Na o Dumela go Seo o sa Kgonego go se Bona?

GE MOTHO yo mongwe a re, ‘Ke dumela feela go seo ke kgonago go se bona,’ ga a bolele seo ka kgopolo ya kgonthe. Ge e le gabotse, ka moka ga rena re dumela dilong tšeo re sa kgonego go di bona.

Ka mohlala, sekolong o ka ba o ile wa dira boitekelo bjo bo hlatselago gore lepatlelo-kgogedi le gona. Boitekelo bjoo bo ka dirwa ka tsela ye: “Tšhela marathana a tšhipi letlakaleng. Ke moka o bee letlakala leo godimo ga makenete. Ge letlakala le šikinywa bjalo ka ge eka le šikinywa ka malea, marathana a tšhipi a kgobokana kgaufsi le makenete  gomme a dira sebopego sa lepatlelo-kgogedi. Ge e ba o dirile bjalo, na o ka kgona go bona lepatlelo-kgogedi e le ka kgonthe? Aowa, eupša tsela yeo le šomago ka yona marathaneng a tshipi ke yeo e bonagalago gabotse, e go nea bohlatse bjo bo kgodišago bja gore matla a makenete a gona.

Re amogela ka ntle le go botšiša dilo tše dingwe tšeo re sa kgonego go di bona. Ge re lebelela seswantšhong se sebotse seo se thadilwego goba re kgahlišwa ke seswantšho se sebotse se se betlilwego, ga re belaele go ba gona ga mothadi goba mmetli. Ka gona ge re naganišiša ka phororo goba re lebeledišiša letšatši ge le sobela, na ga se ra swanela go tutueletšega go nagana kgonagalo ya gore e ka ba e le mošomo wa Rabokgabo goba Mmetli yo Mogolo?

Lebaka Leo ba Bangwe ba sa Dumelego

Ka mo go makatšago, batho ba bangwe ba tlogetše go dumela go Modimo ka baka la seo ba se rutilwego kerekeng. Se e bile therešo ka monna wa Norway yo a ilego a botšwa gore Modimo o tšhuma batho ba babe mollong wa dihele. Monna o be a tloga a sa kwešiše gore ke Modimo wa mohuta mang yo a ka tlaišago batho ka mokgwa wo, ka gona o ile a thoma go ba mo-ila-Modimo.

Lega go le bjalo, ka morago monna o ile a dumela go hlahloba Beibele, a thušwa ke yo mongwe wa Dihlatse tša Jehofa. O be a makaditšwe ke go ithuta gore Beibele ga e rute gore batho ba babe ba tlaišwa mollong wa dihele. Beibele e swantšha lehu le go robala. Ka lebitleng ga re kwe bohloko; ga re tsebe selo. (Mmoledi 9:5, 10) Monna gape o ile a ithuta le gore batho bao Modimo a ba ahlolago e le ba kgopo wa go se fetoge ba tla dula mabitleng ka mo go sa felego. (Mateo 12:31, 32) Bahu ba bangwe ka moka ba tla tsošwa ka nako ya Modimo e swanetšego, ka tebelelo ya go hwetša bophelo bjo bo sa felego ka tlase ga maemo a Paradeise. (Johane 5:28, 29; 17:3) Tlhaloso ye e ile ya kwagala. E be e dumelelana le polelo ya Beibele yeo e rego: “Modimo ké Yêna leratô.” (1 Johane 4:8) Monna yo yo a botegago o ile a tšwela pele ka go ithuta ga gagwe Lentšu la Modimo, gomme ge nako e dutše e e-ya o ile a thoma go rata Modimo wa Beibele.

Ba bangwe ba gana go ba gona ga Mmopi yo lerato ka baka la go aparela ga tlalelo le go hloka toka. Ba dumelelana le monna wa mo-Sweden yo a kilego a šupa magodimong gomme a botšiša gore: “Ra-matla-ohle, Modimo yo a humilego ka dilo ka moka a ka ba gona bjang kua legodimong mola e le gore re na le kgobogo e ntši gakaakaa gotee le bokgopo mo lefaseng?” Ka baka la ge go se gwa ka gwa ba le yo a kgonago go araba potšišo ya gagwe, le yena o ile a ba mo-ila-Modimo. Ka morago o ile a thoma go ithuta Beibele le Dihlatse tša Jehofa. O ile a ithuta gore Lentšu la Modimo le nea karabo e kgotsofatšago ya potšišo  ya bogologolo, Ke ka baka la’ng Modimo a dumeletše bokgopo? *

Monna yo yo a botegago o ile a ithuta gore go ba gona ga bokgopo ka bogona ga go bontšhe gore Modimo ga a gona. Ka mohlala: Monna a ka dira thipa bakeng sa go e šomišetša go sega nama. Moreki a ka reka thipa gomme a e šomišetša go bolaya e sego go sega nama. Taba ya gore thipa e ile ya dirišwa gampe ga go na ka mokgwa woo e ka ganetšago go ba gona ga modiri wa yona. Ka mo go swanago, taba ya gore lefase ga se la ka la dirišwa ka go dumelelana le seo le bego le se reretšwe ga e bolele gore ga le na Mmopi.

Beibele e ruta gore modiro wa Modimo ke wo o phethagetšego. Ke “Mo-ila-bokxôpô, Moloki, Yêna Mosiami.” (Doiteronomio 32:4) Modimo o nea batho dimpho tše dibotse, eupša dimpho tše dingwe di ile tša dirišwa gampe gomme tša bakela tlaišego yeo e sa hlalosegego. (Jakobo 1:17) Lega go le bjalo, Modimo o tla fediša tlaišego. Ka morago ga moo, “ba bolêta e tlo ba bôná beng ba naxa; . . . ba dula mo xo yôna ka mehla le ka mehla.”​—Psalme 37:11, 29.

Monna wa mo-Sweden yo go boletšwego ka yena pejana o ile a kgomega kudu ge a be a bona tlaišego ya magagabo. Ka kgonthe, go kgomega ga gagwe ka lerato ka ba bangwe go tiišetša go ba gona ga Modimo. Bjang?

Go batho ba bantši, tsela e nnoši yeo ba ka e kgethago go e na le go dumela go Modimo ke go dumela go tlhagelelo. Bo-ratlhagelelo ba ruta ka ga “go phologa ga tšeo di tiilego kudu”​—e lego gore batho le diphoofolo ba phadišana go ya ka mehuta ya bona le ya tšona bakeng sa go phologa. Yeo e tiilego kudu e a phela; yeo e fokolago kudu e a hwa. Ba re yeo ke thulaganyo ya dilo ya tlhago. Eupša ge e ba e le “tlhago” gore tšeo di fokolago di hwe e le gore di bulele tšeo di tiilego sebaka, re ka hlalosa bjang taba ya gore, go swana le monna wa mo-Sweden, batho ba bangwe bao ba tiilego ba a kgomega ge ba bona magagabo bona ao a tlaišegago?

Go Tseba Modimo

Ga re kgone go bona Modimo ka gobane ga a na sebopego sa motho. Lega go le bjalo, Modimo o nyaka gore re mo tsebe. Tsela e nngwe yeo ka yona re ka tlwaelanago le yena gabotse ke ka go ela hloko ditiro tša gagwe tše matla​—“diswantšho” le “diswantšho tše di betlilwego” tša tlholo. Go Ba-Roma 1:20, Beibele e re: “Tše di sa bonwexo tša [Modimo], e lexo matla a neng le neng, le bomodimo bya xaxwe, le tšôna xo tloxa thlolong ya lexohle, ba ka di hlatha ka xo bôna ditirô tša xaxwe.” Ee, go fo etša ge go hlahlobišiša seswantšho goba seswantšho se se betlilwego go ka go thuša go ba le temogo ka dika tša rabokgabo, go naganišiša ka mediro ya Modimo yeo e kgahlišago go ka go thuša go tlwaelana kaone le semelo sa gagwe.

Ee, re ka se ke ra araba dipotšišo ka moka tšeo di hlobaetšago bophelong ka go fo lebelela mediro ya Modimo ya tlholo. Eupša re ka hwetša dikarabo tša dipotšišo tšeo ka go nyakišiša ka Lentšung la Modimo, Beibele. E bile ka go bala Beibele ka monagano o bulegilego moo banna ba babedi bao go boletšwego ka bona pejana ba ilego ba fihla phethong ya gore Modimo o gona le gore o na le taba le seo se re diragalelago.

[Mongwalo wa ka tlase]

[Mothopo wa Seswantšho go letlakala 28]

J. Hester and P. Scowen (AZ State Univ.), NASA