Sehlopha sa bo-108 sa Gilead se Kgothaleditšwe Gore se Nee Tirelo e Kgethwa

KA Beibeleng, borapedi bja Modimo gantši bo bitšwa ka polelwana “tirelo e kgethwa.” E tšwa lentšung la Segerika leo le bolelago go direla Modimo. (Ba-Roma 9:4, bapiša le NW.) Ba 5 562 bao ba ilego ba theetša lenaneo la moletlo wa go aloga ga sehlopha sa bo-108 sa Sekolo sa Beibele sa Watchtower sa Gilead ba ile ba kwa diboledi di nea keletšo e šomago yeo e tla thušago dialoga go nea tirelo e kgethwa e amogelegago go Jehofa Modimo. *

Theodore Jaracz, setho sa Sehlopha se Bušago sa Dihlatse tša Jehofa e be e le modula-setulo. Lenaneo le ile la bulwa ka kopelo 52, “Leina la Tate wa Rena.” Mothaladi wa bobedi wa kopelo yeo o re: ’Ina la ’go le legolo re tsoma go le reta.” Seo ka kgonthe se ile sa bontšha kganyogo e tšwago pelong ya barutwana ba sehlopha se alogago (bao ba bego ba e-tšwa dinageng tše 10) go diriša tlwaetšo ya bona dikabelong tša bona tša boromiwa tšeo di tla bago dinageng tše 17 tše fapa-fapanego.

Mantšung a gagwe a go bula, Ngwanabo rena Jaracz o ile a lebiša tlhokomelo dikgweding tše tlhano tša barutwana tša thuto ya Beibele e tseneletšego yeo e ilego ya ba lokišeletša tirelo mašemong a šele. Se se ba thušitše go ‘kgonthišetša tšohle,’ e lego go hlahlobišiša seetšeng sa Lentšu la Modimo seo ba bego ba ithutile sona nakong e fetilego le go ‘swara tše bolo.’ (1 Ba-Thesalonika 5:21, bapiša le NW.) O ile a ba kgothaletša gore ba kgomarele ka potego go Jehofa, Lentšung la gagwe le dikabelong tšeo ba bego ba di tlwaeleditšwe. Ke eng seo se tlago go ba thuša ge ba dira tše ka moka?

Keletšo e Šomago Bakeng sa go Nea Tirelo e Kgethwa

Lon Schilling, setho sa Komiti ya tša Ditshepedišo tša Bethele, o ile a bolela ka sehlogo seo se rego, “Na o tla Fenya Tekong ya Teka-tekano?” O ile a gatelela mohola wa go ba le teka-tekano, yeo e bontšhago bohlale bja go boifa Modimo. (Jakobo 3:17) Teka-tekano e akaretša go ba yo a ineelago, go se bebe sefahlego, go ba magareng, go ba yo a naganelago le go ba le kgotlelelo. “Batho bao ba nago le teka-tekano ke ba leka-lekanego ditirišanong tša bona le ba bangwe.” Ngwanabo rena Schilling o itše: “Ga ba dire dilo ka mokgwa o feteletšego.” Ke eng seo se ka thušago moromiwa gore a be le teka-tekano? Go itebelela ga motho ka tsela ya boipoetšo, go diriša dibaka tša go theetša le go ithuta go ba bangwe gotee le go rata go ela hloko dipono tša ba bangwe a dutše a sa kwanantšhe melao ya motheo ya Modimo.​—1 Ba-Korinthe 9:19-23.

“O se ke wa Lebala go ja!” e be e le sehlogo seo se kgahlišago sa polelo ye e latelago lenaneong, yeo e bego e newa ke Samuel Herd, setho se sengwe sa Sehlopha se Bušago. O ile a  bontšha bohlokwa bja go iphepa gabotse moyeng e le gore motho a dule a swanelegela go nea tirelo e kgethwa. Ngwanabo rena Herd o itše: “Modiro wa lena wa moya kgaufsinyane o tla oketšega ge le e-ya dikabelong tša lena tša go bolela le go ruta. Ka gona, go tlo nyakega gore le oketše dijo tša lena tša moya tšeo le di jago e le gore le kgone go leka-lekanya le go lekelelanya matla a lena.” Phepo ya ka mehla ya dijo tša moya e ka thuša moromiwa go phema kgateletšego ya moya le go hlologela gae. E tlaleletša kgotsofalong le boikemišetšong bja go dula kabelong ya tirelo e kgethwa.​—Ba-Filipi 4:13.

Mohlahli yo mongwe wa Gilead, Lawrence Bowen, o ile a kgothaletša barutwana bao ba alogago go “Boela Mathomong.” O be a re’ng? O ile a laela batheetši ka moka gore ba bule Diema 1:7 yeo e rego: “Xo boifa Morêna ké xôna xo thôma tsebô.” Seboledi se ile sa hlalosa gore: “Selo se sengwe le se sengwe seo se ganetšago taba ya motheo ya go ba gona ga Jehofa se tloga se ka se swanelege go ka ba tsebo ya kgonthe goba sa feleletša ka kwešišo e nepagetšego.” Ngwanabo rena Bowen o ile a bapiša ditaba ka botlalo tša Lentšu la Modimo, Beibele le dikarolwana tša papadi ya go aga seswantšho. Ge dikarolwana di kopantšwe, di bopa seswantšho. Ge go e-na le dikarolwana tše dintši, seswantšho e ba se segolo le  seo se bonagalago gabotse kudu gomme motho o se thabela kudu. Se se ka thuša bohle go nea tirelo e kgethwa go Modimo.

Wallace Liverance, mongwadiši wa Sekolo sa Gilead, o ile a phetha lelokelelo la dipolelo. Sehlogo sa gagwe se be se re “Nea Tebogo e le Sehlabelo sa Gago go Modimo.” O ile a lebiša tlhokomelo pegong ya go fodiša ga Jesu balephera ba lesome. (Luka 17:11-19) Ke o tee feela yo a ilego a gomela morago gomme a tumiša Modimo le go leboga Jesu. Ngwanabo rena Liverance o ile a re: “Ka ntle le pelaelo ba bangwe ba be ba thabetše go hlweka. Ba ile ba ikwa ba thabile, eupša go be go bonagala eka sohle seo ba bego ba se nyaka e be e le gore ba bolelwe ke moperisita e le bao ba hlwekilego.” Tlhwekišo ya moya ye e bago gona ka go ithuta therešo, yeo e kopantšwego le tebogo e swanetše go tutueletša motho go leboga Modimo ka baka la go loka ga gagwe. Barutwana ba sehlopha sa bo-108 sa Gilead ba ile ba kgothaletšwa go naganišiša ka mediro ka moka ya Modimo le go loka ga gagwe bakeng sa go dira gore tirelo ya bona le dihlabelo e be ponagatšo ya tebogo go Modimo.​—Psalme 50:14, 23; 116:12, 17.

Diphihlelo le Dipoledišano tša Mabapi le Kamoo se se ka Dirwago ka Gona

Mark Noumair, mohlahli yo mongwe wa Gilead o ile a swara karolo e latelago ya lenaneo. E be e le mabapi le diphihlelo tša tirelo ya tšhemo tša sehlopha nakong ya tlwaetšo ya sona. Barutwana ba be ba feditše kakaretšo ya nywaga e ka bago 12 bodireding bja nako e tletšego pele ba ka tla Gilead. Ge ba sa le sekolong, ba ile ba thoma dithuto tše dintši tša Beibele le batho ba ditlogo tše di fapa-fapanego, e lego seo se bontšhago gore barutwana ba be ba tseba tsela yeo ka yona ‘ba ka bago tšohle go batho bohle.’​—1 Ba-Korinthe 9:22.

Ka morago ga diphihlelo tša barutwana, Charles Molohan le William Samuelson ba ile ba boledišana le ditho tše dingwe tša lapa la Bethele le balebeledi ba basepedi bao ba kilego ba tsenela Gilead. Yo mongwe wa banababo rena yo go ilego gwa boledišanwa le yena ke Robert Pevy, o ile a hlankela Philippines ka morago ga go aloga sehlopheng sa bo-51 sa Gilead. O ile a gopotša sehlopha gore: “Nako le nako ge go e-na le bothata, motho yo mongwe le yo mongwe o nea ditšhišinyo tša gagwe mabapi le kamoo bothata bo ka rarollwago ka gona. Ka mehla go dula go e-na le motho yo bohlale go go feta, motho yo a ka tlago le kgopolo e kaone. Eupša ge o lebelela ka Beibeleng gomme o leka go hwetša pono ya Modimo ka dilo, ga go na yo a ka e fetago. Ka mehla e tla dula e le karabo e nepagetšego.”

Bakeng sa go phetha lenaneo le lebotse la moya, John Barr, setho sa Sehlopha se Bušago, o ile a bolela ka sehlogo se se rego “Nea Tirelo e Kgethwa e Amogelegago go Jehofa.” O ile a bontšha kamoo tirelo e kgethwa e ka bonagatšwago ka gona bodireding bja tšhemo bakeng sa go thuša batho ba dipelo tše di lokilego go rapela Modimo ka tsela e amogelegago. Ka morago ga go retologela mantšung a Jesu a lego go Mateo 4:10, Ngwanabo rena Barr o itše, “Ge e ba re tla rapela Jehofa a nnoši, re swanetše go široga mekgwa ka moka e sa lemogegego ya borapedi bja medimo ya diswantšho e bjalo ka megabaru, kganyogo ya go kganyoga mahumo le go iphagamiša. Go re dira gore re thabe gakaakang ge re nagana gore baromiwa ba rena go theoša le nywaga ga e sa le go tloga mathomong a bo-1940 ba itiretše pego e botse tabeng ye! Le gona re ikwa re kgonthišegile gore lena dialoga tša sehlopha sa bo-108 sa Gilead le tla latela mohlala wa bona o mobotse. Le tla nea Jehofa tirelo e kgethwa, e lego yena a nnoši yo a swanetšego go e amogela.”

E bile go ruma gabotse lenaneo leo le agago. E be e le gona e lego nako ya go kwa ditumedišo tša bao ba ba lakaletšago tše dibotse go tšwa lefaseng ka bophara, go newa ga di-diploma le go balwa ga lengwalo leo le tšwago sehlopheng leo le bego le bontšha tebogo bakeng sa tlwaetšo yeo se ilego sa e hwetša. Sehlopha seo se alogago se ile sa kgothaletšwa gore se bontšhe seka sa go phegelela dikabelong tša sona le go hlankeleng Jehofa. Ka moka bao ba bilego gona, go akaretša le baeng ba tšwago dinageng tše 25, ba ile ba kopanela go phetheng lenaneo ka kopelo le thapelo.

[Mongwalo wa ka tlase]

[Lepokisi go letlakala 23]

DIPALO-PALO TŠA SEHLOPHA

Palo ya dinaga tšeo di emetšwego: 10

Palo ya dinaga tšeo ba abetšwego go tšona: 17

Palo ya barutwana: 46

Palogare ya nywaga: 34

Palogare ya nywaga therešong: 16

Palogare ya nywaga bodireding bja nako e tletšego: 12

[Seswantšho go letlakala 24]

Sehlopha sa bo-108 sa Dialoga tša Sekolo sa Beibele sa Gilead

Lelokelelong le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.