Kamoo Bophelo bja Gago bo ka Bago le Morero o Oketšegilego Kudu

SEEMA sa bogologolo se re: “O se kê wa itapišetša lehumô; lesa xo hlalefêla lôna. E tlo re xe O sa le tsepeletše, la široxa; la phorolla diphêxô bo-ka lenong, la hlatloxêla sebakeng.” (Diema 23:4, 5) Ka mantšu a mangwe, ga se ga bohlale go itapiša ka baka la go nyaka go huma, ka gobane lehumo le ka fofa bjalo ka ge eka le diphegong tša lenong.

Bjalo ka ge Beibele e bontšha, mahumo a dilo tše di bonagalago a ka nyamelela kapejana. A ka fela ka bošego bjo tee ka baka la kotsi ya tlhago, go theoga ga tša boiphedišo goba maemo a mangwe a sa letelwago. Go feta moo, gaešita le bao ba bago le katlego ya dilo tše di bonagalago gantši ba nyema moko. Ela hloko taba ya John, yoo mošomo wa gagwe o bego o akaretša go thabiša bo-radipolitiki, bahlomphegi ba dipapadi le dikgoši.

John o re: “Ke ile ka ineela mošomong wa-ka. Ke ile ka ba le katlego ya tša ditšhelete, ke dula dihoteleng tša matsaka gomme ka dinako tše dingwe ke bile ke e-ya mošomong ka sefofane seo e sego sa batho bohle. Mathomong ke be ke go thabela, eupša ganyenyane-ganyenyane ke ile ka thoma go lewa ke bodutu. Batho bao ke bego ke katanela go ba thabiša ba ile ba bonagala ba tšeega feela. Bophelo bja-ka bo be bo se na morero.”

Bjalo ka ge John a ile a lemoga, bophelo bjo bo se nago mahumo a dilo tša moya ga bo kgotsofatše. Thutong ya gagwe e tumilego ya Thabeng, Jesu Kriste o ile a bontšha kamoo lethabo le le swarelelago le ka hwetšwago ka gona. O itše: “Ba lehlôxônôlô ké ba ba humanexilexo mo moyeng [ba ba lemogago dinyakwa tša bona tša moya, NW], xobane bôná-bao mmušô wa maxodimo ké wa bôná.” (Mateo 5:3) Ka gona, ka mo go kwagalago ke ga bohlale go bea dilo tša moya pele bophelong. Lega go le bjalo, dintlha tše dingwe le tšona di ka thuša go nea bophelo morero o oketšegilego kudu.

Lapa la Gago Gotee le Bagwera ke ba Bohlokwa e le ka Kgonthe

Na o be o ka thabela bophelo ge e ba o se na kgokagano le lapa la gago e bile o se na bagwera ba kgaufsi? Go molaleng gore o be o ka se ke wa dira bjalo. Mmopi wa rena o re dirile re e-na  le senyakwa sa go rata le go ratwa. Le ke lebaka le lengwe leo ka lona Jesu a ilego a gatelela bohlokwa bja gore ‘re rate ba gabo rena bjalo ka ge re ithata.’ (Mateo 22:39) Lapa ke mpho e tšwago go Modimo yeo e neago tikologo e botse bakeng sa go bontšha lerato leo le se nago boithati.​—Ba-Efeso 3:14, 15.

Malapa a rena a ka dira bjang gore maphelo a rena a be le morero o oketšegilego kudu? Ee, lapa leo le kopanego le ka bapišwa le serapana se sebotse seo se neago botšhabelo bjo bo lapološago kgateletšong ya bophelo bja letšatši le letšatši. Ka mo go swanago, ka lapeng re ka hwetša bogwera bjo bo lapološago le borutho bjo bo fedišago maikwelo a bodutu. Go ba gona, lapa ga le fo nea botšhabelo bjo bjalo ka go itiragalela feela. Lega go le bjalo, ge re tiiša ditlemo tša lapa, re batamelana kgaufsi gomme bophelo e ba bjo bo humilego. Ka mohlala, nako le tlhokomelo tšeo re di neago bakeng sa go bontšha lerato le tlhompho go balekane ba rena ba lenyalo ke dipeeletšo tšeo di dirwago letšatši le letšatši tšeo di ka feleletšago ka meputso e humilego.​—Ba-Efeso 5:33.

Ge e ba re e-na le bana, re swanetše go katanela go lokišeletša tikologo e botse yeo re tla ba godišetšago go yona. Go fetša nako le bona, go boloka poledišano e le yeo e bulegilego gotee le go ba nea thuto ya moya e ka ba mo go nyakago go gontši kudu. Eupša nako e bjalo gotee le maiteko di ka re tlišetša kgotsofalo e kgolo. Batswadi bao ba atlegago ba lebelela bana e le tšhegofatšo, e le bohwa bjo bo tšwago go Modimo bjoo bo swanetšego go hlokomelwa gabotse.​—Psalme 127:3.

Bagwera ba babotse le bona ba tlaleletša bophelong bjo bo nago le morero le bjo bo kgotsofatšago. (Diema 27:9) Re ka ba le bagwera ba bantši ka go bontšha kwelobohloko. (1 Petro 3:8) Bagwera ba kgonthe ba thuša ka go re tsoša ge re kgopša. (Mmoledi 4:9, 10) Gomme “moxwêra . . . ké ngwan’ešo e a ntswáletšwexo wa mohla wa tlalêlô.”​—Diema 17:17.

Bogwera bja kgonthe e ka ba bjo bo kgotsofatšago gakaakang! Go sobela ga letšatši ke mo go kgahlišago kudu, dijo ke tšeo di nago le tatso kudu le mmino ke woo o thabišago kudu ge di abelanwa le mogwera. Ee, lapa leo le batamelanego le bagwera bao ba ka botwago ke feela mahlakore a mabedi a bophelo bjo bo nago le morero. Ke ditokišetšo dife tše dingwe tšeo Modimo a di dirilego tšeo di ka neago maphelo a rena morero o oketšegilego kudu?

Go Kgotsofatša Senyakwa sa Rena sa Moya

Bjalo ka ge go bontšhitšwe pejana, Jesu Kriste o ile a tswalanya lethabo le go lemogwa ga senyakwa sa rena sa moya. Re bopilwe re e-na le bobedi bokgoni bja moya le bja boitshwaro. Lega go le bjalo, Beibele e bolela ka “motho wa Môya” le “motho wa xo ikuta wa pelong.”​—1 Ba-Korinthe 2:15; 1 Petro 3:3, 4. 

Go ya ka An Expository Dictionary of New Testament Words ka W. E. Vine, pelo ya seswantšhetšo e emela “go šoma ka mo go feletšego ga motho monaganong le boitshwarong, ka dika tša monagano gotee le tša maikwelo.” Ka tsela ya go hlalosa, Vine o oketša ka gore: “Ka mantšu a mangwe, pelo e dirišwa ka mokgwa wa seswantšhetšo bakeng sa mothopo o utegilego wa bophelo bja motho ka noši.” Puku e swanago e bile e bontšha gore “pelo, ka ge e le ka gare-gare e na le ‘motho yo a utegilego,‘ . . . motho wa kgonthe.”

Re ka kgotsofatša bjang dinyakwa tša “motho wa Môya” goba tša “motho wa xo ikuta,” yoo e lego “motho wa xo ikuta wa pelong”? Re gata mogato o bohlokwa ka go dira se le go kgotsofatša senyakwa sa rena sa moya ge re lemoga ntlha yeo e dirilwego ke mopsalme yo a buduletšwego yo a opetšego ka gore: “Tsebang gobane Jehofa ke Modimo; ke Yena a re dirilego, ga ra itira, re setšhaba sa gagwe, re dinku tša mafulo a gagwe.” (Psalme 100:3, PK) Go lemogwa ga se ka mo go kwagalago go re lebiša tabeng ya gore re phethe ka gore re a ikarabela go Modimo. Ge e ba re nyaka go akaretšwa gare ga ‘setšhaba sa gagwe le dinku tša mafulo a gagwe,’ re swanetše go dira ka go dumelelana le Lentšu la gagwe, Beibele.

Na seo ke selo se sebe? Aowa, ka gobane go lemoga gore boitshwaro bja rena bo na le taba go Modimo go oketša morero maphelong a rena. Go re kgothaletša gore re be batho ba kaone​—ruri ke pakane e nago le mohola. Psalme 112:1 e re: “Monna wa lehlôxônôlô ké e a boifaxo Morêna, a kxahlwa xaxolo ke ’tayô tša xaxwe.” Poifo ya borapedi ya go boifa Modimo le go kwa mo go tšwago pelong ga melao ya gagwe go ka nea maphelo a rena morero o oketšegilego kudu.

Ke ka baka la’ng go kwa Modimo go re kgotsofatša? Ka gobane re na le letswalo, mpho yeo Modimo a e filego batho ka moka. Letswalo ke mohlahlobi wa boitshwaro yo a ngwadišago go amogelega goba go se amogelege ga seo re se dirilego goba seo re sa naganago go se dira. Ka moka ga rena re ile  ra ba tlalelong ya letswalo le molato. (Ba-Roma 2:15) Fela, matswalo a rena a ka ba a re putsa. Ge e ba re direla Modimo le magagabo rena dilo ka tsela ya go hloka boithati, re ikwa re kgotšwe e bile re kgotsofetše. Re hwetša gore “lešexo la monei le phala la monewa.” (Ditiro 20:35) Go na le lebaka le bohlokwa bakeng sa se.

Mmopi wa rena o re dirile ka mokgwa woo e lego gore dikganyogo le dinyakwa tša magagabo rena di a re kgoma. Go thuša ba bangwe go tšweletša lethabo ka dipelong tša rena. Go oketša moo, Beibele e re kgonthišetša gore ge re nea motho yo mongwe yo a hlokago, Modimo o lebelela se e le kgaugelo e diretšwego yena.​—Diema 19:17.

Ka ntle le go nea kgotsofalo ya ka gare, na go lebiša tlhokomelo dinyakweng tša rena tša moya go ka re thuša ka tsela ya kgonthe? Ee, rakgwebo wa Bohlabela bja Magareng yo a bitšwago Raymond o dumela gore go ka ba bjalo. O re: “Pakane ya-ka ya kgonthe e be e le go dira tšhelete. Eupša go tloga ka nako yeo ke ilego ka dumela pelong ya-ka gore go na le Modimo le gore Beibele e bontšha dilo tšeo a di ratago, ke ile ka fetoga motho yo a fapanego. Ga bjale go hwetša sa go iphediša go tšea maemo a bobedi bophelong bja-ka. Ka go leka go thabiša Modimo, ke šireleditšwe maikwelong a senyago a lehloyo. Gaešita le ge tate a ile a hwa nakong ya thulano, ga ke rate go itefeletša go bao ba ikarabelago.”

Bjalo ka ge Raymond a ile a lemoga, go hlokomela dinyakwa tša “motho wa moya” gabotse go ka alafa dintho tše di tseneletšego tša maikwelo. Lega go le bjalo, bophelo e ka se be bjo bo kgotsofatšago ka mo go feletšego ka ntle le gore re lebeletšane le mathata ao a tlišwago ke letšatši le lengwe le le lengwe.

Re ka ba le “Khutšô ya Modimo”

Lefaseng le la leema-ema, ke matšatši a mmalwa ao a fetago dilo di sepela gabotse. Go ba le dikotsi, dithulaganyo ga di sepele gabotse e bile batho ba a re nyamiša. Ditšhitišo tše di ka re amoga lethabo. Lega go le bjalo, bao ba hlankelago Jehofa Modimo, Beibele e ba holofetša kgotsofalo ya ka gare​—“khutšô ya Modimo.” Re hwetša bjang khutšo ye?

Moapostola Paulo o ngwadile gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Go e na le go leka go rwala mathata a rena re nnoši, re swanetše go rapela ka go tšwa pelong, re lahlele merwalo ya rena ya letšatši le letšatši go Modimo. (Psalme 55:22) Go ba le tumelo ya go dumela gore o arabela kgopelong e bjalo ka Morwa wa gagwe, Jesu Kriste, go tla tšwela pele ge re dutše re gola moyeng le go lemoga kamoo Modimo a re thušago ka gona.​—Johane 14:6, 14; 2 Ba-Thesalonika 1:3.

Ka morago ga ge re agile kholofelo ya rena go Jehofa Modimo, “Mokwi wa dithapêlô,” re kgona go lebeletšana gakaone le diteko tše bjalo ka bolwetši bja lebaka le letelele, botšofadi goba go hwelwa. (Psalme 65:2) Lega go le bjalo, bakeng sa go ba le bophelo bjo bo nago le morero e le ka kgonthe re swanetše go nagana le ka bokamoso.

Thabela Kholofelo e Lego ka Pele

Beibele e holofetša “maxodimo a mafsa le lefase le lefsa,” mmušo wa legodimong wa go loka le woo o hlokomelago wo o bušago godimo ga lapa la batho bao ba kwago. (2 Petro 3:13) Lefaseng leo le lefsa leo le holofeditšwego ke Modimo, ntwa le go hloka toka di tla tšeelwa sebaka ke khutšo le toka. Se ga se feela kganyogo e fetago ka lebelo, eupša ke  kgodišego yeo e ka matlafalago letšatši le lengwe le le lengwe. Ke ditaba tše dibotse e le ka kgonthe e bile e tloga e le lebaka bakeng sa go thaba.​—Ba-Roma 12:12; Tito 1:2.

John yo go boletšwego ka yena mathomong, ga bjale o ikwa gore bophelo bja gagwe bo na le morero o oketšegilego kudu. O re: “Gaešita le ge ke be ke se motho wa bodumedi kudu, ke be ke dumela go Modimo ka mehla. Eupša ga se ka ka ka dira selo ka tumelo ye go fihlela ge Dihlatse tša Jehofa tše pedi di nketela. Ke ile ka ba tšhollela dipotšišo tše bjalo ka, ‘Re dira’ng mo? Re lebile kae?’ Dikarabo tša bona tše kgotsofatšago tša Mangwalo di ile tša nnea kgopolo ya morero ka lekga la pele bophelong bja-ka. Seo e be e fo ba mathomo-mayo. Ke ile ka swarwa ke lenyora la go nyorelwa therešo yeo e ilego ya ntira gore ke fetoše dilo tša-ka ka moka tše bohlokwa bophelong. Gaešita le ge ke sa hlwe ke le mohumi ka dilo tše di bonagalago, ke ikwa bjalo ka ra-dimilione moyeng.”

Ka go swana le John, mohlomongwe o ile wa robatša bokgoni bja gago bja moya ka nywaga e mentši. Lega go le bjalo, ka go ba le “pelo [e] bohlale” o ka bo tsoša. (Psalme 90:12) Ka boikemišetšo le go dira boiteko, o ka ba le lethabo la kgonthe, khutšo le kholofelo. (Ba-Roma 15:13) Ee, e bile bophelo bja gago bo ka ba le morero o oketšegilego kudu.

[Seswantšho go letlakala 6]

Thapelo e ka re tlišetša “khutšô ya Modimo”

[Diswantšho go letlakala 7]

Na o tseba seo se ka dirago gore bophelo bja lapa e be bjoo bo kgotsofatšago kudu?