le nako e ntši, mola e le gore ke be ke dula ke gateletšegile e bile ke dula ke dira dilo ka lebelo. Ga se ka ka ka ikwa ke e-na le nako ya go khutša ka  gobane ka mehla go be go dula go e-na le dilo tšeo di swanetšego go dirwa.”

Ge e sa le ngwanenyana yo monyenyane, Maria o be a llišwa ke go ferekana ge a be a sa kgone go thala gabotse bjalo ka ge ba bangwe ba be ba dira. Go tšwela pele, go tsomeng ga gagwe go ba le bokgoni bjo bo phethagetšego mminong, gantši o be a gateletšega e bile a belaela go e na le go thabela go bapala goba go opela ga gagwe. Ngwanenyana yo mongwe wa mo-Brazil Tânia, yo a ilego a leka go ba bohlale le go phema phadišano, o dumetše gore o be a sa dutše a ipeela ditekanyetšo tšeo di bego di phagame kudu, bobedi sekolong le ka gae. O be a nagana gore ka ntle le gore mošomo wa gagwe e be o phethagetšego, batho ba ka se ke ba mo rata kudu. Go feta moo, Tânia ka dinako tše dingwe o be a letela mo gontši kudu go ba bangwe, e lego seo se ilego sa mo dira gore a ikwe a swabile e bile a nyamile.

Gaešita le ge bokgoni, maiteko le maikwelo a go ikwa motho a kgotsofetše di le bohlokwa, maikwelo a fošagetšego a bjalo ka go tšhoga go palelwa, a ka tšwelela ka baka la go ipeela dipakane tšeo di sa fihlelelegego. Batswadi goba ba bangwe ba ka bea tekanyetšo ya phethego mošomong wa sekolo goba dipapading tšeo bafsa ba hwetšago go le thata go di fihlelela. Ka mohlala, mmago Ricardo o be a e-na le ditebelelo tše di phagamego ka yena, a nyaka gore e be ngaka, a bapale piano e bile a be a bolele maleme a mmalwa. Na o kgona go bona gore ge e ba mokgwa woo wa go dira dilo ge o feteletšwa, o tliša mathata le maswabi?

Ke ka Baka La’ng o Swanetše go Phema Tshekamelo ya go Nyaka Gore Dilo di Dirwe ka Mokgwa o Phethagetšego?

Mošomo wa maemo a phagamego, go fihlelela maemo a phagamego a nepagalo le a bothakga ke mo go nyakegago kudu. Ka gona, batho ba swanetše go phadišana mebarakeng ya mošomo. Ntlha e nngwe yeo e bakelago ba bantši gore ba katane ka matla kudu ke go boifa go lahlegelwa ke mokgwa wa boiphedišo. Bašomi ba bangwe ba ba bjalo ka radiatletiki yoo a ineelago ka mo go feteletšego bakeng sa go dira rekoto e mpsha. Ka morago, ge a lebeletšane le phadišano e thata, a ka ikwa a tutueletšega gore a itlwaetše ka mo go oketšegilego, mohlomongwe ka go šomiša dikhemikhale bakeng sa go kaonefatša e bile a holofela go fenya. Go e na le go phegelela ka mo go sa gobatšego go phela gabotse, tshekamelo ya go nyaka gore dilo di dirwe ka mokgwa o phethagetšego e dira batho gore “ba tutuetšwe ke go boifa go palelwa” goba “ba tutueletšege go ba ba pele.”​—The Feeling Good Handbook.

Ka mo go dumelegago, ba bangwe ba ikwa gore seo ba ka se dirago go tša bokgabo goba dipapading se ka kaonefatšwa ka mehla. Lega go le bjalo, go ya ka Dr. Robert S. Eliot, “go nyaka gore dilo di dirwe ka mokgwa o phethagetšego ke tebelelo yeo e ka se tsogego e bile ya kgonthe.” O oketša ka gore: “Go akaretša maikwelo a molato, go iphahlelela le go boifa go kwerwa.” Lega go le bjalo, mantšu a Kgoši Salomo yo bohlale ke a bohlale gakaakang, ao a rego: “Ka bôna medirô ka moka, le matšô a medirô yohle, è le tša xe motho a tsebafêla wabô, è le tša lefêla, è le xo phuthêla môya ka kobô.”​—Mmoledi 4:4.

O ka dira eng ge e ba o sekamela go beng yo a nyakago phethego? Na ke therešo gore ge o leka go dira bjalo ka matla kudu ke moo o nyamišwago kudu? Na o be o ka rata go ba yo a sa nyakego mo gontši kudu le go ba yo a thekgago ditho kutšwanyana? Ke eng seo se bolelwago ke go phethagala? Na ga o hlologele go šomiša bokgoni bja gago bjo bo feletšego ge o dutše o phema go ba motho yo a nyakago gore dilo di dirwe ka mokgwa o phethagetšego? Ge e ba batho bao ba sa phethagalago ba kgona go diriša bokgoni bja bona bjo ba bo neilwego ke Modimo go hwetša dilo tšeo di tla holago ba bangwe, akanya seo batho ba ka se dirago ka tlase ga maemo a phethagetšego le ka tlase ga tlhahlo ya Modimo!

[Seswantšho go letlakala 4]

Batswadi goba ba bangwe ba ka nyaka phethego yeo bafsa ba ka se e fihlelelego