“Lena ka Moka le Bana ba o Tee”
“Lena ka Moka le Bana ba o Tee”
“Lena Le se kê la dumêla leo la Rabi, xobane wa lena Moruti ké o tee, ké Kriste; ’me lena ka moka Le bana ba o tee.”—MATEO 23:8.
1. Ke taba efe yeo re swanetšego go e ela hloko?
MOSADI wa Mokriste wa nageng ya ka Bohlabela o ile a botšiša ka ntle le maikemišetšo a mabe moromiwa yo a tšwago Australia gore: “Ke mang yo a swanelwago ke go newa kgodišo e kgolo, na ke moromiwa goba ke mošomi wa Bethele?” O be a nyaka go tseba gore ke mang yo a swanetšego go hlompšha kudu, moromiwa yo a tšwago nageng e nngwe goba modiredi wa lefelong yo a hlankelago ofising ya lekala ya Mokgatlo wa Watch Tower. Potšišo yeo e se nago maikemišetšo a mabe, yeo e bontšhago setšo sa go tshwenyega ka maemo e ile ya tlaba moromiwa. Lega go le bjalo, kgang ya gore yo mogolo ke mang e bakwa ke kganyogo ya go rata go tseba moo batho ba emego gona maemong a matla le a tutuetšo.
2. Re swanetše go lebelela barapedi-gotee le rena bjang?
2 Go tshwenyega mo ga se selo se sefsa. Gaešita le barutiwa ba Jesu ba ile ba ba le ngangišano e tšwelago pele mabapi le gore yo mogolo ke mang. (Mateo 20:20-24; Mareka 9:33-37; Luka 22:24-27) Le bona ba be ba e-tšwa setšong seo se tshwenyegago ka maemo sa Bojuda bja lekgolong la pele la nywaga. A naganne ka setšhaba se se bjalo, Jesu o ile a eletša barutiwa ba gagwe gore: “Lena Le se kê la dumêla leo la Rabi, xobane wa lena Moruti ké o tee, ké Kriste; ’me lena ka moka Le bana ba o tee.” (Mateo 23:8) Seithuti sa Beibele Albert Barnes o boletše gore sereto sa bodumedi se se swanago le sa “Moruti” seo se bolelago “Morutiši,” “se bonagala se tsenya boikgantšho le maikwelo a go ikwa motho a phagame go bao ba bitšwago ka sona, le mona le maikwelo a go se be selo go bao ba sa bitšwego ka sona; le gona moya ka moka le tshekamelo ya gona di fapane le ‘bonolo bjo bo lego go Kriste.’” Ka kgonthe, Bakriste ba phema go bitša balebeledi bao ba lego gare ga bona e le “Mogolo Semang-mang,” ba diriša lentšu “mogolo” e le sereto sa kgodišo e feteletšego. (Jobo 32:21, 22) Ka lehlakoreng le lengwe, bagolo bao ba phelelago seo se bolelwago ke keletšo ya Jesu ba godiša ditho tše dingwe tša phuthego, go fo etša ge Jehofa a godiša barapedi ba botegago ka go se kwanantšhe gomme Jesu Kriste a godiša balatedi ba botegago ka go se kwanantšhe.
Mohlala wa Jehofa le wa Jesu
3. Jehofa o ile a godiša bjang dibopiwa tša gagwe tša moya?
3 Le ge Jehofa e le “Yo Godimo-dimo,” go tloga mathomong o ile a godiša dibopiwa tša gagwe ka go di akaretša medirong ya gagwe. (Psalme 83:18) Ge a be a bopa motho wa pele, Jehofa o ile a akaretša Morwa wa gagwe yo a tswetšwego a nnoši modirong e le “mošomedi yo a nago le bokgoni.” (Diema 8:27-30, bapiša le NW; Genesi 1:26.) Jehofa o ile a ba a laletša barongwa ba gagwe ba legodimong gore ba itlhalose mabapi le kamoo go ka dirwago ka gona tabeng ya go fediša Kgoši Ahaba yo kgopo ge A be a dira phetho ya go dira bjalo.—1 Dikxoši 22:19-23.
4, 5. Jehofa o godiša bjang dibopiwa tša gagwe tšeo e lego batho?
4 Jehofa o buša e le Mmuši yo a Phagamego wa legohle. (Doiteronomio 3:24) Ga go nyakege gore a rerišane le batho. Lega go le bjalo, go ka thwe o a inama gore a ba ele hloko. Mopsalme o opetše ka gore: “Ké mang a lekanaxo le Morêna Modimo wa rena Mo-dula-phaxamong? Ó ukametše maxodimo le lefase, ó di bôna di le tlase, A tsoša babôtlana leroleng.”—Psalme 113:5-8.
5 Pele a ka fediša Sodoma le Gomora, Jehofa o ile a theetša dipotšišo tša Aborahama gomme a kgotsofatša kwešišo ya Aborahama mabapi le toka. (Genesi 18:23-33) Le ge Jehofa a be a šetše a tseba mafelelo a dikgopelo tša Aborahama, o ile a theetša dikgopelo tša Aborahama ka go se fele pelo gomme a amogela mabaka a gagwe.
6. Go ile gwa feleletša ka eng tabeng ya go bontšha ga Jehofa kgodišo ge Habakuku a botšiša potšišo?
6 Jehofa o ile a theetša le Habakuku yo a ilego a botšiša gore: “Morêna, xo tlo feletša neng ké fêla kè bitša Ò sa kwe?” Na Jehofa o ile a lebelela potšišo yeo e le go hlohla matla a gagwe a taolo? Aowa, o ile a lebelela dipotšišo tša Habakuku e le tše di nepagetšego, gomme ka seo o ile a utolla morero wa gagwe wa go tsoša ba-Kaladea gore ba phethe kahlolo. O ile a kgonthišetša moporofeta gore ‘kahlolo ye yeo e boletšwego e sa le pele e be e tla phethagala.’ (Habakuku 1:1, 2, 5, 6, 13, 14; 2:2, 3) Ka go tšeela godimo dilo tšeo Habakuku a tshwenyegilego ka tšona le go mo araba, Jehofa o ile a godiša moporofeta. Ka baka leo, moporofeta yo a tshwenyegilego kudu o ile a phuthologa gomme a thoma go thaba, a botile Modimo wa phološo ya gagwe ka mo go feletšego. Se se bonagatšwa pukung e buduletšwego ya Habakuku yeo e matlafatšago kholofelo ya rena go Jehofa lehono.—Habakuku 3:18, 19.
7. Ke ka baka la’ng tema yeo Petro a e kgathilego ka Pentekoste ya 33 C.E. e le ya bohlokwa?
7 Jesu Kriste ke mohlala o mongwe o mobotse wa go bontšha tlhompho go ba bangwe. Jesu o be a boditše barutiwa ba gagwe gore “mang le mang e a . . . ntahlaxo pele xa batho, le Nna ke tlo mo lahla pele xa Tate.” (Mateo 10:32, 33) Lega go le bjalo, bošegong bja go ekwa ga gagwe, barutiwa ba gagwe ka moka ba ile ba mo tlogela gomme moapostola Petro yena a mo latola gararo. (Mateo 26:34, 35, 69-75) Jesu o ile a lebelela ka kua ga ponagalo ya ka ntle gomme a hlokomela maikwelo a Petro a ka gare-gare, go itshola ga gagwe mo go tseneletšego. (Luka 22:61, 62) Ka morago ga matšatši a 51 feela, Kriste o ile a nea moapostola yo a itshotšego seriti ka go mo dumelela gore a emele barutiwa ba Jesu ba 120 letšatšing la Pentekoste le gore a diriše sa pele sa “dikxonyu tša mmušô.” (Mateo 16:19; Ditiro 2:14-40) Petro o be a neilwe sebaka sa go ‘boa gomme a matlafatše bana babo.’—Luka 22:31-33.
Go Nea Ditho tša Lapa Kgodišo
8, 9. Tabeng ya go godiša mosadi wa gagwe, monna a ka ekiša Jehofa le Jesu bjang?
8 Banna le batswadi ba dira gabotse go ekiša Jehofa le Jesu Kriste tabeng ya go diriša matla a taolo ao a neilwego ke Modimo. Petro o eleditše ka gore: “Le lena Banna! Le phedišanê le [basadi ba lena] Lè tseba xore mosadi re ka re ké yêna sebyana se se swanetšexo xo neneketšwa.” (1 Petro 3:7) Akanya o swara sebjana sa letsopa se se phumegago gabonolo, seo go lego molaleng gore ga se a tia go feta sa kota. Na o be o ka se be šedi kudu? Monna a ka dira bjalo ka go ekiša Jehofa, a theetše dikgopolo tša mosadi wa gagwe ge a dira diphetho ditabeng tša lapa. Gopola gore Jehofa o ile a ipha nako ya go bontšhana mabaka le Aborahama. Monna ka ge a sa phethagala a ka palelwa ke go bona taba ka botlalo. Ka gona na e be e ka se be gabohlale gore a godiše mosadi wa gagwe ka go ela hloko kgopolo ya gagwe ka potego?
9 Mafaseng ao go wona bolaodi bja banna bo tsemilego ka medu, monna o swanetše go dula a gopola gore mosadi wa gagwe a ka ba a swanelwa ke go fenya lepheko le legolo la go bolela maikwelo a gagwe a ka gare-gare. Ekiša tsela yeo Jesu Kriste a ilego a dirišana ka yona le barutiwa ba gagwe, bao e bego e tla ba karolo ya sehlopha sa monyadiwa wa gagwe wa nako e tlago nakong ya ge a be a sa le lefaseng. O be a ba tšea e le ba bohlokwa, a naganela mafokodi a bona a mmele le a moya gaešita le pele ba ka bolela dinyakwa tša bona. (Mareka 6:31; Johane 16:12, 13; Ba-Efeso 5:28-30) Go oketša moo, iphe nako ya go ela hloko seo mosadi wa gago a go direlago sona gotee le lapa la gago gomme o bontšhe tebogo ya gago ka mantšu le ka ditiro. Jehofa gotee le Jesu ba ile ba leboga, ba reta le go šegofatša bao ba bego ba swanelega. (1 Dikxoši 3:10-14; Jobo 42:12-15; Mareka 12:41-44; Johane 12:3-8) Ka morago ga ge monna wa gagwe a fetogile yo mongwe wa Dihlatse tša Jehofa, mosadi wa Mokriste ka Bohlabela o itše: “Monna wa-ka o be a tlwaetše go nketa pele ka dikgato tše tharo goba tše nne, a nthwešitše dilo tšohle. Ga bjale o rwala mekotlana gomme o bontšha tebogo bakeng sa seo ke se dirago ka gae!” Lentšu la tebogo e tšwago pelong le dira mo gogolo tabeng ya go thuša mosadi wa gago gore a ikwe a tšewa e le wa bohlokwa.—Diema 31:28.
10, 11. Ke eng seo batswadi ba ka ithutago sona mohlaleng o mobotse wa Jehofa tabeng ya go dirišana le setšhaba sa marabele sa Isiraele?
10 Ge ba dirišana le bana ba bona, kudu-kudu ge go nyakega kgalemelo, batswadi ba swanetše go ekiša mohlala wa Modimo. “Morêna ó be a fêla a kxothatša Ba-Isiraele [le ba-Juda]” gore ba lahle ditsela tša bona tše mpe, eupša ba ile ba tšwela pele “ba thšalalatša melala.” (2 Dikxoši 17:13-15) Ba-Isiraele ba ile ba ba ba leka go “mo foraforetša ka legano la bona, ba mo aketša ka maleme a bona.” Batswadi ba bantši ba ka nagana gore bana ba bona ka dinako tše dingwe ba itshwara bjalo. Ba-Isiraele ba be ba “leka Modimo” gomme ba mo kweša bohloko, ba mo dira gore a šulafalelwe. Lega go le bjalo, Jehofa e be “e le Yo kgaugelo, a ba lebalela bokgopo bja bona, a se ke a ba senya.”—Psalme 78:36-41, PK.
11 Jehofa o ile a ba a lopa ba-Isiraele ka gore: “Tlang xê, re sekišaneng! . . . Le xe dibe tša lena di hubetše bo-ka madi, di tlo šweufala wa leswêla.” (Jesaya 1:18) Le ge Jehofa a be a se a foša, o ile a laletša setšhaba sa marabele gore se tle ba tlo lokiša ditaba. A boemo bjo bobotse gakaakang bja kgopolo bjoo batswadi ba ka bo ekišago ge ba dirišana le bana ba bona! Ge boemo bo nyaka gore go dirwe bjalo, ba nee seriti ka go theetša taba ya bona gomme o bontšhane le bona mabaka mabapi le lebaka leo ka lona ba swanetšego go fetoga.
12. (a) Ke ka baka la’ng re swanetše go phema go godiša bana ba rena go feta kamoo re godišago Jehofa ka gona? (b) Ke eng seo se nyakegago ge e ba re tla hlompha seriti sa bana ba rena ge re ba kgalemela?
12 Ee, ka dinako tše dingwe bana ba nyaka keletšo e matla. Batswadi ba ka se rate gore ba swane le Eli yo a ilego ‘a tšwela pele a godiša barwa ba gagwe go e na le go godiša Jehofa.’ (1 Samuele 2:29) Lega go le bjalo, bana ba swanetše gore ba bone boikemišetšo bjo lerato bjo bo hlohleletšago phošollo. Ba swanetše gore ba kgone go lemoga gore batswadi ba bona ba a ba rata. Paulo o eletša bo-tate ka gore: “Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Le ge go bolelwa ka matla a taolo a bo-tate, ntlha yeo e tšweletšwago ke ya go nyakega ga gore tate a naganele seriti sa bana ka go se ba galefiše ka baka la bogale bja gagwe bjo bo feteletšego. Ee, go naganela seriti sa bana go nyaka nako le boiteko go batswadi, eupša dienywa tša go dira bjalo ke tšeo di swanelwago ke go direlwa boikgafo ka moka.
13. Pono ya Beibele ka batšofadi ka lapeng ke efe?
13 Go bontšha kgodišo dithong tša lapa go fetela ka kua ga go nea mosadi wa motho le bana ba gagwe seriti. Seema sa Sejapane se re: “Ge o tšofetše, e-kwa bana ba gago.” Seo se bolelwago ke seema seo ke gore batswadi bao ba tšofetšego ba swanetše go phema go tshela mellwane ya taolo ya bona ya botswadi le gona ba swanetše ba ele hloko seo se bolelwago ke bana ba bona bao ba godilego. Le ge e le ga Mangwalo gore batswadi ba godiše bana ba bona ka go ba theetša, bana ga se ba swanela go bontšha boemo bja kgopolo bja go se hlomphe dithong tše di godilego tša lapa. Diema 23:22 e re: “Mm’axo xe a kxekotše, O se kê wa mo nyatša.” Kgoši Salomo o ile a phela ka go dumelelana le seema se gomme a godiša mmagwe ge a be a e-tla go yena go tlo dira kgopelo. Salomo o ile a dira gore go bewe sedulo sa bogoši ka go le letona la sedulo sa gagwe gomme a theetša seo mmagwe yo a tšofetšego, Batseba a bego a nyaka go mmotša sona.—1 Dikxoši 2:19, 20.
14. Re ka godiša bjang ditho tše di tšofetšego tša phuthego?
14 Ka lapeng la rena leo le katološitšwego la moya, re boemong bjo bobotse bja go ‘rakana pele’ go godišeng ditho tše di tšofetšego tša phuthego. (Ba-Roma 12:10) Ba ka ba ba sa kgone go dira mo gontši go etša kamoo ba bego ba dira ka gona mehleng e fetilego, gomme seo se ka ba ferekanya. (Mmoledi 12:1-7) Hlatse e tloditšwego yeo e tšofetšego yeo e bego e sa tsoge malaong a yona lefelong la go hlokomela balwetši e kile ya bontšha pherekano e bjalo ka gore: “Ke fela pelo gore ke hwa neng gomme ke boele mošomong.” Go batšofadi ba bjalo, go bontšha ga rena tlhompho e swanetšego le kgodišo go ka thuša. Ba-Isiraele ba be ba laetšwe gore: “O eme pele ga hlogo e pududu, gomme o godiše sefahlogo sa mokgalabje.” (Lefitiko 19:32, PK) Bontšha go naganela ka go dira bao ba godilego gore ba ikwe ba nyakwa e bile ba lebogwa. ‘Go ema’ go ka akaretša go dula fase le go ba theetša ge ba anega seo ba kgonnego go se dira nywageng e fetilego. Seo se tla nea batšofadi seriti le go humiša bophelo bja rena ka noši bja moya.
“Le Rakanê Pele ka xo Xodišana”
15. Bagolo ba ka dira’ng go nea ditho tša phuthego seriti?
15 Ditho tša phuthego di a ata ge bagolo ba di beela mohlala o mobotse. (1 Petro 5:2, 3) Go sa šetšwe go swarega ga bona, bagolo bao ba hlokomelago ba gata mogato wa pele wa go batamela bafsa, dihlogo tša malapa, bo-mma bao ba se nago balekane, basadi ba malapa le batšofadi go sa šetšwe gore bao ba lebeletšane le mathata goba go se bjalo. Bagolo ba theetša seo ditho tša phuthego di nyakago go se bolela gomme ba di reta bakeng sa seo di kgonago go se dira. Mogolo yo a nago le šedi yo a bolelago mantšu a tebogo ka seo ngwanabo rena goba kgaetšedi a se dirago o ekiša Jehofa yo a lebogago dibopiwa tša gagwe tša lefaseng.
16. Ke ka baka la’ng re swanetše go lebelela bagolo e le bao ba swanelwago ke kgodišo gotee le ba bangwe ka phuthegong?
16 Ka go ekiša Jehofa, bagolo ba bea mohlala o mobotse tabeng ya go diriša keletšo ya Paulo e rego: “Xo ratana seng sa lena e bê kwanô ya dipelô; Le rakanê pele ka xo xodišana.” (Ba-Roma 12:10) Se se ka ba thata kudu bakeng sa bagolo bao ba dulago dinageng tšeo go tšona go tshwenyega ka maemo e lego mokgwa o tlwaelegilego. Ka mohlala, nageng e nngwe ya ka Bohlabela go na le mantšu a mabedi bakeng sa “ngwanabo rena,” le lengwe ke la kgodišo gomme le lengwe ke le le tlwaelegilego. Ga se kgale ditho tša phuthego di be di bitša bagolo le bao ba godilego ka leina la kgodišo, di diriša leina le le tlwaelegilego bakeng sa ba bangwe. Lega go le bjalo, di ile tša kgothaletšwa gore di diriše leina le le tlwaelegilego ka dinako tšohle ka gobane go etša ge Jesu a ile a botša balatedi ba gagwe, “lena ka moka Le bana ba o tee.” (Mateo 23:8) Gaešita le ge phapano e ka no se bonale kudu gakaalo dinageng tše dingwe, go nyakega gore ka moka ga rena re lemoge tshekamelo ya batho ya go hlaola batho go ya ka maemo.—Jakobo 2:4.
17. (a) Ke ka baka la’ng bagolo ba swanetše go ba ba batamelegago? (b) Ke ka ditsela dife bagolo ba ka ekišago Jehofa tabeng ya go dirišana le ditho tša phuthego?
17 Ke therešo gore Paulo o ile a re kgothaletša gore re sware bagolo ba bangwe e le bao ba swanelwago ke ‘go godišwa gabedi,’ eupša e sa dutše e le banababo rena. (1 Timotheo 5:17) Ge e ba re kgona go ‘batamela sedulo sa bogoši sa botho bjo bo sa swanelago sa Mmuši wa Legohle ka tokologo ya polelo,’ na ga se ra swanela go kgona go batamela bagolo bao ba swanetšego go ekiša Jehofa? (Ba-Hebere 4:16; Ba-Efeso 5:1) Balebeledi ba ka lekola go batamelega ga bona ka noši ka go nagana gore ke gakae ba bangwe ba tlago go bona go tlo tsoma keletšo goba go tlo dira ditšhišinyo. Ithute thuto tseleng yeo Jehofa a akaretšago ba bangwe ka gona medirong ya gagwe. O nea ba bangwe seriti ka go ba abela boikarabelo. Le ge ditšhišinyo tše dingwe tšeo di newago ke Hlatse e nngwe di ka bonala di sa šome, bagolo ba swanetše go leboga go kgomega mo go bontšhwago. Gopola kamoo Jehofa a ilego a swaragana ka gona le dipotšišo tšeo di fatollago tša Aborahama le sello sa Habakuku sa kgateletšego.
18. Bagolo ba ka ekiša Jehofa bjang tabeng ya go lokiša bao ba nyakago thušo?
18 Bakriste-gotee ba bangwe ba nyaka go lokišwa. (Ba-Galatia 6:1) Lega go le bjalo, ba bohlokwa mahlong a Jehofa, ba swanelwa ke go swarwa ka seriti. Hlatse e nngwe e itše: “Ge motho yo a neago keletšo a mpontšha tlhompho, ke ikwa ke lokologile go ka mmatamela.” Batho ba bantši ba arabela gabotse keletšong ge ba swarwa ka seriti. Go ka tšea nako, eupša go theetša bao ba tšerego megato e fošagetšego go ba nolofaletša gore ba amogele keletšo le ge e le efe yeo e nyakegago. Gopola kamoo Jehofa a ilego a bontšhana mabaka ka gona le ba-Isiraele gantši-ntši ka baka la go ba kwela bohloko. (2 Koronika 36:15; Tito 3:2) Keletšo yeo e newago ka kwelobohloko e tla kgoma dipelo tša bao ba nyakago thušo.—Diema 17:17; Ba-Filipi 2:2, 3; 1 Petro 3:8.
19. Re swanetše go lebelela bjang batho bao ba sa dumelego go swana le Bakriste?
19 Go bontšha ga rena kgodišo go ba bangwe go fetela le go bao ba ka bago ba le tseleng ya go ba banababo rena ba moya nakong e tlago. Batho ba bjalo ba ka ba ba diega tabeng ya go amogela molaetša gona bjale, eupša go sa nyakega gore re se ba felele pelo le go lemoga seriti seo ba nago le sona e le batho. Jehofa “xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Na ga se ra swanela go ba le pono ya Jehofa? Ge re nagana ka batho ka kakaretšo, re ka bula tsela bakeng sa go nea bohlatse ge e ba ka dinako tšohle re leka go ba le bogwera. Ee, re phema mohuta wa bogwera bjoo bo ka bago bo akaretša dikotsi tša moya. (1 Ba-Korinthe 15:33) Lega go le bjalo, re bontšha “botho,” re sa nyatše batho bao ba sa dumelego go swana le rena.—Ditiro 27:3.
20. Mohlala wa Jehofa le wa Jesu Kriste o swanetše go re tutueletša go dira’ng?
20 Ee, Jehofa le Jesu Kriste ba lebelela yo mongwe le yo mongwe wa rena e le yo a swanelwago ke tlhompho. Eka ka mehla re ka gopola kamoo ba dirago dilo ka gona gomme ka tsela e swanago re rakane pele go godišaneng. Eka re ka dula re gopola mantšu a Morena wa rena Jesu Kriste a rego: “Lena ka moka Le bana ba o tee.”—Mateo 23:8.
O tla Araba Bjang?
• O swanetše go lebelela barapedi-gotee bjang?
• Mohlala wa Jehofa le wa Jesu o go tutuetša bjang gore o godiše ba bangwe?
• Banna le batswadi ba ka godiša ba bangwe bjang?
• Go lebelela Bakriste-gotee le bona e le banababo bona go tutuetša bagolo gore ba itshware ka ditsela dife?
[Dipotšišo tša Thuto]
[Seswantšho go letlakala 18]
Godiša mosadi wa gago ka mantšu a tebogo
[Seswantšho go letlakala 18]
Nea bana ba gago seriti ka go ba theetša
[Seswantšho go letlakala 18]
Swara ditho tša phuthego ka seriti