Go Bjala Dipeu tša Therešo ya Mmušo
Go Bjala Dipeu tša Therešo ya Mmušo
“Byala peu ya xaxo e sa le bosasa, le ka mantšibua ’atla s’axo se se khutšê.”—MMOLEDI 11:6.
1. Ke ka kgopolo efe Bakriste ba bjalago peu lehono?
TEMO e be e bapala karolo e bohlokwa setšhabeng sa ba-Hebere sa bogologolo. Ke ka baka leo Jesu yoo bophelo bja gagwe ka moka e le motho a bo feditšego Nageng ya Kholofetšo, a bego a diriša ditaba tša tša temo diswantšhong tša gagwe. Ka mohlala, o ile a swantšha go bolela ditaba tše dibotse tša Mmušo wa Modimo le go bjala peu. (Mateo 13:1-9, 18-23; Luka 8:5-15) Go fihla le lehono, go sa šetšwe gore re phela setšhabeng sa tša temo goba go se bjalo, go bjala dipeu tša moya ka tsela ye ke modiro o bohlokwa-hlokwa woo Bakriste ba ka o dirago.
2. Modiro wa rena wa boboledi o bohlokwa gakaaka’ng, gomme tše dingwe tša dilo tšeo di dirwago lehono ke dife bakeng sa go o phetha?
2 Ke tokelo e kgolo go tšea karolo go bjaleng therešo ya Beibele mehleng ye ya bofelo. Ba-Roma 10:14, 15 e hlalosa gabotse bohlokwa bja modiro wo ge e re: “Ba tlo kwa bya’ng, xe xo se sexoeledi? Xomme ba ka xoêlêla bya’ng xe ba sa rongwe? Ké tšôna tše di ngwadilwexo xwa thwe: A ratêxa bya’ng maoto a motseta wa ditaba tše botse!” Ga se gwa ka gwa ba bohlokwa gakaakaa go swana le gona bjale gore go gatelwe pele ka boemo bjo bo nepagetšego bja kgopolo go phetheng thomo ye yeo e neilwego ke Modimo. Ke ka lona lebaka leo Dihlatse tša Jehofa di nweletšego ka botlalo modirong wa go tšweletša le wa go aba Dibeibele le dithušo tša go ithuta Beibele ka maleme a 340. Go lokišetšwa ga ditaba tše go nyaka baithapi ba ka godimo ga 18 000 ntlong-kgolo ya tšona le diofising tša makala dinageng tše di fapa-fapanego. Le gona Dihlatse tše di nyakilego go ba dimilione tše tshela di tšea karolo go abeng dipuku tše tša Beibele lefaseng ka moka.
3. Ke eng seo se phethwago ka go bjalwa ga therešo ya Mmušo?
3 Dienywa tša modiro wo o thata ke dife? Go etša mehleng ya pele ya Bokriste, ba bantši lehono ba amogela therešo. (Ditiro 2:41, 46, 47) Lega go le bjalo, sa bohlokwa kudu go feta palo e kgolo ya bagoeledi ba Mmušo bao ba sa tšwago go kolobetšwa ke therešo ya gore bohlatse bjo bjo bogolo bo tlaleletša tabeng ya go kgethagatšwa ga leina la Jehofa le go hlatselweng ga gagwe e le Modimo a nnoši wa therešo. (Mateo 6:9) Go feta moo, go tseba Lentšu la Modimo go kaonefatša maphelo a ba bantši gomme go ka ba lebiša phološong.—Ditiro 13:47.
4. Baapostola ba be ba kgomegile ka batho bao ba bego ba bolela le bona go fihla tekanyong efe?
4 Baapostola ba be ba lemoga ka botlalo bohlokwa bja ditaba tše dibotse tše di neago bophelo, gomme ba be ba kgomega ka mo go tseneletšego ka bao ba bego ba bolela le bona. Se se bonagala gabotse mantšung a moapostola Paulo, ge a be a ngwala gore: “Ka thloloxêlô e kaakaa re be re re re Le neê tšohle, e sexo Ebangedi yeo ya Modimo fêla, re bê re re re Le neê le bophelô bya rena; xobane Lè le baratiwa ba rena.” (1 Ba-Thesalonika 2:8) Tabeng ya go bontšha go kgomega mo go bjalo ga kgonthe ka batho, Paulo le baapostola ba bangwe ba be ba ekiša Jesu le barongwa ba legodimong bao ba swaregilego kudu modirong wo wa go phološa bophelo. Anke re ahla-ahleng dikarolo tše bohlokwa tšeo bahlanka ba ba Modimo ba legodimong ba di bapalago go bjaleng therešo ya Mmušo, le gona anke re boneng kamoo mohlala wa bona o re kgothaletšago ka gona gore re kgathe tema ya rena.
Jesu—Mobjadi wa Therešo ya Mmušo
5. Jesu o be a dula a swaregile ka modiro ofe kudu ge a be a le lefaseng?
5 Jesu yo e lego motho yo a phethagetšego, o be a e-na le matla a go nea dilo tše dintši tše dibotse ka tsela ya dilo tše di bonagalago bakeng sa batho ba mehleng ya gagwe. Ka mohlala, a ka be a ile a kgona go kgopamolla dikgopolo tše dintši tše di fošagetšego tša tša kalafo tša mehleng ya gagwe, goba a ka be a ile a kgona go kaonefatša kwešišo ya batho mahlakoreng a mangwe a tša thutamahlale. Lega go le bjalo, o ile a bea taba ka mo go kwalago ge a sa tšwa go thoma bodiredi bja gagwe gore thomo ya gagwe e be e le ya go bolela ditaba tše dibotse. (Luka 4:17-21) Go ya bofelong bja bodiredi bja gagwe, o ile a hlalosa gore: “Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:37) Ka gona o be a dula a swaregile ka go bjala dipeu tša therešo ya Mmušo. Go ruta batho ba mehleng ya gagwe ka Modimo le merero ya Gagwe e be e le gabohlokwa kudu go feta thuto le ge e le efe yeo Jesu a ka bego a ile a kgona go ba nea yona.—Ba-Roma 11:33-36.
6, 7. (a) Ke boitlamo bofe bjo bogolo bjo Jesu a bo dirilego pele a rotogela legodimong, gomme o bo phethagatša bjang? (b) Boemo bja Jesu bja kgopolo mabapi le modiro wa boboledi bo go kgoma bjang wena ka noši?
6 Jesu o ile a ipolela e le Mobjadi wa therešo ya Mmušo. (Johane 4:35-38) O be a gaša dipeu tša ditaba tše dibotse lebakeng le lengwe le le lengwe. Le ge a be a e-hwa koteng, o ile a bolela ditaba tše dibotse mabapi le paradeise ya lefaseng ya nakong e tlago. (Luka 23:43) Go feta moo, go tshwenyega ga gagwe mo go tseneletšego ka gore ditaba tše dibotse di bolelwe ga se gwa felela lehung la gagwe a le koteng ya tlhokofatšo. Pele ga ge a ka rotogela legodimong, o ile a laela baapostola gore ba tšwele pele ba bjala dipeu tša therešo ya Mmušo le go dira barutiwa. Ka morago Jesu o ile a dira kholofetšo e makatšago. O itše: “Tsebang, ke na le lena ka mehla xo fihla bofelong bya lefase.”—Mateo 28:19, 20.
7 Jesu ka mantšu a o ile a dira boitlamo bja go thekga, go hlahla le go šireletša modiro wa go bolela ditaba tše dibotse “ka mehla xo fihla bofelong bya lefase.” Go ba go fihla mehleng ya rena, Jesu o tšwela pele a bontšha kgahlego ya motho ka noši modirong wa boebangedi. Ke Moetapele wa rena yo a hlokometšego go bjalwa ga therešo ya Mmušo. (Mateo 23:10) Ka ge e le Hlogo ya phuthego ya Bokriste, o ikarabela pele ga Jehofa bakeng sa modiro wo wa lefase ka bophara.—Ba-Efeso 1:22, 23; Ba-Kolose 1:18.
Barongwa ba Bolela Ditaba tše Dibotse
8, 9. (a) Barongwa ba bontšhitše bjang kgahlego ya kgonthe ditabeng tša batho? (b) Ke ka kgopolo efe go ka thwego re sebogelo sa barongwa?
8 Ge Jehofa a be a bopa lefase, barongwa ba ile ba ‘hlalala le go gobela.’ (Jobo 38:4-7) Ga e sa le go tloga ka nako yeo, dibopiwa tše tša legodimong di bontšhitše kgahlego e tseneletšego ditabeng tša batho. Jehofa o di dirišitše go fetišetša melaetša ya Modimo bathong. (Psalme 103:20) Se ke sa therešo kudu mabapi le go gašwa ga ditaba tše dibotse mehleng ya rena. Kutollong yeo a e neilwego, moapostola Johane o ile a bona “Morongwa e mongwê à fofa xare xa lexodimo” yo a swerego “Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle; a bolêla ka lentšu le lexolo, a re: Boifang Modimo Le rêtê Yêna, xobane nakô ya kahlolô ya xaxwe e tlile.”—Kutollo 14:6, 7.
9 Beibele e šupa barongwa e le “meôya ya xo hlankêla ba bangwê, meôya ya xo rongwa ya y’o dirêla bao ba xo tlo ja bohwa bya phološô.” (Ba-Hebere 1:14) Ge barongwa ba dutše ba dira ka phišego mediro ya bona yeo ba e abetšwego, ba hwetša le sebaka sa go re bogela gotee le go bogela modiro wa rena. Bjalo ka ge eka re lebaleng le le lego molaleng kudu, re phetha modiro wa rena ka pele ga babogedi ba legodimong. (1 Ba-Korinthe 4:9) Ke mo go phafošago gakaakang le mo go thabišago gakaakang go tseba gore ga re šome re nnoši re le babjadi ba therešo ya Mmušo!
Re Kgatha Tema ya Rena ka Phišego
10. Keletšo e šomago yeo e lego go Mmoledi 11:6 e ka dirišwa bjang modirong wa rena wa boebangedi?
10 Ke ka baka la’ng Jesu le barongwa ba bontšha kgahlego gakaakaa modirong wa rena? Jesu o neile lebaka le lengwe ge a be a re: “Ke a Le botša, ka mokxwa o byalo le Barongwa ba Modimo ba thabêla mo-dira-dibe o tee e a sokoloxaxo.” (Luka 15:10) Le rena re bontšha kgahlego e bjalo ya kgonthe bathong. Ka gona, re dira kamoo re ka kgonago ka gona go gaša dipeu tša therešo ya Mmušo gohle. Mantšu a Mmoledi 11:6 a ka dirišwa modirong wa rena. Moo Beibele e re eletša gore: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela; xoba xo tlo mela yeno xoba yela, xoba ka dipedi.” Ke therešo gore go motho yo mongwe le yo mongwe yo a amogelago molaetša wa rena go ka ba go e-na le ba makgolo goba gaešita le ba dikete bao ba o ganago. Eupša ka go swana le barongwa, re a thaba ge “mo-dira-dibe o tee” feela a amogela molaetša wa phološo.
11. Go dirišwa ga dikgatišo tšeo di theilwego Beibeleng go ka šoma bjang ka mo go atlegago?
11 Go akaretšwa mo gontši modirong wa go bolela ditaba tše dibotse. Thušo e nngwe e bohlokwa modirong wo ke dikgatišo tše di theilwego Beibeleng tšeo di dirišwago ke Dihlatse tša Jehofa. Ka ditsela tše itšego, dikgatišo tše di swana le dipeu tšeo di gašwago gohle. Ga re tsebe gore ke kae moo di tlago go atlega gona. Ka dinako tše dingwe kgatišo e ka feta matsogong a fapanego pele motho a ka e bala. Jesu le barongwa ba ka ba ba hlahla ditiragalo mabakeng a mangwe go dira gore se se direge bakeng sa gore ba dipelo tše di lokilego ba holege. Ela hloko diphihlelo tše di bontšhago kamoo Jehofa a ka tšweletšago mafelelo ao a sa letelwago le ao a kgahlišago a diriša dipuku tšeo di tlogeletšwego batho.
Mošomo wa Modimo wa Therešo
12. Makasine wa kgale o ile wa dirišwa bjang go thušeng lapa le lengwe gore le tsebe Jehofa?
12 Ka 1953, Robert, Lila le bana ba bona ba ile ba huduga toropong e kgolo ba ya ntlong ya kgale yeo e hlagetšego ya polaseng motseng wa magaeng wa Pennsylvania, U.S.A. Go se go ye kae ka morago ga go hudugela moo, Robert o ile a rera go tsenya ntlwana ya go hlapela ka tlase ga manamelo ao a ageletšwego. Ka morago ga go tloša mapokisi a mmalwa, o ile a utolla gore ka morago ga leboto magotlo a be a ipoloketše dipampiri tša mankgeretla, dikoko tšeo di se nago selo tša dithamane le ditlakala tše dingwe. Gona moo, mo gare ga tšona ka moka, go be go e-na le kopi ya makasine wa The Golden Age. Robert o ile a kgahlišwa ka mo go kgethegilego ke sehlogo seo se bolelago ka taba ya go godiša bana. O be a kgahlilwe kudu ke tlhahlo e kwalago yeo e theilwego Beibeleng yeo e bego e neilwe ka makasineng moo e lego gore o ile a botša Lila gore ba be ba tlo tsenela “bodumedi bja The Golden Age.” Lebakeng la dibeke tše sego kae feela, Dihlatse tša Jehofa di ile tša fihla ntlong ya bona, eupša Robert a di botša gore lapa le be le thabela feela “bodumedi bja The Golden Age.” Dihlatse di ile tša hlalosa gore The Golden Age bjale e be e e-na le leina le lefsa, Awake! Robert le Lila ba ile ba thoma go ithuta Beibele ka mehla le Dihlatse gomme mafelelong ba kolobetšwa. Le bona ka mo go swanago, ba ile ba bjala dipeu tša therešo baneng ba bona gomme ba buna ka boati. Lehono, ditho tša ka godimo ga tše 20 tša lapa le, go akaretša le bana ka moka ba šupa ba Robert le Lila, ke bahlanka ba kolobeditšwego ba Jehofa Modimo.
13. Ke eng seo se tutueditšego banyalani ba Puerto Rico gore ba thome go ba le kgahlego Beibeleng?
13 Nywageng e 40 e fetilego, William le Ada, banyalani ba ba tšwago Puerto Rico, ba be ba sa thabele go ithuta Beibele. Nako le nako ge Dihlatse tša Jehofa di be di kokota mojakong wa bona, banyalani ba be ba itira eka ga ba gona gae. Ka letšatši le lengwe William o ile a etela lefelo la go rekiša dilo tša kgale a ile go reka selo se itšego bakeng sa gore a lokiše ka sona ka gae. Ge a tloga, o ile a bona puku ya mmala o tagilego wo o tswakilwego ka botala-morogo le boserolwana e le mo godimo ga setšhelo se segolo sa ditlakala. E be e le puku ya Religion, yeo e gatišitšwego ke Dihlatse tša Jehofa morago kua ka 1940. William o ile a ya le puku yeo gae gomme a thabišwa ke go bala ka phapano magareng ga bodumedi bja maaka le bja therešo. Nakong e latelago ge Dihlatse tša Jehofa di be di ba etetše, William le Ada ba ile ba theetša molaetša wa tšona ka lethabo gomme ba thoma go ithuta Beibele le tšona. Ka morago ga dikgwedi ba ile ba kolobetšwa Kopanong ya Ditšhaba-tšhaba ya Thato ya Modimo ka 1958. Ga e sa le go tloga ka nako yeo, ba thušitše batho ba ka godimo ga 50 gore e be karolo ya borwarre bja rena bja Bokriste.
14. Bjalo ka ge phihlelo e bontšha, dipuku tša rena tšeo di theilwego Beibeleng di na le tshekamelo ya go ka dira’ng?
14 Karl o be a e-na le nywaga e 11 feela e bile a e-na le mahlajana. O be a ipona a tsena mathateng ka mehla. Tatagwe, moruti wa Mojeremane wa Methodist o be a mo rutile gore batho ba babe ba fišwa diheleng ka morago ga lehu. Ka gona Karl o be a boifa dihele kudu. Ka letšatši le lengwe ka 1917, Karl o ile a bona pampišana yeo e gatišitšwego setarateng gomme a e topa. Ge a dutše a e bala, mahlo a gagwe a ile a tanywa ka pela ke potšišo e rego: “Dihele ke eng?” Pampiri e be e le taletšo ya go laleletša polelong ya phatlalatša yeo e bolelago ka dihele, yeo e bego e thekgwa ke Barutwana ba Beibele, bao lehono ba tsebjago e le Dihlatse tša Jehofa. Mo e ka bago lebaka la ngwaga ka morago, ka morago ga mananeo a mmalwa a thuto ya Beibele, Karl o ile a kolobetšwa gomme ka go dira bjalo a ba yo mongwe wa Barutwana ba Beibele. Ka 1925 o ile a laleletšwa go yo šoma ntlong-kgolo ya lefase ya Dihlatse tša Jehofa—moo a sa dutšego a hlankela gona. Modiro wa bophelo ka moka wa Bokriste wo o fetilego nywaga-some e seswai o thomile ka pampišana setarateng.
15. Ke eng seo Jehofa a kgonago go se dira ge a bona go swanetše?
15 Ke therešo gore ke selo se se lego ka godimo ga bokgoni bja motho go ka lemoga ge e ba barongwa ba ile ba akaretšwa ka go lebanya diphihlelong tše gotee le go lemoga bogolo bja tekanyo ya go akaretšwa ga bona. Lega go le bjalo, le ka mohla ga se ra swanela go belaela gore Jesu le barongwa ba bapala karolo e mafolofolo modirong wa boboledi le gore Jehofa a ka hlahla ditaba ge a bona go swanetše. Diphihlelo tše le tše dingwe tše dintši tše di swanago le tšona di bontšha tshekamelo ya go loka yeo dipuku tša rena di ka bago le yona ka morago ga ge di tlogile matsogong a rena.
Re Neilwe Lehumo
16. Ke eng seo re ka ithutago sona mantšung a 2 Ba-Korinthe 4:7?
16 Moapostola Paulo o boletše ka ‘lehumo le le swerwego ka dibjana tša letsopa.’ Lehumo leo ke thomo yeo e neilwego ke Modimo ya go dira boboledi, gomme dibjana tša letsopa ke batho bao Jehofa a ba neilego lehumo le. Ka ge batho bao ba sa phethagala e bile ba e-na le mafokodi, Paulo o tšwela pele go bolela gore mafelelo a go newa ga bona taelo e bjalo ke gore “matla a maxolo e bê a Modimo, e sexo a rena.” (2 Ba-Korinthe 4:7) Ee, re ka ithekga ka Jehofa gore a re nee matla ao a nyakegago go re dira gore re kgone go phetha modiro wo re nago le wona.
17. Ke eng seo re tlago go gahlana le sona ge re dutše re bjala dipeu tša therešo ya Mmušo, gomme ke ka baka la’ng lega go le bjalo re swanetše go kgomarela boemo bjo bo nepagetšego bja kgopolo?
17 Gantši re swanelwa ke go dira boikgafo. Go ka ba thata goba gwa se kgonege go šoma mašemong a mangwe. Go na le mafelo a mangwe ao go wona batho ba bantši ba bonalago ba sa thabele ka mo go feteletšego, e bile ba e-na le lehloyo. Go ka dirwa boiteko bjo bogolo mafelong ao go sa bonagalego go e-na le katlego. Eupša boiteko bjo re bo dirago ke bja bohlokwa kudu nakong ya ge mo gontši gakaakaa go le kotsing. Gopola gore dipeu tšeo o di bjalago di ka nea batho lethabo gona bjale gotee le bophelo bjo bo sa felego nakong e tlago. Mantšu a Psalme 126:6 a ipontšhitše e le a therešo gantši ge a re: “Xo ya ba ya bà lla, ba swere peu bà byala; xo boa ba tlo boa ka mekxolokwane, bà rwele dingata tša bôná.”
18. Re ka lebiša bjang tlhokomelo ka mehla bodireding bja rena, gomme ke ka baka la’ng re swanetše go dira bjalo?
18 Anke re dirišeng sebaka se sengwe le se sengwe se se swanetšego bakeng sa go bjala dipeu tša therešo ya Mmušo ka boati. Eka le ka mohla re se ke ra lebala gore, le ge e le rena re bjalago peu le go e nošetša, Jehofa ke yena a e medišago. (1 Ba-Korinthe 3:6, 7) Le gona, go fo etša ge Jesu le barongwa ba phetha karolo ya bona modirong, Jehofa o letetše gore re phethe bodiredi bja rena ka botlalo. (2 Timotheo 4:5) Eka re ka lebiša tlhokomelo ka mehla modirong wa rena wa go ruta, boemong bja rena bja kgopolo le phišegong ya rena bodireding. Ka baka la’ng? Paulo o a araba: “Xe O dira byalo O tlo iphološa, wa phološa le bao ba Xo kwaxo.”—1 Timotheo 4:16.
Re Ithutile’ng?
• Modiro wa rena wa go bjala o tšweletša mafelelo a mabotse ka ditsela dife?
• Jesu Kriste le barongwa ba akaretšwa bjang modirong wa boebangedi lehono?
• Ke ka baka la’ng re swanetše go ba le seatla se se bulegilego re le babjadi ba therešo ya Mmušo?
• Ge re kopana le go se thabele goba lehloyo bodireding bja rena, ke eng seo se swanetšego go re tutueletša go kgotlelela?
[Dipotšišo tša Thuto]
[Seswantšho go letlakala 15]
Ka go swana le balemi Isiraeleng ya bogologolo, Bakriste lehono ba gaša dipeu tša therešo ya Mmušo ka boati
[Seswantšho go letlakala 16]
Dihlatse tša Jehofa di tšweletša le go aba dikgatišo tša mehuta-huta tšeo di theilwego Beibeleng ka maleme a 340