Badiši ba Bakriste, ‘Ahlamišang Dipelo tša Lena’!

“MORÊNA ké modiši wa-ka; nka se hlôke selô.” Dafida ka mantšu ao o be a bolela go bota ga gagwe Modimo wa gagwe ka mo go feletšego. Ge re bolela ka tsela ya moya, Jehofa o be a mo iša “mafulong a matalá” le “meetseng a makhutšô,” a mo hlahla “mmileng wa xo loka.” Ge a be a dikologilwe ke baganetši, Dafida o ile a hwetša thekgo le kgothatšo tšeo di ilego tša mo tutueletša gore a re go Jehofa: “Nka se boife bobe, xobane ó na le nna.” Ka ge a be a e-na le Modiši yoo yo a Phagamego, Dafida o be a ikemišeditše go “fetša bontši bya matšatši, [a] dutše Ngwakong wa Morêna.”​—Psalme 23:1-6.

Morwa yo a tswetšwego a nnoši wa Modimo le yena o ile a hwetša tlhokomelo e lerato ya Jehofa, gomme o ile a bonagatša tlhokomelo ye ka mo go phethagetšego ditirišanong tša gagwe le barutiwa ba gagwe nakong ya go ba gona ga gagwe ka nakwana mo lefaseng. Ka baka leo Mangwalo a mo šupa e le “modiši yo boló” le “Modiši e moxolo.”​—Johane 10:11; Ba-Hebere 13:20; 1 Petro 5:2-4.

Jehofa le Jesu Kriste ba tšwela pele ba diša bao ba ba ratago. Ka boripana, bodiši bja bona bo bonagala tokišetšong e lerato ya badiši ba ka tlase ka phuthegong. Paulo o be a bolela le badiši bao ba ka tlase ge a be a re: “Itoteng-xê; Le lôtôlê le mohlape ka moka wo Môya o mokxêthwa o Le xafetšexo wôna, la ba badiši ba wôna, xore Le dišê phuthêxô ya Modimo, ye a inyaketšexo yôna ka madi a [Morwa wa, NW] xaxwe.”​—Ditiro 20:28.

Go diša mohlape ka go dumelelana le mohlala wo o beilwego ke Jehofa le Kriste Jesu ga se mošomo o bonolo, eupša ke gabohlokwa kudu gona bjale go feta le ge e le neng pele. Nagana ka Dihlatse tša ka godimo ga milione tšeo di kolobeditšwego lebakeng la nywaga e meraro e fetilego! Batho bao ba bafsa ga ba na phihlelo ya moya yeo e hwetšwago ka nywaga e mentši ya modiro. Le gona, nagana ka Dihlatse tšeo e sa dutšego e le bana goba bafsa bao ba lego mahlalagading. Ba nyaka tlhokomelo yeo e sa tšwego go batswadi ba bona feela eupša le yeo e tšwago go badiši ba ka tlase ba phuthego.

Ka kgonthe, Mokriste yo mongwe le yo mongwe o hlaselwa ke dikgateletšo tša ka ntle, go akaretša le kgateletšo ya dithaka. Bohle ba swanetše go katanela go ganetša tutuetšo e matla ya go latela tsela ya lefase ya go ikgotsofatša. Dinageng tše dingwe, bagoeledi ba Mmušo ba ka nolega moko ka baka la go se arabele molaetšeng wa bona. Bagoeledi ba bantši ba na le mathata a magolo a tša maphelo. Mathata a tša ditšhelete a ka ba a amoga ba bangwe tutuetšo ya bona ya go tsoma Mmušo pele. Go bolela therešo, ka moka ga rena​—go akaretša le bao e lego kgale ba le therešong​—re nyaka thušo ya badiši ba lerato e bile re a e swanelegela.

Tutuetšo e Nepagetšego

Bakriste ba lekgolong la pele la nywaga ba ile ba eletšwa gore: ‘Ahlamišang dipelo tša lena’! (2 Ba-Korinthe 6:11-13) Bagolo ba Bakriste ba dira gabotse go latela keletšo ye go hlokomeleng mediro ya bona ya bodiši. Ba ka dira bjalo bjang? Go thwe’ng ka bahlanka ba bodiredi bao bontši bja bona e lego bagolo ba nakong e tlago?

Ge e ba bagolo ba Bakriste e tla ba tšhegofatšo go mohlape, ba swanetše go tutuetšwa ke se se fetago maikwelo a boikarabelo. Ba eletšwa gore: “Dišang mohlape wa Modimo wo le naxo nawô’; Le se dirê ka xo xapeletšwa, e bê ka xo ithapa; e sexo ka xo ipabalêla, e bê ka pelo ye e rataxo.” (1 Petro 5:2, mongwalo o sekamego ke wa rena.) Ka gona modiro wa bodiši wo o atlegago o akaretša go rata le go fišegela go hlankela ba bangwe. (Johane 21:15-17) Go bolela go hlokomela dinyakwa tša dinku le go arabela ka pela go tšona. Go bolela go bontšha dika tše dibotse tša  Bokriste tšeo di tsebjago e le dienywa tša moya wa Modimo ge ba dirišana le ba bangwe.​—Ba-Galatia 5:22, 23.

Modiro wa bodiši ka dinako tše dingwe o akaretša go etela banababo rena magaeng a bona. * Eupša badiši bao ba ‘ahlamišago dipelo tša bona’ ba šoma ka thata. Ke gore, ba dira se se fetago go fo dira maeto a bodiši ao e sego a ka mehla. Ba diriša sebaka se sengwe le se sengwe ka mo go holago go diša ba bangwe bao ba lego mohlapeng.

Go Tlwaetša ba Bangwe Gore e tle e be Badiši

Ngwanabo rena le ge e le ofe, go sa šetšwe nywaga ya gagwe, yo a ‘katanelago bolebeledi, o duma modiro o botse.’ (1 Timotheo 3:1, bapiša le NW.) Bahlanka ba bantši ba bodiredi ba bontšhitše go rata go katanela ditokelo tše di oketšegilego. Ka gona, bagolo ba thuša bana ba babo rena ka lethabo bao ba ratago gore ba gate mogato wo o bohlokwa tabeng ya go “katanela bolebeledi.” Se se bolela go ba tlwaetša gore e tle e be badiši ba ba nago le bokgoni.

Ka baka la go kgomarela ka go tia ditekanyetšong tša Modimo tše di phagamego, phuthego ya Jehofa ya Bokriste ga se ya ka ya fokodišwa ke badiši ba maaka ba ba swanago le ba ba hlaloswago go Hesekiele 34:2-6. Ba ba be ba hlaswega mahlong a Jehofa e bile e le ka tshwanelo. Go e na le gore ba fepe mohlape, ba be ba iphepa. Ba paletšwe ke go matlafatša balwetši, go fodiša bao ba babjago, go bofa bao ba robegile ka mašela goba go buša bao ba gašanego goba ba timetšego. Ba itshwara kudu bjalo ka diphiri go e na le go itshwara bjalo ka badiši, ba be ba gatelela dinku. Dinku tšeo di hlokomologilwego di ile tša gašana, di ralala di sa tsebe moo di yago gona go se na motho yo a di hlokomelago.​—Jeremia 23:1, 2; Nahume 3:17; Mateo 9:36.

Ka go se swane le badiši bao ba sa botegego, badiši ba Bakrsite ba latela mohlala wa Jehofa. Ba thuša ka go lebiša dinku “mafulong a matalá” le “meetseng a makhutšô” a moya. Ba katanela go di lebiša “mmileng wa xo loka” ka go di thuša gore di kwešiše Lentšu la Jehofa ka mo go nepagetšego le go le diriša go tšona. Ba kgona go dira se ka mo go atlegago ka gobane ba “swanelegela go ruta.”​—1 Timotheo 3:2, bapiša le NW.

Bogolo bja modiro wa bagolo wa go ruta bo dirwa sethaleng ka nako ya diboka tša phuthego. Lega go le bjalo, bagolo gape ba ruta batho ka o tee ka o tee. Ee, ba bangwe ba kgona go ruta gakaone ge e le moo ba lebanego le motho, mola ba bangwe ba filwe kudu tabeng ya go nea dipolelo. Eupša go ba le tekanyo ya tlasana ya bokgoni lehlakoreng le lengwe la go ruta ga go nape go dira gore motho yo mongwe a se swanelegele go ka ruta. Bagolo ba a ruta, ba diriša dibaka ka moka tšeo di ba bulegelago, go akaretša le bodiši. Ka mohlala, bodiši bjo bongwe bo dirwa motheong o rulaganyeditšwego, e lego ka maeto ao a rulaganyeditšwego. Eupša bogolo bja modiro wa bodiši bo ka dirwa gape le ka tsela yeo e sa rulaganyetšwago, yeo le yona e holago kudu.  

Go ba Badiši le Barutiši ka Dinako Tšohle

Gore ngaka e kgone go phetha modiro wa yona go nyakega gore e be le tsebo le phihlelo. Eupša balwetši ba yona ba a leboga ge e ba bontšha botho, kwelobohloko, go kgomega le kgahlego e tšwago pelong. Dika tše e swanetše go ba karolo ya semelo sa yona. Dika tše di swanago le tšona di swanetše go ba karolo ya semelo sa morutiši le modiši yo botse, e be karolo ya botho bja gagwe bja letšatši le letšatši. Morutiši wa kgonthe o tla dula a itokišeditše go ruta bao ba mo dikologilego le ge e le neng ge go nyakega. Diema 15:23 e re: “Ka kxonthe lentšu la xo tla lebakeng la xôna, ké lôna le le botse.” ‘Lebaka la gona’ e ka ba ge a bolela a le sethaleng, ge a bolela ka ntlo le ntlo goba ge a swere mehlamu Holong ya Mmušo goba mogaleng. Ka mo go swanago, modiši yo botse o katanela go bontšha dika tše dibotse tša go hlokomela ka dinako tšohle, e sego feela ge a dira maeto a bodiši. Ge a šetše a ‘ahlamišitše pelo ya gagwe,’ o tla diriša sebaka se sengwe le se sengwe ka mo go holago go diša dinku, a di nea tlhokomelo yeo di e nyakago ka lebaka la gona. Se ke sona se mo dirago gore a ratege mahlong a dinku.​—Mareka 10:43.

 Wolfgang yo ga bjale e lego mogolo, o gopola diketelo tša bogwera tšeo di bego di direlwa lapa la gagwe ke mohlanka wa bodiredi le mosadi wa gagwe. O re: “Bana ba rena ba be ba thabišwa kudu ke tlhokomelo yeo ba bego ba e hwetša le nako e thabišago yeo re bego re e-ba le yona. Ba sa dutše ba bolela ka seo.” Ee, mohlanka yo wa bodiredi o bontšhitše gore o a kgomega; o be a ‘ahlamiša pelo ya gagwe.’

Sebaka se sengwe sa go ka ‘ahlamiša pelo ya motho’ ke ka go etela balwetši, go ba romela molaetša o mokopana wa kgothatšo goba go ba leletša mogala​—go dira selo le ge e le sefe go ba tsebiša gore o a kgomega! Ithapele go thuša ge go nyakega. Ge e ba ba nyaka go bolela, theetša ka kelohloko. Bolela ka mediro e agago le yeo e thabišago ya pušo ya Modimo phuthegong ya lefelong le mafelong a mangwe. Ba thuše gore ba lebiše tlhokomelo bokamosong bjo bo tagilego bjo bo boloketšwego bao ba ratago Jehofa.​—2 Ba-Korinthe 4:16-18.

Go Tlaleletša Maetong a Bodiši

Ka go gopola morero wa bodiši, go molaleng gore go dira maeto a bodiši ao a rulagantšwego malapeng a banababo rena, le ge e le gabohlokwa, e fo ba e le karolo ya seo se akaretšwago. Modiši yo lerato o ‘ahlamiša pelo ya gagwe’ ka go ba yo a batamelegago ka tlase ga maemo ka moka le ka dinako ka moka. Tswalano e borutho yeo a e hlagolelago  le banababo e ba kgonthišetša gore dinakong tša mathata, ga se ba swanela go tšhoga selo se sebe ka ge ba tseba gore ngwanabo bona yo lerato, modiši wa Mokriste o a ba hlokomela.​—Psalme 23:4.

Ee, lena badiši ka moka ba Bakriste le ‘ahlamiše dipelo tša lena.’ Bontšhang lerato le le tšwago pelong go banababo lena​—ba kgothatšeng, ba lapološeng, ba ageng moyeng ka ditsela tšohle tšeo le ka di kgonago. Ba thušeng gore ba eme ba tiile tumelong. (Ba-Kolose 1:23) Ka ge di šegofaditšwe ka badiši ba Bakriste bao ba ‘ahlamišago dipelo tša bona,’ dinku di ka se hloke selo. Go etša Dafida, di tla ikemišetša go fetša bontši bja matšatši di dutše ngwakong wa Jehofa. (Psalme 23:1, 6) Ke eng se sengwe seo modiši yo lerato a ka bago a se nyaka?

[Mengwalo ya ka tlase]

[Lepokisi go letlakala 30]

Badiši ba Bakriste

• Ba hlankela ka phišego le ka go rata

• Ba fepa mohlape le go o hlokomela

• Ba thuša ba bangwe gore ba katanele go ba badiši

• Ba etela balwetši le go ba hlokomela

• Ba phafogela go thuša banababo bona ka dinako tšohle

[Diswantšho go letlakala 31]

Go sa šetšwe gore ba tirelong ya tšhemo, dibokeng goba dipokanong tša segwera, bagolo e dula e le badiši ka mehla