Na o ka Hwetša Khutšo ya ka Gare?

Morago kua ka 1854, mongwadi wa mo-Amerika Henry Thoreau o ngwadile gore: “Bontši bja batho bo phela maphelo a tlalelo ka setu.”

Go ya ka bohlatse bjo bo lego gona go bonagala mehleng ya gagwe batho ba bantši ba se ba ka ba thabela khutšo ya ka gare. Lega go le bjalo, seo se diregile nywageng e ka bago 150 e fetilego. Na dilo ke tšeo di fapanego lehono? Goba na mantšu a Thoreau a sa dutše a šoma? Go thwe’ng ka wena ka noši? Na o kgotsofetše, o khutšong? Goba na ga se wa šireletšega, ga o kgonthišege mabapi le bokamoso gomme ‘o tlaletšwe ka setu,’ ge mantšu a Thoreau a bewa ka tsela e nngwe?

KA MANYAMI, go na le dilo tše dintši lefaseng tšeo di amogago batho khutšo ya ka gare. Anke re boleleng tše sego kae feela: Dinageng tše dintši go hlokega ga mešomo le mogolo wa tlase di tliša bodiidi gomme tša bo tlaleletša ka tlalelo ya tša boiphedišo. Dinageng tše dingwe ba bantši ba diriša matla a bona ka thata ba kitimiša lehumo le dilo tše di bonagalago. Lega go le bjalo, gantši mokgwa wa bophelo wo o nago le moya wa phadišano o tliša pelaelo e sego khutšo. Bolwetši, ntwa, bosenyi, go hloka toka le kgatelelo le tšona di amoga batho khutšo.

Ba Ile ba Tsoma Khutšo ya ka Gare

Ba bantši ga ba nyake go tšea kgang le lefase go ya ka tsela yeo le lego ka yona. Antônio * e be e le moetapele wa bašomi feketoring e kgolo kua São Paulo, Brazil. A holofetše gore o tla kaonefatša maemo a bophelo, o ile a tšea karolo dingongoregong le megwantong ya boipelaetšo, eupša se ga se sa ka sa mo tlišetša khutšo ya monagano.

Ba bangwe ba holofela gore lenyalo le tla tliša tekanyo ya khutšo ya ka gare bophelong bja bona, eupša ba ka nyamišwa. Marcos e be e le rakgwebo yo a atlegilego. O ile a tsenela dipolitiki gomme a ba ramotse wa motse wa diintaseteri. Lega go le bjalo, bophelo bja gagwe bja ka gae e be e le masetla-pelo. Ge bana ba gagwe ba tlogile gae, yena le mosadi wa gagwe ba ile ba arogana ka baka la go se kwane mo go sa lokišegego.

Gerson e lego ngwana wa setarateng kua Salvador, Brazil o be a nyaka go lekela hlogong. O ile a ralala go tloga motseng o mongwe go ya go o mongwe, a sepela le  baotledi ba dilori. Go se go ye kae ke ge a šetše a lemaletše dihlare-tagi, a hlakola batho bakeng sa gore a kgone go lefelela mokgwa wa gagwe o mobe. O ile a swarwa ke maphodisa makga a mmalwa. Lega go le bjalo, go sa šetšwe semelo sa gagwe sa go ba bogale le go ba šoro, Gerson o be a hlologetšwe khutšo ya ka gare. Na o be a ka e hwetša?

Ge Vania e be e sa le yo monyenyane, mmagwe o ile a hwa gomme Vania a rwala boikarabelo bja ka gae go akaretša le go hlokomela moratho wa gagwe yo a babjago. Vania o be a tsena kereke eupša a ikwa a lahlilwe ke Modimo. O be a se na khutšo ya monagano le gatee.

Gape go be go e-na le Marcelo. Sohle seo Marcelo a bego a se nyaka e be e le lethabo. O be a rata go dira meletlo ya maipshino le bafsa ba bangwe​—ba tantsha, ba e-nwa le go diriša dihlare-tagi gampe. Ka nako e nngwe ba ile ba lwa gomme a gobatša mofsa yo mongwe. Ka morago ga moo, o ile a swabišwa kudu ke seo a se dirilego gomme a rapelela thušo go Modimo. Le yena ka mo go swanago o be a nyaka khutšo ya monagano.

Diphihlelo tše di bontšha maemo a mangwe ao a ka fedišago khutšo ya monagano. Na go be go e-na le tsela le ge e le efe yeo ka yona moetapele wa bašomi, radipolitiki, ngwana wa setarateng, morwedi yo a šomago go fetiša tekanyo le morati wa meletlo ya maipshino ba bego ba ka hwetša khutšo ya ka gare yeo ba bego ba e tsoma? Na seo se ba diragaletšego se re ruta selo se itšego? Karabo ya dipotšišo ka bobedi ke ee, bjalo ka ge re tla bona sehlogong se se latelago.

[Mengwalo ya ka tlase]

[Seswantšho go letlakala 3]

Na o hlologetše khutšo ya ka gare?