Bolela Ditaba tše Dibotse ka Phišego

“Le fišege moyeng; le direle Morena.”​—BA-ROMA 12:11, PK.

1, 2. Ke boemo bofe bja kgopolo bjoo Bakriste ba katanelago go bo kgomarela e le baboledi ba ditaba tše dibotse?

LESOGANA le thabetše mošomo wa lona o mofsa. Letšatšing la mathomo le le mošomong, le letetše ditaelo tša mothwadi wa lona ka tetelo-kgolo. Le lebeletše pele mošomong wa lona wa mathomo gomme le o tšeela godimo kudu. Le ikemišeditše go dira sohle seo le ka se kgonago.

² Ka tsela e swanago, rena ka ge re le Bakriste re ka itšea re le bašomi ba bafsa. Ka ge kholofelo ya rena e le go phela ka mo go sa felego, go ka thwe ke gona re sa tšwa go thoma go hlankela Jehofa. Ka kgonthe Mmopi o re gopoletše mešomo e mentši yeo e tlago go re boloka re swaregile ka mo go sa felego. Eupša thomo ya pele-pele yeo re e filwego ke ya go bolela ditaba tše dibotse tša Mmušo wa gagwe. (1 Ba-Thesalonika 2:4) Re ikwa bjang ka kabelo ye yeo e tšwago go Modimo? Ka go swana le lesogana, re nyaka go e phetha go fihla moo re ka kgonago gona ka mafolofolo, ka lethabo​—ee, ka phišego!

3. Ke eng seo se nyakegago gore re atlege re le badiredi ba ditaba tše dibotse?

³ Ke therešo gore go kgomarela boemo bjo bo bjalo bjo bo nepagetšego bja kgopolo e ka ba tlhohlo. Go okeletša bodireding bja rena, re na le boikarabelo bjo bongwe bjo bogolo, bjoo bjo bongwe bja bona bo ka re imelago mmeleng le maikwelong. Tekanyong e kgolo, re kgona go hlokomela dilo tše mola re lebiša tlhokomelo e lekanego bodireding. Lega go le bjalo, e ka ba go katana mo go tšwelago pele. (Mareka 8:34) Jesu o ile a gatelela gore katlego ya rena re le Bakriste e tla nyaka boiteko bjo matla.​—Luka 13:24.

4. Dipelaelo tša letšatši le letšatši di ka kgoma pono ya rena ya moya bjang?

⁴ Ka ge go e-na le dilo tše dintši gakaakaa tšeo di swanetšego go dirwa, go bonolo go ikwa re nolegile moko goba re imetšwe ka dinako tše dingwe. “Dipelaêlô tša bophelô” di ka fokodiša phišego ya rena gotee le tebogo bakeng sa mediro ya pušo ya Modimo. (Luka 21:34, 35; Mareka 4:18, 19) Ka baka la tlhago ya rena ya go se phethagale, re ka lahla ‘lerato la rena la pele.’ (Kutollo 2:1-4) Dikarolo tše itšego tša tirelo ya rena go Jehofa di ka fetoga setlwaedi ka tsela e itšego. Beibele e nea bjang kgothatšo yeo e nyakegago bakeng sa gore re boloke phišego ya rena bakeng sa bodiredi e le yeo e phelago?

Bjalo ka “Mollo o Fišago” Dipelong tša Rena

5, 6. Moapostola Paulo o be a lebelela bjang tokelo ya gagwe ya go dira boboledi?

⁵ Bodiredi bjoo Jehofa a re neilego bjona ke bja bohlokwa kudu gore bo ka dumelelwa gore bo fetoge setlwaedi. Moapostola Paulo o be a tšea go bolelwa ga ditaba tše dibotse e le tokelo e kgolo kudu, gomme o be a itšea e le yo a sa swanelegego gore a ka e newa. O itše: “Nna, ke lexo e monyenyane xo bakxêthwa bohle, ke séditšwe ka kxauxêlô yé ya xo re ba-ntlê ke ba anêxêlê Ebangedi ya lehumô le le sa latišexexo la Kriste; e bê xo ba bônêxêla bohle xore ba bônê pušô ya thopa ya Modimo, ye e bexo e utilwe xo tloxa mehleng ya kxalelele, è le thopa ya Modimo Mohlodi wa tšohle.”​—Ba-Efeso 3:8, 9.

⁶ Boemo bjo bo nepagetšego bja kgopolo bja Paulo ka bodiredi bja gagwe ke mohlala o mobotse go rena. Lengwalong leo a le ngwaletšego ba-Roma, o itše: “Xe e le ka nna, ke phexeletše xore . . . ke Le botšê Ebangedi.” O be a sa lešwe dihlong ke ditaba tše dibotse. (Ba-Roma 1:15, 16) O be a e-na le boemo bjo bo nepagetšego bja kgopolo  gomme a fišegela go phetha bodiredi bja gagwe.

7. Paulo lengwalong leo a le ngwaletšego ba-Roma o ile a lemoša malebana le eng?

⁷ Moapostola Paulo o be a lemoga go nyakega ga gore a kgomarele pono ya go ba le phišego, ka gona o ile a eletša Bakriste ba Roma gore: “Le se tšwafe borotong; le fišege moyeng; le direle Morena.” (Ba-Roma 12:11, PK) Lentšu la Segerika leo le fetoletšwego e le “tšwafa” le na le kgopolo ya go “ba le bobodu.” Le ge re ka se tšwafe e le ka kgonthe bodireding bja rena, ka moka ga rena re swanetše go phafogela ditšhupo le ge e le dife tša mathomong tša bobodu bja moya gomme re dire dipeakanyo tše di swanetšego boemong bja rena bja kgopolo ge e ba re lemoga ditšhupo tše bjalo ka go rena.​—Diema 22:3.

8. (a) Ke eng seo se ilego sa ba bjalo ka “mollo o fišago” pelong ya Jeremia, gomme ka baka la’ng? (b) Ke thuto efe yeo re ka ithutago yona phihlelong ya Jeremia?

⁸ Moya wa Modimo le wona o ka re thuša ge re nyamile. Ka mohlala, lebakeng le lengwe moporofeta Jeremia o ile a ikhwetša a nolegile moko, gomme o ile a nagana go kgaotša modiro wa gagwe wa boporofeta. O ile a ba a bolela ka Jehofa a re: “Nka se ke ka hlwa ke mo gopola, nka se ke ka hlwa ke bolela ka leina la gagwe.” Na se e be e le bohlatse bja bofokodi bjo bogolo bja moya go Jeremia? Aowa. Ge e le gabotse boemo bjo bo tiilego bja moya bja Jeremia, lerato la gagwe la go rata Jehofa le phišego ya gagwe ya go fišegela therešo di ile tša mo matlafatša gore a tšwele pele a porofeta. O a hlalosa: “Pelong ya-ka [lentšu la Jehofa la  ba] bjaloka mollo o fišago, o tswaleletšwego ka mašapong a-ka; gomme le ge ke be ke itapiša go momela [homola], ke paletšwe.” (Jeremia 20:9, PK) Ke ga tlhago gore bahlanka ba botegago ba Modimo ba ikwe ba nolegile moko nako le nako. Eupša ge ba rapelela thušo go Jehofa, o tla bala dipelo tša bona gomme a ba nea moya o mokgethwa ka bolokologi, ge e ba ka go swana le Jeremia, ba e-na le lentšu la gagwe dipelong tša bona.​—Luka 11:9-13; Ditiro 15:8.

“Le se kê la Tima Mollô wa Môya”

9. Ke eng seo se ka šitišago modiro wa moya o mokgethwa ka lehlakoreng la rena ?

⁹ Moapostola Paulo o ile a eletša ba-Thesalonika gore: “Le se kê la tima mollô wa Môya.” (1 Ba-Thesalonika 5:19) Ee, ditiro le boemo bja kgopolo tšeo di thulanago le melao ya motheo ya go boifa Modimo di ka šitiša modiro wa moya o mokgethwa ka lehlakoreng la rena. (Ba-Efeso 4:30) Bakriste lehono ba na le kabelo ya go bolela ditaba tše dibotse. Re swara tokelo ye ka tlhompho e tseneletšego. Ga go re makatše gore bao ba sa tsebego Modimo ba swara modiro wa rena wa boboledi ka lenyatšo. Eupša ge Mokriste a hlokomologa bodiredi bja gagwe ka boikemišetšo, go ka feleletša ka go tima mollo wa moya wa Modimo wo o tutuetšago.

10. (a) Pono ya magagabo rena e ka re kgoma bjang? (b) Ke pono efe e phagamego ka bodiredi bja rena yeo e bolelwago go 2 Ba-Korinthe 2:17?

¹⁰ Ba bangwe bao ba lego ka ntle ga phuthego ya Bokriste ba ka ba ba lebelela bodiredi bja rena e le go aba dipuku feela. Ba bangwe ka phošo ba ka phetha ka gore re ya ka ntlo le ntlo feela bakeng sa gore re hwetše meneelo. Ge e ba re dumelela dipono tše bjalo tše di fošagetšego di tutuetša boemo bja rena bja kgopolo, se se ka fokotša go atlega ga rena bodireding. Go e na le go dumelela kgopolo e bjalo gore e re kgome, anke re kgomareleng pono yeo Jehofa le Jesu ba nago le yona ka bodiredi bja rena. Moapostola Paulo o ile a bolela pono yeo e phagamego ge a be a re: “Rena xa re etše bao ba ba retollaxo Lentšu la Modimo; rena re le bolêla rè rereša; re boledišwa ke Modimo rè le ba Kriste.”​—2 Ba-Korinthe 2:17.

11. Ke eng seo se ilego sa dira gore Bakriste ba pele ba kgone go dula ba fišega gaešita le ka tlase ga tlaišo, gomme mohlala wa bona o swanetše go re kgoma bjang?

¹¹ Go se go ye kae ka morago ga lehu la Jesu, barutiwa ba gagwe kua Jerusalema ba ile ba lebeletšana le nako ya tlaišo. Ba ile ba tšhošetšwa le go laelwa gore ba kgaotše go dira boboledi. Lega go le bjalo, Beibele e bolela gore ba ile ba “tlala  Môya o mokxêthwa, ba bolêla Lentšu la Modimo ka mafolofolo.” (Ditiro 4:17, 21, 31) Mantšu ao Paulo a ilego a a botša Timotheo nywaga e itšego ka morago a bontšha boemo bjo bo nepagetšego bja kgopolo bjoo Bakriste ba swanetšego go bo kgomarela. Paulo o itše: “Modimo xa a ka a re nea Môya wa boi; ó re file Môya wa matla, le wa leratô, le wa thlaoloxanyô. Ké xôna, O se bê le masêmê xe O hlatsêla Mong wa rena, xe O hlatsêla le nna moxôlêxwa wa xaxwe; mo Ebangedi e hloiwaxo O êmê le yôna ka matla a Modimo.”​—2 Timotheo 1:7, 8.

Ke Eng Seo re se Kolotago Moagišani wa Rena?

12. Lebaka le legolo leo ka lona re bolelago ditaba tše dibotse ke lefe?

¹² Gore re be le boemo bjo bo nepagetšego bja kgopolo ka bodiredi bja rena, re swanetše go ba le maikemišetšo a nepagetšego. Ke ka baka la’ng re dira boboledi? Lebaka le legolo le bonwa mantšung a mopsalme a rego: “O [Jehofa] rêtwa ke baxauxêlwa ba xaxo; ba bolêla tša letaxô la boxoši by’axo, ba kwatša tša matla a xaxo. Xore bana ba batho ba botšwê tša matla a xaxo, le tša letaxô la mmušô wa xaxo.” (Psalme 145:10-12) Ee, re dira boboledi e le gore re rete Jehofa phatlalatša le go kgethagatša leina la gagwe pele ga batho bohle. Gaešita le ge e le ba sego kae bao ba re theetšago, go bolela ga rena molaetša wa phološo ka potego go tliša theto go Jehofa.

13. Ke eng seo se re gapeletšago go botša ba bangwe ka kholofelo ya phološo?

¹³ Gape re bolela ka baka la lerato la go rata batho le gore re efoge molato wa madi. (Hesekiele 33:8; Mareka 6:34) Seo se tswalanago le se ke mantšu a Paulo ge a be a bolela ka bao ba lego ka ntle ga phuthego ya Bokriste a re: “Ke kwa e ke ke tlemilwe xore ke hlankêlê Ba-Gerika le ba mehuta e šele, le ba bohlale le ba ba se naxo bohlale.” (Ba-Roma 1:14) Paulo o ile a ikwa a kolota batho go ba tsebiša ditaba tše dibotse, ka ge e le thato ya Modimo gore “batho bohle ba phološwê.” (1 Timotheo 2:4) Lehono, re ikwa re e-na le lerato le le swanago gotee le sekoloto seo go moagišani wa rena. Lerato leo Jehofa a ratago batho ka lona le ile la mo tutueletša gore a romele Morwa wa gagwe lefaseng gore a tlo ba hwela. (Johane 3:16) Seo e bile boikgafo bjo bogolo. Re ekiša lerato la Jehofa ge re diriša nako le go dira boiteko tabeng ya go botša ba bangwe ka ditaba tše dibotse tša phološo tšeo di theilwego sehlabelong sa Jesu.

14. Beibele e hlalosa bjang lefase la ka ntle ga phuthego ya Bokriste?

¹⁴ Dihlatse tša Jehofa di lebelela magagabo tšona e le bao e tlago go ba ditho tša borwarre bja Bokriste. Re swanetše go bolela ka sebete, eupša sebete sa rena ga se sa go hlasela. Go ba gona, Beibele e diriša mantšu a matla ge e bolela ka lefase ka kakaretšo. Lentšu “lefase” ka bolona le dirišwa ke Paulo ka kgopolo e sa kgahlišego ge a bolela ka “bohlale bya lefase leno” le “dikxanyoxô tša lefase.” (1 Ba-Korinthe 3:19; Tito 2:12) Paulo o ile a ba a gopotša Bakriste ba Efeso gore ge ba be ba sepela “ka mokxwa wa lefase leno,” ba be ba ‘hwile’ moyeng. (Ba-Efeso 2:1-3) Mantšu a le a mangwe a swanago le wona a dumelelana le mantšu a moapostola Johane yo a itšego: “Lefase ka moka le rapaletše bobeng.”​—1 Johane 5:19.

15. Mabapi le batho bao ba lego ka ntle ga phuthego ya Bokriste, ke eng seo re sa se dirego gomme ke ka baka la’ng re sa dire bjalo?

¹⁵ Ka gona, gopola gore mantšu a bjalo a šupa go lefase ka kakaretšo leo le arogilego go Modimo, e sego go batho ka o tee ka o tee. Bakriste ga ba leke go ahlola e sa le pele kamoo motho le ge e le mang a tlago go arabela ka gona modirong wa boboledi. Ga ba na lebaka la go hlalosa batho le ge e le bafe e le dipudi. Ga se taba ya rena go bolela gore mafelelo e tla ba afe ge Jesu a e-tla go kgethologanya “dinku” go “dipudi.” (Mateo 25:31-46) Jesu ke moahlodi yo a kgethilwego; rena ga re bona. Ka ntle le moo, phihlelo e bontšhitše gore ba bangwe bao ba bego ba akaretšwa ka mo go tseneletšego boitshwarong bjo e lego bjo bobe kudu ba amogetše molaetša wa Beibele, ba fetoga gomme ba ba Bakriste ba ba phelago bophelo bjo bo hlwekilego. Ka gona, le ge re ka ba re sa tsome go gwerana le batho ba itšego, ga re dika-dike go boledišana le bona ka kholofelo ya Mmušo ge sebaka se tšwelela. Mangwalo a bolela ka batho ba itšego, bao le ge e be e sa le bao ba sa dumelego, ‘ba bego ba sekametše ka mo go swanetšego bophelong bjo bo sa felego.’  Mafelelong ba ile ba fetoga badumedi. (Ditiro 13:48, bapiša le NW.) Le ka mohla re ka se ke ra kgona go tseba gore yo a sekametšego ka mo go swanetšego ke ofe go fihlela ge re šetše re neile bohlatse​—mohlomongwe ka makga a mantši. Re dutše re nagana ka se, re swara bao ba sa hlwago ba amogela molaetša wa phološo ka “bolêta” le ka “tlhompho e tseneletšego,” re holofela gore ba bangwe gare ga bona ba sa dutše ba ka arabela molaetšeng wa bophelo.​—2 Timotheo 2:25; 1 Petro 3:15, NW.

16. Lebaka le lengwe leo ka lona go nyakegago gore re loutše “bokgoni bja go ruta” ke lefe?

¹⁶ Go loutša go ba le bokgoni re le barutiši go tla oketša go fišegela ga rena go bolela ditaba tše dibotse. Go swantšha se: Papadi e kgahlišago e ka ba e sa kgahlišego go motho yo a sa tsebego kamoo e bapalwago ka gona. Eupša go yoo a e bapalago gabotse, o a e thabela. Ka mo go swanago, Bakriste bao ba loutšago “bokgoni bja go ruta” ba oketša lethabo la bona bodireding. (2 Timotheo 4:2, NW; Tito 1:9) Paulo o ile a eletša Timotheo ka gore: “Se O swanetšexo xo se phêxêlêla ké xore Madimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:15) Re ka loutša bjang bokgoni bja rena bja go ruta?

17. Re ka ‘bopa [bjang] kganyogo’ bakeng sa tsebo ya Beibele, gomme tsebo yeo e tla hola bjang bodiredi bja rena?

¹⁷ Tsela e nngwe ke ka go monya tsebo e nepagetšego ka mo go oketšegilego. Moapostola Petro o re kgothaletša gore: “Le etšê masea a sa tš’o xo bêlêxwa, Le llêlê [“bopang kganyogo bakeng sa,” NW] lebese la Lentšu lé le sa forexo, xore Le xolê ka lôna Le fihlêlê phološô.” (1 Petro 2:2) Ngwana yo a phetšego gabotse o kganyoga lebese ka tsela ya tlhago. Lega go le bjalo, Mokriste a ka swanelwa ke gore a ‘bope kganyogo’ bakeng sa tsebo ya Beibele. Se se ka dirwa ka go hlagolela mekgwa e mebotse ya go ithuta le ya go bala. (Diema 2:1-6) Go nyakega boiteko le boitayo ge e ba re tla ba barutiši bao ba nago le bokgoni ba Lentšu la Modimo, eupša maiteko a bjalo a tliša meputso. Lethabo leo le tlišwago ke go hlahloba Lentšu la Modimo le tla re dira gore re fišege ka moya wa Modimo, re fišegela go abelana le ba bangwe dilo tšeo re ithutago tšona.

18. Diboka tša Bokriste di ka re hlama bjang gore re rathe lentšu la therešo re sa kgopamiše?

¹⁸ Diboka tša Bokriste le tšona di bapala karolo e bohlokwa tseleng ya go diriša ga rena Lentšu la Modimo ka bokgoni. Ge go balwa mangwalo a Beibele dipolelong tša phatlalatša le dipoledišanong tše dingwe tša Mangwalo, re dira gabotse ka go latela ka Dibeibeleng tša rena ka noši ge go balwa. Re dira ka bohlale go lebiša tlhokomelo dikarolong tša diboka, go akaretša le tšeo di bolelago ka mo go kgethegilego ka modiro wa rena wa boboledi. Le ka mohla ga se ra swanela go nyenyefatša mohola wa dipontšho, mohlomongwe re itumelela gore re šitišwe. Gape, go nyakega boitayo le go theetša ka šedi. (1 Timotheo 4:16) Diboka tša Bokriste di aga tumelo ya rena, di re thuša gore re bope kganyogo bakeng sa Lentšu la Modimo le go re tlwaetša gore re be ba goeledi ba fišegago ba ditaba tše dibotse.

Re ka Ithekga ka Thekgo ya Jehofa

19. Ke ka baka la’ng e le gabohlokwa go ba le karolo ka mehla modirong wa boboledi?

¹⁹ Bakriste bao ba ‘fišegago moyeng’ le bao ba fišegelago go bolela ditaba tše dibotse ba katanela  go tšea karolo ka mehla bodireding. (Ba-Efeso 5:15, 16) Ke therešo gore maemo a a fapana, e bile ga se bohle bao ba kgonago go fetša nako e lekanago modirong wo wa go phološa bophelo. (Ba-Galatia 6:4, 5) Lega go le bjalo, mohlomongwe sa bohlokwa kudu go feta tekanyo ya nako yeo re e dirišago modirong wa go bolela ke makga ao ka wona re bolelago ka kholofelo ya rena go ba bangwe. (2 Timotheo 4:1, 2) Ge re bolela kudu, ke moo re tlago go lemoga kudu bohlokwa bja modiro wo. (Ba-Roma 10:14, 15) Kwelobohloko ya rena le go kwela ba bangwe bohloko di tla gola ge re gahlana ka mehla le batho bao ba botegago bao ba llago ba hlokofetše e bile ba se na kholofelo.​—Hesekiele 9:4; Ba-Roma 8:22.

20, 21. (a) Ke modiro ofe wo o sa letšego ka pele ga rena? (b) Jehofa o thekga bjang maiteko a rena?

²⁰ Jehofa o re neile ditaba tše dibotse. Ye ke thomo ya pele yeo re e hwetšago go yena re le “badirišani” ba gagwe. (1 Ba-Korinthe 3:6-9) Re fišegela go phetha boikarabelo bjo bjo re bo neilwego ke Modimo ka moya ka moka, go fihla moo re ka kgonago gona. (Mareka 12:30; Ba-Roma 12:1) Go sa na le ba bantši bao ba nago le tshekamelo e swanetšego lefaseng bao ba swerwego ke tlala ya therešo. Go na le modiro o montši wo o swanetšego go dirwa, eupša re ka ithekga ka thekgo ya Jehofa ge re dutše re phetha bodiredi bja rena ka botlalo.​—2 Timotheo 4:5.

²¹ Jehofa o re nea moya wa gagwe gomme o re hlama ka “thšoša ya Môya,” e lego Lentšu la Modimo. Ka thušo ya gagwe re ka kgona go ahlamiša melomo ya rena ‘ka bolokologi bja go bolela gore re tsebatše sephiri se sekgethwa sa ditaba tše dibotse.’ (Ba-Efeso 6:17-20, bapiša le NW.) Anke go bolelwe ka rena mabapi le seo moapostola Paulo a ilego a se ngwalela Bakriste ba Thesalonika ge a re: “Ka xe Ebangedi ya rena e sa ka ya Le tlêla ka polêlô fêla; e Le tletše ka matla le ka Môya-mokxêthwa ka mokxwa o kxodišaxo ruri.” (1 Ba-Thesalonika 1:5) Ee, anke re boleleng ditaba tše dibotse ka phišego!

Poeletšo e Kopana

• Ka baka la dipelaelo tša bophelo, go ka direga’ng ka phišego ya rena bodireding?

• Kganyogo ya rena ya go kganyoga go bolela ditaba tše dibotse e ka swana bjang le “mollo o fišago” dipelong tša rena?

• Ke boemo bofe bja kgopolo bjo bo fošagetšego bjo re swanetšego go bo phema mabapi le bodiredi?

• Ka kakaretšo, re swanetše go lebelela bjang bao ba se nago ditumelo tše di swanago le tša rena?

• Jehofa o re thuša bjang go kgomarela phišego ya rena modirong wa boboledi?

[Dipotšišo tša Thuto]

[Diswantšho go letlakala 9]

Bakriste ba ekiša phišego ya Paulo le ya Jeremia

[Diswantšho go letlakala 10]

Phišego ya rena bodireding e tutuetšwa ke lerato la go rata Modimo le moagišani