Re Mohuta O Nago Le Tumelo

Go Tsebatša Ditaba tše Dibotse Mašemong a Reise a Taiwan

TAIWAN gantši e ba le pula e ntši kudu, yeo e e kgontšhago go buna dipuno tše pedi tše dibotse tša reise ngwaga o mongwe le o mongwe. Lega go le bjalo, ka dinako tše dingwe dipula ga di ne ka nako ya ge di swanetše go na, gomme dimelana di a hwa. Ge se se direga, na molemi o lahlela toulo? Aowa. O a tseba gore kgotlelelo e a nyakega. O godiša dimelana tše difsa gomme a bjala mašemo gape. Ka gona, ge e ba maemo a kaonefala, molemi o buna puno e botse. Go bjala ga moya gotee le go buna ka dinako tše dingwe go swana le se kudu.

Go Phegelela Punong ya Moya

Go theoša le nywaga Dihlatse tša Jehofa kua Taiwan di ile tša šoma ka thata go bjala le go buna dipeu tša therešo ya Mangwalo ditikologong tše dingwe tšeo di bego di bonagala di se na tšweletšo. Mohlala o mongwe ke Selete sa Miao-li. Go be go ile gwa ba le karabelo e nyenyane maitekong a sewelo a go nea bohlatse tikologong yeo. Ka gona, ka 1973 banyalani ba babulamadibogo ba kgethegilego ba ile ba abelwa go yo šoma moo e le bagoeledi ba Mmušo ba nako e tletšego. Mathomong, ba bangwe ba ile ba bontšha kgahlego ditabeng tše dibotse. Lega go le bjalo, go se go ye kae kgahlego yeo e ile ya pona. Ke moka babulamadibogo ba kgethegilego ba ile ba romelwa tikologong e nngwe.

Ka 1991 babulamadibogo ba bangwe ba babedi ba kgethegilego ba ile ba romelwa moo. Eupša gape ditiragalo di ile tša bontšha gore boemo bo be bo se bja swanela bakeng sa kgolo ya moya. Ka morago ga nywaga e mmalwa, babulamadibogo ba kgethegilego ba ile ba romelwa gape mašemong ao go bego go holofetšwe gore e tla ba ao a tla bago le tšweletšo kudu. Ka gona, naga e ile ya lala ka nakwana.

Maiteko a Mpshafaditšwego a Buna Katlego

Ka September 1998 go ile gwa dirwa phetho ya gore go dirwe boiteko bja go tsoma mafelo a nago le tšweletšo kudu tšhemong e kgolo e sa abjago ya Taiwan. Se se be se tla phethwa bjang? Ka go abela babulamadibogo ba kgethegilego ba 40 ba nakwana go šoma mašemong ao a sa abjago ao a nago le baagi ba bantši kudu.

Metse e mebedi e bataganego kua Seleteng sa Miao-li e be e le gare ga mašemo ao a bego a kgethilwe bakeng sa lesolo. Dikgaetšedi tše nne tšeo di sa nyalwago di ile tša swanelwa ke go šoma moo ka dikgwedi tše tharo bakeng sa go hlahloba tšhemo. Kapejana ka morago ga go goroga ga bona, ba ile ba ngwala dipego tše di kgahlišago mabapi le palo ya batho ba thabelago bao ba bego ba ba hwetša moo. Ka nako ya ge ba fetša dikgwedi tša bona tše tharo ba bula madibogo tikologong, ba be ba swara dithuto tše dintši tša legae tša Beibele. Ba ile ba ba ba hloma sehlopha sa thuto ya puku ya phuthego ka thušo ya mogolo wa phuthego e lego kgaufsi.

Ba bararo ba dikgaetšedi tše ba ile ba hlalosa ka mo go kwagalago gore ba tla rata go tšwela pele bakeng sa go hlokomela “dimelana” tšeo di bego di gola gabotse kudu. Mafelelong, ba babedi ba bona ba ile ba kgethelwa go ba babulamadibogo ba kgethegilego ba ka mehla, gomme wa boraro o ile a tšwela pele go šoma moo e le mmulamadibogo wa ka mehla. Mogolo yo a tšwago phuthegong ya kgaufsi o ile a hudugela tikologong yeo bakeng sa go yo ba thuša. Ba ka godimo ga 60 ba ile ba ba gona polelong ya phatlalatša ya mathomo yeo e ilego ya newa tikologong yeo. Ga bjale phuthego e lego kgaufsi e thuša sehlopha se se sefsa go swara diboka tša Sontaga ka mehla go tlaleletša dihlopheng tše mmalwa tša thuto ya puku. Kgaufsinyane go ka no hlongwa phuthego e mpsha tikologong yeo.

Go Phegelela go Tliša Ditšhegofatšo Dikarolong tše Dingwe tša Taiwan

Mafelo a mangwe a ile a arabela ka tsela e swanago. Kua Seleteng sa I-lan ka karolong ya ka leboa-bohlabela  ya sehlakahlaka, go ile gwa hlongwa Thuto e mpsha ya Puku ya Phuthego tikologong yeo babulamadibogo ba kgethegilego ba nakwana ba ilego ba šoma gona.

Ge ba be ba le gare ba e-ya ka ntlo le ntlo mantšiboeng a mangwe, mmulamadibogo yo a kgethegilego wa nakwana o ile a gahlana le lesogana leo a ilego a le bontšha pampišana e nago le lelokelelo la diboka tša phuthego. Gatee-tee le ile la botšiša gore: “Na nka ba gona dibokeng gosasa mantšiboa? Ge e ba go le bjalo, ke swanetše go apara’ng?” Mmulamadibogo yo o ile a ikhwetša a swara dithuto tša Beibele tše seswai le batho ba thabelago bekeng e nngwe le e nngwe. Barutwana ba Beibele ba mmalwa go se go ye kae ke ge ba dira dithulaganyo tša go ba bagoeledi ba ditaba tše dibotse ka bobona, ba e-na le pakane ya go kolobetšwa.

Motho yo mongwe toropong yona ye o be a dutše a tsena kereke ka nywaga e mentši eupša ga se a ka a hwetša motho yo a ka mo rutago Beibele. Ge a be a e-kwa ka thulaganyo ya thuto ya Beibele, o ile a diriša sebaka seo. O ile a kgothaletšwa gore a lokišeletše e sa le pele thuto yeo a tlago go ithuta yona. Ge mmulamadibogo yo a kgethegilego wa nakwana a e-tla go tlo swara thuto, o ile a hwetša gore mosadi o dirile “mošomo wa gae” wa gagwe ka go reka puku yeo ka go yona a ilego a ngwala dipotšišo tšeo di gatišitšwego tabeng yeo e bego e ithutwa. Ka gona o be a ngwadile dikarabo tša gagwe bakeng sa potšišo e nngwe le e nngwe. O be a bile a ngwalolotše ka pukung ya gagwe ya dintlha le mangwalo ka moka a bontšhitšwego thutong ya gagwe. Ka nako ya ge kgaetšedi a be a fihla bakeng sa go swara thuto ya pele, mosadi o be a šetše a lokišeleditše dithuto tše tharo tša mathomo!

Mafelelo a swanago a ile a bonwa toropong ya Dongshih e lego bogareng bja Taiwan. Babulamadibogo ba kgethegilego ba nakwana ba ile ba sepediša diporoutšha tša ka godimo ga 2 000 ka dikgwedi tše tharo tšeo ba šomilego ka tšona moo. Ka kgwedi ya boraro, ba be ba swara dithuto tša magae tša Beibele tše 16. Toropo e be e sentšwe kudu ke tšhišinyego ya lefase yeo e ilego ya hlasela bogareng bja Taiwan ka September 21, 1999, eupša ba bangwe bao ba thabelago ba tšwela pele ba dira tšwelopele ya moya, gaešita le ge ba swanela go sepela lebaka la iri bakeng sa gore ba be gona dibokeng Holong ya Mmušo e lego kgaufsi. Ee, go phegelela go a nyakega bakeng sa go buna puno e botse, go sa šetšwe gore ke ya ditšweletšwa tša dilo tše di bonagalago goba tša mohuta wa tša moya.

[Mmapa go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

CHINA

Taiwan Strait

TAIWAN

[Mothopo]

Mountain High Maps® Copyright © 1997 Digital Wisdom, Inc.